HEIM 1 blei ein gedigen suksess med strålande kritikkar, utselde hus og mange ekstraforestillingar. Bergensavisen gav terningkast seks og konkluderte med at «Det er bare å ta av seg hatten». Bergens Tidende oppsummerte det slik: «HEIM skriv seg inn i sjela til vestlendingen» og trilla terningen til fem. Dei to neste kapitla av denne Vestlandskrønika, HEIM 2 og 3, fekk også varm mottaking.

Vinteren 2022 tar Det Vestnorske Teateret fatt på det fjerde kapittelet. Vi vitjer denne gong åra mellom 1995 og 2005, til hendingane som skaka eller mora oss, stadar vi kjenner og songar vi hugsar.

Dette er tiåret der Kurt Nilsen vinn Idol, Kronprinsen får si Mette Marit og vi lærer oss å flørte på mobiltelefon. Det er også tiåret då Sleipner går på grunn, Prinsesse Diana døyr i bilulukke, og etter 9/11 må vi venne oss til lange sikkerheitskontrollar på flyplassen. Vi skal vitje tida der Reality-TV og Boyband dominerte, «alle» ville ha frisyren til Rachel og frykta for ny teknologi tok overhand. Vil datamaskinene takle millenniumskiftet og korleis feire ei slik nyttårsaftan? Og kva med u-båten på Fedje, skal den hevast eller senkast?

I HEIM 4 inviterer vi til å minnast dei gode og dei vonde dagane i lag. Vi skal gjenoppleve musikken som var lydsporet til desse dagane med «Voksne herrers orkester». Bli med oss til gledelege gjensyn og treffande ettertanke. Bli med oss på forestillingen.