Sangiovanni Lorenzo

A cooperativa, unha empresa da familia Sangiovanni Lorenzo, proveniente de Montevideo, xestiona o taller artesanal de carpintaría Estudio Sangiovanni e a tenda Lorenzo Design. Sangiovanni e Lorenzo son os apelidos dos seus antepasados; os nomes son unha homenaxe ao espírito emprendedor, de busca e artístico dos seus pais e avós. O taller abre en 2015, mentres que en 2016 abren a tenda física na zona vella compostelá. En 2017 teñen o seu primeiro contacto con chefs nas xornadas Artesanía no Prato, organizadas pola Fundación Artesanía de Galicia. En 2018 pechan a tenda para dedicárense exclusivamente ao deseño de pezas e vaixela para a alta gastronomía. En 2019 fan as súas primeiras vendas para gastronomía a nivel internacional. En 2020 ampliaron o proxecto, creando pezas funcionais e artísticas para o fogar, abrindo en 2021 de novo unha tenda e showroom en San Lázaro. Tamén participaron en espazos como Pop up Galicia ou Saberes e Sabores, en Madrid. Varias pezas súas estiveron no Cumio Internacional de Gastronomía Madrid Fusión.

Traballan a medida, adaptándose ás necesidades de cada proxecto. Traballan para algúns dos restaurantes máis sonados do planeta, como Arany Kaviár en Hungría, o Atelier Amaro de Varsovia, o Mirazur na Costa Azul, Da Terra en Londres, Brace en Copenhague Casa Dani en Nova York ou o de José Andrés en Washington. A nivel español e galego traballan para DiverXo, Mugaritz, El Portal de Echaurren, Asador Etxebarri, Cañitas Maite, Muna, Arrels, A Tafona, Casa Solla ou Culler de Pau, o seu primeiro cliente.

Traballan exclusivamente con madeiras certificadas, fundamentalmente de nogueira, cerdeira, carballo e freixo. Para os acabados usan tanto ceras e aceites naturais como vernices alimentarios, que garanten a neutralidade da peza e a non achega de sabor. As súas pezas están preparadas para usarse todos os días e serven para alimentos fríos e quentes.

Bibliografía:

1. • Fundación Artesanía de Galicia (coord). (2019). Lorenzo Design. Madeira para cociñas de vangarda. Obradoiro de Artesanía, 17, 30-39. https://artesaniadegalicia.xunta.gal/sites/default/files/documentos/revista-obradoiro/obradoiro17.pdf

   • Rebollo, D. (7 de novembro, 2023). Lorenzo Design. Teito Magazine. Recuperado o 29 de febreiro de 2024 de https://teitomagazine.com/producto/lorenzo-design

   • Sánchez, O. (22 de febreiro, 2021). Fernando Sangiovanni: "Es un orgullo ver que un taller familiar llega desde Santiago a 60 estrellas Michelin". La Voz de Galicia. https://www.lavozdegalicia.es/noticia/santiago/2021/02/19/fernando-sangiovanni-orgullo-ver-taller-familiar-llega-60-estrellas-michelin/00031613744009600807209.htm

   • Sueiras, A. (22 de novembro, 2020). La familia uruguaya que diseña vajillas para chefs Michelin. El Observador. https://www.elobservador.com.uy/nota/la-familia-uruguaya-que-disena-vajillas-para-chefs-michelin-202011225021

   • Tapia, M. (1 de decembro, 2023). Las vajillas de los chefs con estrella son de Lorenzo Design. Fuera de Serie. https://www.expansion.com/fueradeserie/moda-y-caprichos/2023/12/01/65649033e5fdeabd788b4647.html

   • Zabalbescoa, A. (9 de novembro, 2023). La familia de artesanos que conquista con sus cucharas y sus platos de madera los mejores restaurantes del mundo. El País. https://elpais.com/eps/2023-11-09/la-familia-de-artesanos-que-conquista-con-sus-cucharas-y-platos-de-madera-los-mejores-restaurantes-del-mundo.html