၁.၄.၆။ ဟိုတ်မထေက်ကဵုလလမ်ကၠေံ စှ်ဒ္စါံသာ်
၄၄။ ယွံခမဳတအ် ကုခမဳ မဍိုက်ပေၚ်တဴ ကေုာံအၚ်္ဂဂမၠိုၚ်မသုန်ပြကာဂှ် ဒးကဵုလလမ်ကၠေံပဋိသာရဏဳယကမ်ရ၊ (ခမဳဂှ်သ္ပအ္စာဥပဇ္ၛာယ်တုဲ) ဟွံပကဵုပယျၚ်ရ၊ ဟွံကဵုနိဿယရ၊ ဟွံကဵုသာမဏဳကၠောန်ၜိုတ်ရ၊ ဟွံသာယျေန်သ္ဍိုက်မၠိုက် ပွမသၟိတ်ပတိုန် သွက်ဂွံဒၠောံဗတောန်ခမဳဗြဴဂမၠိုၚ်ရ၊ ၜိုန်ကလိဂွံသၟိတ်လေဝ် ဟွံဒၠောံဗတောန်ခမဳဗြဴဂမၠိုၚ်ရ၊ ယွံခမဳတအ် ကုခမဳ မဍိုက်ပေၚ်တဴ ကေုာံအၚ်္ဂဂမၠိုၚ်မသုန်ပြကာဝွံ ဒးကဵုလလမ်ကၠေံ ပဋိသာရဏဳယကမ်ရ။
ယွံခမဳတအ် ကုခမဳ မဍိုက်ပေၚ်တဴ ကေုာံအၚ်္ဂဂမၠိုၚ်မသုန်ပြကာသအာၚ်လေဝ် ဒးကဵုလလမ်ကၠေံ ပဋိသာရဏဳယကမ်ရ၊ (ခမဳဂှ်) ဟွံအာစိုပ် အာပတ်မဒှ်ဟိုတ်သ္ပပဋိသာရဏဳယကမ်ရ၊ အာပတ်သအာၚ်တၠုၚ်လအာတုပ်ကဵုဂှ်ကဵုဒှ် အာပတ်ယုတ်မာ ကြံၚ်မ္ၚိုဟ်လောန်လတူဂှ်ကဵုဒှ် ဟွံအာစိုပ်ရ၊ ဟွံဟီုဂရိုဟ်ကမ်ရ၊ ဟွံဟီုဂရီု ခမဳသ္ပကမ်ဂမၠိုၚ်ရ။ ယွံခမဳတအ် ကုခမဳ မဍိုက်ပေၚ်တဴ ကေုာံအၚ်္ဂဂမၠိုၚ်မသုန်ပြကာဝွံ ဒးကဵုလလမ်ကၠေံ ပဋိသာရဏဳယကမ်ရ။
ယွံခမဳတအ် ကုခမဳ မဍိုက်ပေၚ်တဴ ကေုာံအၚ်္ဂဂမၠိုၚ်ဒ္စါံပြကာဂှ် ဒးကဵုလလမ်ကၠေံပဋိသာရဏဳယကမ်ရ၊ (ခမဳဂှ်) ဟွံတန်ဒေါံဥပေါသ် ခမဳပကတတ်ရ၊ ဟွံတန်ဒေါံပဝါရဏာရ၊ ဟွံသ္ပ ပွမဒၠောံဗတောန်ရ၊ ဟွံဂိုၚ်ကေတ်အရာဇၞော်သကိုပ်သကရ၊ ဟွံအာတ်အခေါၚ်ရ၊ ဟွံစောဒနာရ၊ ဟွံကဵုဗှ်ဗၞုဟ်ရ၊ ဟွံကဵုစိုန်သကီုနှဴရဴကေုာံခမဳပကတတ်ဂမၠိုၚ်ရ။ ယွံခမဳတအ် ကုခမဳ မဍိုက်ပေၚ်တဴ ကေုာံအၚ်္ဂဂမၠိုၚ်ဒ္စါံပြကာဝွံ ဒးကဵုလလမ်ကၠေံ ပဋိသာရဏဳယကမ်ရ။
✤ ပ္ဍဲပဋိသာရဏဳယကမ် ဟိုတ်မထေက်ကဵုလလမ်ကၠေံစှ်ဒ္စါံသာ် တုဲရ။ ✤
၄၅။ ယွံခမဳတအ် ရဴဝွံ ဒးကဵုလလမ်ရ၊ ယွံခမဳတအ် ခမဳသုဓမ္မဂှ် ပြာပ်အာဇရေၚ်သၚ်တုဲ လၜက်ကၠေဟ်ပတိုန်သ္ၚာကၞေဟ် ပ္ဍဲလတူပၞးပါဲမွဲလပါ် လ္ၚောဝ်ဒၠးဇိုၚ် ခမဳဇၞော်ဂမၠိုၚ်တုဲ ဂဇအ်ဒၟံၚ်ဗွဲလံက်ဂဇုန် သီုမပၚ်ပတိုန်ခၠအ်သၟိပ်တဲဂှ် “ယွံတဳတပိုဉ်တအ် ဟိုတ်နူသၚ်သ္ပလဝ် ပဋိသာရဏဳယကမ်ဂှ်ရ အဲဍိက် ဒ္ဂေတ်တဴ ဗွဲမဒးရးရ၊ ဖျေံကၠေံ တသော်မာန်ရ ‘မာန်စှေ်’ ရ၊ ဒ္ဂေတ်တဴ ဒ္ဂေတ်ဝတ် ဒှ်ဟိုတ်တိတ်ဗၠးနူကမ်ရ၊ အာတ်အခေါၚ် ပွမလလမ်ကၠေံ ပဋိသာရဏဳယကမ်ရ” ရဴဝွံ ဒးဂရၚ်ပတီရ။ မရနုက်ကဵုၜါဝါလေဝ် ဒးအာတ်အခေါၚ်ရ။ မရနုက်ကဵုပိဝါလေဝ် ဒးအာတ်အခေါၚ်ရ။
ခမဳ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ―
“ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ဟိုတ်နူသၚ်သ္ပလဝ် ပဋိသာရဏဳယကမ်ဂှ်ရ ခမဳသုဓမ္မဝွံ ဒ္ဂေတ်တဴဗွဲမဒးရးရ၊ ဖျေံကၠေံတသော်မာန်ရ ‘မာန်စှေ်’ ရ၊ ဒ္ဂေတ်တဴ ဒ္ဂေတ်ဝတ်ဒှ်ဟိုတ်တိတ်ဗၠးနူကမ်ရ၊ အာတ်အခေါၚ် ပွမလလမ်ကၠေံ ပဋိသာရဏဳယကမ်ရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ်ကဵုလလမ်ကၠေံ ပဋိသာရဏဳယကမ် ကုခမဳသုဓမ္မရ၊ ဣဝွံတုန် ပွမကဵုတီရောၚ်။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳသုဓမ္မဝွံ ဟိုတ်နူသၚ်သ္ပလဝ် ပဋိသာရဏဳယကမ်ဂှ်ရ ဒ္ဂေတ်တဴ ဗွဲမဒးရးရ၊ ဖျေံကၠေံ တသော်မာန်ရ ‘မာန်စှေ်’ ရ၊ ဒ္ဂေတ်တဴ ဒ္ဂေတ်ဝတ်ဒှ်ဟိုတ်တိတ်ဗၠးနူကမ်ရ၊ အာတ်အခေါၚ် ပွမလလမ်ကၠေံ ပဋိသာရဏဳယကမ်ရ၊ သၚ်ကဵုလလမ်ကၠေံ ပဋိသာရဏဳယကမ် ကုခမဳသုဓမ္မရ၊ ယြဴကုတဳလပိုဉ်မွဲ သ္ဍိုက်မၠိုက်ပွမကဵုလလမ်ကၠေံ ပဋိသာရဏဳယကမ် ကုခမဳသုဓမ္မရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။ မရနုက်ကဵုၜါဝါလေဝ် ဟီုသ္ဂးဟိုတ်ဂှ်ရ။ ပ ။ မရနုက်ကဵုပိဝါလေဝ် ဟီုသ္ဂးဟိုတ်ဂှ်ရ။ ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳသုဓမ္မဝွံ ဟိုတ်နူသၚ်သ္ပလဝ် ပဋိသာရဏဳယကမ်ဂှ်ရ ဒ္ဂေတ်တဴ ဗွဲမဒးရးရ၊ ဖျေံကၠေံ တသော်မာန် ‘မာန်စှေ်’ ရ၊ ဒ္ဂေတ်တဴ ဒ္ဂေတ်ဝတ်ဒှ်ဟိုတ်တိတ်ဗၠးနူကမ်ရ၊ အာတ်အခေါၚ် ပွမလလမ်ကၠေံ ပဋိသာရဏဳယကမ်ရ၊ သၚ်ကဵုလလမ်ကၠေံ ပဋိသာရဏဳယကမ် ကုခမဳသုဓမ္မရ၊ ယြဴကုတဳလပိုဉ်မွဲ သ္ဍိုက်မၠိုက် ပွမကဵုလလမ်ကၠေံ ပဋိသာရဏဳယကမ် ကုခမဳသုဓမ္မရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
သၚ် ဂပ်ဝ်ကဵုလလမ်ကၠေံ ပဋိသာရဏဳယကမ် ကုခမဳသုဓမ္မတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ ရဴဝွံ သ္ဂးရ)။
❀ ပဋိသာရဏဳယကမ် စတုတ္ထတုဲရ။ ❀
