Чайка Леанід Нікіфаравіч

Вернасць абавязку, любоў да людзей, высокую чалавечую прыстойнасць пранёс Леанід Нікіфаравіч Чайка праз усё сваё жыццё. Нарадзіўся 13 верасня 1919 года ў вёсцы Гута Бабруйскага павета ў сялянскай сям’і. Пасля заканчэння сямігодкі паступіў у Бабруйскую фельчарска-акушэрскую школу і закончыў яе ў 1939 годзе. Знаходзячыся на абавязковай службе ў радах Чырвонай Арміі, прымаў удзел у Фінскай кампаніі.

У гады Вялікай Айчыннай вайны знаходзіўся на акупіраванай фашыстамі тэрыторыі Кіраўскага раёна і змагаўся з захопнікамі ў саставе партызанскага атрада № 537 у якасці фельчара, начальніка санітарнай службы 2-га батальёна.

З моманту вызвалення Кіраўскага раёна ад нямецка-фашысцкіх захопнікаў і па ліпень 1993 года Леанід Нікіфаравіч працаваў у сістэме аховы здароўя Кіраўскага раёна. Першыя тры гады выконваў абавязкі дзяржаўнага санітарнага інспектара, потым працаваў памочнікам дзяржсанінспектара, загадчыкам санэпідаддзела, памочнікам эпідэміёлага, інструктарам санасветработы. Два гады выконваў абавязкі галоўнага ўрача санэпідстанцыі. 49 гадоў аддаў добрасумленнай працы і ў 1975 годзе быў удастоены ганаровага звання «Заслужаны работнік Беларусі». Яго ратны і працоўны подзвіг адзначаны ордэнамі Айчыннай вайны ІІ ступені, Працоўнага Чырвонага Сцяга і шасцю медалямі.