សមាគមខ្មែរនៃសេដ្ឋកិច្ចក្រៅប្រព័ន្ធ 

សៀមរាប៖ នៅព្រឹកថ្ងៃទី២៤ ខែមករា ឆ្នាំ២០២៥ ថ្នាក់ដឹកនាំសមាគមខ្មែរនៃសេដ្ឋកិច្ចក្រៅប្រព័ន្ធ (Khmer-AI) ប្រចាំតំបន់សាខាខេត្តសៀមរាប បានធ្វើការចុះជួបសួរសុខទុក្ខបងប្អូនជាសកម្មជន និងសមាជិកសមាគមក្នុងតំបន់គោលដៅ ដើម្បីស្វែងយល់ពីបញ្ហាប្រឈមនៃការប្រកបមុខរបរប្រចាំថ្ងៃ របស់បងប្អូនដែលជាអាជីវករ និងអ្នករត់រ៉ឺម៉កទេសចរណ៍ ក្នុងខេត្តសៀមរាប។ ក្នុងកិច្ចសំណេះសំណាលនោះផងដែរ ថ្នាក់ដឹកនាំសមាគម បានធ្វើការផ្សព្វផ្សាយស្តីពីការវិវឌ្ឍថ្មីៗនៃបេឡាជាតិសន្តិសុខសង្គម (ប.ស.ស.)។ 

ភ្នំពេញ៖ នៅព្រឹកថ្ងៃទី២៧ ខែមករា ឆ្នាំ២០២៥នេះ លោក ព្រុំ សុធា ប្រធានសមាគមខ្មែរនៃសេដ្ឋកិច្ចក្រៅប្រព័ន្ធ និងក្រុមការងារ បានចុះសួរសុខទុក្ខ និងយកថវិកាមួយចំនួនឧបត្តម្ភដល់សមាជិកដែលជួបគ្រោះថ្នាក់ចរាចរណ៍កាលពីថ្មីៗនេះ។ 

ព្រះសីហនុ៖ នៅពេលថ្មីៗនេះ ថ្នាក់ដឹកនាំសមាគមខ្មែរនៃសេដ្ឋកិច្ចក្រៅប្រព័ន្ធ (Khmer-AI) ប្រចាំតំបន់សាខាខេត្តព្រះសីហនុ បានធ្វើការចុះជួបសួរសុខទុក្ខបងប្អូនជាសកម្មជន និងប្រធានគោលដៅក្នុងតំបន់ខេត្តព្រះសីហុ ដើម្បីពង្រឹងនិងផ្សព្វផ្សាយពីការវឌ្ឍន៍ថ្មីៗរបស់សមាគម រួមទាំងស្វែងយល់ពីបញ្ហាប្រឈមនៃការប្រកបមុខរបរប្រចាំថ្ងៃរបស់បងប្អូនក្នុងតំបន់។ 

រាជធានីភ្នំពេញ៖ នៅថ្ងៃទី៥ ខែកុម្ភៈ ឆ្នាំ២០២៥ លោក ជួន ផានិត អគ្គលេខាធិការនៃសមាគមខ្មែរនៃសេដ្ឋកិច្ចក្រៅប្រព័ន្ធ (Khmer-AI) បានចុះជួបសួរសុខទុក្ខ និងជជែកពិភាក្សាជាមួយសមាជិក និងសកម្មជនក្នុងគោដៅរង្វង់មូលក្រុងតាខ្មៅ។ ក្នុងការជំនួបនោះ លោកបានលើកឡើងពីផែនការសកម្មភាពសំខាន់ៗសម្រាប់ឆ្នាំ២០២៥  និងការវិវឌ្ឍន៍ថ្មីនៃរបបសន្តិសុខសង្គម (ប.ស.ស.) ផងដែរ។  

ព្រះសីហនុ៖ កាលពីថ្ងៃទី៩ ខែមីនា ឆ្នាំ២០២៥ លោក ទេព សុផា ជាថ្នាក់ដឹកនាំសមាគមខ្មែរនៃសេដ្ឋកិច្ចក្រៅប្រព័ន្ធ (Khmer-AI) ប្រចាំតំបន់ខេត្តព្រះសីហនុ បានធ្វើការចុះជួបបងប្អូនជាសមាជិក សកម្មជន ស្ថិតនៅគោលដៅកន្ទុយនាគ ក្នុងខេត្តព្រះសីហុ ដើម្បីប្រជុំពង្រឹងនិងផ្សព្វផ្សាយពីការវឌ្ឍន៍ថ្មីៗរបស់សមាគម រួមទាំងពន្យល់ណែនាំសមាជិកទាំងអស់ឱ្យចូលរួមរក្សាសណ្តាប់ធ្នាប់ របៀបរៀបរយក្នុងតំបន់ គោលរបស់ខ្លួន។ 

សៀមរាប៖ នៅរសៀលថ្ងៃចន្ទ ១២កើត ខែផល្គុន ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១០ ខែមីនា ឆ្នាំ២០២៥ ថ្នាក់ដឹកនាំរបស់សមាគមខ្មែរនៃសេដ្ឋកិច្ចក្រៅប្រព័ន្ធ (Khmer-AI) ប្រចាំតំបន់ខេត្តសៀមរាប ដែលរួមមានលោក ប្រាក់ សារ៉ាន់ អនុប្រធានសមាគម លោកស្រី ហាស់ សៀម អគ្គហេរញ្ញិក និងលោក ឡាយ រដ្ឋា ប្រធានសាខាខេត្ត បានចុះសួរសុខទុក្ខ និងនាំយកថវិកាមួយចំនួន ផ្តល់ជូនលោក សរ ឡាយ ជាសមាជិករបស់សមាគមKhmer-AI ដែលមានបញ្ហាភ្នែកកំពុងសម្រាកព្យាបាលជម្ងឺនៅគេហដ្ឋានរបស់លោក ស្ដិតនៅភូមិពោធិ៍ សង្កាត់សៀមរាប ក្រុងសៀមរាប ខេត្តសៀមរាប។ 

សៀមរាប៖ ក្រុមអ្នករត់រ៉ឺម៉កកង់បី ដែលជាសមាជិករបស់សមាគមខ្មែរនៃសេដ្ឋកិច្ចក្រៅប្រព័ន្ធ (Khmer-AI) បានធ្វើបដិសណ្ឋារកិច្ច ជូនដល់ភ្ញៀវទេសចរអន្តរជាតិ ចំនួន១៣នាក់ ដែលរួមមានជនជាតិ អូស្ត្រាលី កាណាដា អង់គ្លេស ប៉ូឡូញ និងអាមេរិក ចាប់ពីថ្ងៃទី៩ ដល់ថ្ងៃទី១២ ខែមីនា ឆ្នាំ២០២៥។ ក្នុងដំណើរទស្សនារយៈពេល៤ថ្ងៃនេះ អ្នករត់រ៉ឺម៉កកង់បី របស់សមាគមបាននាំភ្ញៀវអន្តរជាតិ ទៅទស្សនានៅតំបន់ប្រវត្តិសាស្រ្តសំខាន់ៗមួយចំនួនក្នុងទឹកដីអង្គរនៃខេត្តសៀមរាប ព្រមទាំងជូនទៅទស្សនាជីវភាព និងការរស់នៅរបស់ប្រជាជននៅក្នុងសហគមន៍មួយចំនួនក្នុងខេត្តសៀមរាបផងដែរ។

ភ្ញៀវទេសចរទាំងនោះបានសម្តែងការពេញចិត្តចំពោះការធ្វើបដិសណ្ឋារកិច្ច និងការផ្តល់សេវាដឹកជញ្ជូនដ៏ល្អរបស់ក្រុមអ្នកបើកបរ។

សូមបញ្ជាក់ថា៖ ការធ្វើបដិសណ្ឋារកិច្ច និងការការពារសន្តិសុខសុវត្ថិភាព ជូនភ្ញៀវទេសចរ គឺមានសារៈសំខាន់ណាស់សម្រាប់វិស័យទេសចរណ៍។ នៅពេលដែលភ្ញៀវទេសចរមានការពេញចិត្តចំពោះសេវាកម្មផ្សេងៗ ពួកគេនឹងមកទស្សនាប្រទេស កម្ពុជាជាថ្មីម្តងទៀត។ លើសពីនេះពួកគេក៏អាចនឹងជួយផ្សព្វផ្សាយវិស័យទេសចរណ៍ ពីប្រទេសកម្ពុជា ទៅដល់អ្នកទេសចរដទៃទៀតដែលមិនទាន់បានមកទស្សនា។

ព្រះសីហនុ៖ កាលពីថ្ងៃទី១១ ខែមីនា ឆ្នាំ២០២៥កន្លងទៅ សមាគមខ្មែរនៃសេដ្ឋកិច្ចក្រៅប្រព័ន្ធ (Khmer-AI) ប្រចាំតំបន់ខេត្តព្រះសីហនុ បានទទួលការអញ្ជើញ ពីមន្ទីរទេសចរណ៍ខេត្តព្រះសីហនុ ក្នុងការចូលរួមវគ្គអប់រំបណ្ដុះបណ្ដាលស្ដីពីការទទួលបដិសណ្ឋារកិច្ច និងការពង្រឹងសណ្ដាប់ធ្នាប់សេវាកម្មដឹកជញ្ជូនទេសចណ៍ រ៉ឺម៉កកង់បី ដែលរៀបចំដោយមន្ទីរទេសចរណ៍ខេត្តព្រះសីហនុ និងរួមសហការជាមួយក្រុមហ៊ុនតាដា។ វគ្គបណ្ដុះបណ្ដាលនេះរៀបចំឡើងក្នុងគោលបំណង ដើម្បីឱ្យសិក្ខា កាមក្រេបជញ្ជក់យកនូវចំណេះដឹងក្នុងការបម្រើសេវាកម្មដឹកជញ្ជូនភ្ញៀវទេសចរដែលអញ្ជើញមកលេងកម្សាន្ដក្នុងខេត្តព្រះសីហនុឱ្យទទួលបានសេវាកម្មដ៏ល្អ និងសុខសុវត្ថិភាព។

រាជធានីភ្នំពេញ៖ នៅរសៀលថ្ងៃចន្ទ ៥រោច ខែផល្គុន ឆ្នាំរោង ឆស័ក ព.ស ២៥៦៨ ត្រូវនឹងថ្ងៃទី១៧ ខែមីនា ឆ្នាំ២០២៥នេះ លោក ជួន ផានិត អគ្គលេខាធិការនៃសមាគមខ្មែរនៃសេដ្ឋកិច្ចក្រៅប្រព័ន្ធ (Khmer-AI) បានចុះសួរសុខទុក្ខ និងនាំយកថវិកាមួយចំនួនដែលបានមកពីការចូលរួមចំណែករបស់បងប្អូនសមាគម ដើម្បីយក មកផ្តល់ជូនលោក មុត ជុំនាង ដែលជាសមាជិករបស់សមាគមខ្មែរនៃសេដ្ឋកិច្ចក្រៅប្រព័ន្ធប្រចាំតំបន់គោលដៅក្រុងតាខ្មៅ ដែលបានជួបគ្រោះថ្នាក់ចរាចរណ៍កាលពីយប់ ថ្ងៃទី០៨ ខែមីនា ឆ្នាំ២០២៥កន្លងទៅ។