၁.၇.၄။ ဒ္ဂေတ်ဝတ်ပန်စှော်ပိသာ်
၇၀။ ယွံခမဳတအ် ခမဳ မဒးဒုၚ်သ္ပဥက္ခေပနဳယကမ် ဟိုတ်ပွမဟွံသၠးကၠေံ ကွေတ်မိစ္ဆာမယုတ်မာဂှ် ဒးဒ္ဂေတ်ဗွဲမဒးရးရ။ ကြက်သ္ဂးဂတဝွံတုန် ပ္ဍဲအရာမဒ္ဂေတ်ဂှ် ဒ္ဂေတ်ဝတ်မဒးဒ္ဂေတ်သ္ပ ဗွဲမဒးရးရောၚ်― (သ္ပအ္စာဥပဇ္ၛာယ်တုဲ) ဟဂပ်ဝ်ပကဵုပယျၚ်ရ၊ ဟဂပ်ဝ်ကဵုနိဿယရ၊ ဟဂပ်ဝ်ကဵုသာမဏဳကၠောန်ၜိုတ်ရ၊ ဟဂပ်ဝ်သာယျေန်သ္ဍိုက်မၠိုက် ပွမသၟိတ်ပတိုန် သွက်ဂွံဒၠောံဗတောန်ခမဳဗြဴဂမၠိုၚ်ရ၊ ၜိုန်ဂွံဒုၚ်သၟိတ်လေဝ် ဟဂပ်ဝ်ကဵုဩဝါဒကဵုခမဳဗြဴဂမၠိုၚ်ရ၊ ဟွံထေက်ကဵု အာစိုပ် အာပတ်ဒှ်ဟိုတ် သၚ်သ္ပဥက္ခေပနဳယကမ် ဟိုတ်ပွမဟွံသၠးကၠေံ ကွေတ်မိစ္ဆာမယုတ်မာရ၊ အာပတ်သအာၚ် တၠုၚ်လအာတုပ်ကဵုဂှ်ကီု အာပတ်ယုတ်မာ ကြံၚ်မ္ၚိုဟ်လောန်လတူဂှ်ကီု ဟွံထေက်ကဵုအာစိုပ်ရ၊ ဟွံထေက်ကဵု ဟီုဂရိုဟ်ကမ်ရ၊ ဟွံထေက်ကဵုဟီုဂရိုဟ် ခမဳသ္ပကမ်ဂမၠိုၚ်ရ ။ ပ ။ ဟွံထေက်ကဵု တန်ဒေါံဥပေါသ် ခမဳပကတတ်ရ၊ ဟွံထေက်ကဵု တန်ဒေါံ ပဝါရဏာရ၊ ဟဂပ်ဝ်သ္ပ ပွမဒၠောံဗတောန်ရ၊ ဟွံထေက်ကဵုစွံပတန် ပ္ဍဲအရာဇၞော်သကိုပ်သကရ၊ ဟွံထေက်ကဵုအာတ်အခေါၚ်ရ၊ ဟွံထေက်ကဵုစောဒနာရ၊ ဟွံထေက်ကဵု ကဵုဗှ်ဗၞုဟ်ရ၊ ဟွံထေက်ကဵု စိုန်သကီုနှဴရဴ ကေုာံခမဳပကတတ်ဂမၠိုၚ်ရ၊ (ဣဝွံတုန် ဒ္ဂေတ်ဝတ် မဒးဒ္ဂေတ်သ္ပဗွဲမဒးရးရောၚ်။)
✤ပ္ဍဲဥက္ခေပနဳယကမ် မဂပ်ဝ်ဗက်ပတိတ် ဟိုတ်ပွမဟွံသၠးကၠေံ ကွေတ်မယုတ်မာ ဒ္ဂေတ်ဝတ်ပန်စှော်ပိသာ် တုဲရ။✤
၇၁။ ပ္ဍဲအခိၚ်ဂှ် သၚ် သ္ပဥက္ခပနဳယကမ် ဟိုတ်ပွမဟွံသၠးကၠေံ ကွေတ်မိစ္ဆာမယုတ်မာ မဟွံမွဲကဵုပွမပြဘိုဂ်မွဲစွံကေုာံသၚ် ကုခမဳအရိဋ္ဌ မကေၚ်ဒှ်ပ္ဍဲဂကူဂစိုတ်ကၟာတ်ရ။
ခမဳအရိဋ္ဌ သၚ်သ္ပလဝ်ဥက္ခေပနဳယကမ် ဟိုတ်ပွမဟွံသၠးကၠေံ ကွေတ်မိစ္ဆာမယုတ်မာဂှ် ရာမ်တိတ်ခရှ်ရ။
ခမဳပၟိက်အောန်ဂမၠိုၚ်ဂှ် “ခမဳအရိဋ္ဌ မကေၚ်ဒှ်ပ္ဍဲဂကူဂစိုတ်ကၟာတ် သၚ်သ္ပလဝ် ဥက္ခေပနဳယကမ် ဟိုတ်ပွမဟွံသၠးကၠေံ ကွေတ်မိစ္ဆာမယုတ်မာဂှ် မုဟိုတ် ရာမ်တိတ်ခရှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုန်ကျာ်တြဲ ကဵုခမဳသၚ် ကောံဓရီုတုဲမ္ဂး―
“ယွံခမဳတအ် ခမဳအရိဋ္ဌ မကေၚ်ဒှ်ဂကူဂစိုတ်ကၟာတ် သၚ်သ္ပလဝ် ဥက္ခေပနဳယကမ် ဟိုတ်ပွမဟွံသၠးကၠေံ ကွေတ်မိစ္ဆာမယုတ်မာဂှ် ရာံတိတ်ခရှ်ရဟီုဂှ် ဍာံပြဟာ” ရဴဝွံ စၟဳစၟတ် သၟာန်သၟုက် ခမဳဂမၠိုၚ်ရ။
ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။
တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ၊ “ယွံခမဳတအ် ဟွံထေက်ရ ။ ပ ။ ယွံခမဳတအ် တြုံမလ္ၚုသၟး (နူမဂ်ဖိုလ်) သၚ်သ္ပလဝ်ဥက္ခေပနဳယကမ် ဟိုတ်ပွမဟွံသၠးကၠေံကွေတ်မိစ္ဆာမယုတ်မာဂှ် မုဟိုတ် ရာမ်တိတ်ခရှ်ရော?။ ယွံခမဳတအ် (ပွခမဳအရိဋ္ဌ သ္ပဒးဝွံ) ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ ။ ပ ။ တွံကဵုဂလာန်ဓရ်တုဲမ္ဂး―
“ယွံခမဳတအ် ဒှ်သာ်ဂှ်မ္ဂး သၚ် ဩဝ်လလမ်ကၠေံ ဥက္ခေပနဳယကမ် မသ္ပလဝ် ဟိုတ်ပွမဟွံသၠးကၠေံ ကွေတ်မိစ္ဆာမယုတ်မာညိ” ရဴဝွံ (သ္ဂးရ)။
