၁၂.၁.၂။ ကမၠိခမဳဂမၠိုၚ်ပန်သာ်
ယွံခမဳတအ် တုပ်သၟဟ်ညံၚ်ရဴသာ်ဂှ်ဟေၚ် ကမၠိကၠိခ္ဍက်ဂမၠိုၚ် သမဏဗြာဟ္မဏဂမၠိုၚ်ဂှ် ဣဝွံပန်ဂကူအိုတ်ရ၊ သမဏဗြာဟ္မဏဂမၠီုၚ် ဟိုတ်မကၠိခ္ဍက်တဴ နကဵုကမၠိကၠိခ္ဍက်ဂမၠိုၚ်ဂှ် ဟွံဂဵုလဟဵုအိုတ်ရ၊ သမဏဗြာဟ္မဏဂမၠိုၚ် ဟိုတ်မကၠိခ္ဍက်တဴ နကဵုကမၠိကၠိခ္ဍက်ဂမၠိုၚ်ဂှ် ဟွံဂဵုလဟဵုအိုတ်ရ၊ ဟွံယးတၟးအိုတ်ရ၊ ဟွံရာၚ်ဆာဲအိုတ်ရ။ ညးမ္ဂးပန်ဂကူအိုတ်ဂှ်ရောမ္ဂးတုန်—
ယွံခမဳတအ် သမဏဗြာဟ္မဏဂမၠိုၚ်လ္ၚဵု သုၚ်ဍာ်သိအိုတ်ရ၊ သုၚ်အရက်မေရယ်အိုတ်ရ၊ မဟွံဝေၚ်ပါဲကၠေံ နူပွမသုၚ်စသိအရက်အိုတ်ရ။ ယွံခမဳတအ် ဣဝွံဂှ် ကမၠိကၠိခ္ဍက် သမဏဗြာဟ္မဏဂမၠိုၚ် မဒှ်ကိုပ်ကၠာရ၊ ဟိုတ်မကၠိခ္ဍက်တဴ နကဵုကမၠိကၠိခ္ဍက်ဂှ် သမဏဗြာဟ္မဏဂမၠိုၚ်လ္ၚဵု ဟွံဂဵုလဟဵုအိုတ်ရ၊ ဟွံယးတၟးအိုတ်ရ၊ ဟွံရာၚ်ဆာဲအိုတ်ရ။
ယွံခမဳတအ် မွဲဂကူပၠန်တုန် သမဏဗြာဟ္မဏဂမၠိုၚ်လ္ၚဵု သွိုန်ဗပိုန်သိပ်ဂၠိပ်ဒ္ဂေတ်မေထုန်အိုတ်ရ၊ ဟွံဝေၚ်ပါဲကၠေံ နူပွမသွိုန်ဗပိုန်သိပ်ဂၠိပ်ဒ္ဂေတ်မေထုန်အိုတ်ရ။ ယွံခမဳတအ် ဣဝွံဂှ် ကမၠိကၠိခ္ဍက် သမဏဗြာဟ္မဏဂမၠိုၚ် မရနုက်ကဵုၜါရ၊ သမဏဗြာဟ္မဏဂမၠိုၚ်လ္ၚဵု ဟိုတ်မကၠိခ္ဍက်တဴ နကဵုကမၠိကၠိခ္ဍက်ဂှ် ဟွံဂဵုလဟဵုအိုတ်ရ၊ ဟွံယးတၟးအိုတ်ရ၊ ဟွံရာၚ်ဆာဲအိုတ်ရ။
ယွံခမဳတအ် မွဲဂကူပၠန်တုန် သမဏဗြာဟ္မဏဂမၠိုၚ်လ္ၚဵု သာယျေန်ထဝ်သြန်အိုတ်ရ၊ ဟွံဝေၚ်ပါဲကၠေံ နူပွမဒုၚ်ဂိုၚ်ကေတ်ထဝ်သြန်အိုတ်ရ။ ယွံခမဳတအ် ဣဝွံဂှ် ကမၠိကၠိခ္ဍက်သာမဏဗြာဟ္မဏဂမၠိုၚ် မရနုက်ကဵုပိရ၊ သမဏဗြာဟ္မဏဂမၠိုၚ်လ္ၚဵု ဟိုတ်မကၠိခ္ဍက်တဴ နကဵုကမၠိကၠိခ္ဍက်ဂှ် ဟွံဂဵုလဟဵုအိုတ်ရ၊ ဟွံယးတၟးအိုတ်ရ၊ ဟွံရာၚ်ဆာဲအိုတ်ရ။
ယွံခမဳတအ် မွဲဂကူပၠန်တုန် သမဏဗြာဟ္မဏဂမၠိုၚ်လ္ၚဵု ဂယိုၚ်လမျီုမှာရာအိုတ်ရ၊ ဟွံဝေၚ်ပါဲကၠေံ နူပွမဂယိုၚ်လမျီုမှာရာအိုတ်ရ။ ယွံခမဳတအ် ဣဝွံဂှ် ကမၠိကၠိခ္ဍက် သမဏဗြာဟ္မဏဂမၠိုၚ် မရနုက်ကဵုပန်ရ၊ သမဏဗြာဟ္မဏဂမၠိုၚ်လ္ၚဵု ဟိုတ်မကၠိခ္ဍက်တဴ နကဵုကမၠိကၠိခ္ဍက်ဂှ် ဟွံဂဵုလဟဵုအိုတ်ရ၊ ဟွံယးတၟးအိုတ်ရ၊ ဟွံရာၚ်ဆာဲအိုတ်ရ။
ယွံခမဳတအ် ကမၠိကၠိခ္ဍက်ဂမၠိုၚ် သမဏဗြာဟ္မဏဂမၠိုၚ်ဂှ် ဣဝွံပန်ဂကူအိုတ်ရ၊ သာမဏဗြာဟ္မဏဂမၠိုၚ်လ္ၚဵု ဟိုတ်မကၠိခ္ဍက်တဴ နကဵုကမၠိကၠိခ္ဍက်ဂမၠိုၚ်ဂှ် ဟွံဂဵုလဟဵုအိုတ်ရ၊ ဟွံယးတၟးအိုတ်ရ၊ ဟွံရာၚ်ဆာဲအိုတ်ရ။
ယွံဒကာတအ် တဳလမၞုံပိုဉ်ကျာ်တြဲ တွံတဴဂလာန်ဝွံရ၊ တွံတဴဂလာန်ဝွံတုဲ ကျာ်တြဲမလေပ်သ္ဂးတဴဂလာန်ခိုဟ်ဆာဲ ပ္ဍဲကြဴနူဂှ် တွံတိုန်ဂလာန်ဝွံရ။
သမဏဗြာဟ္မဏဂမၠိုၚ်လ္ၚဵု မၞုံယၟုပေါသ မကၠိခ္ဍက်တဴ နကဵု ‘ရာဂ’ ပွမထၞေန်စပ် ‘ဒေါသ’ ပွမလုတ်မှာဒုဟ် ဒးဒုၚ်ကၟာတ်လဒဵုကဵုအဝိဇ္ဇာ မလေပ်သ္ဍိုက်မၠိုက်တဴ ပိယရုပ် သာတရုပ်ဂှ် သုၚ်ဍာ်သိအိုတ်ရ၊ သုၚ်အရက်မေရယ်အိုတ်ရ၊ သွိုန်ဗပိုန်သိပ်ဂၠိပ် မေထုန်အိုတ်ရ၊ ပူဂိုလ်မဟွံတီဂမၠိုၚ်ဂှ် သာယျေန် ထဝ်ကီု သြန်ကီုအိုတ်ရ။
သမဏဗြာဟ္မဏဂမၠိုၚ်လ္ၚဵု ဂယိုၚ်လမျီု နပွမဂယိုၚ်လမျီုမှာရာအိုတ်ရ၊ ကမၠိကၠိခ္ဍက်ဂမၠိုၚ် ဝွံ ကျာ်တြဲမဒှ်ကဠောဒညာတ်သၟိၚ်တ္ၚဲ တွံလဝ်ရ။
ယြဴနကမၠိကၠိခ္ဍက်ဂမၠိုၚ်ဂှ် သမဏဗြာဟ္မဏဂမၠိုၚ်လ္ၚဵု ဟွံဂဵုလဟဵုအိုတ်ရ၊ ဟွံယးတၟးအိုတ်ရ၊ ဟွံသအးဇ္ၚးအိုတ်ရ၊ ဒှ်မွဲဟာန်ကေုာံမၠိုက်အိုတ်ရ၊ တုပ်သၟဟ်ကေုာံဒြာဲဂြိုပ်အိုတ်ရ။
သမဏဗြာဟ္မဏဂမၠိုၚ်လ္ၚဵု မကွိၚ်ဂြောပ် နကဵုတိုက်ဒမၠု မဒှ်ဍိက်ပၠက်တဏှာ မဒှ်မွဲဟာန်ကေုာံတဏှာ ကဵုဇၞော်မောဝ်တဴ တိသုသာန် မသကာတ်မြဟ်အိုတ်ရ၊ ဒးဂိုၚ်ကေတ် ဘဝတၟိမွဲလှေ်ပၠန်အိုတ်ရ ရဴဝွံ (တွံတဴရ)။
အဲမၞုံကွေတ်ရဴဝွံ တ္ၜေက်လက် တြနာဲဥပးဂမၠိုၚ် မၞုံကဵုသဒ္ဓါ မၞုံကဵုလျုၚ်ဇြုၚ်သ္ဍိုက်ရးဂး၊ လဗပ်ပကီု ဟီုစုတ်ရဂး၊ သ္ပပွမဟွံလျုၚ်ဇြုၚ်သ္ဍိုက်ရဂး၊ အဲဂှ် ဟွံသေၚ်ကဵုဓရ်ဂှ် ဟွံသေၚ်ကဵုဓရ်ရ၊ ဓရ်ဂှ် ဓရ်ရ ရဴဝွံ ဟီုရ၊ ဟွံသေၚ်ကဵုဝိနယ်ရ၊ ဝိနယ်ဂှ် ဝိနယ်ရ ရဴဝွံဟီုရ။
၄၄၈။ ယွံဒကာတအ် ပ္ဍဲကာလမွဲအခိၚ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဘာဝေဠုဝန် မဒှ်ဒၞာဲကဵုစၞကုဇန်လမ္စံက်ဂမၠိုၚ် ဇရေၚ်ဍုၚ်ရာဇဂြိုဟ်ရ။
ပ္ဍဲအခိၚ်ဂှ် ပ္ဍဲပရိသာတ်သၟိၚ် မဂဇအ်ကောံဓရီုသၟဟ်သၟန် အပ္ဍဲဝၚ်နန်ဂှ် ဂလာန်အကြာမတွံဂး “ကုခမဳဂမၠိုၚ် မဒှ်တၞောဝ်ကျာ်ကောန်သၟိၚ်သကျဝၚ်ဂှ် ထဝ်သြန်ဂှ် ဂပ်ဝ်ရ၊ ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သကျဝၚ် သာယျေန်ထဝ်သြန်အိုတ်ရ၊ ခမဳဂမၠိုၚ် မဒှ်တၞောဝ်ကျာ် ကောန်သၟိၚ်သကျဝၚ်ဂှ် ဒုၚ်ဂိုၚ်ကေတ် ထဝ်သြန်အိုတ်ရ” ရဴဝွံ ဒှ်ကၠုၚ်ရ။
ယွံဒကာတအ် ပ္ဍဲအခိၚ်ဂှ် ညးဇၞော်ကွာန်မဏိစူဠက ဂဇအ်နွံဒၟံၚ်ပ္ဍဲပရိသာတ်ဂှ်ရ။ ယွံဒကာတအ် ပ္ဍဲအခိၚ်ဂှ် ညးဇၞော်ကွာန်မဏိစူဠကဂှ်—
“ယွံတၠနာဲတအ် လ္ပဟီုရဴဝွံအိုတ်ညိ၊ ကုခမဳဂမၠိုၚ် မဒှ်တၞောဝ်ကျာ်ကောန်သၟိၚ်သကျဝၚ်ဂှ် ထဝ်သြန်ဂှ် ဟွံဂပ်ဝ်ရ၊ ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သကျဝၚ်ဂှ် ဟွံသာယျေန်ထဝ်သြန်အိုတ်ရ၊ ခမဳဂမၠိုၚ် မဒှ်တၞောဝ်ကျာ် ကောန်သၟိၚ်သကျဝၚ်ဂှ် ဟွံဒုၚ်ဂိုၚ်ကေတ်ထဝ်သြန်အိုတ်ရ၊ ခမဳဂမၠိုၚ် မဒှ်တၞောဝ်ကျာ်ကောန်သၟိၚ် သကျဝၚ်ဂှ် ကၠဟ်သၠးဖျေံထောံ မၞိက်ထဝ်အိုတ်ရ၊ စာ်စ္ဍးနူထဝ်သြန်အိုတ်ရ” ရဴဝွံ ဟီုသ္ဂးကဵု ပရိသာတ်ဂှ်ရ။ ယွံဒကာတအ် ညးဇၞော်ကွာန်မဏိစူဠက တၞဟ်နကဵုပရိသာတ်ဂှ် တီကၠိုဟ်ကေတ် သၟဟ်ရထရ။ ယွံဒကာတအ် ညးဇၞော်ကွာန်မဏိစူဠကဂှ် ကဵုပရိသာတ်ဂှ် တီကၠိုဟ်ကေတ်တုဲပ္ဍဲကြဴ ပြာပ်အာဇရေၚ် တဳလမၞုံပိုဉ်ကျာ်တြဲတုဲမ္ဂး လ္ၚောဝ်သ္ပဝတ်တုဲ သီုမဂဇအ်ဒၟံၚ်ပ္ဍဲဒၞာဲမွဲဂှ်—
“ယွံကျာ်မၞုံပိုဉ် လၟုဟ် ပ္ဍဲပရိသာတ်သၟိၚ် မဂဇအ်ကောံဓရီုညဳသၟဟ်သၟန် အပ္ဍဲဝၚ်နန်ဂှ် ဂလာန်အကြာမတွံဂး ‘ကုခမဳဂမၠိုၚ် မဒှ်တၞောဝ်ကျာ်ကောန်သၟိၚ်သကျဝၚ်ဂှ် ထဝ်သြန်ဂှ် ဂပ်ဝ်ရ၊ ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သကျဝၚ် သာယျေန်ထဝ်သြန်အိုတ်ရ၊ ခမဳဂမၠိုၚ် မဒှ်တၞောဝ်ကျာ် ကောန်သၟိၚ်သကျဝၚ်ဂှ် ဒုၚ်ဂိုၚ်ကေတ် ထဝ်သြန်အိုတ်ရ’ ရဴဝွံ ဒှ်ကၠုၚ်ရ။ ယွံကျာ်မၞုံပိုဉ် ဟီုသ္ဂးရဴဝွံမ္ဂး အဲဍိက်ဂှ် ‘ယွံတၠနာဲတအ် လ္ပဟီုရဴဝွံအိုတ်ညိ၊ ကုခမဳဂမၠိုၚ် မဒှ်တၞောဝ်ကျာ် ကောန်သၟိၚ်သကျဝၚ်ဂှ် ထဝ်သြန်ဂှ် ဟွံဂပ်ဝ်ရ၊ ခမဳဂမၠိုၚ် မဒှ်တၞောဝ်ကျာ် ကောန်သၟိၚ်သကျဝၚ်ဂှ် ဟွံသာယျေန်ထဝ်သြန်အိုတ်ရ၊ ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သကျဝၚ်ဂှ် ဟွံဒုၚ်ဂိုၚ်ကေတ် ထဝ်သြန်အိုတ်ရ၊ ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သကျဝၚ်ဂှ် ကၠဟ်သၠးဖျေံထောံ မၞိက်ထဝ်အိုတ်ရ၊ စာ်စ္ဍးနူထဝ်သြန်အိုတ်ရ’ ရဴဝွံ ဟီုသ္ဂးကဵု ပုရိသာတ်ဂှ်ရ။ ယွံကျာ်မၞုံပိုဉ် အဲဍိက်ဂှ် တၞဟ်နကဵုပရိသာတ်ဂှ် တီကၠိုဟ်ကေတ် သၟဟ်ရထရ။
ယွံကျာ်မၞုံပိုဉ် ပသာ်ရော? အဲဍိက်ဟီုသ္ဂးရဴဝွံမ္ဂး ဒှ်ညးဟီုသ္ဂး ဂလာန်တဳလမၞုံပိုဉ်ကျာ်တြဲ ဟီုတွံဟာ၊ ဒှ် ဟွံစောတ်စောဲ တဳလမၞုံပိုဉ်ကျာ်တြဲ နဂလာန်ဟွံဍာံစၟတ်ဟာ၊ ဓရ်မဗဗွဲကုဓရ်ဂှ်လေဝ် ဒှ်ဟီုသ္ဂးဟာ၊ ပွမဟီုသ္ဂးလ္ၚဵု ညံၚ်ဂွံဗဗွဲကဵုဝါဒဂှ် ရုမ်ဂပ်ကဵုဟိုတ်တုဲ သီုဟွံအာစိုပ် အရာထေက်ကဵု ဟီုဂရိုဟ်ဒှ်ဟာ” ရဴဝွံ ဂရၚ်ပတီရ။
ယွံညးဇၞော်ကွာန် တၠအဲဟီုသ္ဂးရဴဝွံမ္ဂး ဒှ်ညးဟီုသ္ဂးဂလာန်အဲဟီုတွံရ၊ ဒှ်ဟွံစောတ်စောဲ အဲ နဂလာန်ဟွံဍာံစၟတ်ရ၊ ဓရ်မဗဗွဲကုဓရ်ဂှ်လေဝ် ဒှ်ဟီုသ္ဂးရ၊ ပွမဟီုသ္ဂးလ္ၚဵု ညံၚ်ဂွံဗဗွဲကဵုဝါဒဂှ် ရုမ်ဂပ်ကဵုဟိုတ်တုဲ ဟွံအာစိုပ်အရာထေက်ကဵုဟီုဂရိုဟ်ရ၊ ယွံညးဇၞော်ကွာန်ကုခမဳဂမၠိုၚ် မဒှ်တၞောဝ်ကျာ်ကောန်သၟိၚ်သကျဝၚ်ဂှ် ထဝ်သြန်ဂှ် ဟွံဂပ်ဝ်ရ၊ ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သကျဝၚ်ဂှ် ဟွံသာယျေန်ထဝ်သြန်အိုတ်ရ၊ ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သကျဝၚ်ဂှ် ဟွံဒုၚ်ဂိုၚ်ကေတ် ထဝ်သြန်အိုတ်ရ၊ ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သကျဝၚ်ဂှ် ကၠဟ်သၠးဖျေံထောံ မၞိက်ထဝ်အိုတ်ရ၊ စာ်စ္ဍးနူထဝ်သြန်အိုတ်ရ။
ယွံညးဇၞော်ကွာန် ကုညးထဝ်သြန်ဂပ်ဝ်ဂှ် ကာမဂုဏ်ဂမၠိုၚ် မသုန်ပြကာလေဝ် ဂပ်ဝ်အိုတ်ရ၊ ညးကာမဂုဏ်ဂမၠိုၚ် မသုန်ပြကာဂပ်ဝ်ဂှ် “ညးဟွံမွဲကဵုဓရ်ခမဳ၊ ညးဟွံမွဲကဵုဓရ် တၞောဝ်ကျာ်ကောန်သၟိၚ်သကျဝၚ်ဂမၠိုၚ်” ရဴဝွံ ဩဝ်ဂိုၚ်သမ္တီ ဗွဲဨကန်ညိ။
ယွံညးဇၞော်ကွာန် ဗွဲစၟတ်တုန် အဲတွံတဴရဴဝွံရ၊ “ညးမၞုံပၟိက်ကဵုချောဲဂှ် ဂပ်ဝ်ဂၠာဲသ္ၚေဝ်ချောဲရ၊ ညးမၞုံပၟိက်ကဵုဆုဂှ် ဂပ်ဝ်ဂၠာဲသ္ၚေဝ်ဆုရ၊ ညးမၞုံပၟိက်ကဵုကွဳဂှ် ဂပ်ဝ်ဂၠာဲသ္ၚေဝ်ကွဳရ၊ ညးမၞုံပၟိက်ကဵုတြုံ (သၟာကမၠောန်) ဂှ် ဂပ်ဝ်ဂၠာဲသ္ၚေဝ်တြုံ (သၟာကမၠောန်) ရ။ ယွံညးဇၞော်ကွာန် နကဵုဟိုတ်လဵုလေဝ် ‘ဂပ်ဝ်သာယျေန် ဂပ်ဝ်ဂၠာဲသ္ၚေဝ်ထဝ်သြန်’ ရ” ရဴဝွံ အဲကျာ်ဟွံတွံရ ရဴဝွံ သ္ဂးရ။
အဲမၞုံအလေံဟီုသ္ဂးရဴဝွံ တ္ၜေက်လက် တြနာဲဥပးဂမၠိုၚ် မၞုံကဵုသဒ္ဓါ မၞုံကဵုလျုၚ်ဇြုၚ်သ္ဍိုက်ရဂး၊ လဗပ်ပကီု ဟီုစုတ်ရဂး၊ သ္ပပွမဟွံလျုၚ်ဇြုၚ်သ္ဍိုက်ရဂး၊ အဲဂှ် ဟွံကဵုဓရ်ဂှ် ဟွံသေၚ်ကဵုဓရ်ရ၊ ဓရ်ဂှ် ဓရ်ရ ရဴဝွံဟီုရ၊ ဟွံသေၚ်ကဵုဝိနယ်ဂှ် ဟွံသေၚ်ကဵုဝိနယ်ရ၊ ဝိနယ်ဂှ် ဝိနယ်ရ ရဴဝွံဟီုရ။
၄၄၉။ ယွံဒကာတအ် ပ္ဍဲကာလမွဲတ္ၚဲ ပ္ဍဲဍုၚ်ရာဇဂြိုဟ် တဳလမၞုံပိုဉ်ကျာ်တြဲ သ္ပဟိုတ်ကဵုတဳလပိုဉ်ဥပနန္ဒ ကောန်သၟိၚ်သကျဝၚ်တုဲ ပါဲကၠေံထဝ်သြန်ရ၊ သိက္ခာပိုဒ်လေဝ် ပညပ်ရ။ အဲမၞုံကွေတ်ရဴဝွံ တ္ၜေက်လက် တြနာဲဥပးဂမၠိုၚ် မၞုံကဵုသဒ္ဓါမၞုံကဵုလျုၚ်ဇြၚ်သ္ဍိုက်ရဂး၊ လဗပ်ပကီုဟီုစုတ်ရဂး၊ သ္ပပွမဟွံလျုၚ်ဇြုၚ်သ္ဍိုက်ရဂး၊ အဲဂှ် ဟွံသေၚ်ကဵုဓရ်ဂှ် ဟွံသေၚ်ကဵုဓရ်ရ၊ ဓရ်ဂှ် ဓရ်ရ ရဴဝွံ ဟီုရ၊ ဟွံသေၚ်ကဵုဝိနယ်ဂှ် ဟွံသေၚ်ကဵုဝိနယ်ရ၊ ဝိနယ်ဂှ် ဝိနယ်ရ ရဴဝွံ ဟီုရ။
ဟီုသ္ဂးရဴဝွံမ္ဂး ဥပးကောန်ဍုၚ်ဝေသာလဳဂမၠိုၚ်ဂှ် “ယွံတဳလပိုဉ် တဳလပိုဉ်ယသ ကောန်ဗဗၞး ကာကဏ္ဍကမွဲဇကုဟေၚ် ခမဳမဒှ်တၞောဝ်ကျာ်ကောန်သၟိၚ်သကျဝၚ်ရ၊ ညးဂမၠိုၚ်အိုတ်သီုဝွံ ခမဳဟွံသေၚ်အိုတ်ရ၊ တၞောဝ်ကျာ်ကောန်သၟိၚ်သကျဝၚ် ဟွံသေၚ်အိုတ်ရ၊ တဳလပိုဉ်ယသ ကောန်ဗဗၞး ကာကဏ္ဍက ဩဝ်ပဒတဴ ပ္ဍဲဍုၚ်ဝေသာလဳညိ၊ ပိုဲဍိက်တအ်ညးဂမၠိုၚ် သ္ပဂဗုဓ်လွဳပရာ သွက်သ္ၚာ ပိဏ္ဍပါတ် ဘာဂဥုဲမဒှ်ကြိယာဗာပၟၚ်ပၟဲလမျီု မစှေ်ကဵုယဲဂမၠိုၚ်အိုတ်ရ” ရဴဝွံ ဂရၚ်ပတီ တဳလပိုဉ်ယသ ကောန်ဗဗၞးကာကဏ္ဍကအိုတ်ရ။
ကြဴနူဂှ် တဳလပိုဉ်ယသ ကောန်ဗဗၞးကာကဏ္ဍကဂှ် ကဵုဥပးကောန်ဍုၚ်ဝေသာလဳဂမၠိုၚ်တီတုဲမ္ဂး မွဲဟာန်ကေုာံခမဳကလုတ် ဗွက်ကြဴ အာအာရှာမ်ဘာရ။
ပ္ဍဲအခိၚ်ဂှ် ခမဳကောန်ဝဇ္ဇဳရးဂမၠိုၚ် မပဒတဴဍုၚ်ဝေသာလဳဂှ် “ယွံကောန်တၠယသ ကောန်ဗဗၞးကာကဏ္ဍက ဂပ်ဝ်အာတ်ဒုၚ်ဂုဏ် ဥပးဂမၠိုၚ်မပဒတဴပ္ဍဲဍုၚ်ဝေသာလဳတုဲရဟာ” ရဴဝွံ သၟာန် ခမဳကလုတ်ဗွက်ကြဴအိုတ်ရ။
ယွံကောန်တၠတအ် ဥပးဂမၠိုၚ် သ္ပပိုဲညးဂမၠိုၚ် ဒဒှ်ညးယုတ်မာအိုတ်ရ၊ တဳလပိုဉ်ယသကောန်ဗဗၞးကာကဏ္ဍကမွဲဇကုဟေၚ် သ္ပဒဒှ်ခမဳ မဒှ်တၞောဝ်ကျာ်ကောန်သၟိၚ်သကျဝၚ်အိုတ်ရ၊ သ္ပပိုဲညးဂမၠိုၚ်အိုတ်သီု ဒဒှ်ခမဳ ဟွံသေၚ်အိုတ်ရ၊ ဒဒှ်ခမဳ မဒှ်တၞောဝ်ကျာ်ကောန်သၟိၚ်သကျဝၚ် ဟွံသေၚ်အိုတ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳကောန်ဝဇ္ဇဳရးဂမၠိုၚ် မပဒတဴပ္ဍဲဍုၚ်ဝေသာလဳဂှ် “ယွံကောန်တၠတအ် ယသ ကောန်ဗဗၞးကာကဏ္ဍကဝွံ သီုပိုဲညးဂမၠိုၚ် မဟဂပ်ဝ်သၟိတ်ပတိုန်ဂှ် သ္ပပြာကဋ် ကုခရှ်ဂမၠိုၚ်ရ၊ လၟုဟ် ပိုဲညးဂမၠိုၚ် သ္ပဥက္ခေပနဳယကမ် ကုခမဳဂှ်အိုတ်စိုတ်” ရဴဝွံ ခမဳဂမၠိုၚ်ဂှ်မိက်သ္ပ ဥက္ခေပနဳယကမ် ကုယသဂှ်တုဲ ကောံဓရီုအိုတ်ရ။
ပ္ဍဲအခိၚ်ဂှ် တဳလပိုဉ်ယသ ကောန်ဗၞးကာကဏ္ဍက ကဠာၚ်တိုန်အကးတုဲ တန်တဴပ္ဍဲဍုၚ်ကောသမ္ဗဳရ။
၄၅၀။ ပ္ဍဲအခိၚ်ဂှ် တဳလပိုဉ်ယသ ကောန်ဗဗၞးကာကဏ္ဍကဂှ် “ယွံတဳလပိုဉ်တအ် ဩဝ်က္ညကၠုၚ်အိုတ်ညိ၊ ကိုပ်ကၠာဓရ်အသပ္ပုရိုဟ် ဟွံဂဵုလဟဵုဏီ၊ ကိုပ်ကၠာဓရ်သပ္ပုရိုဟ် ဟွံကၠေံဗ္ဒန်ဏီ၊ ကိုပ်ကၠာဓရ်ဟွံသေၚ်ကဵုဝိနယ် ဟွံဂဵုလဟဵုဏီ၊ ကိုပ်ကၠာဓရ်ဝိနယ် ဟွံကၠေံဗ္ဒန်ဏီ၊ ကိုပ်ကၠာပူဂိုလ်အဓမ္မဝါဒဳဂမၠိုၚ် ဟွံမွဲကဵုဒြဟတ်ဏီ၊ ကိုပ်ကၠာပူဂိုလ်ဓမ္မဝါဒဳဂမၠိုၚ် ဟွံဍုန်ကဵုဇြဟတ်ဏီ၊ ကိုပ်ကၠာပူဂိုလ် အဝိနယဝါဒဳဂမၠိုၚ် ဟွံမွဲကဵုဒြဟတ်ဏီ၊ ကိုပ်ကၠာပူဂိုလ်ဝိနယဝါဒဳဂမၠိုၚ် ဟွံဍိုန်ကဵုဇြဟတ်ဏီ ကြက်ဂိုၚ်ကေတ် အဓိကိုရ်ဝွံအိုတ်ရ” ရဴဝွံ ဗလးဏာကလုတ် ဇရေၚ်ခမဳကောန်ဍုၚ်ပါဝါဂမၠိုၚ်ကီု ဇရေၚ်ခမဳကောန်ညးအဝန္တိက္ခိဏပထရးဂမၠိုၚ်ကီုရ။
ပ္ဍဲအခိၚ်ဂှ် တဳလပိုဉ်သမ္ဘူတ မပဒတဴပ္ဍဲဌာန်သာဏဂှ် ပဒတဴဒၟံၚ် ပ္ဍဲဒဵုမၞုံယၟုအဟောဂၚ်္ဂါရ။ ပ္ဍဲအခိၚ်ဂှ် တဳလပိုဉ်ယသ ကောန်ဗဗၞးကာကဏ္ဍက ပြာပ်အာဇရေၚ် တဳလပိုဉ်သမ္ဘူတ မပဒတဴပ္ဍဲဌာန်သာဏ ဒဵုမၞုံယၟုအဟောဂၚ်္ဂါတုဲ လ္ၚောဝ်သ္ပဝတ်တုဲမ္ဂး သီုမဂဇအ်ဒၟံၚ်ပ္ဍဲဒၞာဲမွဲဂှ်—
“ယွံတဳလပိုဉ် ပ္ဍဲဍုၚ်ဝေသာလဳ ခမဳကောန်ညးဝဇ္ဇဳရးဂမၠိုၚ် မပဒတဴ ပ္ဍဲဍုၚ်ဝေသာလဳ ထ္ၜးတဴဝတ္ထုဂမၠိုၚ်စှ်သာ်အိုတ်ရ။
‘ၜဵု မရၚ်တၠုၚ်စွံလဝ် နဍေၚ်ဒြၚ်သတ်ဂှ် ဂပ်ဝ်ရ။
ပွမစသုၚ် ပ္ဍဲအခိၚ်တ္ၚဲစေၚ်လောန်အာ ၜါလပုဟ်တဲဂှ် ဂပ်ဝ်ရ။
ကုခမဳကြက်အာကွာန်သအာၚ်ဂှ် ပွမစသုၚ် သီုဟွံသ္ပအတိရိတ်ဝိယကမ်ဂှ် ဂပ်ဝ်ရ။
ပ္ဍဲမွဲသိမ်ဓဝ် ပွမသကမ်သၚ်တၞဟ်တၞဟ်ဂှ် ဂပ်ဝ်ရ။
ပွမကဵုဆန်ဂှ် ဂပ်ဝ်ရ။
ဒ္ဂေတ်လ္ၚတ်အလေံ အ္စာဥပဇ္ၛာယ်ဂမၠိုၚ်ဂှ် ဂပ်ဝ်ရ။
သီုဟွံသ္ပအတိရိဝိနယ်ကမ် ပွမသ္ပဘိုဂ်ဍာ်တှ် ကၠာဟွံဒှ်ဍာ်တှ်ထၟတ်ဏီဂှ် ဂပ်ဝ်ရ။
ပွမသုၚ်ဍာ်သိၜတ်ၜတ်ဂှ် ဂပ်ဝ်ရ။
နသဳဒိုန် မဟွံမွဲကဵုတသာဲဂှ် ဂပ်ဝ်ရ။
ထဝ်သြန်ဂှ် ဂပ်ဝ်ရ’ ရဴဝွံ (ထ္ၜးအိုတ်ရ)။
ယွံတဳလပိုဉ် လၟုဟ် ပိုဲဍိက်တအ်ညးဂမၠိုၚ် ကိုပ်ကၠာဓရ်အသပ္ပရိုဟ် ဟွံဂဵုလဟဵုဏီ၊ ကိုပ်ကၠာဓရ်သပ္ပုရိုဟ် ဟွံကၠေံဗ္ဒန်ဏီ၊ ကိုပ်ကၠာဓရ်ဟွံသေၚ်ကဵုဝိနယ် ဟွံဂဵုလဟဵုဏီ၊ ကိုပ်ကၠဓရ်ဝိနယ် ဟွံကၠေံဗ္ဒန်ဏီ၊ ကိုပ်ကၠာ ပူဂိုလ်အဓမ္မဝါဒဳဂမၠိုၚ် ဟွံမွဲကဵုဇြဟတ်ဏီ၊ ကိုပ်ကၠာပူဂိုလ်ဓမ္မဝါဒဳဂမၠိုၚ် ဟွံဍိုန်ကဵုဇြဟတ်ဏီ၊ ကိုပ်ကၠာပူဂိုလ်အဝိနယဝါဒဳဂမၠိုၚ် ဟွံမွဲကဵုဇြဟတ်ဏီ၊ ကိုပ်ကၠာပူဂိုလ်ဝိနယဝါဒဳဂမၠိုၚ် ဟွံဍိုန်ကဵုဇြဟတ်ဏီ ကြက်ဂိုၚ်ကေတ် အဓိကိုရ်ဝွံအိုတ်ရ” ရဴဝွံ ဂရၚ်ပတီရ။
“ယွံကောန်တၠ ခိုဟ်သန်ရ” ရဴဝွံ တဳလပိုဉ်သမ္ဘူတ မပဒတဴပ္ဍဲဌာန်သာဏဂှ် ဒုၚ်ဝန်ကုတဳလပိုဉ်ယသ ကောန်ဗဗၞးကာကဏ္ဍကရ။ ပ္ဍဲအခိၚ်ဂှ် ခမဳဂမၠိုၚ်မဒှ်ကောန်ပါဝေယျကရး မၞုံဗၞတ်တြဴစှော်ဇကု မဒှ်ခမဳပဒတဴဂြိုပ်အိုတ်သီု မဒှ်ပကၚ်ရၚ်ဓုတၚ်ပိဏ္ဍပါတ်အိုတ်သီု မဒှ်ပကၚ်ရၚ်ဓုတၚ် ပံသုကူအိုတ်သီု မဒှ်ပကၚ်ရၚ်ဓုတၚ်တိစဳဝရိက်အိုတ်သီု မဒှ်တၠအရှန်ဖအိုတ်ဂှ် ကောံဓရီုဒၟံၚ် ပ္ဍဲဒဵုမၞုံယၟု အဟောဂၚ်္ဂါအိုတ်ရ။
ခမဳဂမၠိုၚ်မဒှ်ကောန်အဝန္တိဒက္ခိဏာပထရး မၞုံဗၞတ်ဒ္စါံစှော်ဒ္စါံဇကု မဒှ်လ္ၚဵုခမဳပဒတဴဂြိုပ် မဒှ်လ္ၚဵုပကၚ်ရၚ်ဓုတၚ်ပိဏ္ဍပါတ် မဒှ်လ္ၚဵုပကၚ်ရၚ်ဓုတၚ်ပံသုကူ မဒှ်လ္ၚဵုပကၚ်ရၚ်ဓုတၚ်တိစဳဝရိက် မဒှ်တၠအရှန်ဖအိုတ်ဂှ် ကောံဓရီုဒၟံၚ် ပ္ဍဲဒဵုမၞုံယၟုအဟောဂၚ်္ဂါအိုတ်ရ။ ပ္ဍဲအခိၚ်ဂှ် ခမဳထေရ်ဇၞော်ဂမၠိုၚ် ချပ်ဂၞန်အိုတ်မ္ဂး “အဓိကိုရ်ဝွံ သကာတ်လေဝ်သကာတ်မြဟ်ရ၊ ဂံၚ်လေဝ်ဂံၚ်သကာရ၊ ပိုဲညးဂမၠိုၚ် မုရဴဗော်သွးမွဲ ကလိဂွံအိုတ်ရော? နကဵုဗော်သွးဂှ် ပ္ဍဲအဓိကိုရ်ဝွံ ပိုဲညးဂမၠိုၚ် မၞုံကဵုဒြဟတ်လောန်အိုတ်ရော?” ရဴဝွံ ကသပ်ဒှ်အိုတ်ရ။
၄၅၁။ ပ္ဍဲအခိၚ်ဂှ် တဳလပိုဉ်ရေဝတ ပဒတဴဒၟံၚ် ပ္ဍဲဍုၚ်သောရေယျရ၊ လၟိၚ်လညာတ်ဂၠိုၚ်တုဲ ဂွံပတိုန်လဝ်ပါၚ် ပါဠိသၟးဟွံက ဓမ္မဝိနယကေုာံမာတိကာလေဝ် ပကၚ်ရၚ်လဝ်ရ၊ ဍိုဟ်ကေက်စဳကၠးဆိုက်ဗ္ဒက် မၞုံကဵုဉာဏ်ပညာမဇြိုဟ်နက်ရ၊ လေပ်ဂွပါပ်ရ၊ မၞုံကဵု “သံသယကုက္ကုစ္စ’ ပွမချပ်သၠေပ်ပၟာရ၊ မၞုံပၟိက်ကဵုဒ္ဂေတ်သိက္ခာရ။
ပ္ဍဲအခိၚ်ဂှ် “တဳလပိုဉ်ရေဝတဝွံ ပဒတဴဒၟံၚ် ပ္ဍဲဍုၚ်သောရေယျရ၊ လၟိၚ်လညာတ်ဂၠိုၚ်တုဲ ဂွံပတိုန်လဝ်ပါၚ် ပါဠိသၟးဟွံက ဓမ္မဝိနယကေုာံမာတိကာလေဝ် ပကၚ်ရၚ်လဝ်ရ၊ ဍိုဟ်ကေက်စဳကၠးဆိုက်ဗ္ဒက် မၞုံကဵုဉာဏ်ပညာမဇြိုဟ်နက်ရ၊ လေပ်ဂွပါပ်ရ၊ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာရ၊ မၞုံပၟိက်ကဵုဒ္ဂေတ်သိက္ခာရ။
ပိုဲညးဂမၠိုၚ် ကလိဂွံဗော်သွး တဳလပိုဉ်ရေဝတမ္ဂး နပွမကလိဂွံရဴဝွံ ပ္ဍဲအဓိကိုရ်ဝွံ ပိုဲညးဂမၠိုၚ် ကြက်ဒှ်ညးမၞုံကဵုဒြဟတ်လောန်အိုတ်ရ” ရဴဝွံ ကသပ်ဒှ် ကုခမဳထေရ်ဇၞော်ဂမၠိုၚ်အိုတ်ရ။
ဃောခမဳထေရ်ဇၞော်ဂမၠိုၚ် ချပ်ဂၞန်ဒၟံၚ်ဂှ် တဳလပိုဉ်ရေဝတ မိၚ်ကေတ်နကဵုဒိဗ္ဗသောတ အဘိဉာဏ် မသအးဇ္ၚးမလောန် လတူပွမမိၚ်ကတောဝ်မၞိဟ်ဂမၠိုၚ်တုဲ “အဓိကိုရ်ဝွံ သကာတ်လေဝ်သကာတ်မြဟ်ရ၊ ဂံၚ်လေဝ်ဂံၚ်သကာရ၊ ပ္ဍဲအဓိကိုရ်မၞုံသဘဴရဴဝွံ အဲဆုတ်ကလေၚ်ထောံမ္ဂး ပွမဆုတ်ကလေၚ်ဂှ် ဟွံဗဗွဲရ၊ ခမဳဂမၠိုၚ်ဂှ်လေဝ် ကြက်ကၠုၚ်လၟုဟ်အိုတ်ရ၊ အဲဂှ်နှဴအာကရောမ်ခမဳဂမၠိုၚ်ဂှ်မ္ဂး ဂွံအာဗွဲတသိုခ် ဟွံသေၚ်ရ၊ အဲဂွံအာပြဟ်ပြဟ်မ္ဂး ခိုဟ်ရ” ရဴဝွံ ကသပ်ဒှ်ရ။
ကြဴနူဂှ် တဳလပိုဉ်ရေဝတ နူသောရေယျ အာဍုၚ်သၚ်္ကဿရ။
ပ္ဍဲအခိၚ်ဂှ် ခမဳထေရ်ဂမၠိုၚ် “တဳလပိုဉ်ရေဝတ ဣလဵုရော?” ရဴဝွံ အာဍုၚ်သောရေယတုဲ သၟာန်အိုတ်ရ။
“တဳလပိုဉ်ရေဝတဂှ် အာဍုၚ်သၚ်္ကဿရ” ရဴဝွံ ခမဳဂမၠိုၚ်ဂှ် သ္ဂးအိုတ်ရ။
ပ္ဍဲအခိၚ်ဂှ် ခမဳထေရ်ဂမၠိုၚ် “တဳလပိုဉ်ရေဝတ ဣလဵုရော?” ရဴဝွံ အာဍုၚ်သၚ်္ကဿတုဲ သၟာန်အိုတ်ရ။
“တဳလပိုဉ်ရေဝတဂှ် အာဍုၚ်ကဏ္ဏကုဇ္ဇရ” ရဴဝွံ ခမဳဂမၠိုၚ်ဂှ် သ္ဂးအိုတ်ရ။
ပ္ဍဲအခိၚ်ဂှ် တဳလပိုဉ်ရေဝတ နူဍုၚ်ကဏ္ဏကုဇ္ဇ အာဍုၚ်ဥဒုမ္ဗရရ။
ပ္ဍဲအခိၚ်ဂှ် ခမဳထေရ်ဂမၠိုၚ် “တဳလပိုဉ်ရေဝတ ဣလဵုရော?” ရဴဝွံ အာဍုၚ်ကဏ္ဏကုဇ္ဇတုဲ သၟာန်အိုတ်ရ။
“တဳလပိုဉ်ရေဝတဂှ် အာဍုၚ်ဥဒုမ္ဗရ” ရဴဝွံ ခမဳဂမၠိုၚ်ဂှ် သ္ဂးအိုတ်ရ။
ပ္ဍဲအခိၚ်ဂှ် တဳလပိုဉ်ရေဝတ နူဍုၚ်ဥဒုမ္ဗရ အာဍုၚ်အဂ္ဂဠ ရ။
ပ္ဍဲအခိၚ်ဂှ် ခမဳထေရ်ဂမၠိုၚ် “တဳလပိုဉ်ရေဝတ ဣလဵုရော?” ရဴဝွံ အာဍုၚ်ဥဒုမ္ဗရတုဲ သၟာန်အိုတ်ရ။
“တဳလပိုဉ်ရေဝတဂှ် အာဍုၚ်အဂ္ဂဠရ” ရဴဝွံ ခမဳဂမၠိုၚ်ဂှ် သ္ဂးအိုတ်ရ။
ပ္ဍဲအခိၚ်ဂှ် တဳလပိုဉ်ရေဝတ နူဍုၚ်အဂ္ဂဠ အာဍုၚ်သဟဇာတိရ။
ပ္ဍဲအခိၚ်ဂှ် ခမဳထေရ်ဂမၠိုၚ် “တဳလပိုဉ်ရေဝတ ဣလဵုရော?” ရဴဝွံ အာဍုၚ်အဂ္ဂဠတုဲ သၟာန်အိုတ်ရ။
“တဳလပိုဉ်ရေဝတဂှ် အာဍုၚ်သဟဇာတိရ” ရဴဝွံ ခမဳဂမၠိုၚ်ဂှ် သ္ဂးအိုတ်ရ။
ပ္ဍဲအခိၚ်ဂှ် ခမဳထေရ်ဂမၠိုၚ် ဂတာပ်အာ တဳလပိုဉ်ရေဝတ ပ္ဍဲဍုၚ်သဟဇာတိအိုတ်ရ။
၄၅၂။ ပ္ဍဲအခိၚ်ဂှ် တဳလပိုဉ်သမ္ဘူတ မပဒတဴပ္ဍဲဌာန်သာဏဂှ် “ယွံကောန်တၠ တဳလပိုဉ်ရေဝတဝွံ လၟိၚ်လညာတ်ဂၠိုၚ်တုဲ ဂွံပတိုန်လဝ်ပါၚ် ပါဠိသၟးဟွံက ဓမ္မဝိနယ ကေုာံ မာတိကာလေဝ်ပကၚ်ရၚ်လဝ်ရ၊ ဍိုဟ်ကေက် စဳကၠးဆိုက်ဗ္ဒက်မၞုံကဵုဉာဏ်ပညာမဇြိုဟ်နက်ရ၊ လေပ်ဂွပါပ်ရ၊ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာရ၊ မၞုံပၟိက်ကဵုဒ္ဂေတ်သိက္ခာရ။ ပိုဲညးဂမၠိုၚ် သၟာန်တဴ တဳလပိုဉ်ရေဝတ သၟာန်ပုစ္ဆာအိုတ်မ္ဂး၊ တဳလပိုဉ်ရေဝတဂှ် နသၟာန်ပုစ္ဆာမွဲဓဝ်ဟေၚ် ကဵုကလိလောန်အာ လုကဴကၠိုဟ်ဗတမ်မာန်ရ၊ လၟုဟ် တဳလပိုဉ်ရေဝတ ကြက်ဗတိုက်ဖအောဝ် ခမဳကွပဒတဴဇရေၚ် မလေပ်ဖ္ဍောတ် နရမျာၚ်ရ။ တၠအဲဂှ် ပ္ဍဲအခိၚ်ပွမဖ္ဍောတ် နရမျာၚ်ခမဳကွးပဒတဴဇရေၚ်တုဲဂှ် ပြာပ်အာဇရေၚ် တဳလပိုဉ်ရေဝတတုဲ ဩဝ်ဂရၚ်ပတီသၟာန် ဝတ္ထုဂမၠိုၚ်စှ်သာ်ဝွံညိ” ရဴဝွံ သ္ဂးကုတဳလပိုဉ်ယသ မဒှ်ကောန်ဗဗၞးကာကဏ္ဍကရ။
“ယွံတဳလပိုဉ် ခိုဟ်သန်ရ” ရဴဝွံ တဳလပိုဉ်ယသ ကောန်ဗၞးကာကဏ္ဍကဂှ် ဒုၚ်ဝန်ကုတဳလပိုဉ်သမ္ဘူတ မပဒတဴပ္ဍဲဌာန်သာဏရ။
ပ္ဍဲအခိၚ်ဂှ် တဳလပိုဉ်ရေဝတ ဗတိုက်ဖအောဝ် ခမဳကွးပဒတဴဇရေၚ် မလေပ်ဖ္ဍောတ်နရမျာၚ်ရ။ ပ္ဍဲအခိၚ်ဂှ် တဳလပိုဉ်ယသ ကောန်ဗဗၞးကာကဏ္ဍကဂှ် ပ္ဍဲအခိၚ်မဖ္ဍောတ်နရမျာၚ် ခမဳကွးပဒတဴ ဇရေၚ်တုဲဂှ် ပြာပ်အာဇရေၚ် တဳလပိုဉ်ရေဝတတုဲ လ္ၚောဝ်သ္ပဝတ် တဳလပိုဉ်ရေဝတတုဲမ္ဂး သီုမဂဇအ်ဒၟံၚ် ပ္ဍဲဒၞာဲမွဲဂှ်—
“ယွံတဳလမၞုံပိုဉ် သိၚ်္ဂဳလောဏကပ္ပဂှ် ဂပ်ဝ်ဟာ” ရဴဝွံ ဂရၚ်ပတီသၟာန်တိုန်ရ။
ယွံကောန်တၠ သိၚ်္ဂဳလောဏကပ္ပမ္ဂးဂှ် ညးဍေံရော? ရဴဝွံ (သၟာန်ရ)။
ယွံတဳလပိုဉ် “ပ္ဍဲဌာန်ဟွံမွဲကဵုၜဵုဂှ် ကြက်ဂွံပြဘိုဂ်ရ” ရဴဝွံ သွက်ဂွံရၚ်တၠုၚ်လဝ်ၜဵု နကဵုဍေၚ်ဒြၚ်သတ်ဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဟွံဂပ်ဝ်ရ ရဴဝွံ (သ္ဂးရ)။
ယွံတဳလမၞုံပိုဉ် ဒွၚ်္ဂုလကပ္ပဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဒွၚ်္ဂုလကပ္ပမ္ဂးဂှ် ညးဍေံရော? ရဴဝွံ (သၟာန်ရ)။
ယွံတဳလပိုဉ် ပ္ဍဲအခိၚ်တ္ၚဲစေၚ်လောန်အာ သၞိၚ်ၜါလပုဟ်တဲတုဲဂှ် သွက်ဂွံပြဘိုဂ်ဘောဇိုန်ဂှ် ဂပ်ဝ်ဟာ ရဴဝွံ (ဂရၚ်ပတီရ)။ ယွံကောန်တၠ ဟွံဂပ်ဝ်ရ ရဴဝွံ (သ္ဂးရ)။
ယွံတဳလမၞုံပိုဉ် ဂါမန္တရကပ္ပဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဂါမန္တကပ္ပမ္ဂးဂှ် ညးဍေံရော ရဴဝွံ (သၟာန်ရ)။
ယွံတဳလပိုဉ် “လၟုဟ် ကြက်အာကွာန်သအာၚ်ရ” ရဴဝွံ ခမဳမဒးပဝါရိတ် ဃောကဵုပိုဉ်ဂှ် သွက်ဂွံသ္ပပြဘိုဂ် ဘောဇိုန်မဟွံသ္ပအတိရိတ်ဝိနယ်ကမ်ဂှ် ဂပ်ဝ်ဟာ
ရဴဝွံ (ဂရၚ်ပတီရ)။
ယွံကောန်တၠ ဟွံဂပ်ဝ်ရ ရဴဝွံ (သ္ဂးရ)။
ယွံတဳလမၞုံပိုဉ် အာဝါသကပ္ပမ္ဂးဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ အာဝါသကပ္ပမ္ဂးဂှ် ညးဍေံရော? ရဴဝွံ (သၟာန်ရ)။
ယွံတဳလပိုဉ် ဘာဂမၠိုၚ်မဂၠိုၚ်ဂှ် ဒှ်မွဲသိမ်ဓဝ်အိုတ်ရ၊ သွက်ဂွံသ္ပဥပေါဟ်တၞဟ်တၞဟ်ဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဟွံဂပ်ဝ်ရ ရဴဝွံ (သ္ဂးရ)။
ယွံတဳလမၞုံပိုဉ် အနုမတိကပ္ပဂှ် ဟဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ အနုမတိကပ္ပမ္ဂးဂှ် ညးဍေံရော? ရဴဝွံ (သၟာန်ရ)။
ယွံတဳလပိုဉ် “ခမဳမကၠုၚ်ဂမၠိုၚ် ကြက်ကဵုသ္ပအခေါၚ်အိုတ်ရ” ရဴဝွံ သၚ်မဒှ်ဝဂ် သွက်ဂွံသ္ပကမ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဟွံဂပ်ဝ်ရ ရဴဝွံ (သ္ဂးရ)။
ယွံတဳလမၞုံပိုဉ် အာစိဏ္ဏကပ္ပဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ အာစိဏ္ဏကပ္ပမ္ဂးဂှ် ညးဍေံရော? ရဴဝွံ (သၟာန်ရ)။
ယွံတဳလပိုဉ် ပွဝွံ ဒှ်ဒ္ဂေတ်အလေံ အ္စာဥပဇ္ၛာယ်အဲရ၊ ပွဝွံ ဒှ်ဒ္ဂေတ်အလေံ အ္စာဥပဇ္ၛာယ်အဲရ၊ သွက်ဂွံဒ္ဂေတ်အလေံ ပွဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဒ္ဂေတ်အလေံလ္ၚဵုဂှ် ဂပ်ဝ်ရ၊ ဒ္ဂေတ်အလေံလ္ၚဵုဂှ် ဟွံဂပ်ဝ်ရ ရဴဝွံ (သ္ဂးရ)။
ယွံတဳလမၞုံပိုဉ် အမထိတကပ္ပဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ အမထိကကပ္ပမ္ဂးဂှ် ညးဍေံရော? ရဴဝွံ (သၟာန်ရ)။
ယွံတဳလပိုဉ် ဍာ်တှ် သဘဴဍာ်တှ်ပကတိလေဝ် စာ်စ္ဍးတုဲ ဍာ်တှ်ထၟတ်လေဝ် ဟွံဒှ်ဏီဂှ် ခမဳဒးပဝါရိတ်ဃောကဵုပိုဉ်ဂှ် သီုဟွံသ္ပအတိရိတ်ဝိနယ်ကမ် သွက်ဂွံသုၚ်ဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဟွံဂပ်ဝ်ရ ရဴဝွံ (သ္ဂးရ)။
ယွံတဳလမၞုံပိုဉ် သွက်ဂွံသုၚ် ဇဠောဂဳဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဇဠောဂဳမ္ဂးဂှ် ညးဍေံရော? ရဴဝွံ (သၟာန်ရ)။
ယွံတဳလပိုဉ် ၜိုန်စဳရေၚ်လဝ် နကပေါတ်ကြိယာဗာအိုတ်သိုတုဲလေဝ် သွက်ဂွံသုၚ်ဍာ်သိၜတ်ၜတ် မဟွံဒှ်ဍာ်သိအရက်ဏီဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဟွံဂပ်ဝ်ရ ရဴဝွံ (သ္ဂးရ)။
ယွံတဳလမၞုံပိုဉ် နိသဳဒိုန်မဟွံမွဲကဵုတဿဲဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဟွံဂပ်တ်ရ ရဴဝွံ (သ္ဂးရ)။
ယွံတဳလမၞုံပိုဉ် ထဝ်သြန်ဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဟွံဂပ်ဝ်ရ ရဴဝွံ (သ္ဂးရ)။
ယွံတဳလပိုဉ် ပ္ဍဲဍုၚ်ဝေသာလဳ ခမဳကောန်ညးဝဇ္ဇဳရးဂမၠိုၚ် မပဒတဴ ပ္ဍဲဍုၚ်ဝေသာလဳဝွံ ထ္ၜးတဴဝတ္ထုဂမၠိုၚ်စှ်သာ်အိုတ်ရ။ ကိုပ်ကၠာဓရ်အသပ္ပုရိုဟ် ဟွံဂဵုလဟဵုဏီ၊ ကိုပ်ကၠဓရ်သပ္ပုရိုဟ် ဟွံကၠေံဗ္ဒန်ဏီ၊ ကိုပ်ကၠာဓရ်ဟွံသေၚ်ကဵုဝိနယ် ဟွံဂဵုလဟဵုဏီ၊ ကိုပ်ကၠာ ဓရ်ဝိနယ်ဟွံကၠေံဗ္ဒန်ဏီ၊ ကိုပ်ကၠာပူဂိုလ်အဓမ္မဝါဒဳဂမၠိုၚ် ဟွံမွဲကဵုဇြဟတ်ဏီ၊ ကိုပ်ကၠာပူဂိုလ်ဓမ္မဝါဒဳဂမၠိုၚ် ဟွံဍုန်ကဵုဒြဟတ်ဏီ၊ ကိုပ်ကၠာပူဂိုလ်အဝိနယဝါဒဳဂမၠိုၚ် ဟွံမွဲကဵုဇြဟတ်ဏီ၊ ကိုပ်ကၠာပူဂိုလ်ဝိနယဝါဒဳဂမၠိုၚ် ဟွံဍိုန်ကဵုဇြဟတ်ဏီ လၟုဟ်ပိုဲဍိက်တအ်ညးဂမၠိုၚ် ကြက်ဂိုၚ်ကေတ် အဓိကိုရ်ဝွံအိုတ်ရ” ရဴဝွံ ဂရၚ်ပတီရ။ “ယွံကောန်တၠ ခိုဟ်သန်ရ” ရဴဝွံ တဳလပိုဉ်ရေဝတ ဒုၚ်ဝန် ကုတဳလပိုဉ်ယသ ကောန်ဗဗၞးကာကဏ္ဍကရ။
✤✤✤ခဏ်ပဌမတုဲရ။✤✤✤
