Thoughts No. 16 - 2021

(Date 22-Apr-2021)

بسرعة العمر بيمضي

مثل ما كأنو مضي!

سريع ما بيطلب

لا إذن ولا دستور!

ما بينطرنا

ما بياخد برأينا

بيقطع مثل السهم

ما فينا نلقطو

ما فينا نوقفو

و أكيد ما فينا نعيدو...

منفكّر إنّا عايشين وما رح نفنا

منفكّر إنو الدني دنيتنا

منضيّع عمرنا عم نحلم بالمستقبل

و عم نتذكّر الماضي

و بضيع الحاضر من عمرنا

و الوقت بيغدرنا

وعلى غفلة...

السنين بتفارقنا

أ.ع.س.

Thoughts No. 14 - 2021

(Date 08-Apr-2021)

شو شتقنا نسلّم سلام إيد بإيد

نغمر ونشدّ ومش عن بعيد.

نعبـّر عن يـلـي بقـلـبنـا

بلا ما نحس بميّة عقدة ذنب

ويوجـعـنـا قـلـبـنـا.

شو شتقنا نتنفّس برياحا

وما نعمل حساب لكل رَوحا.

شو شتقنا نشوف وجوه،

ضِحكات وابتسامات أحبابنا

ونِضحك مع بعضنا من قَلب قلبنا

نقرّب من بعضنا ونزور بعضنا.

اشتقنا نكون أحرار!

نتحرّر من هالماسكات

و نبطّل ناخد مسافات

والله شتقنا...

شتقنا نرجع مثل ما كنّا...

بس بتعرفو مظبوط نحنا شتقنا

ويـمـكـن تــعــبنا وما عاد فـيـنـا...

بــس كـلـنـا ايـمـان إنـّو الله مـعـنـا

وحاسس فينا...

بيعرف الوقت يلّي خَلَص

عنجد ما عاد فينا!

وبنَجّينا...

أ.ع.س.

Thoughts No. 12 - 2021

(Date 25-Mar-2021)

كل شي بصير معنا لخيرنا

كلمات تعودنا نسمعا و نسمّعا لحالنا

و يمكن نرددا مع حالنا

كل ما يتسكّر باب بوجنا

كل ما الأمل ينطفي ونحس ما عاد فينا...

وعم ننطفي...

منقول: لخيرنا! يمكن هيدا الشي أحسنلنا...

كل ما نيأس، كل ما نضعف، كل ما نحزن...

بيلمع براسنا انو ربنا سمح بهالشي لمصلحتنا...

إديش هالقناعة حلوي،

إديش هالفكرة بتعزي،

خربت أو عمرت كلو لخيرنا

تعو نعيش هالعبرة

وما تضل بس فكرة

وتصير جزء من حياتنا

ومش بس كلمات عابرا...

أ.ع.س.

Thoughts No. 10 - 2021

(Date 11-Mar-2021)

الحب كلمة صغيرة معانيها كتيرة.

فينا نحب على السكت،

فينا نحب و نحكي،

فينا ما نحكي و بس نبكي!

فينا نعبر بكلمات

و فينا نختصر الجمل بنظرة، ببسمة أو بكلمة...

كلمة من القلب طالعة بتكفي،

وبكل صدق نابعة بتروي.

بكفي أوقات نبكي مع يلي عم يبكي.

نشد على ايدو ونحط كفنا بكفو...

بكفي أوقات بس نسمع و نصغي ليلي عم يشكي...

نحس في و نحس معو نحط حالنا محلو

و نحس بكل أحاسيسو...

كلنا منحب

كلنا عنا لغة خاصة فينا لما نحب

لغاتنا مختلفة و طرقنا متعددة

بس النيّة وحدة و وحيدة

"إنو نحب"

لأنو "الله محبة"

أ.ع.س.

Thoughts No. 8 - 2021

(Date 25-Feb-2021)

بالرغم من كل شي، مكفايين!

بالرغم من كل شي،

ولو مش فاهمين...

المهم مش واقفين.

نحنا مكفايين!

بالرغم من كل شي،

و لو ما في شي ظابط!

نحنا كلنا ثقة بضابط هالكون

انو مظبطلنا كل شي

لخير كل واحد فينا!

ثقتنا في بتقوينا!

"نحنا ربنا معنا وحامينا"

هيدا ايمانا يلي بكفينا وبيكفينا

بالرغم من كل شي: "ربنا بحبنا“

ما ننسى هالشي...

أ.ع.س.

Thoughts No. 6 - 2021

(Date 11-Feb-2021)

تعو نرجع لزمن الماضي، لريحة الحطب و الصوبية...

والمنقوشة اللي بتقرش قرش على الصاج.

لصحن اللبنة المزين بزيتونة جرجير،

وشيء كم عرق نعنع من الحوش.

البيض المقلي بالفخار، ولا أطيب...

تعو نرجع لأطيب عالم و أنقى قلوب.

همّن على قدّن! ومحبتن من قلبن!

اللّقمي اللي بتمّن لغيرن!

ما بيعرفو معنى الغيرة،

ما غيرَّن هالزمن المادي، ما قدر عليهن!!

هني هني...

ببساطتن، بضحكاتن،

بغمزات عيونن، بشفافيِّتن...

اللي بقلبن على راس شفافن...

"حياتن كلها حياة"

"حياتن كلها حب"

تعو نرجع لهيدا الحب...

الحب الصافي، الهادي، الصادق والمش مادي.

هيدا الحب المجاني يلي من نوع ثاني.

تعو نرجع ...

أ.ع.س.

Thoughts No. 4 - 2021

(Date 28-Jan-2021)

إنت و محجور و حاسس حالك مهجور.

مخنوق متل كأنك مسجون.

مسجون ببيتك وغصب عنك!

عينك على الضو وناطر ليطلع الضو.

يخلَص هل النفق!

يخَلِصنا قبل ما يخَلِّص علينا.

خلَص!

قول لنفسك:

ما بدي عيش على النطرا!

فيي جود بالموجود، وحس حالي موجود.

وحتى ولو أنا لحالي ومع حالي.

إعطي معنى لحياتي ولوجودي.

فتش جواتي كيف فيي طور مهاراتي وإكتشف طاقاتي.

حسّن حياتي بهل الحجر الصحي ليكون سليم وصحي.

أ.ع.س.

Thoughts No. 2 - 2021

(Date 14-Jan-2021)

ما تقلق على بكرا! ما تخلي قلق اللحظة يسرق منك هل اللحظة... عيش كل يوم بيومه, و بكرا جايي يومه...

أ.ع.س.

كل ما الأنا تكبر, همنا بيكبر... و منتكبر...

بيصغرو الناس بعيونا و بتكبر الأنا بقلوبنا...

و كل ما الأنا تصغر, همنا بيصغر... و بصير همنا يلي هاممنا كيف نسلم أمورنا لربنا و نعيش بسلام مع حالنا و يلي حولينا...

شو بدنا؟ نحجم هالأنا؟

ولا بدنا و بعد بدنا؟

و يا ريت عاجبنا...

أ.ع.س.

ما نحكم على حدا! ما حدا محل حدا، ولا حدا متل حدا!

مظبوط نحن مختلفين وما حدا بيشبه حدا!

بس ما نخلي هل الاختلاف يخلق خلاف.

أ.ع.س.