https://sites.google.com/view/linguarium
Ene man haw twea zoons. En de joongste van die zag teage ziene vaader: Vaader, geaf mig ut deil van ut vermooge, woa ig reg op hup. En de vaader verdeilde oonger hun al wat ze hawwe. En noa un paar daag pakde de joongste zoon zig alles biej ein en goong weg van woa hea woonde nao un lantj wiet weg, en dao verbrazde hea wat er haw. Wie hea alles verteart haw, keem ene erge hoongersjnoat euver dat lantj, en hea begoos ermoot te lieje. En hea goong in deens biej eine van de burgers van dat lantj, en dae sjikde hum noa zien veljer om de verkes te hujje. En hea hej zich gaer de maag gevult, mer neemes goof um get dao van. Doe goong hea naodenke en zag: Wiej voeul daagloanesj haet miene vaader neet, en diej hubbe broat zat, en ig vergaon hiej van de hoonger. Ig sjtaon op en gaon nao miene vader en dan gaon ich teagen um zegge: Vader, ich hup gezoonjigt teage de heemel en teagen ug. Ig ben ut neet mear weart ene zoon van ug geneumt te weare. Sjtelt mig aan es eine van eur daagloanesj.
En hea sjtoong op en goong nao ziene vaader. En wiej hea nog wiet weg woar, zoog ziene vaader um, en kreeg mitlieje mit um. Hea rende noa hum hear en vool um om de haws en puende hum. En de zoon zag teagen um: Vaader, ich hup gezoonjigt teage de heemel en teagen ug. Ig ben ut neet mear weart ene zoon van ug geneumt te weare. Toen zag de vader teage zien knechte: Gaot gaw ut beste kleit hoale en doot um dat aan. En geaft um ene vingerrink veur aan zien henj en sandaale veur aan de veut, en hoalt ut vetgemaste kawf, sjlagt ut en laot os eate en feas viere, want dizze zoon van mig woor doad en is weer leavent gewoore, hea woor verloare en is weer truuk gevoonje.
En ze begooste feas te viere. Mer ziene awtste zoon woor in ut veltj. En wiej hea bekans toes woor, huerde hea muziek en dans. En wiej hea eine van de knegte biej zig haw geroope, vroog hea, wat dao gaonde woor. En dae zag um: Eure broor is truuk gekoome, en eure vader haet ut vet gemaste kawf gesjlag, oomdat hea hum gezoontj haet truuk gevoonje. En dae woort kaot en wool neet nao benne goan. Doe keem ziene vaader noa boete en probeerde hum op zien gemoot te wirke. Mer dae goof ziene vaader antjwoort en zag: Kiekt ens, al zoa voeul jaor ben ig eure kneg, en hup ig ummer alles gedoan wat geer mig opdroog. Mer mig hub geer nog noats ens un geitebukske gegeave om mit mien vrunj feas te viere. Mer noe, wiej dae zoon van ug is truuk gekoome, dae eur vermoge der door haet gejaag mit hoere, noe hup geer veur dae ut vet gemaste kawf gesjlag! Mer de vaader zag teagen um: Doe, miene zoon, doe bes ummer biej mig, en al wat van mig is is van dig. Veer moote feas viere en bliej zeen, want dae broor van dig woor coat, en is weer leavent gewoore, en dae woor verloare, en is truuk gevoonje.