Лапянкоў Міхаіл Якаўлевіч

Жыццё працягваецца

Міхаіл Якаўлевіч Лапянкоў – удзельнік Вялікай Айчыннай вайны. Нарадзіўся ў вёсцы Клімавічы. З 12 гадоў разам з бацькамі хадзіў працаваць у калгас, пасвіў коней, быў задзейнічаны ў паляводстве. Затым вывучыўся ў Бабруйску на шафёра і вярнуўся ў родную гаспадарку.

Вялікая Айчынная вайна напаткала хлопца, калі ён служыў у 58-м гаўбічна-артылерыйскім палку ў Заходняй Беларусі. Іх вайсковая часць размяшчалася ў лесе. Салдаты жылі ў палатках. Калі нямецкія самалёты пачалі бамбіць лес, байцоў паднялі па трывозе. Цудам засталіся жывымі. Усіх пагрузілі на машыны і адправілі абараняць граніцу. Там ішоў жорсткі бой. Шмат байцоў параніла, многія сустрэлі тут сваю смерць.

Салдаты трымалі абарону больш двух тыдняў. Але сілы былі няроўныя. З акружэння да сваіх прарываліся групамі. У такім пераходзе Лапянкоў атрымаў раненне ў руку і трапіў ў палон да немцаў. Спачатку быў лагер для ваеннапалонных ў Польшчы, потым – Германія. Яму давялося адчуць на сабе ўсе цяжкія ўмовы барака, непасільную працу. Грузіў баржы каменнем, працаваў на цагельні. Тут, у далёкім краі, Міхаіл Якаўлевіч і сустрэў Перамогу. Яго і іншых вязняў вызвалілі савецкія салдаты, падлячылі, накармілі.

Дадому Лапянкоў вярнуўся летам 1946 года пасля службы на Украіне. Працаваў ў калгасе рабочым, потым трактарыстам, камбайнерам.

Міхаіл Якаўлевіч і яго жонка Ганна Іванаўна вырасцілі і выхавалі 6 дзяцей. Маюць 14 унукаў і 15 праўнукаў. У апошні час здароўе стала падвадзіць іх, але жыццё, негледзячы на ўсе цяжкасці, працягваецца.

Аліна Салаўёва, бібліятэкар Чарнаруцкай сельскай бібліятэкі

Салаўёва, А. Жыццё працягваецца / Аліна Салаўёва // Ударны фронт. – 2004. — 24 красавіка. — С. 2.