Avenida Xoán XXIII

Esta vía foi aberta a finais dos anos 50 do século XX para mellorar o acceso dos numerosos visitantes á catedral. A reordenación deste espazo, levada a cabo polos arquitectos Albert Viaplana e Helio Piñón e finalizada en 1994, resolveu as esixencias de acceso do tráfico e de aparcamento, tanto de coches como de autobuses. Ademais, conectou o Campus Norte co casco histórico. É digno de mención o establecemento dun interesante diálogo entre o novo e o vello, con San Francisco e San Martiño Pinario como límites da avenida, algo controvertido no momento.

O elemento que protagoniza o conxunto é unha longa marquesina de soportes cónicos de aceiro cuberta de cristal, disminuíndo en altura cara ao casco histórico, potenciando así o efecto de penetración nel. No vértice da avenida, onde estaba a antiga Porta de San Francisco, sitúase a Costa Vella, que conecta na súa cima coa antiga Porta da Pena. No outro vértice, sitúase a coñecida como Praza da Paz, nas proximidades da Xunta de Galicia.

Bibliografía:

• Turismo de Santiago. (s.d.). Avenida de Xoán XXIII. Recuperado o 19 de febreiro de 2020 de http://www.santiagoturismo.com/rutas/avenida-de-xoan-xiii

Imaxes:

1. Pedro J Pacheco, Punto de fuga, CC BY-NC-SA 2.0