Whakaipuipu

Whakaipuipu mai rā te moana kei waho e

E āki kau ana ki Te Toka-namu-a-Mihi-marino

Ki uta rā, ki Pākirikiri e

Ko te rite o te wai kei aku kamo

Tīneia te whetū mārama o te ao Māori

Kia pōuri, kia tūohu noa, kia mamae au e

Kei hea rā tōu ritenga hei whakamau atu mā te iwi e

E koe, e te ngākau māhaki, e te ngākau aroh

Te tohunga whakairo kupu, te manu tīoriori o te motu

Mū ana i te rā nei e

Ngaro atu koe i te kitenga kanohi e

Ō taonga ia, ka mahue mai

Anō he toka whatiwhati ngaru

E kore e ngaro, e kore e wareware e

Kāti, e hika, haere i tō tira mokemoke e

Ko au e kapo atu ki te rehu o te tai

E pā mai nei ki ahau e