၁၁.၃။ ဗြဟ္မဒဏ်
၄၄၅။ ပ္ဍဲအခိၚ်ဂှ် တဳလပိုဉ်အာနန္ဒဂှ်—
“ယွံတဳလပိုဉ်တအ် တဳလမၞုံပိုဉ်ကျာ်တြဲ ပ္ဍဲအခိၚ်ဆိုက်ညောန်ကဵုပပရိနိဗ္ဗာန်ဂှ် ယွံအာနန္ဒ အဲကျာ်ကလိလောန်စဴတုဲ သၚ်ဩဝ်စွံဗြဟ္မဒဏ် ကုခမဳဆန္နညိ” ရဴဝွံ ဟီုမြော်ဗကန်လဝ်ကဵုအဲဍိက်ရ ရဴဝွံ ဂရၚ်ပတီ ခမဳထေရ်ဇၞော်ဂမၠိုၚ်ရ။
ယွံကောန်တၠအာနန္ဒ တၠအဲဂှ် “ယွံတဳလပိုဉ် ဗြဟ္မဒဏ်မ္ဂးဂှ် ညးဍေံရော?” ရဴဝွံ ဂရၚ်ပတီသၟာန်ထောံ တဳလမၞုံပိုဉ်ကျာ်တြဲဟာ” ရဴဝွံ (သၟာန်အိုတ်ရ)။
ယွံတဳလပိုဉ်တအ် အဲဍိက်ဂှ် “ယွံတဳလပိုဉ် ဗြဟ္မဒဏ်မ္ဂးဂှ် ညးဍေံရော?” ရဴဝွံ ဂရၚ်ပတီသၟာန်လဝ် တဳလမၞုံပိုဉ်ကျာ်တြဲ ရဴဝွံ (သ္ဂးရ)။
ယွံအာနန္ဒ ခမဳဆန္နဂှ် အရာမိက်ဟီုဂှ် ကဵုဟီုညိ၊ ခမဳဂမၠိုၚ် ဟဂပ်ဝ်ဟီုကဵု ခမဳဆန္နရ၊ ဟဂပ်ဝ်ဒၠောံဗတောန်ရ၊ ဟဂပ်ဝ်ဝေတ်ဆေဝ်ဒဝ်ရ၊ ဣဝွံဂှ် ဗြဟ္မဒဏ်ရ ရဴဝွံ (တဳလမၞုံပိုဉ်ကျာ်တြဲ ဟီုမြော်ကၠုၚ်ရ ရဴဝွံဂရၚ်ပတီရ)။
ယွံကောန်တၠအာနန္ဒ ဒှ်သာ်ဂှ်မ္ဂး တၠအဲဟေၚ် ဩဝ်ကဵုစွံ ဗြဟ္မဒဏ် ကုခမဳဆန္နညိ ရဴဝွံ (သ္ဂးအိုတ်ရ)။
ယွံတဳလပိုဉ်တအ် မုရဴသာ်လဵု အဲဍိက်ဂွံကဵုစွံဗြဟ္မဒဏ် ကုခမဳဆန္နရော၊ ခမဳဂှ်ကြမ်ကြသအဵုသအာ်ရ၊ သကာတ်မြဟ်ရ ရဴဝွံ (ဂရၚ်ပတီရ)။
ယွံကောန်တၠအာနန္ဒ ဒှ်သာ်ဂှ်မ္ဂး ဩဝ်အာမွဲဟာန်ကေုာံခမဳဂမၠိုၚ်မဂၠိုၚ်ညိ ရဴဝွံ (သ္ဂးအိုတ်ရ)။
“ခိုဟ်သန်ရ ယွံတဳလပိုဉ်တအ်” ရဴဝွံ တဳလပိုဉ်အာနန္ဒ ဒုၚ်ဝန်ကုခမဳထေရ်ဇၞော်ဂမၠိုၚ်တုဲမ္ဂး မွဲဟာန်ကေုာံခမဳသၚ်ဂမၠိုၚ်မဂၠိုၚ်ဗၞတ်မသုန်ကၠံ နကဵုဂၠုၚ်မဒးစးတိုန်လတူ ဒစးတိုန်ဍုၚ်ကောသမ္ဗဳရ၊ စှေ်နူဂၠုၚ်တုဲ ဂဇအ်ဒၟံၚ်ပ္ဍဲသၟဝ်တမ်ဆုမွဲ ဇရေၚ်ဥဒျာန်သၟိၚ်ဥဒေနရ။
ပ္ဍဲအခိၚ်ဂှ် သၟိဥဒေန မွဲဟာန်ကေုာံကမၠောၚ်မောၚ်မ ဝေၚ်ဂြိုၚ်ကတိုၚ်ကမှ်မိပ်မြဟ်ဒၟံၚ်ပ္ဍဲဥဒျာန်ရ။ “တဳလပိုဉ်အာနန္ဒ အ္စာပိုဲတအ်ဂှ် ဂဇအ်ဒၟံၚ်ပ္ဍဲသၟဝ်တမ်ဆုမွဲ ဇရေၚ်ဥဒျာန်ရဂး” ရဴဝွံ ကမၠောၚ်မောၚ်မ သၟိၚ်ဥဒေန သ္ဂောံမိၚ်ကေတ်ရ။ ပ္ဍဲအခိၚ်ဂှ် ကမၠောၚ်မောၚ်မဂှ် “ယွံတၠညးသၟိၚ်ဇၞော် တဳလပိုဉ်အာနန္ဒ အ္စာပိုဲတအ်ဂှ် ဂဇအ်ဒၟံၚ်ပ္ဍဲသၟဝ်တမ်ဆုမွဲ ဇရေၚ်ဥဒျာန်ရဂး၊ ယွံတၠညးသၟိၚ်ဇၞော် ပိုဲဍိက်တအ်ညးဂမၠိုၚ် နွံပၟိက်သၟိက်မိက်ဗဵုလ္ၚောဝ် တဳလပိုဉ်အာနန္ဒအိုတ်ရ” ရဴဝွံ ဟီုပတီ သၟိၚ်ဥဒေနအိုတ်ရ။
ဒှ်သာ်ဂှ်မ္ဂး မၞးတအ်ညးဂမၠိုၚ် ဩဝ်ဗဵုလ္ၚောဝ် ခမဳအာနန္ဒအိုတ်ညိ ရဴဝွံ (သ္ဂးရ)။
ပ္ဍဲအခိၚ်ဂှ် ကမၠောၚ်မောၚ်မ သၟိၚ်ဥဒနေဂှ် ပြာပ်အာဇရေၚ် တဳလပိုဉ်အာနန္ဒတုဲ လ္ၚောဝ်သ္ပဝတ် တဳလပိုဉ်အာနန္ဒတုဲမ္ဂး ဂဇအ်ဒၟံၚ်ပ္ဍဲဒၞာဲမွဲရ၊ ကမၠောၚ်မောၚ်မ သၟိၚ်ဥဒေန မဂဇအ်ဒၟံၚ်ပ္ဍဲဒၞာဲမွဲဂှ် နကဵုဂလာန်ဓရ် တဳလပိုဉ်အာနန္ဒ ကဵုတီညာတ်ကေတ (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုကေက်သကာ ကဵုမြဟ်မြာရ။
ပ္ဍဲအခိၚ်ဂှ် ကမၠောၚ်မောၚ်မသၟိၚ်ဥဒေနဂှ် နကဵုဂလာန်ဓရ် တဳလပိုဉ်အာနန္ဒ ကဵုတီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုကေက်သကာကဵုမြဟ်မြာတုဲမ္ဂး ကဵုဒါန်ယာတ်ကၞေဟ်ဂမၠိုၚ်မသုန်ကၠံ ကုတဳလပိုဉ်အာနန္ဒရ။ ကြဴနူဂှ် ကမၠောၚ်မောၚ်မ သၟိၚ်ဥဒေနဂှ် သ္ဍိုက်မၠိုက်ဂလာန်မဂပ်ဝ်ဟီုတွံ တဳလပိုဉ်အာနန္ဒလောန်ဒှ်တုဲ အိုဟ်တၟိုဟ်လောန်ဒှ်တုဲ ဒၠိုက်ကတဵုနူဒၞာဲတုဲမ္ဂး လ္ၚောဝ်သ္ပဝတ်တဳလပိုဉ်အာနန္ဒတုဲ သ္ပရှေ်သှေ်ရဴဂဴပြာပ်အာ ဇရေၚ်သၟိၚ်ဥဒေနရ။ သၟိၚ်ဥဒေန ညာတ်ကေတ် ကမၠောၚ်မောၚ်မ မကၠုၚ်နူဇမ္ၚောဲမ္ဂး “မၞးတအ်ညးဂမၠိုၚ် ဆဵုညာတ်ခမဳအာနန္ဒအိုတ်ဟာ” ရဴဝွံ သၟာန်သၟုက် ကမၠောၚ်မောၚ်မရ။ ယွံတၠညးသၟိၚ်ဇၞော် ပိုဲဍိက်တအ်ညးဂမၠိုၚ် ဂွံဆဵုညာတ်ကၠုၚ် တဳလပိုဉ်အာနန္ဒအိုတ်ရ ရဴဝွံ (ဟီုပတီရ)။ မၞးတအ်ညးဂမၠိုၚ် ဂွံကဵုကၠုၚ်ဒါန်မမိက်ကဵုမွဲမွဲ ကုခမဳအာနန္ဒအိုတ်ဟာ ရဴဝွံ (သၟာန်သၟုက်ရ)။ ယွံတၠညးသၟိၚ်ဇၞော် ပိုဲဍိက်တအ်ညးဂမၠိုၚ်ကဵုကၠုၚ်ဒါန် ယာတ်ကၞေဟ်ဂမၠိုၚ် မသုန်ကၠံ ကုတဳလပိုဉ်အာနန္ဒအိုတ်ရ ရဴဝွံ (ဟီုပတီရ)။
သၟိၚ်ဥဒေနဂှ် “မုဟိုတ် ခမဳအာနန္ဒ ဒုၚ်ဂိုၚ်ကေတ် သ္ၚာဗွဲမဂၠိုၚ်ဗၞတ်ဂှ်ရော၊ ခမဳအာနန္ဒဂှ် ပွမကူသာန်သွံရာန်ယာတ်လေဝ် ကြက်သ္ပဟာ၊ ဆေၚ်ယာတ်လေဝ်လးတေဝ်ဟာ” ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ။
ကြဴနူဂှ် သၟိၚ်ဥဒေနပြာပ်အာဇရေၚ် တဳလပိုဉ်အာနန္ဒတုဲ ဟီုဂလာန်မိပ်စိုတ်အိုဟ်တၟိုဟ်ဆက်မိတ် ကေုာံ တဳလပိုဉ်အာနန္ဒရ၊ ဟီုပတုဲကၠေံဂလာန်ထေက်ကဵုမိပ် စိုတ်အိုတ်ဟ်တၟိုဟ် ထေက်ကဵုဗှ်ဗၞုဟ်တုဲ သီုမဂဇအ်ဒၟံၚ်ပ္ဍဲဒၞာဲမွဲဂှ်—
“ယွံတဳလပိုဉ်အာနန္ဒ ကမၠောၚ်မောၚ်မအဲဍိက်တအ် ကၠုၚ်စိုပ်ဌာန်ဝွံဟာ” ရဴဝွံ ဂရၚ်ပတီ တဳလပိုဉ်အာနန္ဒရ။
ယွံသၟိၚ်ဇၞော် ကမၠောၚ်မောၚ်မ တၠအဲ ကၠုၚ်စိုပ်ဌာန်ဝွံရ ရဴဝွံ (သ္ဂးရ)။
ကဵုဒါန်မမိက်ကဵုမွဲမွဲ ကုတဳလပိုဉ်အာနန္ဒဟာ ရဴဝွံ (ဂရၚ်ပတီရ)။
ယွံသၟိၚ်ဇၞော် ကဵုဒါန် ကုအဲ ယာတ်ကၞေဟ်ဂမၠိုၚ်မသန်ကၠံရ ရဴဝွံ (သ္ဂးရ)။
သ္ၚာဗွဲမဂၠိုၚ်ဗၞတ်ဝွံ တဳလပိုဉ်အာနန္ဒ ပသာ်သ္ပရော? ရဴဝွံ (ဂရၚ်ပတီရ)။
ယွံသၟိၚ်ဇၞော် ကြက်ပါ်ပရအ်မွဲစွံ ကေုာံခမဳဂမၠိုၚ်မၞုံကဵုသ္ၚာမဍိုန်လျရ ရဴဝွံ (သ္ဂးရ)။
ယွံတဳလပိုဉ်အာနန္ဒ သ္ၚာတြေံဂမၠိုၚ်မဍိုန်လျဂှ် ပသာ်သ္ပအိုတ်ရော? ရဴဝွံ (ဂရၚ်ပတီရ)။
ယွံသၟိၚ်ဇၞော် သ္ၚာတြေံဂမၠိုၚ်မဍိုန်လျဂှ် ကြက်သ္ပသၞာလးလတူအိုတ်ရ ရဴဝွံ (သ္ဂးရ)။
ယွံတဳလပိုဉ်အာနန္ဒ သၞာလးလတူတြေံဂမၠိုၚ်ဂှ် ပသာ်သ္ပအိုတ်ရော? ရဴဝွံ (ဂရၚ်ပတီရ)။
ယွံသၟိၚ်ဇၞော် သ္ၚာလးလတူတြေံဂမၠိုၚ်ဂှ် ကြပ်သ္ပဂရောပ်ဖုန်အိုတ်ရ ရဴဝွံ (သ္ဂးရ)။
ယွံတဳပိုဉ်အာနန္ဒ ဂရောပ်ဖုန်တြေံဂမၠိုၚ်ဂှ် ပသာ်သ္ပအိုတ်ရော? ရဴဝွံ (ဂရၚ်ပတီရ)။
ယွံသၟိၚ်ဇၞော် ဂရောပ်ဖုန်တြေံဂမၠိုၚ်ဂှ် ကြက်သ္ပသၞာလးတိအိုတ်ရ ရဴဝွံ (သ္ဂးရ)။
ယွံတဳလပိုဉ်အာနန္ဒ သၞာလးတိတြေံဂမၠိုၚ် ပသာ်သ္ပအိုတ်ရော? ရဴဝွံ (ဂရၚ်ပတီရ)။
ယွံသၟိၚ်ဇၞော် သၞာလးတိတြေံဂမၠိုၚ်ဂှ် ကြက်သ္ပကဝးဇုက်ဇိုတ်ဇိုၚ်အိုတ်ရ ရဴဝွံ (သ္ဂးရ)။
ယွံတဳလပိုဉ်အာနန္ဒ ကဝးဇုက်ဇိုတ်ဇိုၚ်တြေံဂမၠိုၚ်ဂှ် ပသာ်သ္ပအိုတ်ရော? ရဴဝွံ (ဂရၚ်ပတီရ)။
ယွံသၟိၚ်ဇၞော် ကဝးဇုက်ဇိုတ်ဇိုၚ်တြေံဂမၠိုၚ်ဂှ် ကြက်သ္ပယာတ်ဇိုတ်မၠိုက်အိုတ်ရ ရဴဝွံ (သ္ဂးရ)။
ယွံတဳလပိုဉ်အာနန္ဒ ယာတ်ဇိုတ်မၠိုက်တြေံဂမၠိုၚ်ဂှ် ပသာ်သ္ပအိုတ်ရော? ရဴဝွံ (ဂရၚ်ပတီရ)။
ယွံသၟိၚ်ဇၞော် ယာတ်ဇိုတ်မၠိုက်တြေံဂမၠိုၚ်ဂှ် ဒန်ထောံလှေက်တုဲ ဖုဲတဴနလှိုက်သရီုတုဲမ္ဂး ကြက်လံက်လေဝ်တိဗွဝ်ဖအုံအိုတ်ရ ရဴဝွံ (သ္ဂးရ)။
ပ္ဍဲအခိၚ်ဂှ် သၟိၚ်ဥဒေနဂှ် “ခမဳဂမၠိုၚ်မတၞောဝ်ကျာ် ကောန်သၟိၚ်သကျဝၚ်အိုတ်သီုဝွံ ရၚ်တၠုၚ် သ္ပတဴဗွဲမဗဗွဲအိုတ်ရ၊ ဟွံကဵုအာစိုပ်ပွမလီုလာ် မသက္ကုဒတုဲဖဵုအိုတ်ရ” ရဴဝွံ ယာတ်ဂမၠိုၚ်မသုန်ကၠံသအာၚ်လေဝ် ကဵုဒါန် ကုတဳလပိုဉ်အာနန္ဒရ။ ပိဏ္ဍပါတ်သ္ၚာ မတွံဂးသ္ၚာလ္ၚီဝွံ ကတဵုဒှ်ကၠုၚ် ကုတဳလပိုဉ်အာနန္ဒ ဗွဲကိုပ်ကၠာရ။
ပ္ဍဲအခိၚ်ဂှ် တဳလပိုဉ်အာနန္ဒ ပြာပ်အာ ဘာဃောသိတာရာမ်တုဲ ဂဇအ်ဒၟံၚ်ပ္ဍဲသၞာမလးပညပ်လဝ်ရ၊ ပ္ဍဲအခိၚ်ဂှ် တဳလပိုဉ် ဆန္နပြာပ်ကၠုၚ်ဇရေၚ် တဳလပိုဉ်အာနန္ဒတုဲ လ္ၚောဝ်သ္ပဝတ် တဳလပိုဉ်အာနန္ဒတုဲမ္ဂး ဂဇအ်ဒၟံၚ်ပ္ဍဲဒၞာဲမွဲရ၊ တဳလပိုဉ်ဆန္န မဂဇအ်ဒၟံပ္ဍဲဒၞာဲမွဲဂှ်— “ယွံကောန်တၠဆန္န သၚ် ကဵုစွံဗြဟ္မဒဏ် ကုတၠအဲရ” ရဴဝွံ တဳလပိုဉ်အာနန္ဒ သ္ဂးရ။
ယွံတဳလပိုဉ်အာနန္ဒ ကဵုစွံ မုဗြဟ္မဒဏ်ရော? ရဴဝွံ (ဂရၚ်ပတီရ)။
ယွံကောန်တၠဆန္န တၠအဲ အရာမိက်ဟီုဂှ် ကဵုဟီု ခမဳဂမၠိုၚ်ညိ၊ ခမဳဂမၠိုၚ် ဟဂပ်ဝ်ဟီုကဵုတၠအဲရ၊ ဟဂပ်ဝ်ဒၠောံဗတောန်ရ၊ ဟဂပ်ဝ်ဝေတ်ဆေဝ်ဒဝ်ရ၊ (ဣဝွံဂှ် ဗြဟ္မဒဏ်ရ ရဴဝွံ သ္ဂးရ)။
“ယွံတဳလပိုဉ်အာနန္ဒ သ္ပတမ်နူ ခမဳဂမၠိုၚ် မဟဂပ်ဝ်ဟီုသ္ဂး မဟွံဒၠောံဗတောန် မဟွံဝေတ်ဆေဝ်ဒဝ် အဲဍိက်တုဲ ဒှ်ဂစိုတ်ထောံ အဲဍိက်ဟေၚ်ရ ဟွံသေၚ်ဟာ” ရဴဝွံ ပ္ဍဲဒၞာဲဂှ်ဟေၚ် ဒၚ်သၠၚ်တုဲ လောတ်စှ်ရ။
ပ္ဍဲအခိၚ်ဂှ် တဳလပိုဉ်ဆန္နဂှ် ဟိုတ်ဗြဟ္မဒဏ်ပ္ဍဵုပ္ဍိုက်ရာန်သကိုတ်ကီု ဟိုတ်မဂွကီု ဟိုတ်မက္ဍုဟ်မၠေံကီု ညးမွဲဓဝ်ပြာပ်အာဌာန် လ္ၚုသ္ၚိတ်ဇြတုဲ ဟွံဝိဝိၚ်ဟိုတ်မာဲဒှ်တုဲ ပတိတ်ဇြဟတ် ဗွဲမသကာတ်မြဟ်ဒှ်တုဲ မၞုံကဵုစိုတ်မတန်ကြန်ဂှ်ဒှ်တုဲ ပဒတဴမ္ဂး ဖဵု (အရဟတ္တဖိုလ်) မဒှ်လအိတ် ဒ္ဂေတ်မပြဲ မဟွံမွဲပတောံၜတ် ကောန်ဂကူဂမၠိုၚ် နူအဝေါၚ်ဘဝခရှ် မလုပ်စိုပ်အဝေါၚ်ဘဝခမဳ ဗွဲမဒးရး မဂပ်ဝ်နွံပၟိက်ဂှ် ခြာဟွံလအ် ပ္ဍဲဘဝလၟုဟ်ဟေၚ် အလဵုဇကု သ္ပကေတ်ဇၞောဝ်မတ်နကဵုဉာဏ်တၟေၚ်ကၠာ အာစိုပ်တုဲ သ္ပဒတဴရ၊ “ပွမတန်ပဋိသန္ဓိအိုတ်တုဲရ၊ ဒ္ဂေတ်လ္ၚတ်ဒ္ဂေတ်မပြဲတုဲရ၊ သ္ပပတုဲကိစ္စမဂ်တုဲရ၊ တၞဟ်နကိစ္စမဂ်ဝွံ ကိစ္စထေက်ကဵုဒးသ္ပ မွဲသအာၚ်ဟွံမွဲတုဲရ” ရဴဝွံ တီရ၊ တဳလပိုဉ်ဆန္နဂှ် ပၞောဝ်ကဵုတၠအရှန်ဂမၠိုၚ် ဒှ်ပါလုပ်လၟိဟ် မွဲဇကုရ။ ပ္ဍဲအခိၚ်ဂှ် တဳလပိုဉ်ဆန္န အာစိုပ်အရဟတ္တဖိုဟ်တုဲ ပြာပ်အာဇရေၚ် တဳလပိုဉ်အာနန္ဒတုဲပ္ဍဲကြဴ “ယွံတဳလပိုဉ်အာနန္ဒ ပ္ဍဲအခိၚ်လၟုဟ် ဩဝ်ကဵုလလမ် ဗြဟ္မဒဏ် ကုအဲဍိက်ညိ” ရဴဝွံ ဂရၚ်ပတီရ။ ယွံကောန်တၠဆန္န တၠအဲ သ္ပတအ်နူတ္ၚဲ မသ္ပကေတ်ဇၞော်မတ် အရဟတ္တဖိုဟ်တုဲ ဗြဟ္မဒဏ် လလမ်အာ ကုတၠအဲတုဲရ ရဴဝွံ သ္ဂးရ။
ပ္ဍဲဝိနယသၚ်္ဂဳတိဝွံ ခမဳမသုန်ကၠံ ဟိုတ်မဟွံမွဲယုတ်,လောန်ဂှ်ရ ဝိနယသၚ်္ဂဳတိဝွံ ကော်ခဴဂး “ပဥ္စသတိကသၚ်္ဂါယန” ရ။
✵✵✵ပဉ္စသတိပကက္ခန္ဓဨကာဒသမတုဲရ။✵✵✵
ပ္ဍဲခန္ဓကဝွံ ဝတ္ထုမၞုံၜါစှော်ပိရ။
