၁၁.၂။ ခုဒ္ဒါနုခုဒ္ဒကသိက္ခာပဒကထာ
၄၄၁။ ကြဴနူဂှ် တဳလပိုဉ်အာနန္ဒဂှ် “ယွံတဳလပိုဉ်တအ် တဳလမၞုံပိုဉ်ကျာ်တြဲ ပ္ဍဲအခိၚ်ဆိုက်ညောန်ကဵုပပရိနိဗ္ဗာန်ဂှ် ယွံအာနန္ဒ အခိၚ်အဲကျာ်မကလိလောန်အာဂှ် သၚ်မိက်နုက်ကၠေံ ခုဒ္ဒါနုခုဒ္ဒကသိက္ခာပိုဒ်ဂမၠိုၚ်မ္ဂး နုက်ကၠေံညိ” ရဴဝွံ ဟီုမြော်လဝ်ကဵုအဲဍိက် ရဴဝွံ ဂရၚ်ပတီ ကုခမဳထေရ်ဇၞော်ဂမၠိုၚ်ရ။
ယွံကောန်တၠအာနန္ဒ တၠအဲဂှ် “ယွံတဳလမၞုံပိုဉ် ခုဒ္ဒါနုခုဒ္ဒကသိက္ခာပိုဒ်ဂမၠိုၚ်တုန် ညးဍေံအိုတ်ရော” ရဴဝွံ ဂရၚ်ပတီသၟာန်လဝ် တဳလမၞုံပိုဉ်ကျာ်တြဲဟာ ရဴဝွံ (သၟာန်အိုတ်ရ)။
ယွံကောန်တၠအာနန္ဒ တၠအဲဂှ် “ယွံတဳလမၞုံပိုဉ် ခုဒ္ဒါနုခုဒ္ဒကသိက္ခာပိုဒ်ဂမၠိုၚ်တုန် ညးဍေံအိုတ်ရော” ရဴဝွံ ဟွံဂရၚ်ပတီသၟာန်ဒး တဳလမၞုံပိုဉ်ကျာ်တြဲရ ရဴဝွံ (ဂရၚ်ပတီရ)။
မှာထေရ်ဂမၠိုၚ်လ္ၚဵုဂှ် “ပါဲကၠေံ ပါရာဇ်ဂမၠိုၚ်ပန်ဂကူတုဲ သိက္ခာပိုဉ်သှေ်သၟေဟ်ဂမၠိုၚ်ဂှ် ခုဒ္ဒါနုခုဒ္ဒကသိက္ခာပိုဒ်ဂမၠိုၚ်ရ” ရဴဝွံ (သ္ဂးအိုတ်ရ)။
မှထေရ်ဂမၠိုၚ်လ္ၚဵုဂှ် “ပါဲကၠေံ ပါရာဇ်ဂမၠိုၚ်ပန်ဂကူတုဲကီု ပါဲကၠေံ သံဃာဒိသေသ်ဂမၠိုၚ် စှ်ပိဂကူတုဲကီု သိက္ခာပိုဒ်သှေ်သၟေဟ်ဂမၠိုၚ်ဂှ် ခုဒ္ဒါနုခုဒ္ဒကသိက္ခာပိုဒ်ဂမၠိုၚ်ရ” ရဴဝွံ (သ္ဂးအိုတ်ရ)။
မှာထေရ်ဂမၠိုၚ်လ္ၚဵုဂှ် “ပါဲကၠေံ ပါရာဇ်ဂမၠိုၚ်ပန်ဂကူတုဲကီု ပါဲကၠေံ သံဃာဒိသေသ်ဂမၠိုၚ် စှ်ပိဂကူတုဲကီု ပါဲကၠေံ အနိယတဂမၠိုၚ်ၜါဂကူတုဲကီု သိက္ခာပိုဒ်သှေ်သၟေဟ်ဂမၠိုၚ်ဂှ် ခုဒ္ဒါနုခုဒ္ဒကသိက္ခာပိုဒ်ဂမၠိုၚ်ရ” ရဴဝွံ (သ္ဂးအိုတ်ရ)။
မှာထေရ်ဂမၠိုၚ်လ္ၚဵုဂှ် “ပါဲကၠေံ ပါရာဇ်ဂမၠိုၚ်ပန်ဂကူတုဲကီု ပါဲကၠေံ သံဃာဒိသေသ်ဂမၠိုၚ် စှ်ပိကူတုဲကီု ပါဲကၠေံ အနိယတဂမၠိုၚ်ၜါဂကူတုဲကီု ပါဲကၠေံ နိဿဂ္ဂိပါဲစိုတ်ဂမၠိုၚ်ပိစှော်ဂကူတုဲကီု သိက္ခာပိုဒ်သှေ်သၟေဟ်ဂမၠိုၚ်ဂှ် ခုဒ္ဒနုခုဒ္ဒကသိက္ခာပိုဒ်ဂမၠိုၚ်ရ” ရဴဝွံ (သ္ဂးအိုတ်ရ)။
မှာထေရ်ဂမၠိုၚ်လ္ၚဵုဂှ် “ပါဲကၠေံ ပါရာဇ်ဂမၠိုၚ်ပန်ဂကူတုဲကီု ပါဲကၠေံ သံဃာဒိသေသ်ဂမၠိုၚ်စှ်ပိဂကူတုဲကီု ပါဲကၠေံ အနိယတဂမၠိုၚ်ၜါဂကူတုဲကီု ပါဲကၠေံ နိဿဂ္ဂိပါဲစိုတ်ဂမၠိုၚ်ပိစှော်ဂကူတုဲကီု ပါဲကၠေံ သုဒ္ဓပါဲစိုတ်ဂမၠိုၚ်ဒ္စိတ်စှော်ၜါဂကူဂမၠိုၚ်တုဲကီု သိက္ခာပိုဒ်သှေ်သၟေဟ်ဂမၠိုၚ်ဂှ် ခုဒ္ဒါနုခုဒ္ဒကသိက္ခာပိုဒ်ဂမၠိုၚ်ရ” ရဴဝွံ (သ္ဂးအိုတ်ရ)။
မှာထေရ်ဂမၠိုၚ်လ္ၚဵုဂှ် “ပါဲကၠေံ ပါရာဇ်ဂမၠိုၚ်ပန်ဂကူတုဲကီု ပါဲကၠေံ သံဃာဒိသေသ်ဂမၠိုၚ်စှ်ပိဂကူတုဲကီု ပါဲကၠေံ အနိယတဂမၠိုၚ်ၜါဂကူတုဲကီု ပါဲကၠေံ နဿဂ္ဂိပါဲစိုတ်ဂမၠိုၚ်ပိစှော်ဂကူတုဲကီု ပါဲကၠေံ သုဒ္ဓပါဲစိုတ်ဂမၠိုၚ်ဒ္စိတ်စှော်ၜါဂကူဂမၠိုၚ်တုဲကီု ပါဲကၠေံ ပါဋိဒေသနိက်ဂမၠိုၚ်ပန်ဂကူတုဲကီု သိက္ခာပိုဒ်သှေ်သၟေဟ်ဂမၠိုၚ်ဂှ် ခုဒ္ဒါနုခုဒ္ဒကသိက္ခာပိုဒ်ဂမၠိုၚ်ရ” ရဴဝွံ (သ္ဂးအိုတ်ရ)။
၃၃၂။ ပ္ဍဲအခိၚ်ဂှ် တဳလပိုဉ်မဟာကဿပ ကဵုသၚ်တီရ—
“ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သိက္ခာပိုဒ်မစပ်ကေုာံမၞိဟ်ဂမၠိုၚ်လေဝ် နွံကုပိုဲညးဂမၠိုၚ်အိုတ်ရ၊ ‘ဣဝွံဂှ် ဂပ်ဝ်ကုခမဳဂမၠိုၚ် မဒှ်တၞောဝ်ကျာ် ကောန်သၟိၚ်သကျဝၚ်ဂမၠိုၚ်ရ၊ ဣဝွံဂှ် ဟွံဂပ်ဝ်ရ’ ရဴဝွံ မၞိဟ်ဂမၠိုၚ်လေဝ် တီအိုတ်ရ။ ပိုဲညးဂမၠိုၚ် ယဝ်နုက်ထောံ ခုဒ္ဒါနုခုဒ္ဒကသိက္ခာပိုဒ်ဂမၠိုၚ်အိုတ်မ္ဂး၊ ‘ခမဳဂေါတမဂှ် ပညပ်လဝ် သိက္ခာပိုဒ်ကုကွးဂမၠိုၚ် စဵုကဵုဗၞတ်အထိုက်အတန်ယေက်ပၟတ်ပၠိုတ်ညိၚ်ဟေၚ်ရ၊ ဗၞတ်အခိၚ်ကျာ်အ္စာ ခမဳဂမၠိုၚ်ဝွံ တန်တဴဂှ် ခမဳဂမၠိုၚ်ဝွံ ဒ္ဂေတ်ပ္ဍဲသိက္ခာပိုဒ်ဂမၠိုၚ်အိုတ်ရ၊ ဟိုတ်နူကျာ်အ္စာ ခမဳဂမၠိုၚ်ဝွံ ပပရိနိဗ္ဗာန်ဂှ် လၟုဟ် ခမဳဂမၠိုၚ်ဝွံ ဟွံဒ္ဂေတ်ပ္ဍဲသိက္ခာပိုဒ်ဂမၠိုၚ်အိုတ်ရ’ ရဴဝွံ ညးဟီုသ္ဂးဂမၠိုၚ် ကြက်နွံအိုတ်ရ၊ ကမ်မၞုံကဵု အခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် ဟွံပညပ် မဟဂွံပညပ်လဝ်ဏီရ၊ ဟွံသကုတ်ကၠေံ ပညပ်လဝ်တုဲဂှ်ရ၊ အတိုၚ်ပညပ်လဝ်တုဲဂှ် ဒဂိုန်ဂိုၚ်ကေတ် ပ္ဍဲသိက္ခာပိုဒ်ဂမၠိုၚ်တုဲ ဒ္ဂေတ်အာရ၊ ဣဝွံတုန် ပွမကဵုတီရောၚ်။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သိက္ခာပိုဒ်မစပ်ကေုာံ မၞိဟ်ဂမၠိုၚ်လေဝ် နွံကုပိုဲညးဂမၠိုၚ်အိုတ်ရ၊ ‘ဣဝွံဂှ် ဂပ်ဝ်ကုခမဳဂမၠိုၚ်မတၞောဝ်ကျာ်ကောန်သၟိၚ်သကျဝၚ်ဂမၠိုၚ်ရ၊ ဣဝွံဂှ် ဟွံဂပ်ဝ်ရ’ ရဴဝွံ မၞိဟ်ဂမၠိုၚ်လေဝ် တီအိုတ်ရ။ ပိုဲညးဂမၠိုၚ် ယဝ်နုက်ထောံ ခုဒ္ဒါနုခုဒ္ဒကသိက္ခာပိုဒ်ဂမၠိုၚ်အိုတ်မ္ဂး ‘ခမဳဂေါတမဂှ် ပညပ်လဝ် သိက္ခာပိုဒ် ကုကွးဂမၠိုၚ် စဵုကဵုဗၞတ်အထိုက်အတန်ယေက်ပၟတ်ပၠိုတ်ညိၚ်ဟေၚ်ရ၊ ဗၞတ်အခိၚ်ကျာ်အ္စာခမဳဂမၠိုၚ်ဝွံ တန်တဴဂှ် ခမဳဂမၠိုၚ်ဝွံ ဒ္ဂေတ်ပ္ဍဲသိက္ခာပိုဒ်ဂမၠိုၚ်အိုတ်ရ၊ ဟိုတ်နူကျာ်အ္စာ ခမဳဂမၠိုၚ်ဝွံ ပပရိနိဗ္ဗာန်ဂှ် လၟုဟ် ခမဳဂမၠိုၚ်ဝွံ ဟွံဒ္ဂေတ်ပ္ဍဲသိက္ခာပိုဒ်ဂမၠိုၚ်အိုတ်ရ’ ရဴဝွံ ညးဟီုသ္ဂးဂမၠိုၚ် ကြက်နွံအိုတ်ရ၊ သၚ် ဟွံပညပ် မဟဂွံပညပ်လဝ်ဏီရ၊ ဟွံသကုတ်ကၠေံ ပညပ်လဝ်တုဲဂှ်ရ၊ အတိုၚ်ပညပ်လဝ်တုဲဂှ် ဒဂိုန်ဂိုၚ်ကေတ် ပ္ဍဲသိက္ခာပိုဒ်ဂမၠိုၚ်တုဲ ဒ္ဂေတ်အာရ။
ယြဴကုတဳလပိုဉ်မွဲ မၞုံကဵုပွမသ္ဍိုက်မၠိုက် ပွမဟွံပညပ် မဟဂွံပညပ်လဝ်ဏီ ပွမဟွံသကုတ်ကၠေံ ပညပ်လဝ်တုဲဂှ် အတိုၚ်ပညပ်လဝ်တုဲဂှ် ဒဂိုန်ဂိုၚ်ကေတ် ပ္ဍဲသိက္ခာပိုဒ်ဂမၠိုၚ်တုဲ ပွမဒ္ဂေတ်အာရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
သၚ် ဟွံပညပ် မဟဂွံပညပ်လဝ်ဏီရ၊ ဟွံသကုတ်ကၠေံ ပညပ်လဝ်တုဲဂှ်ရ၊ အတိုၚ်ပညပ်လဝ်တုဲဂှ် ဒဂိုန်ဂိုၚ်ကေတ် ပ္ဍဲသိက္ခာါပိုဒ်ဂမၠိုၚ်တုဲ ဒ္ဂေတ်အာရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ်ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။
၄၄၃။ ပ္ဍဲအခိၚ်ဂှ် ခမဳထေရ်ဇၞော်ဂမၠိုၚ်—
“ယွံကောန်တၠအာနန္ဒ တၠအဲဂှ် ‘ယွံတဳလမၞုံပိုဉ် ခုဒ္ဒါနုခုဒ္ဒကသိက္ခာပိုဒ်ဂမၠိုၚ် မုရဴသိက္ခာပိုဒ်ဂမၠိုၚ်လဵုရော?’ ရဴဝွံ ဟွံဂရၚ်ပတီသၟာန်ထောံ တဳလမၞုံပိုဉ်ကျာ်တြဲရ၊ ဣဝွံဂှ် ပွသ္ပဟွံဒးရး တၠအဲရ၊ ဩဝ်ဟီုလၟိၚ်ဒေသနာ ပွသ္ပဟွံဒးရးဂှ်ညိ” ရဴဝွံ သ္ဂးကဵု တဳလပိုဉ်အာနန္ဒအိုတ်ရ။
ယွံတဳလပိုဉ်တအ် အဲဍိက် ဟိုတ်မဝိုတ်အာသတိဂှ်ရ ‘ယွံတဳလမၞုံပိုဉ် ခုဒ္ဒါနုခုဒ္ဒကသိက္ခာပိုဒ်ဂမၠိုၚ် မုရဴသိက္ခာပိုဒ်ဂမၠိုၚ်လဵုရော?’ ရဴဝွံ ဟွံဂရၚ်ပတီသၟာန်ဒး တဳလမၞုံပိုဉ်ကျာ်တြဲရ။ ပွဂှ် ပွသ္ပဟွံဒးရး ရဴဝွံ အဲဍိက်ဟွံညာတ်ရ၊ ၜိုန်ဂှ်လေဝ် ဗွဲအစောံလျုၚ်ပတှ်ေ ကုတဳလပိုဉ်တအ် ညးဂမၠိုၚ် ဟီုလၟိၚ်ဒေသနာ ပွသ္ပဟွံဒးရးဂှ်ရ။
ယွံကောန်တၠအာနန္ဒ တၠအဲဂှ် လိုန်သ္ၚာသၞုက်ဗြဲ တဳလမၞုံပိုဉ်ကျာ်တြဲတုဲ ဇိၚ်ရ၊ ဣဝွံလေဝ် ပွသ္ပဟွံဒးရး တၠအဲရ၊ ဩဝ်ဟီုလၟိၚ်ဒေသနာ ပွသ္ပဟွံဒးရးဂှ်ညိ ရဴဝွံ (သ္ဂးအိုတ်ရ)။
ယွံတဳလပိုဉ်တအ် အဲဍိက် ဗွဲအစောံဟွံရှေ်သှေ်ရဴဂဴ လိုန်သ္ၚာသၞုက်ဗြဲ တဳလမၞုံပိုဉ်ကျာ်တြဲတုဲ ဇိၚ်ဟွံသေၚ်ရ၊ ပွဂှ် ပွသ္ပဟွံဒးရး ရဴဝွံ အဲဍိက် ဟွံညာတ်ရ၊ ၜိုန်ဂှ်လေဝ် ဗွဲအစောံလျုၚ်ပတှ်ေ ကုတဳလပိုဉ်တအ်ညးဂမၠိုၚ် ဟီုလၟိၚ်ဒေသနာ ပွသ္ပဟွံဒးရးဂှ်ရ။ ယွံကောန်တၠအာနန္ဒ တၠအဲဂှ် ကဵုမာတုဂါမ်ဂမၠိုၚ် လ္ၚောဝ်ဇကု (ဇွ) တဳလမၞုံပိုဉ်ကျာ်တြဲ ဗွဲကိုပ်ကၠာရ၊ ဍာ်ရမတ်မာတုဂါမ်ဂမၠိုၚ် မလရိုအ်ယာံဂှ် လေတ်ဒးဇကု (ဇွ) တဳလမၞုံပိုဉ်ကျာ်တြဲရ၊ ဣဝွံလေဝ် ပွသ္ပဟွံဒးရး တၠအဲရ၊ ဩဝ်ဟီုလၟိၚ်ဒေသနာ ပွသ္ပဟွံဒးရးဂှ်ညိ ရဴဝွံ (သ္ဂးအိုတ်ရ)။
ယွံတဳလပိုဉ်တအ် အဲဍိက် “(ပွမအာ) ပ္ဍဲဟွံသေၚ်ကဵုအခိၚ် လ္ပကဵုဒှ် ကုမာတုဂါမ်ဂမၠိုၚ်ဝွံညိ” ရဴဝွံ (ဗှ်ဗၞုဟ်ကေတ်တုဲ) ကဵုမာတုဂါမ်ဂမၠိုၚ် လ္ၚောဝ်ဇကု (ဇွ) တဳလမၞုံပိုဉ်ကျာ်တြဲ ဗွဲကိုပ်ကၠာရ၊ ပွဂှ် ပွသ္ပဟွံဒးရး ရဴဝွံ အဲဍိက် ဟွံညာတ်ရ၊ ၜိုန်ဂှ်လေဝ် ဗွဲအစောံလျုၚ်ပတှ်ေ ကုတဳလပိုဉ်တအ်ညးဂမၠိုၚ် ဟီုလၟိၚ်ဒေသနာ ပွသ္ပဟွံဒးရးဂှ်ရ။
ယွံကောန်တၠအာနန္ဒ တဳလမၞုံပိုဉ်ကျာ်တြဲ သီုကဵုသ္ပတဴနိမိတ်မကြံၚ်မ္ၚိုဟ် သီုကဵုသ္ပတဴသၞိၚ်အရံၚ်မကြံၚ်မ္ၚိုဟ်ဂှ် “သွက်ဂွံဒှ်ဒတုဲမြမောဝ် မၞိဟ်မဂၠိုၚ်ကီု သွက်ဂွံဒှ်တသိုခ်မၞိဟ်မဂၠိုၚ်ကီု သွက်ဂွံမၚ်မွဲလိုက်ကီု သွက်ဂွံဒှ်ဖဵုကီု သွက်ဂွံဒှ်ဒတုဲမြမောဝ်ကီု သွက်ဂွံဒှ်တသိုခ် မၞိဟ်ဒေဝတဴဂမၠိုၚ်ကီု တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဩဝ်တန်တဴ လုကဴအာယုကပ်ညိ၊ တဳလမၞုံပိုဉ်ကျာ်တြဲ မလေပ်သ္ဂးတဴဂလာန်ခိုဟ်ဆာဲ ဩဝ်တန်တဴ လုကဴအာယုကပ်ညိ” ရဴဝွံ တၠအဲ ဟွံအာတ်ပါန် အခေါၚ်ထောံ တဳလမၞုံပိုဉ်ကျာ်တြဲရ၊ ဣဝွံလေဝ် ပွသ္ပဟွံဒးရး တၠအဲရ၊ ဩဝ်ဟီုလၟိၚ်ဒေသနာ ပွသ္ပဟွံဒးရးဂှ်ညိ ရဴဝွံ (သ္ဂးအိုတ်ရ)။
ယွံတဳလပိုဉ်တအ် အဲဍိက် ဟိုတ်မၞုံကဵုစိုတ် သၟိၚ်မာရ်မဂပ်ဝ်ပ္ဍဵုပ္ဍိုက်ရာန်သကိုတ်ဂှ်ရ “သွက်ဂွံဒှ်ဒတုဲမြမောဝ် မၞိဟ်မဂၠိုၚ်ကီု သွက်ဂွံဒှ်တသိုခ်မၞိဟ်မဂၠိုၚ်ကီု သွက်ဂွံမၚ်မွဲလိုက်ကီု သွက်ဂွံဒှ်ဖဵုကီု သွက်ဂွံဒှ်ဒတုဲမြမောဝ်ကီု သွက်ဂွံဒှ်တသိုခ် မၞိဟ်ဒေဝတဴဂမၠိုၚ်ကီု တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဩဝ်တန်တဴ လုကဴအာယုကပ်ညိ၊ တဳလမၞုံပိုဉ်ကျာ်တြဲ မလေပ်သ္ဂးတဴဂလာန်ခိုဟ်ဆာဲ ဩဝ်တန်တဴ လုကဴအာယုကပ်ညိ” ရဴဝွံ တၠအဲ ဟွံအာတ်ပါန် အခေါၚ်ထောံ တဳလမၞုံပိုဉ်ကျာ်တြဲရ၊ ပွဂှ် ပွသ္ပဟွံဒးရး ရဴဝွံ အဲဍိက်ဟွံညာတ်ရ၊ ၜိုန်ဂှ်လေဝ် ဗွဲအစောံလျုၚ်ပတှ်ေ ကုတဳလပိုဉ်တအ်ညးဂမၠိုၚ် ဟီုလၟိၚ်ဒေသနာ ပွသ္ပဟွံဒးရးဂှ်ရ။
ယွံကောန်တၠအာနန္ဒ တၠအဲ သ္ပလွဳပရာ ဒဒှ်ထပိုဲခမဳ မာတုဂါမ် ပ္ဍဲဓမ္မဝိနယ ‘သာသနာ’ ကျာ်တြဲမတွံလဝ်ရ၊ ဣဝွံလေဝ် ပွသ္ပဟွံဒးရး တၠအဲရ၊ ဩဝ်ဟီုလၟိၚ်ဒေသနာ ပွသ္ပဟွံဒးရးဂှ်ညိ ရဴဝွံ (သ္ဂးအိုတ်ရ)။
ယွံတဳလပိုဉ်တအ် “မဟာပဇာပတိဂေါတမဳဝွံ ဒှ်မိသွီုကျာ်တြဲရ၊ ညးမြိမြန်လဝ် စဵုကဵုဇၞော်ဂေါဝ်ရ၊ ညးလွဳဝတ်ဗ္စဖျုၚ်လဝ်ရ၊ ညးကဵုလဝ်ဍာ်တှ်ရ၊ မိစဴအာသွဝ်တုဲ ညးဗမဴလဝ်ဍာ်တှ် ကဵုကျာ်တြဲရ” ရဴဝွံ ဗှ်ဗၞုဟ်ကေတ်တုဲ အဲဍိက် သ္ပလွဳပရာဒး ဒဒှ်ထပိုဲခမဳ မာတုဂါမ် ပ္ဍဲဓမ္မဝိနယ ‘သာသနာ’ ကျာ်တြဲမတွံလဝ်ရ၊ ပွဂှ် ပွသ္ပဟွံဒးရး ရဴဝွံ အဲဍိက်ဟွံညာတ်ရ၊ ၜိုန်ဂှ်လေဝ် ဗွဲအစောံလျုၚ်ပတှ်ေ ကုတဳလပိုဉ်တအ်ညးဂမၠိုၚ် ဟီုလၟိၚ်ဒေသနာ ပွသ္ပဟွံဒးရးဂှ်ရ။
၄၄၄။ ပ္ဍဲအခိၚ်ဂှ် တဳလပိုဥ်ပုရာဏ မွဲဟာန်ကေုာံ ဂကောံခမဳသၚ်ဂမၠိုၚ်မဂၠိုၚ် ဗၞတ်မသုန်ကၠံ ဂေတ်ဂ္ၚေၚ်ဒၟံၚ် ဒေသစာရိတ် ပ္ဍဲဇနပိုဒ်ဒက္ခိဏဂိရိရ။ ပ္ဍဲအခိၚ်ဂှ် တဳလပိုဉ်ပုရာဏ ပဒတဴဗၞတ်မမိပ်လဟိၚ် ပ္ဍဲဇနပိုဒ်ဒက္ခိဏဂိရိတုဲမ္ဂး ဃောခမဳထေရ်ဇၞော်ဂမၠိုၚ် ပတိုန်သၚ်္ဂါယန ဓမ္မကေုာံဝိနယ ပြာပ်အာဇရေၚ် ခမဳထေရ်ဇၞော်ဂမၠိုၚ် ပ္ဍဲဘာဝေဠုဝန် မဒှ်ဒၞာဲကဵုစၞ ကုယန်လမ္စံက် ဂမၠိုၚ် ဇရေၚ်ဍုၚ်ရာဇဂြိုဟ်တုဲပ္ဍဲကြဴ ဟီုဂလာန်မိပ်စိုတ်အိုဟ်တၟိုဟ် ဆက်မိတ်မွဲဟာန်ကေုာံ ခမဳထေရ်ဇၞော်ဂမၠိုၚ်တုဲမ္ဂး ဂဇအ်ဒၟံၚ်ပ္ဍဲဒၞာဲမွဲရ၊ တဳလပိုဉ်ပုရာဏ မဂဇအ်ဒၟံၚ် ပ္ဍဲဒၞာဲမွဲဂှ် “ယွံကောန်တၠပုရာဏ ထေရ်ဇၞော်ဂမၠိုၚ် ပတိုန်သၚ်္ဂါယန ဓမ္မကေုာံဝိနယအိုတ်ရ၊ ဩဝ်ပြာပ်အာ ဌာန်ပတိုန်သၚ်္ဂါယနဂှ်ညိ” ရဴဝွံ ခမဳထေရ်ဇၞော်ဂမၠိုၚ် သ္ဂးအိုတ်ရ။
ယွံကောန်တၠတအ် ထေရ်ဇၞော်ဂမၠိုၚ် ဂပ်ဝ်ပတိုန်သၚ်္ဂါယန ဓမ္မကေုာံဝိနယ ဗွဲမဒးရးရ၊ ၜိုန်ဂှ်လေဝ် အဲဍိက် အတိုၚ်ကလၚ်လဝ်တုဲ ပ္ဍဲဂတမုက်တဳလမၞုံပိုဉ်ကျာ်တြဲဂှ်ဟေၚ် အတိုၚ်ဂိုၚ်ကေတ်တုဲဂှ်ဟေၚ် ကြက်ပကၚ်ရၚ်ရ ရဴဝွံ (သ္ဂးရ)။
