МОНГОЛ ОРНЫ ЖИГҮҮРТЭН - 2024 гэрэл зургийн уралдаан
Монголын зэрлэг амьтан судлах хамгаалах төв, Монголын шувуу ажиглагчдын клуб хамтран уламжлалт “Монгол орны жигүүртэн” гэрэл зургийн уралдаанаа зарлаж байна. Энэхүү уралдаан нь олон нийтийг байгаль хамгаалах, түүний дотроос жигүүртэн амьтад, тэдгээрийн амьдрах орчныг хамгаалах үйлсэд татан оролцуулах, шувуу ажиглагч сонирхогчдыг дэмжих зорилготой.
Уралдааны заавар
“Монгол орны жигүүртэн” гэрэл зургийн уралдаанд оролцох сонирхолтой иргэдийн сүүлийн нэг жилийн хугацаанд буулгасан шувууны гэрэл зургийн бүтээлийг 2024 оны 4 дүгээр сарын 07-ний өдрийг дуустал mongolianbirdwatching@gmail.com хаягаар хүлээн авна. Зургийн шалгаруулалтыг тусгай шүүгчдийн бүрэлдэхүүн шувууны гэрэл зургийн нийтлэг чанарын болон шувуу хамгаалах ёс зүйн шаардлагад нийцүүлэн шүүж шилдэг зургуудыг шалгаруулна. Уралдааныг дүнг 2024 оны 4 дүгээр сарын 13-нд зохион байгуулагдах МШАК-ын IX уулзалтын үеэр олон нийтэд зарлаж, шагнал хүртээж урамшуулна.
Зурагчин өөрийн овог нэр, холбоо барих э-мэйл хаяг, утасны дугаараа ирүүлсэн байх ёстой. Уралдаанд ирсэн фото зургуудын зохиогчийн эрх тухайн зурагчинд хадгалагдах болно
Уралдаанд ирж буй зургуудыг олон нийтэд өргөн таниулах үүднээс Монголын зэрлэг амьтан судлах хамгаалах төвийн албан ёсны facebook дээр байрлуулах болно https://www.facebook.com/WSCCM.
Уралдаанд шалгарсан оролцогсодтой э-мэйлээр холбоо барих бөгөөд ЗАСХТ, МШАК-ын facebook болон вэбсайт дээр зарлах болно. Мөн шалгарсан бүтээлийг нийтийн хүртээл болгох үүднээс дээрх вэбсайт дээр байрлуулж, сурталчилна.
Гэрэл зурагт тавигдах шаардлага
Бүтээлийн техникийн шаардлага:
Уралдаанд ирүүлэх бүтээл нь байгалийн амьдрах орчинд авсан зэрлэг шувууны гоо үзэсгэлэн, зан төрх, ховор агшныг уран сайхнаар илтгэн харуулна.
Уралдаанд ирүүлж байгаа бүтээл нь зохиогч болон бүтээлийн нэртэй байна. Шувууны нэршлийг бичихийг дэмжинэ.
Оролцогч бүр 5 хүртэлх бүтээлээ ирүүлж болно.
Зураг, бичлэгийн формат JPEG, MP4, файлын хэмжээ 50MB-аас хэтрэхгүй байна. Зураг бичлэгийн үндсэн агуулга, дүрсийг өөрчлөлгүйгээр засвар хийж болно.
Зохиомлоор дүрс, дэвсгэрийг сольсон, зүйсэн нийлмэл зургийг хүлээн авахаас түдгэлзэнэ.
Бүтээлд хүний орон гэр, барилга, дэд бүтцийн хэсэг орсон байж болно.
Шалгаруулалтын нууцыг хадгалах үүднээс зурган дээр зохиогчийн тамгатай бүтээлийг хүлээн авахгүй.
Бүтээлийн ёс зүйн шаардлага:
Амьтан шувууг таниулан сурталчлах, хайрлан хамгаалах, амьдрах орчныг тэтгэх энэрэнгүй хандах үзэл санааны үүднээс амьтан шувууны бүтээлд хүнлэг ёс зүйн шаардлагад нийцсэн байна. Үүнд:
Шувууг илт үргээж хөөсөн, дарамтад оруулсан, тушсан, хөдөлгөөнийг хориглосон, дрон ашигласан, шувууны үүр, өндөг, ангаахай дэгдээхэйнд хэт ойртож буюу богино дурангаар авсан, тэжээсэн, гаршуулсан шувууны зураг, бичлэг
Эргийн шувууг үржлийн үед, усны шувууг гуужсан үед ойрын зайнаас авсан зураг, бичлэг
Шөнийн цагт шувууг хурц гэрэл ашиглан авсан зураг, бичлэгийг хүлээн авахаас түдгэлзэнэ.
Уралдааны шагнал
1-р байр
Өргөмжлөл, дурсгалын зүйлс, 500 000 төгрөг
2-р байр
Өргөмжлөл, дурсгалын зүйлс, 400 000 төгрөг
3-р байр
Өргөмжлөл, дурсгалын зүйлс, 300 000 төгрөг
Ховор шувуу
Өргөмжлөл, дурсгалын зүйлс, 300 000 төгрөг
Ховор агшин
Өргөмжлөл, дурсгалын зүйлс, 300 000 төгрөг
Шилдэг видео
Өргөмжлөл, дурсгалын зүйлс, 300 000 төгрөг
Дэмжигч болон ивээн тэтгэгч байгууллагууд
Энэ жилийн уралдааны бай шагналыг дараах байгууллагууд спонсорлон оролцож байна. Та бүхэнд МШАК-ын нийт гишүүдийн өмнөөс талархлаа илэрхийлье.
Зэрлэг амьтан судлах хамгаалах төв
Монголын гэрэл зурагчдын нэгдсэн холбоо
ШУА-ийн Биологийн хүрээлэн
Мишээл байгаль орчин, танин мэдэхүйн хүрээлэн
Байгаль Апп
GIZ