Iñchiñ

Taiñ txokiñche

Mapuzuguletuaiñ Wallmapu mew – Instituto Nacional de La Lengua Mapuche – es una organización dedicada a la revitalización lingüística del mapuzugun en territorio Mapuche dirigida a todas y todos los habitantes del Wallmapu, sin excepción.

¡Mari mari peñi! ¡Mari mari lamgen! ¡Mari mari kom pu Wallmapuche!

Mapuzuguletuaiñ, feytachi küzaw ayinieiñ taiñ witxañpüramtual ta mapuzugun kimeltun zugu mew.

Taiñ txokiñche mew wiño piwkeyegetuiñ mew ka mapuche txokiwtun mew ta mapuzugun ñi zuam, chaf pu wechekeche mew, iñchiñ ñi rakizuamkülen mew ta mülenole ti mapuzugun feyta amulewelayay ta mapucheke che, feyti nasion mugel ta chumkawrume mülelayafuy.

Feytachi zugu mew ta txükoluwiyiñ ta Mapuzuguletuaiñ mew, tüfachi txokiñche mew konküleiñ mapuche ka mapuchegeyenochi che, ka kim mapuzuguyelu ka petu kim mapuzugumekelu, welu zew fentepun kimüwiyiñ femechimu taiñ pepi kimeltuleal ta ka mapuzugun.

We zugu nu ta feyta, kuifitugewyetuy ñi llitugen tüfachi zugu, pu wechekeche mew ñi enturumeluegün ta kiñeke kursu, ti kiñeke kimeltuwe ruka mew, ka fey ñi wünemuegün ñi entuken ti koneltun mapuzugun, feychi fewreru küyen mew, 2015 txipantugelu.

Feytachi pu che müten kuifimew ta txür witxañpüramkelu ta mapuzugun, külatxipantu yenieiñ, ka kizu pepiluwün mew ta witxañpüramfiiñ ta Mapuzuguletuaiñ, taiñ nietuam weke kim mapuzuguyelu, fey mew ta entumekelu inchiñ ta kursu, kimeltun ka koneltun mapuzugun, fillke amun nielu. Kafey newenmakelu inchiñ ta mapuzugun ñi witxañpüramtun taiñ mapu mew, Gülumapu ka Puelmapu mew.