https://sites.google.com/view/linguarium
Ene man haw twea zoons. En de joongste van die zag teage ziene vaader: Vaader, geaf mig ət deil van ət vermooge, woa ig reg op høp. En de vaader verdeilde oonger hun al wat ze hawwe. En nao ən paar daag pakde de joongste zoon zig alles biej ein en goong weg van woa hea woonde nao ən lantj wiet weg, en dao verbrazde hea wat er haw. Wie hea alles vertaert haw, keem ene erge hoongersjnoat euver dat lantj, en hea begoos ermoot te lieje. En hea goong in deens biej eine van de burgers van dat lantj, en dae sjikde əm noa zien veljer om de verkes te hujje. En hea hej zich gaer de maag gevølt, mer neemes goof əm get dao van. Doe goong hea naodenke en zag: Wiej voeul daagloanesj haet miene vaader neet, en diej høbbe broat zat, en ig vergaon hiej van de hoonger. Ig sjtaon op en gaon nao miene vader en dan gaon ich teagen əm zegge: Vader, ich høp gezoonjigt teage de heemel en teagen ug. Ig ben ət neet mear weart ene zoon van ug geneumt te weare. Sjtelt mig aan es eine van eur daagloanesj.
En hea sjtoong op en goong nao ziene vaader. En wiej hea nog wiet weg woor, zoog ziene vaader əm, en kreeg mitlieje mit əm. Hea rende noa əm hear en vool əm om de haws en puende əm. En de zoon zag teagen əm: Vaader, ich høp gezoonjigt teage de heemel en teagen ug. Ig ben ət neet mear weart ene zoon van ug geneumt te weare. Doe zag de vader teage zien knechte: Gaot gaw ət beste kleit hoale en doot əm dat aan. En geaft əm ene vingerrink veur aan zien henj en sandaale veur aan de veut, en hoalt ət vetgemaste kawf, sjlagt ət en laot oos eate en feas viere, want dizze zoon van mig woor doad en is weer leavent gewoore, hea woor verloare en is weer truuk gevoonje.
En ze begooste feas te viere. Mer ziene awtste zoon woor in ət veltj. En wiej hea bekans toes woor, huerde hea muziek en dans. En wiej hea eine van de knegte biej zig haw geroope, vroog hea, wat dao gaonde woor. En dae zag əm: Eure broor is truuk gekoome, en eure vader haet ət vet gemaste kawf gesjlag, oomdat hea əm gezoontj haet truuk gevoonje. En dae woort kaot en wool neet nao benne goan. Doe keem ziene vaader noa boete en probeerde əm op zien gemoot te wirke. Mer dae goof ziene vaader antjwoort en zag: Kiekt ens, al zoa voeul jaor ben ig eure kneg, en høp ig ummer alles gedoan wat geer mig opdroog. Mer mig høb geer nog noats ens ən geitebøkske gegeave om mit mien vrunj feas te viere. Mer noe, wiej dae zoon van ug is truuk gekoome, dae eur vermoge der door haet gejaag mit hoere, noe høp geer veur dae ət vet gemaste kawf gesjlag! Mer de vaader zag teagen əm: Doe, miene zoon, doe bes ummer biej mig, en al wat van mig is is van dig. Veer moote feas viere en bliej zeen, want dae broor van dig woor doat, en is weer leavent gewoore, en dae woor verloare, en is truuk gevoonje.