၁.၂.၅။ နိယဿကမ်လလမ်
၁၇။ ပ္ဍဲအခိၚ်ဂှ် သၚ် သ္ပနိယဿကမ် ကုခမဳသေယျသက ရဴဝွံမ္ဂး ‘တၠအဲ ဒးနိဿယ် ဗဒါဲတုဲ ပဒတဴရ’။ ဟိုတ်နူသၚ်သ္ပလဝ် နိယဿကမ်ဂှ်ရ ခမဳသေယျသကဂှ် သိပ်ဂၠိပ်ပြာပ်ခသဳကၠဳ ဗဒါဲကဵုမိတ်သဟာဲခိုဟ်ဆာဲဂမၠိုၚ်တုဲမ္ဂး ဂိုၚ်ကတ်ကေတ် သၟာန်သၟုက်ဂှ်ဒှ်တုဲ လၟိၚ်လညာတ်ဂၠိုၚ်ရ၊ ဂွံပတိုန်လဝ်ပါၚ် ပါဠိသၟးဟွံက ဓမ္မဝိနယကေုာံမာတိကာလေဝ် ပကၚ်ရၚ်လဝ်ရ၊ မၞုံကဵုပညာရ၊ ဍိုဟ်ကေတ်စဳကၠးရ၊ လေပ်ဂွပါပ်ပွသရာမ်ပါပ်ရ၊ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာ သာ်ဝွံဟာ သာ်ဝွံဟာရ၊ မၞုံကဵုဒ္ဂေတ်သိက္ခာရ၊ ဒ္ဂေတ်တဴ ဗွဲမဒးရးရ၊ ဖျေံကၠေံတသော်မာန်ရ ‘မာန်စှေ်’ ရ၊ ဒ္ဂေတ်တဴ ဒ္ဂေတ်ဝတ်ဒှ်ဟိုတ်တိတ်ဗၠးနူကမ်ရ၊ ပြာပ်အာဇရေၚ်ခမဳဂမၠိုၚ်တုဲမ္ဂး “ယွံတဳလပိုဉ်တအ် ဟိုတ်နူသၚ်သ္ပလဝ် နိယဿကမ်ဂှ်ရ အဲဍိက်ဒ္ဂေတ်တဴ ဗွဲမဒးရးရ၊ ဖျေံကၠေံတသော်မာန်ရ ‘မာန်စှေ်’ ရ၊ ဒ္ဂေတ်တဴ ဒ္ဂေတ်ဝတ်ဒှ်ဟိုတ်တိတ်ဗၠးနူကမ်ရ၊ အဲဍိက် ပသာ် ဂွံဒ္ဂေတ်သ္ပရော?” ရဴဝွံ ဟီုသ္ဂးရ။ ခမဳတအ် ဒှ်သာ်ဂှ်မ္ဂး သၚ် ဩဝ်ကဵုလလမ်ကၠေံ နိယဿကမ် ကုခမဳသေယျသကညိ။
