هەرچەندە زاناکان پێشبینی دەکەن کە چەندین شارستانیەتی پێشکەوتووی تر لە گەردووندا بوونی هەبێت، بەڵام فراوانی گەردوون بووەتە ڕێگر لەبەردەم گەیشتنی ئەو شارستانیەتانە بەیەکتر. بۆشایی نێوان هەسارە و ئەستێرەکان بۆ ملیاران کیلۆمەتر و ساڵی ڕووناکی درێژبووەتەوە کە بڕینی کارێکی زۆر سەختە. بۆ نموونە نزیکترین ئەستێرە لە زەویەوە جگە لە خۆر ئەستێرەی ئەلفا سێنتۆریە کە 4.3 ساڵی ڕووناکی لێمانەوە دوورە و بۆ گەیشتن بەو ئەستێرەیە بەم تەکنەلۆژیایەی ئێستا مرۆڤ لەبەردەستیدایە، پێویستمان بە 81 هەزار ساڵ هەیە. بۆیە دەتوانین بە ساددەی بڵێین کە فراوانی گەردوون و کورتی تەمەنی زیندەوەران ڕێگرە لە پێکگەیشتنی زیندەوەرانی جیهانە جیاوازەکان.