პრინტისა და ხელსაქმის სახელოსნო 

პრინტისა და ხელსაქმის სახელოსნო

    ჩვენს სახელოსნოს "პრინტისა და ხელსაქმის სახელოსნო" ჰქვია. ვბეჭდავთ თითქმის ყველაფერზე – მაისურებზე, ნაჭრის ჩანთებზე, ქუდებზე, ჭიქებზე, ასევე ვამზადებთ გულსაბნევებს სასურველი ლოგოებითა და ნახატებით. ამას გარდა ვქსოვთ და ვამზადებთ თექას. მატყლთან და შალის ძაფებთან შეხებაც კი უდიდეს სიამოვნებას ჰგვრის ჩვენს ყველა წევრს, მით უმეტეს, რომ გარკვეული ძალისხმევის შედეგად იქმნება უამრავი ლამაზი ნივთი – სამკაულები, ჩანთები, სათამაშოები და სხვა მრავალი საინტერესო ნაწარმი.

ჩვენ არ ვქმნით მასიური წარმოების სერიულ ნივთებს, არამედ ვცდილობტ, რომ ხარიხიანი პროდუქტი დავამზადოთ, რომლებიც მომხმარებლის საჭიროებებს დააკმაყოფილებს. როცა გამოფენებზე სტუმრები ნამუშევრების დათვალიერებისას აღფრთოვანებას გამოთქვამენ, ჩვენს მუშაკებს სიხარულით უნათდებათ სახე. იმის შეგრძნება, რომ ქმნი ნივთს, რომელიც ვიღაცას დიდ სიამოვნებას ანიჭებს, საკუთარ თავში რწმენას აძლიერებს და ამტკიცებს, რომ შენც საზოგადოების სრულუფლებიანი წევრი ხარ.

ჩვენი ჯგუფი ცხრა წევრისგან შედგება – ორ სოციალური თერაპევტთან ერთად აქ მუშაობს სხვადასხვა ასაკის 7 ბენეფიციარი. ყველაზე უფროსი წევრი სოფო, რომელიც ორგანიზაციის დაარსებისთანავე მუშაობს ჩვენთან, უკვე 53 წლისაა, ხოლო უმცროსი – სოფო, 22 წლის. ასაკობრივი სხვაობა მათ ხელს არ უშლის, რომ აქ მუდმივად სუფევდეს მეგობრული, კოლეგიალური და ტოლერანტული განწყობა. ჯგუფის წევრებმა კარგად იციან ერთმანეთის სუსტი და ძლიერი მხარეები, ყოველთვის ითვალისწინებენ, ზრუნავენ და ეხმარებიან ერთმანეთს. ისინი სწავლობენ დათმობას, საკუთარი ნების უკან დახევას, რაც ნამდვილად დეფიციტია ჩვენი საზოგადოების "ჯანმრთელ" ნაწილში.

სახელოსნოს საქმიანობა სხვადასხვა შრომით ოპერაციებადაა დაყოფილი, სადაც ჩვენი წევრები თავიანთი უნარების გათვალისწინებით კარგად ერთვებიან, განავითარებენ მოტორულ და ინტელექტუალურ შესაძლებლობებს. შრომასთან ერთად ვზრუნავთ შემოქმედებითი უნარების განვითარებაზე, ვმონაწილეობთ მხატვრულ თერაპიებში (ხატვა, პლასტიცირება, მუსიკა). სახელოსნოს მუშაობის 30-წლიან გამოცდილებაზე დაყრდნობით,  თამამად ვამბობთ, რომ შეფერხების მქონე ზრდასრულ ადამიანს მთელი ცხოვრების მანძილზე აქვს პოტენციალი, რომ ისწავლოს, წინ წავიდეს და განვითარდეს.

ყოველი ჩვენგანი თავისი ბიოგრაფიით გამორჩეული და საინტერესო პიროვნებაა. ხანგრძლივი მუშაობის მანძილზე ჩვენს ჯგუფში უკვე სტაბილურად ხერხდება როგორც ინდივიდუალური, ასევე გუნდური საჭიროებების, მოთხოვნილებების და სურვილების გათვალისწინება. ჩვენ მივაღწიეთ წონასწორობას პიროვნულ და საქმიან კავშირებს შორის, სიახლოვესა და დისტანციას შორის. აქ, ისევე როგორც ორგანიზაციის სხვა სახელოსნოებში, ჩამოყალიბდა მომსახურე პერსონალთა და შეფერხების მქონე პირთა ნამდვილი ერთობა, და ეს ძალიან გვახარებს.

ჩვენი საქმიანობის წარმართვისათვის გვჭირდება ფინანსების მოძიება. თუ გაქვთ სურვილი, თქვენი წვლილი შეიტანოთ ამ საქმეში, გახდით  ჩვენი მეგობარი. 

შეგიძლიათ თანხა ჩარიცხოთ ტერა ბანკის ანგარიშზე: GE46KS0000000000425916

მიმღები: კავშირი ადამიანებისთვის განსაკუთრებულ ზრუნვას რომ საჭიროებენ 

დანიშნულება: პრინტისა და ხელსაქმის სახელოსნოს მეგობარი