ပိဋကတ်ပိ ဘာသာမန် - ၁.၃။ ပဗ္ဗာဇနဳယကမ်

၁.၃။ ပဗ္ဗာဇနဳယကမ်

၂၁။ ပ္ဍဲအခိၚ်ဂှ် ခမဳယုတ် မဟွံမွဲကဵုဂဝဂလေံဂမၠိုၚ် မၞုံယၟုအဿဇိပုနဗ္ဗသုက ဒှ်ပူဂိုလ်နွံပိုဉ်ဂဇအ်ဘာဂမၠိုၚ် ပ္ဍဲကဳဋာဂိရိအိုတ်ရ။ ခမဳ (အဿဇိပုနဗ္ဗသုက) ဂမၠိုၚ်ဂှ် ဒ္ဂေတ်သ္ပတဴ ဒ္ဂေတ်ယုတ်မာ မၞုံသဘဴရဴဝွံအိုတ်ရ၊ တဵုတဴတၞမ်ပ္ကဴသၟတ်အိုတ်ရ၊ ဖအောဝ်ကဵုညးသအာၚ်တဵုအိုတ်ရ၊ ကိုဟ်စဝ်စရိုဟ်ဍာ်အိုတ်ရ၊ ဖအောဝ်ကဵုကိုဟ်စဝ်စရိုဟ်ဍာ်အိုတ်ရ၊ ၜှ်ဂၠောၚ်အိုတ်ရ၊ ဖအောဝ်ကဵုၜှ်ဂၠောၚ်အိုတ်ရ၊ ကၞောတ်ဇန်အိုတ်ရ၊ ဖအောဝ်ကဵုကၞောတ်ဇန်အိုတ်ရ၊ သ္ပတဴဇၟန်ပ္ကဴမၞုံတဝ် မတိတ်မွဲလပါ်အိုတ်ရ၊ ဖအောဝ်ကဵုသ္ပအိုတ်ရ၊ သ္ပတဴဇၟန်ပ္ကဴ မၞုံတဝ်မတိတ်ၜါလပါ်အိုတ်ရ၊ ဖအောဝ်ကဵုသ္ပအိုတ်ရ၊ သ္ပတဴ ပ္ကဴဗတဗ္ဂဲအိုတ်ရ၊ ဖအောဝ်ကဵုသ္ပအိုတ်ရ၊ သ္ပတဴပ္ကဴလကံက်တဲ (ဇၟန်ပကဴကဝး) အိုတ်ရ၊ ဖအောဝ်ကဵုသ္ပအိုတ်ရ၊ သ္ပတဴပ္ကဴတဝ်စရှ်အိုတ်ရ၊ ဖအောဝ်ကဵုသ္ပအိုတ်ရ၊ သ္ပတဴသၞေက်၊ ပ္ကဴဂ္ညိကတောဝ်အိုတ်ရ၊ ဖအောဝ်ကဵုသ္ပအိုတ်ရ၊ သ္ပတဴပ္ကဴဂြောပ်သြိုဟ်အိုတ်ရ၊ ဖအောဝ်ကဵုသ္ပအိုတ်ရ။

ခမဳ (အဿဇိပုနဗ္ဗသုက) ဂမၠိုၚ်ဂှ် တၞဟ်နဖဵု ဗြဴကောန်ဂကူ ‘ဗြဴတၠလျိုၚ်’ ဗြဴဇၞော်ကောန်ဂကူ ‘ဝုတ်ဇၞော်’ သၟတ်ဗြဴကောန်ဂကူ ‘ဝုတ်သၟတ်’ ခအှ်ဗြဴကောန်ဂကူ ဍိက်ဗြဴ ကောန်ဂကူဂမၠိုၚ် ရၚ်တၠုၚ်တဴ ဇၟန်ပ္ကဴမၞုံတဝ် မတိတ်မွဲလပါ်အိုတ်ရ၊ ဖအောဝ်ကဵုရၚ်တၠုၚ်အိုတ်ရ၊ ရၚ်တၠုၚ်တဴဇၟန်ပ္ကဴမၞုံတဝ် မတိတ်ၜါလပါ်အိုတ်ရ၊ ဖအောဝ်ကဵုရေၚ်တၠုၚ်အိုတ်ရ၊ ရၚ်တၠုၚ်တဴ ပ္ကဴဗတဗ္ဂဲအိုတ်ရ၊ ဖအောဝ်ကဵုရၚ်တၠုၚ်အိုတ်ရ၊ ရၚ်တၠုၚ်တဴ ပ္ကဴလကံက်တဲ (ဇၟန်ပ္ကဴကဝး) အိုတ်ရ၊ ဖအောဝ်ကဵုရၚ်တၠုၚ်အိုတ်၊ ရၚ်တၠုၚ်တဴ ပ္ကဴတဝ်စရှ်အိုတ်ရ၊ ဖအောဝ်ကဵုရၚ်တၠုၚ်အိုတ်ရ၊ ရၚ်တၠုၚ်တဴသၞေက်၊ ပ္ကဴဂ္ညိကတောဝ်အိုတ်ရ၊ ဖအောဝ်ကဵုရၚ်တၠုၚ်အိုတ်ရ၊ ရၚ်တၠုၚ်တဴ ပ္ကဴဂြောပ်သြိုဟ်အိုတ်ရ၊ ဖအောဝ်ကဵုရၚ်တၠုၚ်အိုတ်ရ။

ခမဳ (အဿဇိပုနဗ္ဗသုက) ဂမၠိုၚ်ဂှ် တၞဟ်နဖဵု ဗြဴကောန်ဂကူ ‘ဗြဴတၠလျိုၚ်’ ဗြဴဇၞော်ကောန်ဂကူ ‘ဝုတ်ဇၞော်’ သၟတ်ဗြဴကောန်ဂကူ ‘ဝုတ်သၟတ်’ ခအှ်ဗြဴကောန်ဂကူ ဍိက်ဗြဴကောန်ဂကူဂမၠိုၚ် ပ္ဍဲမွဲပ္ၚာန်ခရော်ဓဝ်လေဝ် စဟာပ်အိုတ်ရ၊ ပ္ဍဲမွဲခရော်သုၚ်ဍာ်ဓဝ်လေဝ် သုၚ်အိုတ်ရ၊ ပ္ဍဲမွဲသၞာဓဝ်လေဝ် ဂဇအ်အိုတ်ရ၊ ပ္ဍဲမွဲဇံၚ်ခါတ်ဓဝ်လေဝ် တိက်အိုတ်ရ၊ ပ္ဍဲမွဲယာတ်လးဓဝ်လေဝ်တိက်အိုတ်ရ၊ ပ္ဍဲမွဲယာတ်လတက်ဓဝ်လေဝ် တိက်အိုတ်ရ၊ ပ္ဍဲမွဲယာတ်လးမွဲယာတ်လတက်ဓဝ်လေဝ် တိက်အိုတ်ရ၊ ပ္ဍဲဟွံသေၚ်ကဵုအခိၚ်လေဝ် စဟာပ်အိုတ်ရ၊ သိအရက်လေဝ် သုၚ်အိုတ်ရ၊ ပ္ကဴသဴမြမောဝ်ဂစေအ်စၠန် လံက်ဗဗိုဟ်လေဝ် ပကၚ်ရၚ်အိုတ်ရ၊ လှေ်လေဝ်လှေ်အိုတ်ရ၊ ဂယှေ်လေဝ် ဂယှေ်အိုတ်ရ၊ တိၚ်တိုက်လေဝ် တိၚ်တိုက်အိုတ်ရ၊ လှ်ေလေဝ် လှ်ေသာၚ်သောဝ်အိုတ်ရ၊ (ဗတောန်ထ္ၜးကဵုနဲလှေ်အိုတ်ရ၊) အလိုက်ဗြဴသၟာလှေ်လေဝ် လှေ်ဗက်အိုတ်ရ၊ အလိုက်ဗြဴသၟာလှ်ေလေဝ် ဂယှေ်ဗက်အိုတ်ရ၊ အလိုက်ဗြဴသၟာလှေ်လေဝ် တိၚ်တိုက်ဗက်အိုတ်ရ၊ အလိုက်ဗြဴသၟာလှေ်လေဝ် လှေ်သာၚ်သောဝ်အိုတ်ရ၊ အလိုက်ဗြဴသၟာဂယှ်ေလေဝ် လှေ်ဗက်အိုတ်ရ၊ အလိုက်ဗြဴသၟာဂယှေ်လေဝ် ဂယှ်ေဗက်အိုတ်ရ၊ အလိုက်ဗြဴသၟာဂယှေ်လေဝ် တိၚ်တိုက်ဗက်အိုတ်ရ၊ အလိုက်ဗြဴသၟာဂယှ်ေလေဝ် လှ်ေသာၚ်သောဝ်ဗက်အိုတ်ရ၊ အလိုက်ဗြဴသၟာဆေၚ်ဝေၚ်လေဝ် လှ်ေဗက်အိုတ်ရ၊ အလိုက်ဗြဴသၟာဆေၚ်ဝေၚ်လေဝ် ဂယှ်ေဗက်အိုတ်ရ၊ အလိုက်ဗြဴသၟာဆေၚ်ဝေၚ်လေဝ် တိၚ်တိုက်ဗက်အိုတ်ရ၊ အလိုက်ဗြဴသၟာဆေၚ်ဝေၚ်လေဝ် လှ်ေသာၚ်သောဝ်အိုတ်ရ၊ အလိုက်ဗြဴသၟာဗတောန်လေဝ် လှ်ေဗက်အိုတ်ရ၊ အလိုက်ဗြဴသၟာဗတောန်လေဝ် ဂယှေ်ဗက်အိုတ်ရ၊ အလိုက်ဗြဴသၟာဗတောန်လေဝ် တိၚ်တိုက်ဗက်အိုတ်ရ၊ အလိုက်ဗြဴသၟာဗတောန်လေဝ် လှေ်သာၚ်သောဝ်ဗက်အိုတ်ရ။

ကၠဒ္စါံခန်လေဝ် ဝေၚ်အိုတ်ရ၊ ကၠစှ်ခန်လေဝ် ဝေၚ်အိုတ်ရ၊ ကၠပ္ဍဲအမှဲအကးလေဝ် ဝေၚ်အိုတ်ရ၊ ကၠောန်သရက်ပ္ဍဲတိတုဲလေဝ် ဝေၚ်အိုတ်ရ၊ နပွမပေါဟ်မခတ်လေဝ် ဝေၚ်အိုတ်ရ၊ နပွမဖျေံမပး ပ္ဍဲလတူခတဵုပးတုဲလေဝ် ဝေၚ်အိုတ်ရ၊ နပွမတက်တၚ်ဏာၚ်လေဝ် ဝေၚ်အိုတ်ရ၊ နကဵုဇြေဟ်ဒု န်ကရေက်လေဝ် ဝေၚ်အိုတ်ရ၊ နဝေၚ်မခနေအ်လေဝ် ဝေၚ်အိုတ်ရ၊ နပွမဓဂိုဟ်ပေဝ်လေဝ် ဝေၚ်အိုတ်ရ၊ နကဵုထဲသၟတ်လေဝ် ဝေၚ်အိုတ်ရ၊ နပွမပစူတာ (နပွမဗတက်ဂတးဂတန်)လေဝ်ဝေၚ်အိုတ်ရ၊ နကဵုစက်စာန်လေဝ်ဝေၚ်အိုတ်ရ၊ နကဵုကၞာဲသၟတ်လေဝ်ဝေၚ်အိုတ်ရ၊ နကဵုကွဳသၟတ်လေဝ် ဝေၚ်အိုတ်ရ၊ နကဵုတ္ၚသၟတ်လေဝ် ဝေၚ်အိုတ်ရ၊ နပွမပၞုက် အက္ခရ်လေဝ် ဝေၚ်အိုတ်ရ၊ နပွမထၟိက်ပတိတ်ကသပ်စိုတ်လေဝ် ဝေၚ်အိုတ်ရ၊ သ္ပမပတမ်ကဵုညံၚ်ကၠက် ညံၚ်ခ္ဍဲညံၚ်ကုန်တုဲလေဝ် ဝေၚ်အိိုတ်ရ၊ ကွတ်စိၚ်လေဝ် ကတ်ဗတောန်အိုတ်ရ၊ ကွတ်ချေံလေဝ် ကတ်ဗတောန်အိုတ်ရ၊ ကွတ်ကွဳစောတ် (ရထာ) လေဝ် ကတ်ဗတောန်အိုတ်ရ၊ ကွတ်တ္ၚလေဝ် ကတ်ဗတောန်အိုတ်ရ၊ ကွတ်သာၚ်ၜုန်မြလေဝ် ကတ်ဗတောန်အိုတ်ရ၊ နူဂတစိၚ်လေဝ် ဂြိပ်အာအိုတ်ရ၊ နူဂတချေံလေဝ် ဂြိပ်အာအိုတ်ရ၊ နူဂတးကွဳစောတ် (ရထာ) လေဝ် ဂြိပ်အာဂြိပ်ကၠုၚ်အိုတ်ရ၊ သ္ပတဴညံၚ်ဒံၚ်သၠာ်တက်ၜုၚ်အိုတ်ရ၊ တက်လေဝ် တက်ကၞက်အိုတ်ရ၊ ကဝိုတ်လေဝ် ကဝိုတ်လက်ဗန်အိုတ်ရ၊ တက်လေဝ် တက်လက်ပၠုဲအိုတ်ရ။

ပ္ဍဲလဒေါဝ်ပေါဲလှ်ေဂမၠိုၚ်လေဝ် လးပၠးသကိုပ်တုဲ “ယွံဒေံဗြဴ ဩဝ်လှ်ေပ္ဍဲသၞာဝွံညိ” ရဴဝွံ ဟီုသ္ဂးကဵုဗြဴသၟာလှ်ေအိုတ်ရ၊ ခိုဟ်ကွေံရ ခိုဟ်ကွေံရ ယွံဒေံဗြဴ ရဴဝွံ ကဵုလေဝ်ကဵုသာဓုကာအိုတ်ရ၊ လပုဟ်တဲဂမၠိုၚ်ပတိုန်စွံလဝ်လတူတၞေၚ်လေဝ် ဍံက်ကဵုအိုတ်ရ၊ ဒ္ဂေတ်ပွမယုတ်မာနာနာသာလေဝ် ဒ္ဂေတ်သ္ပအိုတ်ရ။

၂၂။ ပ္ဍဲအခိၚ်ဂှ် ခမဳမွဲဇကု ဒၠိုက်ကတဵုနူဝသ် ပ္ဍဲဇနပိုဒ်ကာသိရးတုဲ တၞဟ်နသွက်သ္ဂောံဗဵုလ္ၚောဝ် တဳလမၞုံပိုဉ်ကျာ်တြဲ အာတဴဍုၚ်သာရဝှ်မ္ဂး စိုပ်ကၠုၚ်ကဳဋာဂိရိရ၊ ပ္ဍဲအခိၚ်ဂှ် ပ္ဍဲအခိၚ်နူဂယး သၠောံရုၚ်လတက်ပဠေဝ်သ္ၚာတုဲမ္ဂး ဂိုၚ်ထ္ၜကေတ်ဗဗေၚ်သ္ၚာတုဲ မၞုံကဵုမတ်မဖျေံဗွဲသၟဝ် နပွမတိုန်ဂတ ပွမဆုတ်လက်ကရဴ ပွမသ္ၚေဝ်ရံၚ်တူရူ ပွမသ္ၚေဝ်ဒ္စေၚ်ရံၚ် ပွမခ္ဍောပ် ပွမပၠး မရၚ်တၠုၚ်ကဵု လျုၚ်ဇြုၚ်သ္ဍိုက်ဒှ်တုဲ ခမဳမဍိုက်ပေၚ်တဴကေုာံဣရိယာပိုထ်ဂှ် တၞဟ်နသွက်ပိဏ္ဍပါတ် လုပ်အာကဳဋာဂိရိရ။ မၞိဟ်ဂမၠိုၚ် ညာတ်ခမဳဂှ်တုဲ “ဍိုန်ဍိုန်လျလျလဇုဲလဇုဲလဇလဇခ္ဍောပ်လဝ်မုက် (ခတောအ် လဝ်တၞေၚ်) ညံၚ်ညးဒေါသတိတ်ကီုတုဲ ညးမကၠုၚ်ဒၟံၚ်ဝွံတုန် ညးလဵုရော? ကုညးမပြာပ်ကၠုၚ်ဝွံ မုရဴညးလဵုမွဲ ကြက်ကဵုဒါန် ပိဏ္ဍပါတ်ရော? တဳလပိုဉ်အဿဇိပုနဗ္ဗသုကဂမၠိုၚ် ပိုဲညးဂမၠိုၚ်တုန် ဍိုန်ဍောတ်ဇိပ်ဂၠိပ်အိုတ်ရ၊ ဍုက်ဍေက်ကလိတ်ကလောတ်အိုတ်ရ၊ ပါၚ်ဍာတ်အိုတ်ရ၊ မၞုံကဵုပွမအီ အာဂတအိုတ်ရ၊ ကၠုၚ်ညိကၠုၚ်ညိ ရဴဝွံ မၞုံအလေံဟီုဒုၚ်တၠုၚ်ပါၚ်ဆာတ်အိုတ်ရ၊ မၞုံကဵုမုက္ခဝါ ဍာတ်ပ္ညုၚ် ဇြုၚ်ကေဝ်ဒၟံၚ်ဟေၚ် မံက်ထေၚ်လဵုအိုတ်ရ၊ မၞုံအလေံ ဟီုသ္ဂးကိုပ်ကၠာရ၊ ကုတဳလပိုဉ် ဂမၠိုၚ်ဂှ်ဟေၚ် ထေက်ကဵုကဵုဒါန်ပိဏ္ဍပါတ်ရ” ရဴဝွံ ဟီုသ္ဂးအိုတ်ရ။ ဥပးမွဲဂှ် ညာတ်ဒးအာ ခမဳမဂေတ်ဂ္ၚေၚ် တၞဟ်နသွက်ပိဏ္ဍပါတ် ပ္ဍဲကဳဋာဂိရိမ္ဂး ပြာပ်အာဇရေၚ်ခမဳဂှ်တုဲ လ္ၚောဝ်သ္ပဝတ် ဗွဲမရှ်ေသှ်ေရဴဂဴတုဲမ္ဂး “ယွံတဳလပိုဉ် ကလိဂွံပိဏ္ဍပါတ်ညိဟာ” ရဴဝွံ ဂရၚ်ပတီရ။ ယွံဒကာ ဟွံကလိဂွံပိဏ္ဍပါတ်ရ ရဴဝွံ (ကလၚ်သ္ဂးရ)။

ယွံတဳလပိုဉ် ဩဝ်က္ညကၠုၚ်ညိ၊ ကြက်အာသ္ၚိအိုတ်ရ ရဴဝွံ (ဂရၚ်ပတီရ)။

ပ္ဍဲအခိၚ်ဂှ် ဥပးဂှ် နိမန်ဏာ ခမဳဂှ် သ္ၚိတုဲ ဖါပ်ဗ္စတုဲမ္ဂး—

“ယွံတဳလပိုဉ် တဳလပိုဉ် မုရဴဌာန်မွဲ က္ညအာရော?” ရဴဝွံ ဂရၚ်ပတီရ။

ယွံဒကာ အဲ တၞဟ်နသွက်သ္ဂောံဗဵုလ္ၚောဝ် တဳလမၞုံပိုဉ်ကျာ်တြဲ ကြက်အာဍုၚ်သာရဝှ်ရ ရဴဝွံ (ကလေၚ်သ္ဂးရ)။

ယွံတဳလပိုဉ် ယဝ်ဒှ်သာ်ဂှ်မ္ဂး နကဵုဂလာန်အဲဍိက်ဂှ် ဩဝ်လ္ၚောဝ်ဖျေံက္ဍိုပ် ဒၠးဇိုၚ်တဳလမၞုံပိုဉ်ကျာ်တြဲဂမၠိုၚ်ညိ။ ရဴဝွံလေဝ် ဩဝ်ဂရၚ်ပတီညိ။

“ယွံတဳလမၞုံပိုဉ် ဘာပ္ဍဲကဳဋာဂိရိဂှ် လီုလာ်အာတုဲရ၊ ခမဳယုတ် မဟွံမွဲကဵုဂဝဂလေံဂမၠိုၚ် မၞုံယၟုအဿဇိပုနဗ္ဗသုက ဒှ်နွံပိုဉ်ဂဇအ်ဘာဂမၠိုၚ် ပ္ဍဲကဳဋာဂိရိအိုတ်ရ။ ခမဳဂမၠိုၚ်ဂှ် ဒ္ဂေတ်သ္ပတဴ ဒ္ဂေတ်ယုတ်မာ မၞုံသဘဴရဴဝွံအိုတ်ရ၊ တဵုတဴတၞမ်ပ္ကဴသၟတ်အိုတ်ရ၊ ဖအောဝ်ကဵုညးသအာၚ်တဵုအိုတ်ရ၊ ကိုဟ်စဝ်စရိုဟ်ဍာ်အိုတ်ရ၊ ဖအောဝ်ကဵုကိုဟ်စဝ်စရိုဟ်ဍာ်အိုတ်ရ၊ ၜှ်ဂၠောၚ်အိုတ်ရ၊ ဖအောဝ်ကဵုၜှ်ဂၠောၚ်အိုတ်ရ၊ ကၞောတ်ဇန်အိုတ်ရ၊ ဖအောဝ်ကဵုကၞောတ်ဇန်အိုတ်ရ၊ သ္ပတဴဇၟန်ပ္ကဴမၞုံတဝ် မတိတ်မွဲလပါ်အိုတ်ရ၊ ဖအောဝ်ကဵုသ္ပအိုတ်ရ၊ သ္ပတဴဇၟန်ပ္ကဴ မၞုံတဝ်မတိတ်ၜါလပါ်အိုတ်ရ၊ ဖအောဝ်ကဵုသ္ပအိုတ်ရ၊ သ္ပတဴ ပ္ကဴဗတဗ္ဂဲအိုတ်ရ၊ ဖအောဝ်ကဵုသ္ပအိုတ်ရ၊ သ္ပတဴပ္ကဴလကံက်တဲ (ဇၟန်ပ္ကဴကဝး) အိုတ်ရ၊ ဖအောဝ်ကဵုသ္ပအိုတ်ရ၊ သ္ပတဴပ္ကဴတဝ်စရှ်အိုတ်ရ၊ ဖအောဝ်ကဵုသ္ပအိုတ်ရ၊ သ္ပတဴသၞေက်၊ ပ္ကဴဂ္ညိကတောဝ်အိုတ်ရ၊ ဖအောဝ်ကဵုသ္ပအိုတ်ရ၊ သ္ပတဴပ္ကဴဂြောပ်သြိုဟ်အိုတ်ရ၊ ဖအောဝ်ကဵုသ္ပအိုတ်ရ။

ခမဳ (အဿဇိပုနဗ္ဗသုက) ဂမၠိုၚ်ဂှ် တၞဟ်နဖဵု ဗြဴကောန်ဂကူ ‘ဗြဴတၠလျိုၚ်’ ဗြဴဇၞော်ကောန်ဂကူ ‘ဝုတ်ဇၞော်’ သၟတ်ဗြဴကောန်ဂကူ ‘ဝုတ်သၟတ်’ ခအှ်ဗြဴကောန်ဂကူ ဍိက်ဗြဴကောန်ဂကူဂမၠိုၚ် ပ္ဍဲမွဲပ္ၚာန်ခရော်ဓဝ်လေဝ် စဟာပ်အိုတ်ရ၊ ပ္ဍဲမွဲခရော်သုၚ်ဍာ်ဓဝ်လေဝ် သုၚ်အိုတ်ရ၊ ပ္ဍဲမွဲသၞာဓဝ်လေဝ် ဂဇအ်အိုတ်ရ၊ ပ္ဍဲမွဲဇံၚ်ခါတ်ဓဝ်လေဝ် တိက်အိုတ်ရ၊ ပ္ဍဲမွဲယာတ်လးဓဝ်လေဝ်တိက်အိုတ်ရ၊ ပ္ဍဲမွဲယာတ်လတက်ဓဝ်လေဝ် တိက်အိုတ်ရ၊ ပ္ဍဲမွဲယာတ်လးမွဲယာတ်လတက်ဓဝ်လေဝ် တိက်အိုတ်ရ၊ ပ္ဍဲဟွံသေၚ်ကဵုအခိၚ်လေဝ် စဟာပ်အိုတ်ရ၊ သိအရက်လေဝ် သုၚ်အိုတ်ရ၊ ပ္ကဴသဴမြမောဝ်ဂစေအ်စၠန် လံက်ဗဗိုဟ်လေဝ် ပကၚ်ရၚ်အိုတ်ရ၊ လှ်ေလေဝ်လှ်ေအိုတ်ရ၊ ဂယှေ်လေဝ် ဂယှ်ေအိုတ်ရ၊ တိၚ်တိုက်လေဝ် တိၚ်တိုက်အိုတ်ရ၊ လှေ်လေဝ် လှ်ေသာၚ်သောဝ်အိုတ်ရ၊ (ဗတောန်ထ္ၜးကဵုနဲလှ်ေအိုတ်ရ၊) အလိုက်ဗြဴသၟာလှ်ေလေဝ် လှ်ေဗက်အိုတ်ရ၊ အလိုက်ဗြဴသၟာလှ်ေလေဝ် ဂယှ်ေဗက်အိုတ်ရ၊ အလိုက်ဗြဴသၟာလှေ်လေဝ် တိၚ်တိုက်ဗက်အိုတ်ရ၊ အလိုက်ဗြဴသၟာလှ်ေလေဝ် လှ်ေသာၚ်သောဝ်အိုတ်ရ၊ အလိုက်ဗြဴသၟာဂယှ်ေလေဝ် လှေ်ဗက်အိုတ်ရ၊ အလိုက်ဗြဴသၟာဂယှေ်လေဝ် ဂယှ်ေဗက်အိုတ်ရ၊ အလိုက်ဗြဴသၟာဂယှ်ေလေဝ် တိၚ်တိုက်ဗက်အိုတ်ရ၊ အလိုက်ဗြဴသၟာဂယှ်ေလေဝ် လှေ်သာၚ်သောဝ်ဗက်အိုတ်ရ၊ အလိုက်ဗြဴသၟာဆေၚ်ဝေၚ်လေဝ် လှ်ေဗက်အိုတ်ရ၊ အလိုက်ဗြဴသၟာဆေၚ်ဝေၚ်လေဝ် ဂယှ်ေဗက်အိုတ်ရ၊ အလိုက်ဗြဴသၟာဆေၚ်ဝေၚ်လေဝ် တိၚ်တိုက်ဗက်အိုတ်ရ၊ အလိုက်ဗြဴသၟာဆေၚ်ဝေၚ်လေဝ် လှ်ေသာၚ်သောဝ်အိုတ်ရ၊ အလိုက်ဗြဴသၟာဗတောန်လေဝ် လှ်ေဗက်အိုတ်ရ၊ အလိုက်ဗြဴသၟာဗတောန်လေဝ် ဂယှ်ေဗက်အိုတ်ရ၊ အလိုက်ဗြဴသၟာဗတောန်လေဝ် တိၚ်တိုက်ဗက်အိုတ်ရ၊ အလိုက်ဗြဴသၟာဗတောန်လေဝ် လှ်ေသာၚ်သောဝ်ဗက်အိုတ်ရ။

ကၠဒ္စါံခန်လေဝ် ဝေၚ်အိုတ်ရ၊ ကၠစှ်ခန်လေဝ် ဝေၚ်အိုတ်ရ၊ ကၠပ္ဍဲအမှဲအကးလေဝ် ဝေၚ်အိုတ်ရ၊ ကၠောန်သရက်ပ္ဍဲတိတုဲလေဝ် ဝေၚ်အိုတ်ရ၊ နပွမပေါဟ်မခတ်လေဝ် ဝေၚ်အိုတ်ရ၊ နပွမဖျေံမပး ပ္ဍဲလတူခတဵုပးတုဲလေဝ် ဝေၚ်အိုတ်ရ၊ နပွမတက်တၚ်ဏာၚ်လေဝ် ဝေၚ်အိုတ်ရ၊ နကဵုဇြေဟ်ဒု န်က ရေက်လေဝ် ဝေၚ်အိုတ်ရ၊ နဝေၚ်မခနေအ်လေဝ် ဝေၚ်အိုတ်ရ၊ နပွမဓဂိုဟ်ပေဝ်လေဝ် ဝေၚ်အိုတ်ရ၊ နကဵုထဲသၟတ်လေဝ် ဝေၚ်အိုတ်ရ၊ နပွမပစူတာ (နပွမဗတက်ဂတးဂတန်)လေဝ်ဝေၚ်အိုတ်ရ၊ နကဵုစက်စာန်လေဝ်ဝေၚ်အိုတ်ရ၊ နကဵုကၞာဲသၟတ်လေဝ်ဝေၚ်အိုတ်ရ၊ နကဵုကွဳသၟတ်လေဝ် ဝေၚ်အိုတ်ရ၊ နကဵုတ္ၚသၟတ်လေဝ် ဝေၚ်အိုတ်ရ၊ နပွမပၞုက် အက္ခရ်လေဝ် ဝေၚ်အိုတ်ရ၊ နပွမထၟိက်ပတိတ်ကသပ်စိုတ်လေဝ် ဝေၚ်အိုတ်ရ၊ သ္ပမပတမ်ကဵုညံၚ်ကၠက် ညံၚ်ခ္ဍဲညံၚ်ကုန်တုဲလေဝ် ဝေၚ်အိိုတ်ရ၊ ကွတ်စိၚ်လေဝ် ကတ်ဗတောန်အိုတ်ရ၊ ကွတ်ချေံလေဝ် ကတ်ဗတောန်အိုတ်ရ၊ ကွတ်ကွဳစောတ် (ရထာ) လေဝ် ကတ်ဗတောန်အိုတ်ရ၊ ကွတ်တ္ၚလေဝ် ကတ်ဗတောန်အိုတ်ရ၊ ကွတ်သာၚ်ၜုန်မြလေဝ် ကတ်ဗတောန်အိုတ်ရ၊ နူဂတစိၚ်လေဝ် ဂြိပ်အာအိုတ်ရ၊ နူဂတချေံလေဝ် ဂြိပ်အာအိုတ်ရ၊ နူဂတးကွဳစောတ် (ရထာ) လေဝ် ဂြိပ်အာဂြိပ်ကၠုၚ်အိုတ်ရ၊ သ္ပတဴညံၚ်ဒံၚ်သၠာ်တက်ၜုၚ်အိုတ်ရ၊ တက်လေဝ် တက်ကၞက်အိုတ်ရ၊ ကဝိုတ်လေဝ် ကဝိုတ်လက်ဗန်အိုတ်ရ၊ တက်လေဝ် တက်လက်ပၠုဲအိုတ်ရ။

ပ္ဍဲလဒေါဝ်ပေါဲလှေ်ဂမၠိုၚ်လေဝ် လးပၠးသကိုပ်တုဲ “ယွံဒေံဗြဴ ဩဝ်လှ်ေပ္ဍဲသၞာဝွံညိ” ရဴဝွံ ဟီုသ္ဂးကဵုဗြဴသၟာလှေ်အိုတ်ရ၊ ခိုဟ်ကွေံရ ခိုဟ်ကွေံရ ယွံဒေံဗြဴ ရဴဝွံ ကဵုလေဝ်ကဵုသာဓုကာအိုတ်ရ၊ လပုဟ်တဲဂမၠိုၚ်ပတိုန်စွံလဝ်လတူတၞေၚ်လေဝ် ဍံက်ကဵုအိုတ်ရ၊ ဒ္ဂေတ်ပွမယုတ်မာနာနာသာလေဝ် ဒ္ဂေတ်သ္ပအိုတ်ရ။

ယွံတဳလမၞုံပိုဉ် မၞိဟ်ဂမၠိုၚ် မလျုၚ်ပတှ်ေ လျုၚ်ဇြုၚ်သ္ဍိုက် (ရတ်ပိပြကာ) ပ္ဍဲအခိၚ်ကၠာတေံလေဝ် ပ္ဍဲအခိၚ်လၟုဟ် ဟွံလျုၚ်ပတှ်ေ ဟွံလျုၚ်ဇြုၚ်သ္ဍိုက် (ရတ်ပိပြကာ) အိုတ်ရ၊ ဝတ်ကဵုဒါန်သၚ်ဂမၠိုၚ် ပ္ဍဲအခိၚ်ကၠာတေံလေဝ် ပ္ဍဲအခိၚ်လၟုဟ် ပိုတ်အာအိုတ်ရ၊ ခမဳမသ္ဍိုက်ဆာန် သဳလဂမၠိုၚ် သုန်ဂြာံအာအိုတ်ရ၊ ခမဳယုတ်မာဂမၠိုၚ် ပဒတဴဒၟံၚ်အိုတ်ရ။

ယွံတဳလမၞုံပိုဉ် အာတ်ပါန်အခေါၚ်ရ၊ တဳလမၞုံပိုဉ်ကျာ်တြဲ ဗလးကဵုခမဳဂမၠိုၚ် ကဳဋာဂိရိညိ၊ နပွမဗလးနၚ်သာ်ဂှ် ဘာပ္ဍဲကဳဋာဂိရိဝွံ တန်တဴဗွဲမဒးရးရ ရဴဝွံ ဩဝ်ဂရၚ်ပတီညိ” ရဴဝွံလေဝ် (ဩဝ်ဂရၚ်ပတီညိ ရဴဝွံ ဂရၚ်ပတီရ)။ “ယွံဒကာ ခိုဟ်ရ” ရဴဝွံ ခမဳဂှ် ဒုၚ်ဝန်ကုဥပးဂှ်တုဲ ပါဲစ္ဍးက္ညအာ ဍုၚ်သာရဝှ်ရ၊ ဗွဲလၟေၚ်လၟေၚ် ပြာပ်အာဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ် ဇရေၚ်တဳလမၞုံပိုဉ်ကျာ်တြဲတုဲမ္ဂး လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ ဂဇအ်ဒၟံၚ်ပ္ဍဲဒၞာဲမွဲရ။ ပွမဟီုဂလာန်ဆက်မိတ် ဗွဲမမိပ်စိုတ်အိုဟ်တၟိုဟ် ကေုာံခမဳအာဂန္တုကဂမၠိုၚ် မွဲစွံဂှ် ဒှ်အခိုက်အလေံ တဳလမၞုံပိုဉ်ကျာ်တြဲဂမၠိုၚ်ရ။

ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ်−

“ယွံခမဳ ဒုၚ်စရၚ်ဒၟံၚ်ဟာ၊ ယိုပ်ယာပ်ဒၟံၚ်ဟာ၊ သီုဟွံဒှ်လၟောၚ်ဍောၚ်ၜိုတ်ဂှ် သ္ဂောံကၠုၚ်တရဴအဓါန်မဂၠိၚ်သ္ၚောဲဟာ၊ ယွံခမဳ တၠအဲ မုရဴနူဌာန်မွဲ ကၠုၚ်တဴရော?” ရဴဝွံ သၟာန်ခမဳဂှ်ရ။

ဒုၚ်စရၚ်ဒၟံၚ်ရ ယွံကျာ်မၞုံပိုဉ်၊ ယိုပ်ယာပ်ဒၟံၚ်ရ ယွံကျာ်မၞုံပိုဉ်၊ အဲဍိက် သီုဟွံဒှ်လၟောၚ်ဍောၚ်ၜိုတ်ဂှ် သ္ဂာံကၠုၚ်တရဴအဓါန်မဂၠိၚ်သ္ၚောဲရ၊ ယွံကျာ်မၞုံပိုဉ် အဲဍိက် ဒၠိုက်ကဵုနူဝှ် ပ္ဍဲဇနပိုဒ်ကာသိရးတုဲ တၞဟ်နသွက်သ္ဂောံဗဵုလ္ၚောဝ် တဳလမၞုံပိုဉ်ကျာ်တြဲ ကၠုၚ်တဴဍုၚ်သာရဝှ်မ္ဂး စိုပ်ကၠုၚ်ကဳဋာဂိရိရ၊ ယွံကျာ်မၞုံပိုဉ် ပ္ဍဲအခိၚ်ဂှ် အဲဍိက် ပ္ဍဲအခိၚ်နူဂယး သၠောံရုၚ်လတက်ပဠေဝ်သ္ၚာတုဲမ္ဂး ဂိုၚ်ထ္ၜကေတ် ဗဗေၚ်သ္ၚာတုဲ တၞဟ်နသွက်ပိဏ္ဍပါတ် လုပ်အာ ကဳဋာဂိရိရ။

ယွံကျာ်မၞုံပိုဉ် ဥပးမွဲဂှ် ညာတ်ဒးအာ အဲဍိက် မဂေတ်ဂ္ၚေၚ် တၞဟ်နသွက်ပိဏ္ဍပါတ် ပ္ဍဲကဳဋာဂိရိဂှ်မ္ဂး ပြာပ်ကၠုၚ် ဇရေၚ်အဲဍိက်တုဲ လ္ၚောဝ်သ္ပဝတ်ကဵုအဲဍိက်တုဲမ္ဂး−

“ယွံတဳလပိုဉ် ကလိဂွံပိဏ္ဍပါတ်ညိဟာ” ရဴဝွံ ဂရၚ်ပတီရ။

ယွံဒကာ ဟွံကလိဂွံပိဏ္ဍပါတ်ရ ရဴဝွံ (ကလေၚ်သ္ဂးရ)။

ယွံတဳလပိုဉ် ဩဝ်က္ညကၠုၚ်ညိ၊ ကြက်အာသ္ၚိအိုတ်ရ ရဴဝွံ (ဂရၚ်ပတီရ)။ ယွံကျာ်မၞုံပိုဉ် ပ္ဍဲအခိၚ်ဂှ် ဥပးဂှ် နိမန်ဏာ အဲဍိက် သ္ၚိတုဲ ဖါပ်ဗ္စတုဲမ္ဂး−

“ယွံတဳလပိုဉ် တဳလပိုဉ် မုရဴဌာန်မွဲ က္ညအာရော?” ရဴဝွံ ဂရၚ်ပတီရ။

ယွံတဳလမၞုံပိုဉ် မၞိဟ်ဂမၠိုၚ် မလျုၚ်ပတှ်ေ လျုၚ်ဇြုၚ်သ္ဍိုက် (ရတ်ပိပြကာ) ပ္ဍဲအခိၚ်ကၠာတေံလေဝ် ပ္ဍဲအခိၚ်လၟုဟ် ဟွံလျုၚ်ပတှ်ေ ဟွံလျုၚ်ဇြုၚ်သ္ဍိုက် (ရတ်ပိပြကာ) အိုတ်ရ၊ ဝတ်ကဵုဒါန်သၚ်ဂမၠိုၚ် ပ္ဍဲအခိၚ်ကၠာတေံလေဝ် ပ္ဍဲအခိၚ်လၟုဟ် ပိုတ်အာအိုတ်ရ၊ ခမဳ မသ္ဍိုက်ဆာန် သဳလဂမၠိုၚ် သုန်ဂြာံအာအိုတ်ရ၊ ခမဳယုတ်မာဂမၠိုၚ် ပဒတဴဒၟံၚ်အိုတ်ရ။

ယွံတဳလမၞုံပိုဉ် အာတ်ပါန်အခေါၚ်ရ၊ တဳလမၞုံပိုဉ်ကျာ်တြဲ ဗလးကဵုခမဳဂမၠိုၚ် ကဳဋာဂိရိညိ၊ နပွမဗလးနၚ်သာ်ဂှ် ဘာပ္ဍဲကဳဋာဂိရိဝွံ တန်တဴဗွဲမဒးရးရ ရဴဝွံ ဩဝ်ဂရၚ်ပတီညိ” ရဴဝွံ ဂရၚ်ပတီ ကုအဲဍိက်ရ။ ယွံကျာ်မၞုံပိုဉ် အဲဍိက် ကၠုၚ်ကဳဋာဂိရိရ ရဴဝွံ (ဂရၚ်ပတီရ)။ ၂၃။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဴ ကဵုခမဳသၚ် ကောံဓရီုတုဲမ္ဂး−

“ယွံခမဳတအ် ခမဳယုတ်မာ ဟွံမွဲကဵုဂဝဂလေံဂမၠိုၚ် မၞုံယၟုအဿဇိပုနဗ္ဗသုက ဒှ်နွံပိုဉ်ဂဇအ်ဘာဂမၠိုၚ် ပ္ဍဲကဳဋာဂိရီအိုတ်ရ။ ခမဳဂမၠိုၚ်ဂှ် ဒ္ဂေတ်သ္ပတဴ ဒ္ဂေတ်ယုတ်မာ မၞုံသဘဴရဴဝွံအိုတ်ရ၊ တဵုတၞမ်ပကဴအိုတ်ရ၊ ဖအောဝ်ကဵုညးသအာၚ်တဵုအိုတ်ရ ။ ပ ။ ဒ္ဂေတ်ပွယုတ်မာနာနာသာ်လေဝ် ဒ္ဂေတ်သ္ပအိုတ်ရ။ မၞိဟ်ဂမၠိုၚ် မလျုၚ်ပတှ်ေ လျုၚ်ဇြုၚ်သ္ဍိုက် (ရတ်ပိပြကာ) ပ္ဍဲအခိၚ်ကၠာတေံလေဝ် ပ္ဍဲအခိၚ်လၟုဟ် ဟွံလျုၚ်ပတှ်ေ ဟွံလျုၚ်ဇြုၚ်သ္ဍိုက် (ရတ်ပိပြကာ) အိုတ်ရ၊ ဝတ်ကဵုဒါန်သၚ်ဂမၠိုၚ် ပ္ဍဲအခိၚ်ကၠာတေံလေဝ် ပ္ဍဲအခိၚ်လၟုဟ် ပိုတ်အာအိုတ်ရ၊ ခမဳ မသ္ဍိုက်ဆာန် သဳလဂမၠိုၚ် သုန်ဂြာံအာအိုတ်ရ၊ ခမဳယုတ်မာဂမၠိုၚ် ပဒတဴဒၟံၚ်အိုတ်ရ၊ ခမဳယုတ်မာဂမၠိုၚ် ပဒတဴဒၟံၚ်အိုတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက် ခမဳဂမၠိုၚ်ရ။

ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။

တဳလမၞုံပိုဉ်ကျာ်တြဲ မပတၠပိုဉ်တြဲပြကာ ဟီုဂရိုဟ်ရ။ ပ ။ ယွံခမဳတအ် တြုံမလ္ၚုသၟး (နူမဂ်ဖိုလ်) ဂမၠိုၚ်ဂှ် မုဟိုတ်ဒ္ဂေတ်သ္ပတဴ ဒ္ဂေတ်ယုတ်မာ မၞုံသဘဴရဴဝွံအိုတ်ရော? တဵုတဴတၞမ်ပ္ကဴ သၟတ်အိုတ်ရော?၊ ဖအောဝ်ကဵုညးသအာၚ်တဵုအိုတ်ရော? ကိုဟ်စဝ်စရိုဟ်ဍာ်အိုတ်ရော? ဖအောဝ်ကဵုကိုဟ်စဝ်စရိုဟ်ဍာ်အိုတ်ရော? ၜှ်ဂၠောၚ်အိုတ်ရော? ဖအောဝ်ကဵုၜှ်ဂၠောၚ်အိုတ်ရော? ကၞောဝ်ဇန်အိုတ်ရော? ဖအောဝ်ကဵုကၞောတ်ဇန်အိုတ်ရော? သ္ပတဴဇၟန်ပ္ကဴ မၞုံတဝ်မတိတ်မွဲလပါ်အိုတ်ရော? ဖအောဝ်ကဵုသ္ပအိုတ်ရော? သ္ပတဴဇၟန်ပ္ကဴမၞုံတဝ်ၜါလပါ်အိုတ်ရော? ဖအောဝ်ကဵုသ္ပအိုတ်ရော? သ္ပတဴပ္ကဴဗတဗ္ဂဲအိုတ်ရော? ဖအောဝ်ကဵုသ္ပအိုတ်ရော? သ္ပတဴပ္ကဴ လကံက်တဲ (ဇၟန်ပ္ကဴကဝး) အိုတ်ရော? ဖအောဝ်ကဵုသ္ပအိုတ်ရော? သ္ပတဴပ္ကဴတဝ်စရှ်အိုတ်ရော? ဖအောဝ်ကဵုသ္ပအိုတ်ရော?၊ သ္ပတဴသၞေက်၊ ပ္ကဴဂ္ညိကတောဝ်အိုတ်ရော? ဖအောဝ်ကဵုသ္ပအိုတ်ရော? သ္ပတဴပ္ကဴဂြောပ်သြိုဟ်အိုတ်ရော? ဖအောဝ်ကဵုသ္ပအိုတ်ရော?

ခမဳ (အဿဇိ ပုနဗ္ဗသုက) ဂမၠိုၚ်ဂှ် တၞဟ်နဖဵုဗြဴကောန်ဂကူ ‘ဗြဴတၠလျိုၚ်’ ဗြဴဇၞော်ကောန်ဂကူ ‘ဝုတ်ဇၞော်’ သၟတ်ဗြဴကောန်ဂကူ ‘ဝုတ်သၟတ်’ ဂအှ်ဗြဴကောန်ဂကူ ဍိက်ဗြဴကောန်ဂကူဂမၠိုၚ်ရၚ်တၠုၚ်တဴ ဇၟန်ပ္ကဴမၞုံတဝ်မတိတ်မွဲလပါ်အိုတ်ရော? ဖအောဝ်ကဵုရေၚ်တၠုၚ်အိုတ်ရော? ရၚ်တၠုၚ်တဴဇၟန်ပ္ကဴမၞုံတဝ် မတိတ်ၜါလပါ်အိုတ်ရော?၊ ဖအောဝ်ကဵုရၚ်တၠုၚ်အိုတ်ရော? ရၚ်တၠုၚ်တဴ ပ္ကဴဗတဗ္ဂဲအိုတ်ရော? ဖအောဝ်ကဵုရၚ်တၠုၚ်အိုတ်ရော? ရၚ်တၠုၚ်တဴ ပ္ကဴတဝ်စရှ်အိုတ်ရော? ဖအောဝ်ကဵုရၚ်တၠုၚ်အိုတ်ရော? ရၚ်တၠုၚ်တဴသၞေက်၊ ပ္ကဴဂ္ညိကတောဝ်အိုတ်ရော? ဖအောဝ်ကဵု ရေၚ်တၠုၚ်အိုတ်ရော? ရၚ်တၠုၚ်တဴ ပ္ကဴဂြောပ်သြိုဟ်အိုတ်ရော? ဖအောဝ်ကဵုရၚ်တၠုၚ်အိုတ်ရော?။

ခမဳဂမၠိုၚ်ဂှ် မွဲဟာန်ကေုာံဗြဴကောန်ဂကူ ‘ဗြဴတၠလျိုၚ်’ ဗြဴဇၞော်ကောန်ဂကူ ‘ဝုတ်ဇၞော်’ သၟတ်ဗြဴကောန်ဂကူ ‘ဝုတ်သၟတ်’ ဂအှ်ဗြဴကောန်ဂကူ ဍိက်ဗြဴကောန်ဂကူဂမၠိုၚ် ပ္ဍဲမွဲပ္ၚာန်ခရော်စဝ်လေဝ် စဟာပ်အိုတ်ရော? ပ္ဍဲမွဲခရော်သုၚ်ဍာ်ဓဝ်လေဝ် သုၚ်အိုတ်ရော? ပ္ဍဲမွဲသၞာဓဝ်လေဝ် ဂဇအ်အိုတ်ရော? ပ္ဍဲမွဲဇံၚ်ခါတ်ဓဝ်လေဝ် တိက်အိုတ်ရော? ပ္ဍဲမွဲယာတ်လးဓဝ်လေဝ် တိက်အိုတ်ရော? ပ္ဍဲမွဲယာတ်လတက်ဓဝ်လေဝ် တိက်အိုတ်ရော? ပ္ဍဲမွဲယာတ်လးမွဲယာတ် လတက်ဓဝ်လေဝ် တိက်အိုတ်ရော? ပ္ဍဲဟွံသေၚ်ကဵုအခိၚ်လေဝ် စဟာပ်အိုတ်ရော? သိအရက်လေဝ် သုၚ်အိုတ်ရော? ပ္ကဴသဴမြမောဝ်ဂစေအ်စၠန်လံက်ဗဗိုဟ်လေဝ် ပကၚ်ရၚ်အိုတ်ရော? လှေ်လေဝ် လှ်ေအိုတ်ရော?၊ ဂယှ်ေလေဝ် ဂယှ်ေအိုတ်ရော? တိၚ်တိုက်လေဝ် တိၚ်တိုက်အိုတ်ရော? လှ်ေလေဝ် လှ်ေသာၚ်သောဝ်အိုတ်ရော? (ဗတောန်ထ္ၜးကဵုနဲလှ်ေအိုတ်ရော?) အလိုက်ဗြဴသၟာလှ်ေလေဝ် တိၚ်တိုက်ဗက်အိုတ်ရော? အလိုက်ဗြဴသၟာလှ်ေလေဝ် ဂယှ်ေဗက်အိုတ်ရော? အလိုက်ဗြဴသၟာလှေ်လေဝ် တိၚ်တိုက်ဗက်အိုတ်ရော? အလိုက်ဗြဴသၟာလှ်ေလေဝ် လှ်ေသာၚ်သောဝ်အိုတ်ရော? အလိုက်ဗြဴသၟာဂယှ်ေလေဝ် တိၚ်တိုက်ဗက်အိုတ်ရော? အလိုက်ဗြဴသၟာဂယှ်ေလေဝ် လှ်ေသာၚ်သောဝ်ဗက်အိုတ်ရော? အလိုက်ဗြဴသၟာဆေၚ်ဝေၚ်လေဝ် လှ်ေဗက်အိုတ်ရော? အလိုက်ဗြဴ သၟာဆေၚ်ဝေၚ်လေဝ် ဂယှ်ေဗက်အိုတ်ရော? အလိုက်ဗြဴသၟာဆေၚ်ဝေၚ်လေဝ် တိၚ်တိုက်ဗက်အိုတ်ရော? အလိုက်ဗြဴ သၟာဆေၚ်ဝေၚ်လေဝ် လှ်ေသာၚ်သောဝ်အိုတ်ရော? အလိုက်ဗြဴသၟာဗတောန်လေဝ် လှ်ေဗက်အိုတ်ရော? အလိုက်ဗြဴသၟာဗတောန်လေဝ် ဂယှ်ေဗက်အိုတ်ရော? အလိုက်ဗြဴသၟာဗတောန်လေဝ် တိၚ်တိုက်ဗက်အိုတ်ရော? အလိုက်ဗြဴသၟာဗတောန်လေဝ် လှေ်သာၚ်သောဝ်ဗက်အိုတ်ရော?။

ကၠဒ္စါံခန်လေဝ် ဝေၚ်အိုတ်ရော? ကၠစှ်ခန်လေဝ် ဝေၚ်အိုတ်ရော? ကၠပ္ဍဲအမှဲအကးလေဝ် ဝေၚ်အိုတ်ရော? ကၠောန်သရက်ပ္ဍဲတိတုဲလေဝ် ဝေၚ်အိုတ်ရော? နပွမပေါဟ်မခတ်လေဝ် ဝေၚ်အိုတ်ရော? နပွမဖျေံမပး ပ္ဍဲလတူခတဵုပးတုဲလေဝ် ဝေၚ်အိုတ်ရော? နပွမတက်တၚ်ဏာၚ်လေဝ်ဝေၚ်အိုတ်ရော? နကဵုဇြေဟ်ဒုန်ကရေက်လေဝ် ဝေၚ်အိုတ်ရော? နဝေၚ်မခနေအ်လေဝ် ဝေၚ်အိုတ်ရော? နပွမဓဂိုဟ်ပေဝ်လေဝ် ဝေၚ်အိုတ်ရော? နကဵုထဲသၟတ်လေဝ် ဝေၚ်အိုတ်ရော? နပွမပစူတာ (နပွမဗတက်ဂတးဂတန်) လေဝ် ဝေၚ်အိုတ်ရော? နကဵုစက်စာန်လေဝ် ဝေၚ်အိုတ်ရော? နကဵုကၞာဲသၟတ်လေဝ် ဝေၚ်အိုတ်ရော? နကဵုကွဳသၟတ်လေဝ် ဝေၚ်အိုတ်ရော? နကဵုတ္ၚသၟတ်လေဝ် ဝေၚ်အိုတ်ရော? နပွမပၞုက်အက္ခရ်လေဝ် ဝေၚ်အိုတ်ရော? နပွမထၟံက်ပတိတ် ကသပ်စိုတ်လေဝ် ဝေၚ်အိုတ်ရော? သ္ပမပတမ်ကဵုညံၚ်ကၠက် ညံၚ်ခ္ဍဴ ညံၚ်ကုန်တုဲလေဝ် ဝေၚ်အိုတ်ရော? ကွက်စိၚ်လေဝ် ကတ်ဗတောန်အိုတ်ရော? ကွတ်ချေံလေဝ် ကတ်ဗတာန်အိုတ်ရော? ကွတ်ကွဳစောတ် (ရထာ) လေဝ် ကတ်ဗတောန်အိုတ်ရော? ကွတ်တ္ၚလေဝ် ကတ်ဗတောန်အိုတ်ရော? ကွတ်သာၚ်ၜုန်မြလေဝ် ကတ်ဗတောန်အိုတ်ရော? နူဂတစိၚ်လေဝ် ဂြိပ်အာအိုတ်ရော? နူဂတချေံလေဝ် ဂြိပ်အာအိုတ်ရော? နူဂတးကွဳစောတ် (ရထာ) လေဝ် ဂြိပ်အာ ဂြိပ်ကၠုၚ်အိုတ်ရော? သ္ပတဴညံၚ်ဒံၚ်သၠာ်တက်ၜုၚ်အိုတ်ရော? တက်လေဝ် တက်ကၞက်အိုတ်ရော? ကဝိုတ်လေဝ် ကဝိုတ်လက်ဗန်အိုတ်ရော? တက်လေဝ် တက်လက်ပၠုဲအိုတ်ရော?။

ပ္ဍဲလဒေါဝ်ပေါဲလှေ်ဂမၠိုၚ်လေဝ် လးပၠးသကိုပ်တုဲ “ယွံဒေံဗြဴ ဩဝ်လှ်ေပ္ဍဲသၞာဝွံညိ” ရဴဝွံ ဟီုသ္ဂးကဵုဗြဴသၟာလှ်ေအိုတ်ရော? ခိုဟ်ကွေံရ ခိုဟ်ကွေံရ ယွံဒေံဗြဴ ရဴဝွံ ကဵုလေဝ်ကဵုသာဓုကာအိုတ်ရော်? လပုဟ်တဲဂမၠိုၚ်ပတိုန်စွံလဝ် လတူတၞေၚ်လေဝ် ဍံက်ကဵုအိုတ်ရော? ဒ္ဂေတ်ပွယုတ်မာ နာနာသာ်လေဝ် ဒ္ဂေတ်သ္ပအိုတ်ရော? ယွံခမဳတအ် (ပွမခဳဂမၠိုၚ်သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု။ ပ ။

ဟီုဂရိုဟ်တုဲ ။ ပ ။ တွံကဵုဂလာန်ဓရ်တုဲပ္ဍဲကြဴ―

“ယွံသာရိပိုတ် မောဂ္ဂလာန်တအ် မၞးတအ်ညးဂမၠိုၚ် ဩဝ်အာအိုတ်ညိ၊ အာကဳဋာဂိရိတုဲ ဩဝ်သ္ပ ‘ပဗ္ဗာဇနဳယမ်’ ပွမဗက်ဗ္ဒဴ နူကဳဋာဂိရိ ကုခမဳ အဿဇဳပုနဗ္ဗသုကဂမၠိုၚ်အိုတ်ညိ၊ ခမဳဂမၠိုၚ်ဂှ် ဒှ်ကွးပဒတဴမွဲစွံဂမၠိုၚ် မၞးတအ်ညးဂမၠိုၚ်အိုတ်ရ” ရဴဝွံ သ္ဂးကဵုသာရိပိုတ် မောဂ္ဂလာန်ရ။

ယွံတဳလမၞုံပိုဉ် ခမဳဂမၠိုၚ်ဂှ် ကြမ်ကြသအဵုသအာက်အိုတ်ရ၊ သကာတ်မြဟ်အိုတ်ရ၊ ပိုဲဍိက်တအ် ညးဂမၠိုၚ် မုရဴသာ်လဵု သ္ဂောံသ္ပပွမဗက်ဗဒဴ နူကဳဋာဂိရိ ကုခမဳအဿဇဳပုနဗ္ဗသုကဂမၠိုၚ်အိုတ်ရော? ရဴဝွံ (ဂရၚ်ပတီအိုတ်ရ)။

ယွံသာရိပိုတ် မောဂ္ဂလာန်တအ် ယဝ်ဒှ်သာ်မ္ဂး မၞးတအ်ညးဂမၠိုၚ် အာမွဲဟာန်ကေုာံခမဳဂမၠိုၚ်မဂၠိုၚ်အိုတ်ညိ ရဴဝွံ (သ္ဂးရ) ။

“ယွံတဳလမၞုံပိုဉ် ခိုဟ်သန်ရ” ရဴဝွံ သာရိပိုတ်ကေုာံမောဂ္ဂလာန်ဂမၠိုၚ် ကလေၚ်ဂရၚ်ပတီ ကုတဳလမၞုံပိုဉ်ကျာ်တြဲအိုတ်ရ။

ယွံခမဳတအ် ရဴဝွံ ဒးသ္ပရ၊ ဗွဲကိုပ်ကၠာ သ္ဒးစောဒနာ ခမဳအဿဇိပုနဗ္ဗသုကဂမၠိုၚ်ရ၊ ကြဴနူဂှ် သ္ဒးကဵုဗှ်ဗၞုဟ်ရ၊ ကြဴနူဂှ် သ္ဒးပတိုန်အာပတ်ရ၊ ကြဴနူဂှ် ခမဳ စဳကၠးဆိုက်ဗ္ဒက်တုဲ မၞုံကဵု အစောံသတ္တိဂှ် သ္ဒးကဵုသၚ်တီရ။

၂၄။ “ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳအဿဇိပုနဗ္ဗသုကဂမၠိုၚ် လေပ်ပလီုပလာ် ဂကူအိုတ်ရ၊ မၞုံကဵုဒ္ဂေတ်ယုတ်မာအိုတ်ရ၊ ဒ္ဂေတ်မယုတ်မာဂမၠိုၚ် ဒဒက်တဴခမဳဂမၠိုၚ်ဝွံ ညာတ်လေဝ်ဂပ်ဝ်ညာတ်အိုတ်ရ၊ မိၚ်လေဝ်ဂပ်ဝ်မိၚ်အိုတ်ရ၊ ဂကူဂမၠိုၚ် မိန်ခမဳဂမၠိုၚ်ဝွံ မဂပ်ဝ်ပလီုပလာ်လေဝ် ညာတ်လေဝ်ဂပ်ဝ်ညာတ်အိုတ်ရ၊ မိၚ်လေဝ်ဂပ်ဝ် မိၚ်အိုတ်ရ၊ ကမ်မၞုံကဵု အခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် သ္ပပွမဗက်ဗ္ဒဴကၠေံ နူကဳဋာဂိရိ ကုခမဳအဿဇိပုနဗ္ဗသုကဂမၠိုၚ် ရဴဝွံမ္ဂး ‘ခမဳအဿဇိပုနဗ္ဗသုကဂမၠိုၚ် သ္ပဒတဴ ပ္ဍဲကဳဋာဂိရိဟွံဂွံ’ ရ၊ ဣဝွံတုန် ပွမကဵုတီရောၚ်။

ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳအဿဇိပုနဗ္ဗသုကဂမၠိုၚ် လေပ်ပလီုပလာ် ဂကူအိုတ်ရ၊ မၞုံကဵုဒ္ဂေတ်ယုတ်မာအိုတ်ရ၊ ဒ္ဂေတ်မယုတ်မာဂမၠိုၚ် ဒဒက်တဴခမဳဂမၠိုၚ်ဝွံ ညာတ်လေဝ်ဂပ်ဝ်ညာတ်အိုတ်ရ၊ မိၚ်လေဝ်ဂပ်ဝ်မိၚ်အိုတ်ရ၊ ဂကူဂမၠိုၚ် မိန်ခမဳဂမၠိုၚ်ဝွံ မဂပ်ဝ်ပလီုပလာ်လေဝ် ညာတ်လေဝ်ဂပ်ဝ်ညာတ်အိုတ်ရ၊ မိၚ်လေဝ်ဂပ်ဝ်မိၚ်အိုတ်ရ၊ သၚ် သ္ပပွမဗက်ဗဒဴကၠေံနူကဳဋာဂိရိ ကုခမဳအဿဇိပုနဗ္ဗသုကဂမၠိုၚ် ရဴဝွံမ္ဂး ‘ခမဳအဿဇိပုနဗ္ဗသုကဂမၠိုၚ် သ္ပဒတဴ ပ္ဍဲကဳဋာဂိရိဟွံဂွံ’ ရ၊ ယြဴကုတဳလပိုဉ်မွဲ သ္ဍိုက်မၠိုက် ပွမဗက်ဗဒဴကၠေံ နူကဳဋာဂိရိ ကုခမဳအဿဇိပုနဗ္ဗသုကဂမၠိုၚ် ရဴဝွံမ္ဂး ‘ခမဳအဿဇိပုနဗ္ဗသုကဂမၠိုၚ် သ္ပဒတဴ ပ္ဍဲကဳဋာဂိရိဟွံဂွံ’ ရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။ မရနုက်ကဵုၜါဝါလေဝ် ဟီုသ္ဂးဟိုတ်ဂှ်ရ ။ ပ ။ မရနုက်ကဵုပိဝါလေဝ် ဟီုသ္ဂးဟိုတ်ဂှ်ရ။ ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ ။ ပ ။ တဳလပိုဉ်ဂှ် သ္ဒးဟီုတိုန်ရ။

သၚ် ဂပ်ဝ်သ္ပပွမဗက်ဗဒဴကၠေံ နူကဳဋာဂိရိ ကုခမဳအဿဇိပုနဗ္ဗသုကဂမၠိုၚ် ရဴဝွံမ္ဂး ‘ခမဳအဿဇိပုနဗ္ဗသုကဂမၠိုၚ် သ္ပဒတဴ ပ္ဍဲကဳဋာဂိရိဟွံဂွံ’ တုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြ ရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ ရဴဝွံ သ္ဂးရ)။