Hilos que cantan - Texto

Dduu ni rull

Dunown nown txi’n dbenny ruyntxee lady duu gubí’ Xgyæ’ na duladxun. Iz 2004, bidyæbææ gwædxu’ gayenyun dzuyn axh lawn (Bi Daaw) Bii Dauu. Dxiky guzlow kayenyun ralow xi neky ni raknæ dunndzu’ xkal rika’ duu gubi’, te raktxee lady ni ryeentxeeyun, næ raknæ xkal ralæznewn gexhlyu. Zeky gulæz bengul daaw duxteenyun naro’w nadxun guken, gwædxu’ gulæznædan gexhlyu la yuby xanguxhaandan, ralow kwaa ni rigyææ teeny xi dkwaan kana bæ xtee byaa, txikru kwaan ni rigyææ nga’, næ marux ni ribææ guts (gots), zekyza xirw dni rigyææ. Laayn ni dunown zænoow kayeenyun næ radiilyun xi rigyææ, ni gaknæ gal raktxee lady txikru low galbayn duxteenyun kadunzdu’ga low gexhlyu txikru galnadaanza xtee binyeti.

Zenoown næz basa’n bengul daaw ni gulæz duladxunræ, low lady ni ryeentxeeyun rya’n xi neky ryennlown, xi ryenny dulaazun, xi rinnii duxbakallun txikru rak ni bidyæbææ xi basa`n dbenny gulas kana: nis, gi, bi, yu, dxaan gubidx, dxaan bew næ ra kwaa balygi xtee xhagibaa.

Low næzræ badxaagun Lynne Hocking-Mennie, te binyeti gunnaa ruyntxee lady ladxan na Escocia, laan rixhuuyan stekwaa xkal ruyntxeeyan lady low traly, bednæn te xkal gaktxee lady <<gaktxee xi nen>> gwædxu’dulaazun xgaabky, axh gwædxu’za gaken.

Lady guktxee ni gazææbyun rææ, (Bi Daaw) Bii Dauu guritxee diidx gaktxee lady ni nen tsæ’ dmani’n rizæby low bi ni ratxy duladxun, bakabeewn dmaninræ ni ruyn nasa’ galbayn duxteenyun sa’ dxi, ked rakwadulaazdyun gakwadyagzyun xi rulldum, zænædulaazun txezy xkal nen tsæ’dum te dxaagen ni rabeká txi rizu yety.

Telag gayn dxagen kaná duub xtee tubi’nga mani’n txikru xkal bidyæbææ duu kwa, rææ bayeenewn dzuuyn Hector Meneses txikru Eva Brunner.

Razakdulaazun byenyun dzuuyn næ badxaagzun Lynne ni basap dukyun ryeenyun. Ni kaya’kllí duxteenyun ruluuyn ked ka txisubdy xi neky, ni na sru næ ni nasa’ txikru ryelow xgab ni ra’k. Yu’za te diidx nazak ranniiwn næ radæædun ballá ni lá: Museo Textil de Oaxaca ni guxeldan ru’ lizdan te sææby ni gwædyeka dzuni’n duxteenyun ni rilyæzun Bii Dauu.

Dzuyn xtenya rigilin xá zædzanen tu na, dxaagen te kalíreky, guzublawen low guzan ni bidyækaa dxaagen dzuuyn xteenya galruyntxee lady næzgyaa xteen Escocia, ni rakræ a natxa jæz kwaa guzan benny baayn dzuuynræ. Ni runya ruzapkyeen low xkalna næ zææd binny txikru labaa xteen binyety zigakza xkal gulæz bengul daaw næ ni rixhuuya (Næ tsee duy gabi’)

Low febrer xtee 2019, gupa te gallnazak badzunya bedtixlawa gedx Lowla’ Bidxaagen te ni guk bidyæla (Gaktxee ni zædgak México) “crafting futures México”, Consejo Británico gunaa guken. Zeky guk ni byumbææ txikru badxaaga dbinyeti xtee Bii Dauu, batæædun xi nadunnun low duso’wn: kana xa sutxee næ bidyæbææ xa gaktxee ni nen tseen, xi nenrw txiku ni sakru næ zigakza xa rakru galraktxee lady. Bazudxiiwn txi’n te bakadudyagun tsæ’ xi nen gabi’ganaay kud zænoow galbayn tubdxiga, næ xi rukwaaynzen dulaazun. Badæædun galbayn dlady sru ni guktxeenæden garlen duxteenyun ni nnæsden tsæ’ ni ked nendy, ni ked ragwallun txikru ni næzgaziza.

Na' lalzi ni gubyæ’ Escocia zænoown low dzuuyn tuyzi masy dxu’n zit, te kayak stuy kwaa ni nakuy laden kadæ’den gazu gedx Xgyæ’ rizublawden xkal rull dmani’n ri zææby lowbi. Ni rulldum gu’txeeyn, dni bidyæbææky guzlow guktxeeyin Escocia, axh byelow bareen Lowla’: ni zænoow dxi, ni na zit txikru galgidx dux ked gwæsubdy galguknæ duxteenyun.

Txi a nenny ni rull mani’n zææby low bi xtee Xgyæ’, kayu’txee xkalna kud nabanyun nna’ zigakza stekwaa binyeti zædnoow dunown.

Lynne Hocking

Benny ruyntxee lady næ benny basææd xkalna xi neky nan, nabanyan txikru runyan dzuuyn Aberdeen, Escocia kudna Reino Unido; ruyntxeeyan lady low nyaan laayn rudææden te lasu xidneky yu’ lawden.

Rabi' rizulawen