新校舍介紹

新完工ê學校，層林國小。

       層林倚噍吧哖(玉井)頭到，一直猶有西拉雅部落佇咧。行台20線，南橫公路過跋馬(左鎮)，西爿山崙仔內底，散佈ê是西拉雅社頭，東爿是漢人開墾ê部落。日本時代推捒國語教育，設學校佇東爿ê三官大帝廟，是層林國小ê前身。彼當時，西拉雅ê學生囡仔愛過車路來漢人部落讀日本冊。

       自上開始，一直想講學校ê名愛kā西拉雅語khǹg起lih。問題來ah，有人問講：西拉雅時代根本著無「小學」這款物件，西拉雅語著無這个辭，khǹg這無意義…等等。落尾，經過李淑慧小姐鬥相共，揣著清華大學語言所ê李淑芬老師，經過一暫討論，最後chiah 落定。

       層林國小ê西拉雅語用：「Patatutuxoxan ka Nawnamu ki TsanNa」。意思是：層林上早學習ê所在。語法淡薄仔像英語ê「The Primary School of --」，「Patatutuxoxan(學習的地方) ka(構辭，which) Nawnamu(最初的) ki (of)____(地名）」。地名「層林」ê台語發音，是西拉雅語ê音譯。

       尾手，有想過，西拉雅語其實已經失傳ah，這馬留落來ê，只賰一寡單辭，生活用語，欲講一句完整ê話已經是無法ah。目前西拉雅語ê研究，是用一部以早教會留落來，用羅馬字將聖經翻做西拉雅語ê馬太福音做基礎，將語言還原ê過程。聖經本身並毋是通常ê語言，當初時翻譯敢有通遮爾圓滿？親像英文ê語法是本底ê西拉雅語，也是予聖經牽去ê？

       這應該袂有答案，語言失去根嘛綴咧失去。向望佇語言復原ê過程，重新建立新ê文化認同。至無，這間學校ê學生囡仔，會當用家己ê族語，講出家己學校ê名。   

                                                                                                                                                    許家碩建築師