၁၁.၁။ နိဒ္ဒါနိသၚ်္ဂါယန
၄၃၇။ ပ္ဍဲအခိၚ်ဂှ် တဳလပိုဉ်မဟာကဿပဂှ် ကော်လၟိၚ်တိုန် ခမဳဂမၠိုၚ်ရ— ယွံကောန်တၠတအ် ပ္ဍဲကာလမွဲတ္ၚဲ အဲ မွဲဟာန်ကေုာံခမဳသၚ်ဂမၠိုၚ်မဂၠိုၚ် ဗၞတ်မသုန်ကၠံ နူဍုၚ်ပါဝါသွိုန်ဗပိုန်တဴ တရဴအဓါန်မဂၠိၚ်သ္ၚောဲ ဍုၚ်ကုသိနာရာမ်ရ။ ယွံကောန်တၠတအ် ပ္ဍဲအခိၚ်ဂှ် အဲပါဲစှေ် နူဂၠံၚ်တုဲ ဂဇအ်ဒၟံၚ် ပ္ဍဲသၟဝ်တၞံဆုမွဲတၞံရ။
ပ္ဍဲအခိၚ်ဂှ် တဳအာဇဳဝကမွဲ ကေတ်နၚ်ပ္ကဴဒေဝတဴ မန္ဒာရဝ (ပ္ကဴကိုန်ဒိပ်) နူဍုၚ်ကုသိနာရာမ်တုဲ သွိုန်ဗပိုန်တဴ တရဴအဓါန်မဂၠိၚ်သ္ၚောဲ ဍုၚ်ပါဝါရ။ ယွံကောန်တၠတအ် အဲ သဂွံညာတ်ကေတ် တဳအာဇဳဝက အဃောမကၠုၚ်ဒၟံၚ် နူဇမ္ၚောဲဂှ်ဟေၚ်ဂှ် “ယွံကောန်တၠကျာ်တြဲနာဲသာ အာစာပိုဲတအ်ဂှ် တီဒၟံၚ်ဟာ” ရဴဝွံ သၟာန်တိုန် တဳအာဇဳဝကဂှ်ရ။ ယွံကောန်တၠ ဩ တီဒၟံၚ်ရ၊ ခမဳဂေါတမ သ္ပပရိနိဗ္ဗာန်ဂှ် တ္ၚဲဝွံပေၚ်အာထပှ်တ္ၚဲတုဲရ၊ နူဌာန် မသ္ပပရိနိဗ္ဗာန်ဂှ် အဲဍိက်ကေတ်နၚ် ပ္ကဴဒေဝတဴမန္ဒာရဝ (ပ္ကဴကိုန်ဒိပ်) ဝွံရ (တဳဂှ်) ကလေၚ်ဟီုထ္ၜးရ။
ယွံကောန်တၠတအ် ပ္ဍဲအရာမဟီုဂှ် ခမဳဂမၠိုၚ်လ္ၚဵု ရာဂဟွံစာ်စ္ဍးဏီ “ကျာ်တြဲ မၞုံကဵုပိုဉ်တြဴပြကာဂှ် ဗွဲမပြဟ်သန်ဟေၚ် ပပရိနိဗ္ဗာန်တုဲရ၊ ကျာ်တြဲမလေပ်ဟီုသ္ဂးတဴ ဂလာန်ခိုဟ်ဆာဲဂှ် ဗွဲမပြဟ်သန်ဟေၚ် ပပရိနိဗ္ဗာန်တုဲရ၊ ကျာ်တြဲ မၞုံကဵုမတ်ပညာဂှ် ဗွဲမပြဟ်သန်ဟေၚ် ကၠေံဗ္ဒန်အာ ပ္ဍဲလောကတုဲရ” ရဴဝွံ ပၚ်ယာပတိုန် သပါတဲဂမၠိုၚ်တုဲ လရိုအ်ယာံအိုတ်ရ၊ သၟဟ်ညံၚ်ရဴဒတုံစှေ် ဗပါတ်ဗၚ်ဇြဟ်ကီု လောတ်စှေ်အိုတ်ရ၊ ပၠောတ်လော ပၠူဇကုတူရူအိုတ်ရ၊ ပၠောတ်လော ပၠူအာ ပၠူကၠုၚ်အိုတ်ရ။
ခမဳဂမၠိုၚ် ရာဂ စာ်စ္ဍးအိုတ်အာတုဲဂှ်တုန် “ဓရ် ‘သၚ်္ခါရ’ ပွမဒးပြုပြေၚ်ကဵုဂမၠိုၚ် နွံသဘဴဟွံဗိုန်အိုတ်ရ၊ ပ္ဍဲ (အပ္ဍဲဓရ်သၚ်္ခါရဂမၠိုၚ်) ဝွံ သဘဴဗိုန်ဂှ် သာ်လဵုသဂွံကလိဂွံ မာန်ဂှ်ရော” ရဴဝွံ သီုမဗှ်ဗၞုဟ် သီုမဗ္စာရဏာအိုတ်ဂှ်ဒှ်တုဲ အေၚ်ဒုၚ်အာအိုတ်ရ။
ယွံကောန်တၠတအ် ပ္ဍဲအခိၚ်ဂှ် အဲ ကော်လၟိၚ်တိုန် ခမဳဂမၠိုၚ်ရ—
“ယွံကောန်တၠတအ် ဩဝ်ဒေါံထောံအိုတ်ညိ၊ လ္ပစံၚ်တူပူဆာအိုတ်ညိ၊ လ္ပလရိုအ်ယာံအိုတ်ညိ။ ‘ပွမဒးသာဲဂမျိုၚ် ပွမဒးသာဲဂမ်စိုတ် ပွမဒးသာဲခြာ ဘဝတၞဟ်ခြာ ကေုာံညးမသ္ဍိုက်ဆာန်သ္ဍိုက်မၠိုက် သၞေအ်သၞဴဂမၠိုၚ်အိုတ်သီု’ ဂှ် ပ္ဍဲကိုပ်ကၠာတေအ်ဟေၚ် တဳလမၞုံပိုဉ်ကျာ်တြဲ တွံလဝ်တုဲရ ဟွံသေၚ်ဟာ။ ယွံကောန်တၠတအ် ‘အရာဝတ္ထု မၞုံသဘဴပွမပလီုပလာ်ဂှ် ဩဝ်လပကဵုလီုလာ်ညိ’ ရဴဝွံ အတိုၚ်မၞုံပၟိက် ရာဒနာမိက် သာ်လဵုသဂွံကလိဂွံမာန်ဂှ်ရော?၊ သွက်သဂွံကလိဂွံမာန် ရဴဝွံ ဟိုတ်ဍေံဟွံမွဲရ” ရဴဝွံ (သ္ဂးရ)။
ယွံကောန်တၠတအ် ပ္ဍဲအခိၚ်ဂှ် ခမဳဇၞော် (တြကျာ်) မၞုံယၟုသုဘဒ္ဒဂှ် ဂဇအ်ဒၟံၚ် ပ္ဍဲအကြာပရိသာတ်ဂှ်ရ။ ယွံကောန်တၠတအ် ပ္ဍဲအခိၚ်ဂှ် ခမဳဇၞော်သုဘဒ္ဒဂှ် သ္ဂးကဵုခမဳဂမၠိုၚ် ဂလာန်ဝွံရ—
“ယွံကောန်တၠတအ် ဩဝ်ဒေါံထောံအိုတ်ညိ၊ လ္ပစံၚ်တူပူဆာအိုတ်ညိ၊ လ္ပလရိုအ်ယာံအိုတ်ညိ၊ ပိုဲညးဂမၠိုၚ် တိတ်ဗၠးအာ နူခမဳဇၞော်ဂှ် ဗွဲမဒးရးတုဲအိုတ်ရ၊ (ခမဳဇၞော်ဂှ်) ‘ဣဝွံဂှ် ဂပ်ဝ်ကုမၞးတအ်ရ၊ ဣဝွံဂှ် ဟွံဂပ်ဝ်ကုမၞးတအ်ရ’ ရဴဝွံ ပိုဲညးဂမၠိုၚ် ဒးဒုၚ်ချုက်ချာဲကၠုၚ်ရ၊ ပ္ဍဲကာလလၟုဟ်ဝွံတိုန် ပိုဲညးဂမၠိုၚ် အရာနွံပၟိက်သ္ပဂှ် ကြက်သပအိုတ်ရ၊ အရာဟွံမွဲပၟိက်သ္ပဂှ် ကြက်ဟွံသပအိုတ်ရ” ရဴဝွံ (သ္ဂးရ)။
ယွံကောန်တၠတအ် ပိုဲညးဂမၠိုၚ် ကိုပ်ကၠာဓရ်အသပ္ပုရိုဟ် ဟွံဂဵုလဟဵုဏီ၊ ကိုပ်ကၠာဓရ်သပ္ပရိုဟ် ဟွံကၠေံဗ္ဒန်ဏီ၊ ကိုပ်ကၠာဓရ်ဟွံသေၚ်ကဵုဝိနယ် ဟွံဂဵုလဟဵုဏီ၊ ကိုပ်ကၠာဓရ်ဝိနယ် ဟွံကၠေံဗ္ဒန်ဏီ၊ ကိုပ်ကၠာပူဂိုလ်အဓမ္မဝါဒဳဂမၠိုၚ် ဟွံမွဲကဵုဒြဟတ်ဏီ၊ ကိုပ်ကၠာပူဂိုလ်ဓမ္မဝါဒဳဂမၠိုၚ် ဟွံဍိုန်ကဵုဇြဟတ်ဏီ၊ ကိုပ်ကၠာပူဂိုလ်အဝိနယဝါဒဳဂမၠိုၚ် ဟွံမွဲကဵုဒြဟတ်ဏီ၊ ကိုပ်ကၠာပူဂိုလ် ဝိနယဝါဒဳဂမၠိုၚ် ဟွံဍိုန်ကဵုဇြဟတ်ဏီ၊ ပတိုန်သၚ်္ဂါယန ဓမ္မ ကေုာံ ဝိနယအိုတ်စိုအ် (ပကောံဖ္ဍောတ်အိုတ်စိုအ်) ရဴဝွံ ဟီုသ္ဂးရ။
ယွံတဳလပိုဉ် ဒှ်သာ်ဂှ်မ္ဂး ထေရ်မဟာကဿပ ဩဝ်ရုဲစှ် ခမဳဂမၠိုၚ်ညိ ရဴဝွံ ဂရၚ်ပတီအိုတ်ရ။
ပ္ဍဲအခိၚ်ဂှ် တဳလပိုဉ်မဟာကဿပ ရုဲစှ်တၠအရှန်ဂမၠိုၚ် မသုန်ကၠံယုတ်မွဲရ။ ခမဳဂမၠိုၚ်ဂရၚ်ပတီ ကုတဳလပိုဉ်မဟာကဿပ ရဴဝွံအိုတ်ရ။ “ယွံတဳလပိုဉ် တဳလပိုဉ်အာနန္ဒဝွံ ၜိုန်ဒှ်အယာံမာတ်သေက္ခ မဟွံထေက်ကဵုတၞဟ်နဗက် ဆန္ဒာဂတိ ဒေါသာဂတိ မောဟဂတိ ဘယာဂတိလေဝ် ဂိုၚ်ကတ်ကေတ်လဝ် ဓမ္မကေုာံဝိနယ ပ္ဍဲဇရေၚ်တဳလမၞုံပိုဉ်ကျာ်တြဲ ဗွဲမဂၠိုၚ်ရ၊ ယွံတဳလပိုဉ် ဟိုတ်ဒှ်ဟေၚ် ထေရ်မဟာကဿပဂှ် တဳလပိုဉ်အာနန္ဒလေဝ် ဩဝ်ရုဲစှ်ညိ” ရဴဝွံ ဂရၚ်ပတီအိုတ်ရ။ ပ္ဍဲအခိၚ်ဂှ် တဳလပိုဉ်မဟာကဿပဂှ် တဳလပိုဉ်အနန္ဒလေဝ် ရုဲစှ်ရ။
ပ္ဍဲအခိၚ်ဂှ် “ပိုဲညးဂမၠိုၚ် မုရဴပ္ဍဲဌာန်မွဲ ဂွံပတိုန်သၚ်္ဂါယန ဓမ္မကေုာံဝိနယအိုတ်ရော?” ရဴဝွံ ကသပ်ဒှ် ကုထေရ်ဇၞော်ဂမၠိုၚ်ရ။
ပ္ဍဲအခိၚ်ဂှ် “ဍုၚ်ရာဇဂြိုဟ်ဂှ် မၞုံကဵုကွာန်ဂ္ၚေၚ်ပိဏ္ဍပါတ်ဂၠိုၚ်ရ၊ ဘာဂၠိုၚ်ရ၊ ပိုဲညးဂမၠိုၚ်ပြာပ်လုပ်ဒဂိုန် ပ္ဍဲဍုၚ်ရာဇဂြိုဟ်အိုတ်တုဲ ဂွံပတိုန်သၚ်္ဂါယန ဓမ္မကေုာံဝိနယမ္ဂး ခိုဟ်ရ၊ ခမဳသအာၚ်ဂမၠိုၚ်လေဝ် ဟဂွံပြာပ်လုပ်ဒဂိုန် ပ္ဍဲဍုၚ်ရာဇဂြိုဟ်အိုတ်မ္ဂး ခိုဟ်ရ” ရဴဝွံ ကသပ်ဒှ် ကုထေရ်ဇၞော်ဂမၠိုၚ်ရ။ ပ္ဍဲအခိၚ်ဂှ် တဳလပိုဉ်မဟာကဿပ ကဵုသၚ်တီရ—
၄၃၈။ “ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ်သၟိတ်ပတိုန် ခမဳဂမၠိုၚ်မသုန်ကၠံဝွံ ရဴဝွံမ္ဂး ‘ပြာပ်လုပ်ဒဂိုန် ပ္ဍဲဍုၚ်ရာဇဂြိုဟ်ဂမၠိုၚ်ဒှ်တုဲ တၞဟ်နပတိုန်သၚ်္ဂါယန ဓမ္မကေုာံ ဝိနယ ခမဳသအာၚ်ဂမၠိုၚ် ဟဂပ်ဝ်ပြာပ်လုပ်ဒဂိုန် ပ္ဍဲဍုၚ်ရာဇဂြိုဟ်’ ရ၊ ဣဝွံတုန် ပွမကဵုတီရောၚ်။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ်သၟိတ်ပတိုန် ခမဳဂမၠိုၚ် မသုန်ကၠံဝွံ ရဴဝွံမ္ဂး ‘ပြာပ်လုပ်ဒဂိုန် ပ္ဍဲဍုၚ်ရာဇဂြိုဟ်ဂမၠိုၚ်ဒှ်တုဲ တၞဟ်နပတိုန်သၚ်္ဂါယန ဓမ္မကေုာံဝိနယ ခမဳသအာၚ်ဂမၠိုၚ် ဟဂပ်ဝ်ပြာပ်လုပ်ဒဂိုန် ပ္ဍဲဍုၚ်ရာဇဂြိုဟ်’ ရ၊ ယြဴတဳလပိုဉ်မွဲ မၞုံကဵုပွမသ္ဍိုက်မၠိုက် ပွမသၟိတ်ပတိုန် ကုခမဳဂမၠိုၚ်မသုန်ကၠံဝွံ ရဴဝွံမ္ဂး ‘ပြာပ်လုပ်ဒဂိုန် ပ္ဍဲဍုၚ်ရာဇဂြိုဟ်ဂမၠိုၚ်ဒှ်တုဲ တၞဟ်နပတိုန်သၚ်္ဂါယန ဓမ္မကေုာဴဝိနယ ခမဳသအာၚ်ဂမၠိုၚ် ဟဂပ်ဝ်ပြာပ်လုပ်ဒဂိုန် ပ္ဍဲဍုၚ်ရာဇဂြိုဟ်’ ရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
သၚ် ဂပ်ဝ်သၟိတ်ပတိုန် ခမဳဂမၠိုၚ်မသုန်ကၠံဝွံ ရဴဝွံမ္ဂး ‘ပြာပ်လုပ်ဒဂိုန် ပ္ဍဲဍုၚ်ရာဇဂြိုဟ်ဂမၠိုၚ်ဒှ်တုဲ တၞဟ်နပတိုန်သၚ်္ဂါယန ဓမ္မကေုာံဝိနယ ခမဳသအာၚ်ဂမၠိုၚ် ဟဂပ်ဝ်ပြာပ်လုပ်ဒဂိုန် ပ္ဍဲဍုၚ်ရာဇဂြိုဟ်’ တုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။
ကြဴနူဂှ် ခမဳထေရ်ဇၞော်ဂမၠိုၚ် တၞဟ်နပတိုန်သၚ်္ဂါယန ဓမ္မကေုာံဝိနယ က္ညအာဍုၚ်ရာဇဂြိုဟ်အိုတ်ရ၊ ကြဴနူဂှ် ကသပ်ရဴဝွံ ဒှ်ကုခမဳထေရ်ဇၞော်ဂမၠိုၚ်ရ။
“ယွံကောန်တၠတအ် တဳလမၞုံပိုဉ်ကျာ်တြဲဂှ် ထိုၚ်သးပွမပဠေတ်ပဠေတ် ကဝ်သကုတ်ထောၚ်ပြိုဟ်ရ၊ ယွံကောန်တၠတအ် လၟုဟ် ပ္ဍဲညးဂမၠိုၚ် လုကဴဂိတုပဌမ ပဠေတ်ပဠေတ်ကဝ်သကုတ် ထောၚ်ပြိုဟ်အိုတ်ရ၊ လုကဴဂိတုမဇ္ၛိမလဒေါဝ် ကောံဓရီုတုဲ ပတိုန်သၚ်္ဂါယန ဓမ္မကေုာံဝိနယအိုတ်ရ” ရဴဝွံ (ကသပ်ဒှ်ရ)။
ကြဴနူဂှ် ခမဳထေရ်ဇၞော်ဂမၠိုၚ် လုကဴဂိတုပဌမ ပဠေတ်ပဠေတ် ကဝ်သကုတ်ထောၚ်ပြိုဟ်အိုတ်ရ။ ပ္ဍဲအခိၚ်ဂှ် တဳလပိုဉ်အာနန္ဒ “တ္ၚဲယးကောံဓရီုရ၊ အဲသီုကဵုဒှ်တဴသေက္ခ ပွမက္ညအာ ကောံဓရီုဂှ် ဟွံဗဗွဲရ” ရဴဝွံ လုကဴဗတမ် ဗွဲမဂၠိုၚ်ဟေၚ် ကဵုကလိလောန် နကာယဂတာသတိတုဲ ပ္ဍဲအခိၚ်ဖလာၚ်ဂးဗတမ်ဂှ် “ကြက်သတၚ်ရ” ရဴဝွံ ဒလာဲဖျေံဇကုရ။ က္ဍိုပ်သကိုပ်ဟွံစိုပ်ဂၞဳ၊ ဇိုၚ်ဂမၠိုၚ် ဃောဗၠးတိတ်နူတိ၊ ပ္ဍဲအကြာဝွံ စိုတ် သီုဟွံစောဲလာံဂှ် တိတ်ဗၠးအာနူဓရ်အာသဝဂမၠိုၚ်ရ။
၄၃၉။ ကြဴနူဂှ် တဳလပိုဉ်အာနန္ဒ ဒှ်တၠအရှန်တုဲ က္ညအာကောံဓရီုရ။ ပ္ဍဲအခိၚ်ဂှ် တဳလပိုဉ်မဟာကဿပ ကဵုသၚ်တီရ—
“ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိက်မဗဗွဲ ကုသၚ် ယဝ်ဒှ်မ္ဂး၊ အဲဍိက် သၟာန်ဝိနယ် ကုဥပါလိရ” ရဴဝွံ (ကဵုတီရ)။
တဳလပိုဉ်ဥပါလိလေဝ် ကဵုသၚ်တီရ—
“ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲကုသၚ် ယဝ်ဒှ်မ္ဂး၊ တဳလပိုဉ်မဟာကဿပ သၟာန်ဝိနယ်မ္ဂး အဲဍိက် သှ်ကဵုရ” ရဴဝွံ (ကဵုတီရ)။
ကြဴနူဂှ် တဳလပိုဉ်မဟာကဿပဂှ် “ယွံကောန်တၠဥပါလိ ပဌမပါရာဇိကဂှ် မုရဴပ္ဍဲဌာန်မွဲ ပညပ်လဝ်ရော?” ရဴဝွံ သၟာန်တဳလပိုဉ်ဥပါလိရ။
ယွံတဳပိုဉ် ပညပ်လဝ် ပ္ဍဲဍုၚ်ဝေသာလဳရ ရဴဝွံ ဂရၚ်ပတီရ။
သ္ပဟိုတ်ကဵု မုရဴပူဂိုလ်မွဲတုဲ ပညပ်လဝ်ရော? ရဴဝွံ (သၟာန်ရ)။
သ္ပဟိုတ်ကဵု သုဒိန်ကောန်သေဌဳကလန္ဒတုဲ ပညပ်လဝ်ရ ရဴဝွံ (ဂရၚ်ပတီရ)။
မူရဴဟိုတ်နူဟိုတ်မွဲ ပညပ်လဝ်ရော? ရဴဝွံ (သၟာန်ရ)။
ဟိုတ်နူကလိလောန်ဒ္ဂေတ်မေထုန်ဂှ် ပညပ်လဝ်ရ ရဴဝွံ (ဂရၚ်ပတီရ)။
ပ္ဍဲအခိၚ်ဂှ် တဳလပိုဉ်မဟာကဿပ ဝတ္ထုဟိုတ်ပဌမပါရာဇိကလေဝ် သၟာန်တဳလပိုဉ်ဥပါလိရ၊ နိဒါန်လေဝ် သၟာန်ရ၊ ပူဂိုလ်လေဝ် သၟာန်ရ၊ ပညပ်လေဝ်သၟာန်ရ၊ အနုပညပ်လေဝ်သၟာန်ရ၊ ပွမဒးအာပတ်လေဝ် သၟာန်ရ၊ ပွမဟွံဒးအာပတ်လေဝ် သၟာန်ရ။
ယွံကောန်တၠဥပါလိ ဒုတိယပါရာဇိကဂှ် မုရဴပ္ဍဲဌာန်မွဲ ပညပ်လဝ်ရော? ရဴဝွံ (သၟာန်ရ)။
ယွံတဳလပိုဉ် ပညပ်လဝ် ပ္ဍဲဍုၚ်ရာဇဂြိုဟ်ရ ရဴဝွံ ဂရၚ်ပတီရ။
သ္ပဟိုတ်ကဵု မုရဴပူဂိုလ်မွဲတုဲ ပညပ်လဝ်ရော? ရဴဝွံ (သၟာန်ရ)။
သ္ပဟိုတ်ကဵု ထေရ်ဓနိယတုဲ ပညပ်လဝ်ရ ရဴဝွ (ဂရၚ်ပတီရ)။
မုရဴဟိုတ်နူဟိုတ်မွဲ ပညပ်လဝ်ရော? ရဴဝွံ (သၟာန်ရ)။
ဟိုတ်ပွမဂိုၚ်ကၠတ်ကေတ် ဒြပ်တၠညးဟွံကဵုဂှ် ပညပ်လဝ်ရ ရဴဝွံ (ဂရၚ်ပတီရ)။
ပ္ဍဲအခိၚ်ဂှ် တဳလပိုဉ်မဟာကဿပ ဝတ္ထုဟိုတ်ဒုတိယပါရာဇိကလေဝ် သၟာန်တဳလပိုဉ် ဥပါလိရ၊ နိဒါန်လေဝ် သၟာန်ရ၊ ပူဂိုလ်လေဝ် သၟာန်ရ၊ ပညပ်လေဝ် သၟာန်ရ၊ အနုပညပ်လေဝ် သၟာန်ရ၊ ပွမဒးအာပတ်လေဝ် သၟာန်ရ၊ ပွမဟွံဒးအာပတ်လေဝ် သၟာန်ရ။
ယွံကောန်တၠဥပါလိ တတိယပါရာဇိကဂှ် မုရဴပ္ဍဲဌာန်မွဲ ကညပ်လဝ်ရော? ရဴဝွံ (သၟာန်ရ)။
ယွံတဳလပိုဉ် ပညပ်လဝ် ပ္ဍဲဍုၚ်ဝေသာလဳရ ရဴဝွံ ဂရၚ်ပတီရ။
သ္ပဟိုတ်ကဵု မုရဴပူဂိုလ်မွဲတုဲ ပညပ်လဝ်ရော? ရဴဝွံ (သၟာန်ရ)။
သ္ပဟိုတ်ကဵု ခမဳဂမၠိုၚ်မဂၠိုၚ်တုဲ ပညပ်လဝ်ရ ရဴဝွံ (ဂရၚ်ပတီရ)။ မုရဴဟိုတ်နူဟိုတ်မွဲ ပညပ်လဝ်ရော? ရဴဝွံ (သၟာန်ရ)။
ဟိုတ်နူဟိုတ်မတွံဂး ပွမဂစိုတ်ဇကုညးမဒှ်ဇာတ်မၞိဟ်ဂှ် ပညပ်လဝ်ရ ရဴဝွံ (ဂရၚ်ပတီရ)။
ပ္ဍဲအခိၚ်ဂှ် တဳလပိုဉ်မဟာကဿပ ဝတ္ထုဟိုတ်တတိယပါရာဇိကလေဝ် သၟာန်တဳလပိုဉ်ဥပါလိရ၊ နိဒါန်လေဝ် သၟာန်ရ၊ ပူဂိုလ်လေဝ် သၟာန်ရ၊ ပညပ်လေဝ် သၟာန်ရ၊ အနုပညပ်လေဝ် သၟာန်ရ၊ ပွမဒးအာပတ်လေဝ် သၟာန်ရ၊ ပွမဟွံဒးအာပတ်လေဝ် သၟာန်ရ။
ယွံကောန်တၠဥပါလိ စတုတ္ထပါရာဇိကဂှ် မုရဴပ္ဍဲဌာန်မွဲ ပညပ်လဝ်ရော? ရဴဝွံ (သၟာန်ရ)။
ယွံတဳလပိုဉ် ပညပ်လဝ် ပ္ဍဲဍုၚ်ဝေသာလဳရ ရဴဝွံ ဂရၚ်ပတီရ။
သ္ပဟိုတ်ကဵု မုရဴပူဂိုလ်မွဲတုဲ ပညပ်လဝ်ရော? ရဴဝွံ (သၟာန်ရ)။
သ္ပဟိုတ်ကဵု ခမဳဂမၠိုၚ် မပဒတဴ ပ္ဍဲသြၚ်ကြုၚ်ဝဂ္ဂုမုဒါတုဲ ပညပ်လဝ်ရ ရဴဝွံ (ဂရၚ်ပတီရ)။
မုရဴဟိုတ်နူဟိုတ်မွဲ ပညပ်လဝ်ရော? ရဴဝွံ (သၟာန်ရ)။
ဟိုတ်နူဟိုတ်ပွမဟီုကြီုစကလိဂွံၛာန်မဂ်ဖိုလ်ဂှ် ပညပ်လဝ်ရ ရဴဝွံ (ဂရၚ်ပတီရ)။
ပ္ဍဲအခိၚ်ဂှ် တဳလပိုဉ်မဟာကဿပ ဝတ္ထုဟိုတ်စတုတ္ထပါရာဇိကလေဝ် သၟာန်တဳလပိုဉ်ဥပါလိရ၊ နိဒါန်လေဝ် သၟာန်ရ၊ ပူဂိုလ်လေဝ် သၟာန်ရ၊ ပညပ်လေဝ် သၟာန်ရ၊ အနုပညပ်လေဝ် သၟာန်ရ၊ ပွမဒးအာပတ်လေဝ် သၟာန်ရ၊ ပွမဟွံဒးအာပတ်လေဝ် သၟာန်ရ။
နနယ်ဝွံဟေၚ် သၟာန်ဥဘတော ဝိဘၚ်ဂမၠိုၚ်ၜါရ၊ ဇၟာပ်မသၟာန် ဇၟာပ်မသၟာန် တဳလပိုဉ်ဥပါလိ သှ်ကဵုရ။
၄၄၀။ ပ္ဍဲအခိၚ်ဂှ် တဳလပိုဉ်မဟာကဿပ ကဵုသၚ်တီရ—
“ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ် မဗဗွဲ ကုသၚ်ယဝ်ဒှ်မ္ဂး၊ အဲဍိက် သၟာန်ဓမ္မ ကုအာနန္ဒရ” ရဴဝွံ (ကဵုတီရ)။
တဳလပိုဉ်အာနန္ဒလေဝ် ကဵုသၚ်တီရ—
“ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ တဳလပိုဉ်မဟာကဿပ သၟာန်ဓမ္မမ္ဂး အဲဍိက် သှ်ကဵုရ” ရဴဝွံ (ကဵုတီရ)။
ကြဴနူဂှ် တဳလပိုဉ်မဟာကဿပဂှ် “ယွံကောန်တၠအာနန္ဒ သုတ်ဗြဟ္မဇာလဂှ် မုရဴပ္ဍဲဌာန်မွဲ တွံလဝ်ရော?” ရဴဝွံ သၟာန်တဳပိုဉ်အာနန္ဒရ။
ယွံတဳလပိုဉ် တွံလဝ် ပ္ဍဲဇြပ်ပွေၚ်သၟိၚ် ဇရေၚ်ဥဒျာန်ကြုက်အမ္ဗလဋ္ဌိက အကြာဍုၚ်ရာဇဂြိုဟ် ကဵုဍုၚ်နာဠန္ဒရ ရဴဝွံ (ဂရၚ်ပတီရ)။
သ္ပဟိုတ်ကဵု မုရဴပူဂိုလ်မွဲတုဲ တွံလဝ်ရော? ရဴဝွံ (သၟာန်ရ)။
သ္ပဟိုတ်ကဵု ပြဘာဇ်သုပ္ပိယကီု မၚ်ဗၠာဲဗြဟ္မဒတ်ကီုတုဲ တွံလဝ်ရ ရဴဝွံ (ဂရၚ်ပတီရ)။
ပ္ဍဲအခိၚ်ဂှ် တဳလပိုဉ်မဟာကဿပ နိဒါန်သုတ်ဗြဟ္မဇာလလေဝ် သၟာန်တဳလပိုဉ်အာနန္ဒရ၊ ပူဂိုလ်လေဝ် သၟာန်ရ။
ယွံကောန်တၠအာနန္ဒ သုတ်သာမညဖလဂှ် မုရဴပ္ဍဲဌာန်မွဲ တွံလဝ်ရော? ရဴဝွံ (သၟာန်ရ)။
ယွံတဳလပိုဉ် တွံလဝ် ပ္ဍဲဥဒျာန်ကြုက်သဝ်ဇဳဝက ဇရေၚ်ဍုၚ်ရာဇဂြိုဟ်ရ ရဴဝွံ (ဂရၚ်ပတီရ)။
တွံလဝ် ကေုာံပူဂိုလ်လဵုရော? ရဴဝွံ (သၟာန်ရ)။
တွံလဝ် ကေုာံအဇာတသတြု ကောန်ဝေဒေဟဳရ ရဴဝွံ (ဂရၚ်ပတီရ)။
ပ္ဍဲအခိၚ်ဂှ် တဳလပိုဉ်မဟာကဿပ နိဒါန်သုတ်သာမညဖလလေဝ် သၟာန်တဳလပိုဉ်အာနန္ဒရ၊ ပူဂိုလ်လေဝ် သၟာန်ရ။ နနယ်ဝွံဟေၚ် သၟာန်နိကယာယ်ဂမၠိုၚ်မသုန်ရ၊ ဇၟာပ်မသၟာန် ဇၟာပ်မသၟာန် တဳလပိုဉ်အာနန္ဒ သှ်ကဵုရ။
