നമ്മൾ ഇന്ന് ജീവിക്കുന്ന ഈ ലോകം, നമുക്ക് ചുറ്റുമുള്ള നക്ഷത്രങ്ങൾ, കടൽ, പർവ്വതങ്ങൾ... ഇതിനൊക്കെ ഒരു തുടക്കമുണ്ടല്ലോ. എന്നെങ്കിലും ചിന്തിച്ചിട്ടുണ്ടോ, ഇതൊന്നും ഇല്ലാതിരുന്ന ഒരു കാലത്തെ കുറിച്ച്? 'അൽ ബിദായ വൻ നിഹായ' എന്ന തന്റെ വിശ്വപ്രസിദ്ധമായ ഗ്രന്ഥത്തിൽ ഇമാം ഇബ്‌നു കസീർ رحمه الله  ചർച്ച തുടങ്ങുന്നത് തന്നെ ഈ ഒരു പോയിന്റിൽ നിന്നാണ്. നമുക്ക് ചുറ്റുമുള്ള ഈ ആകാശവും ഭൂമിയും പടക്കുന്നതിന് കോടിക്കണക്കിന് വർഷങ്ങൾക്ക് മുമ്പുള്ള ആ 'ആരംഭത്തെ' കുറിച്ച് നമുക്കൊന്ന് നോക്കാം. 

ആദ്യം എന്തുണ്ടായി?

ഒരിക്കൽ നബി ﷺ അടുത്തു വന്ന ഒരു സംഘം ആളുകൾ ചോദിച്ചു: "അല്ലാഹുവിന്റെ റസൂലേ, ഈ ലോകത്തിന്റെ തുടക്കത്തെ കുറിച്ച് പറഞ്ഞു തന്നാലും."

അപ്പോൾ അല്ലാഹുവിന്റെ റസൂൽ ﷺ പറഞ്ഞു:

"അല്ലാഹു ഉണ്ടായിരുന്നു. അവന് മുമ്പ് മറ്റൊന്നും ഉണ്ടായിരുന്നില്ല. അവന്റെ അർശ് (സിംഹാസനം) വെള്ളത്തിന് മുകളിലായിരുന്നു. പിന്നീട് അവൻ എല്ലാ കാര്യങ്ങളും ലൗഹുൽ മഹ്ഫൂളിൽ രേഖപ്പെടുത്തി. അതിനുശേഷം അവൻ ആകാശഭൂമികളെ പടച്ചു." (ബുഖാരി)

ഇതിൽ നിന്ന് നമുക്ക് ഒരു കാര്യം വ്യക്തമാണ്. അല്ലാഹു മാത്രമുണ്ടായിരുന്ന ഒരു അവസ്ഥ ഉണ്ടായിരുന്നു. അവന് തുടക്കമില്ല. അവനാണ് 'അൽ അവ്വൽ' (The First). അല്ലാഹു അല്ലാതെ മറ്റൊന്നും അവിടെ ഉണ്ടായിരുന്നില്ല. ആകാശമില്ല, ഭൂമിയില്ല, മനുഷ്യരില്ല, മലക്കുകളില്ല... ഒന്നും!

• അർശും വെള്ളവും 

നമ്മൾ ഈ കാണുന്ന ലോകം പടക്കുന്നതിന് മുമ്പ് അല്ലാഹു ചില കാര്യങ്ങൾ പടച്ചിട്ടുണ്ട്. അതിൽ ഏറ്റവും പ്രധാനപ്പെട്ട ഒന്നാണ് അല്ലാഹുവിന്റെ അർശ്. അല്ലാഹുവിന്റെ സൃഷ്ടികളിൽ വെച്ച് ഏറ്റവും വലുതും മഹിമയുള്ളതുമായ ഒന്നാണ് അർശ്. ഈ അർശ് അന്ന് വെള്ളത്തിന് മുകളിലായിരുന്നു എന്ന് ഖുർആൻ (സൂറ ഹൂദ്: 7) വ്യക്തമാക്കുന്നുണ്ട്.

• വെള്ളവും അർശും: ഇതിൽ ഏതാണ് ആദ്യം?
പലർക്കും ഉണ്ടാവുന്ന ഒരു വലിയ സംശയം ഇബ്നു കസീർ رحمه الله  തന്റെ ഗ്രന്ഥത്തിൽ വിശദമായി ചർച്ച ചെയ്യുന്നുണ്ട്.അർശിന്റെ സ്ഥാനം: അല്ലാഹുവിന്റെ അർശ് വെള്ളത്തിന് മുകളിലായിരുന്നു എന്ന് *ഖുർആൻ (11:7)* പറയുന്നുണ്ട്. അർശ് വെള്ളത്തിന് മുകളിലാവണമെങ്കിൽ അവിടെ വെള്ളം നേരത്തെ ഉണ്ടാവണമല്ലോ എന്നതാണ് ഒരു യുക്തി. ഇബ്നു ജരീർ അത്ത്വബരി (റ) പോലുള്ളവർ പറയുന്നത് ആകാശഭൂമികൾക്ക് മുമ്പ് അല്ലാഹു വെള്ളത്തെയാണ് പടച്ചത് എന്നാണ്.

എന്നാൽ ഇമാം ഇബ്നു കസീർ رحمه الله ഇതിനെ മറ്റൊരു രീതിയിലാണ് കാണുന്നത്. ഇമ്രാൻ ബിൻ ഹുസൈൻ  (رضي الله عنه) നിവേദനം ചെയ്ത ഹദീസിനെ അടിസ്ഥാനമാക്കി അദ്ദേഹം പറയുന്നത്, അല്ലാഹു അർശ് പടക്കുമ്പോൾ തന്നെ അത് വെള്ളത്തിന് മുകളിലായിരുന്നു എന്നാണ്. അത് ചൂണ്ടി കാണിക്കുന്നത് *സ്ഥാനത്തെ(state of existence)* ആണ് *ക്രമത്തെ(Order of sequence)* അല്ല, ഉദാഹരണം ആയി എനിക്ക് ഒരു പുസ്തകം ഉണ്ടാക്കിയ ശേഷം മേശ ഉണ്ടാക്കി പുസ്തകം മേശക്ക് മുകളിൽ വെക്കാം.

ഇനി ഇതിൽ ഏറ്റവും പ്രധാനപ്പെട്ടത്, നമ്മുടെ ഈ ഭൗതിക ലോകം/ Physical World (ആകാശവും ഭൂമിയും) പടക്കുന്നതിന് മുമ്പേ തന്നെ അർശ് നിലവിൽ വന്നിരുന്നു എന്നതാണ്. ഇബ്നു കസീർ (റ) പറയുന്നത്, സൃഷ്ടികളിൽ വെച്ച് ഏറ്റവും മഹത്തരമായതും (The most magnificent) മറ്റെല്ലാ സൃഷ്ടികൾക്കും മേൽക്കൂരയായി നിൽക്കുന്നതും അർശാണ് എന്നാണ്. ആ അർശിന് താഴെയാണ് ആ വെള്ളം സ്ഥിതി ചെയ്യുന്നത്.