‎‫قُلۡنَا ٱهۡبِطُوا۟ مِنۡهَا جَمِیعࣰاۖ فَإِمَّا یَأۡتِیَنَّكُم مِّنِّی هُدࣰى فَمَن تَبِعَ هُدَایَ فَلَا خَوۡفٌ عَلَیۡهِمۡ وَلَا هُمۡ یَحۡزَنُونَ﴿ ٣٨ ﴾‬

അല്ലാഹു തആല പറയുന്നു:

"നാം പറഞ്ഞു: നിങ്ങൾ എല്ലാവരും അവിടെ നിന്ന് ഇറങ്ങുക. പിന്നീട് എന്റെ പക്കൽ നിന്നുള്ള വല്ല മാർഗദർശനവും നിങ്ങൾക്ക് വന്നെത്തുമ്പോൾ അത് പിന്തുടരുന്നവർക്ക് യാതൊന്നും ഭയപ്പെടാനില്ല; അവർ ദുഃഖിക്കേണ്ടി വരികയുമില്ല." (സൂറത്തുൽ ബഖറ: 38)

• ഭൂമിയിലെ ആഗമനം

ആദം മിനെയും ഹവ്വാ യെയും ഭൂമിയിൽ എവിടെയാണ് ഇറക്കിയത് എന്ന കാര്യത്തിൽ ചരിത്രകാരന്മാർക്കിടയിൽ വ്യത്യസ്ത അഭിപ്രായങ്ങളുണ്ട്. ഇബ്‌നു കസീർ (رحمه الله ) നൽകുന്ന ചില പ്രധാന റിപ്പോർട്ടുകൾ ഇവയാണ്:

1. ഇന്ത്യ: ആദം (അ) ഇറങ്ങിയത് ഇന്ത്യയിലെ 'സറന്ദീബ്' (ഇന്നത്തെ ശ്രീലങ്ക) എന്ന പ്രദേശത്താണെന്നാണ് പ്രബലമായ ഒരു റിപ്പോർട്ട്. അവിടുത്തെ Adam's Peak എന്നറിയപ്പെടുന്ന മല ഇതിന്റെ അടയാളമായി പലരും വിശ്വസിക്കുന്നു.

2. ജിദ്ദ: ഹവ്വാ (عَلَيْهِ ٱلسَّلَامُ ) ഇറങ്ങിയത് ജിദ്ദയിലാണെന്ന് പറയപ്പെടുന്നു, ജിദ്ദ എന്ന അറബി വാക്കിൻ അർത്ഥം മുത്തശ്ശി എന്നാണ് അത് ഹവ്വ യേ സൂചിപ്പിക്കുന്നു എന്ന് പറയപ്പെടുന്നു.

3. മക്ക: അവർ പിന്നീട് മക്കയിൽ വെച്ച് അറഫ യിൽ കണ്ടുമുട്ടി എന്നാണ് ചരിത്രം.

• ആദ്യത്തെ തൗബ

സ്വർഗ്ഗത്തിൽ നിന്ന് പുറത്തിറങ്ങേണ്ടി വന്നതിൽ ആദം (അ) അതീവ ദുഃഖിതനായിരുന്നു. അദ്ദേഹം അല്ലാഹുവിനോട് മാപ്പിനായി കരഞ്ഞപേക്ഷിച്ചു. അല്ലാഹു അദ്ദേഹത്തിന് ചില വചനങ്ങൾ  പഠിപ്പിച്ചു കൊടുത്തു:

‫ رَبَّنَا ظَلَمۡنَاۤ أَنفُسَنَا وَإِن لَّمۡ تَغۡفِرۡ لَنَا وَتَرۡحَمۡنَا لَنَكُونَنَّ مِنَ ٱلۡخَـٰسِرِینَ﴿ ٢٣ ﴾‬

"ഞങ്ങളുടെ രക്ഷിതാവേ, ഞങ്ങൾ ഞങ്ങളോട് തന്നെ അക്രമം ചെയ്തിരിക്കുന്നു. നീ ഞങ്ങൾക്ക് പൊറുത്തുതരികയും കരുണ ചെയ്യുകയും ചെയ്തില്ലെങ്കിൽ തീർച്ചയായും ഞങ്ങൾ നഷ്ടക്കാരിലായിത്തീരും."
(സൂറത്തുൽ അഅ്റാഫ്: 23)
അല്ലാഹു അവരുടെ തൗബ സ്വീകരിച്ചു. ഇബ്‌ലീസിനെപ്പോലെ അഹങ്കരിക്കാതെ, തെറ്റ് ഏറ്റുപറഞ്ഞ് മടങ്ങുക എന്നതാണ് ഒരു വിശ്വാസിയുടെ രീതിയെന്ന് ആദം (അ) ഇവിടെ കാണിച്ചുതന്നു.

• ഭൂമിയിലെ പരീക്ഷണം ആരംഭിക്കുന്നു

സ്വർഗ്ഗത്തിൽ എല്ലാം സൗജന്യമായി ലഭിച്ചിരുന്നുവെങ്കിൽ, ഭൂമിയിൽ അധ്വാനിച്ചാലേ ആഹാരം ലഭിക്കൂ എന്നതായിരുന്നു സ്ഥിതി. കൃഷി ചെയ്യാനും വസ്ത്രം നിർമ്മിക്കാനും ആയുധങ്ങൾ ഉണ്ടാക്കാനും അല്ലാഹു ആദം (അ) മിനെ പഠിപ്പിച്ചു. ഇബ്‌നു കസീർ (റ) വിവരിക്കുന്നത് പ്രകാരം, ആദം (അ) ഭൂമിയിലെ ആദ്യത്തെ മനുഷ്യൻ മാത്രമല്ല, ആദ്യത്തെ പ്രവാചകനും (Prophet) കൂടിയായിരുന്നു. തന്റെ മക്കൾക്ക് അദ്ദേഹം ഏകദൈവ വിശ്വാസം പഠിപ്പിച്ചു നൽകി.

ഖലീഫയുടെ ദൗത്യം

ആദം (അ) സ്വർഗ്ഗത്തിൽ നിന്ന് ഇറങ്ങിയത് വെറുമൊരു ശിക്ഷയായിട്ടല്ല, മറിച്ച് ഭൂമിയെ പരിപാലിക്കുക എന്ന തന്റെ യഥാർത്ഥ ദൗത്യം നിറവേറ്റാനാണെന്ന് ഇബ്‌നു കസീർ (റ) ഊന്നിപ്പറയുന്നു. നമ്മൾ ഓരോരുത്തരും ആ ദൗത്യത്തിന്റെ തുടർച്ചയാണ്. ഭൂമിയിലെ ആ സമാധാനപരമായ ജീവിതത്തിനിടയിലേക്കാണ് മനുഷ്യചരിത്രത്തിലെ ആദ്യത്തെ കൊലപാതകം നടക്കുന്നത്. ഹാബീലും ഖാബീലും തമ്മിലുള്ള ആ സംഘർഷത്തെക്കുറിച്ച് നമുക്ക് അടുത്ത ഭാഗത്തിൽ നോക്കാം.