Tine坐喺架去緊機場嘅黑色五人車碌緊手機，喺某討論區見到個咁樣嘅po，個po成300幾人留言，仲上咗熱門。好奇心驅使下，撳咗入去睇。
#96 Loverrukk男友
如果係就正喇，諗下Love係我女朋友都興奮
#126 oneP跛adaykeepdoctoraway
嘻嘻
我經常FF幫P跛生仔生夠一打
#217 我想參觀Win屋企
成日都幻想Win叫我老公 真係發夢都笑醒
十個有九個巴絲都似乎沉醉緊喺同偶像拍拖嘅美夢入面，得一兩個留言係眾人皆醉佢獨醒嘅，搞到Tine忍唔住喺呢個po留咗個靚言：
#318 scrubb4ever
同明星拍拖好大壓力㗎喎，又唔見得光，都係不了
臨send出去之前停咗停，都係覺得再㩒多個耍手擰頭嘅貼圖傳神啲。
點解會留個咁嘅言？
因為Tine正正就係同緊明星拍拖囉，只有親身經歷先會明白嗰種辛酸。
Year1開始，Ctrl S一路都有去啲club度出下show，就算畢咗業都唔例外，照舊keep住夾band，間唔中又會落club表演，一切都冇咩點變。直到嗰次Ctrl S表演撞正GMM老闆落club飲酒，所有嘢都唔同哂。
個老闆竟然話自己公司嚟緊想推出一隊band，想簽Ctrl S做旗下藝人。當時大家都受寵若驚，但Sarawat好快就出聲拒絕咗，理由係唔想做藝人。
其實唔難估到佢會拒絕，Tine以前問過佢，彈結他彈得咁好點解唔讀音樂系，佢話因為呢樣係佢中意做嘅嘢，唔想為做而做。一樣嘅道理，做咗藝人就有可能令興趣變成壓力來源，中意嘅嘢從此唔再純粹。
點知個老闆死唔心息，窮追猛打，誓要簽到佢哋為止，捕住佢哋落club表演嘅日子，落力說服佢哋。佢出嘅條件唔錯，Ctrl S其他成員其實都有啲心動，想勸下Sarawat改變主意，但Sarawat依然不為所動。
最後令到佢改變主意嘅人，係Tine。有日Sarawat無意間向Tine提起有個癲佬想簽佢哋做藝人，每次表演都纏住佢哋。
「咁你哋咪可以做到Scrubb咁？紅咗唔好唔記得我呀！」Tine 講笑咁講。
「你真係想我做藝人？」
「哈哈，幾好吖，大明星男朋友~」講笑咋嘛，點知會成真啫，點知Sarawat突然會咁順攤應承，咁聽自己話喎。
「我哋到機場喇。」司機兼經理人P'Dim同Tine講。
無錯呀，係P'Dim。佢隊band好早就散咗，有啲隊員好似移咗民，有啲就話出咗嚟做嘢冇咗以前夾band種熱誠。P'Dim後來就入咗GMM做，仲做埋Ctrl S嘅經理人。世事真係難料，正如Man都唔會知當日佢隨口嗡咗句FuckTine，而Sarawat家陣真係做到FuckTine啦。
喺車窗望出去，離遠都見到啲fans拎住Sarawat嘅名牌接佢機，啲fans嘅數目足以反映Sarawat有幾紅。主角終於行出嚟，然後瞬間被人潮淹沒，成班fans衝上去又影相又畀禮物，機場引起一場小騷亂。
見到Sarawat一打開車門嗰個樣，Tine忍唔住攞手機出嚟影低咗，個呆樣好得意。成個星期無見，Sarawat一上車就攬實Tine係咁索，話咁多日無見要補返數喎，攬攬下攰得濟仲挨住咗Tine瞓。
成個車尾箱都係fans啲禮物，有啲唔夠位擺仲放咗喺地下，Tine意識到隔離呢個人真係有好多人鍾意。
Tine見證住佢IG啲follower由幾百升到幾千，再由幾萬升到去幾百萬，校園男神晉升成為國際巨星。佢一方面為男朋友嘅成功而高興，另一方面會覺得Sarawat離自己越嚟越遠，驚佢有一日會變到星星一樣咁遠，遠到自己再掂唔到。
不過好彩嘅係Tine擔心嘅事冇發生到，因為Sarawat會喺行動上證明自己依然係以前嗰個Sarawat，就好似而家咁……
「我可唔可以揸你個胸？」事實上問嗰刻隻手已經放咗上個胸度，仲揸咗兩下。Tine無為意挨住佢瞓嘅Sarawat幾時醒咗，直到Sarawat喺佢耳邊講嘢，啲熱氣噴落耳仔，嗰種酥麻感喺耳邊蔓延開去。
拍咗差唔多7年拖，呢個變態仔由始至終都冇變過，仲係對佢個胸一往情深。
Sarawat仲有意無意咁用嘴唇磨擦佢耳垂，啲頭髮撩住Tine條頸，Tine感覺到自己塊面應該紅過蕃茄，耳仔同塊面熱到可以煎蛋。
「喂！唔好喺車亂嚟呀你！」Tine一邊捉住Sarawat嗰隻撩起咗佢件衫想繼續向上摸嘅鹹豬手，一邊壓低把聲警告Sarawat。
「驚咩啫，都冇人睇到，你細聲啲咪得。」抬頭望一望前面，原來P'Dim好識做，已經拉起咗個簾，隔開咗前後座，基本上Sarawat可以為所欲為。
SARALEO！！！！！
Tine都唔知以後點面對P'Dim，佢發誓唔會再去接Sarawat機，以後都唔會，有時間整埋啲文件好過喺架車度任人魚肉。
人人都話娛樂圈係個大染缸，但偏偏就染唔到置身其中嘅Sarawat。知道Tine份人敏感又會亂諗嘢，Sarawat同公司講到明唔會接有親密成份嘅job，最親密都只限於摸頭同hi five，畀足安全感Tine。
只不過要成名，就一定有嘢要犧牲。公司想Ctrl S行偶像路線，本身係叫佢哋分手，但Sarawat唔肯。最後一人讓一步，繼續拍可以，但要變地下情。
兩個出親街都擔驚受怕，只要同Sarawat一齊就會畀佢啲fans𥄫到實。試過唔小心畀fans見到佢哋去食飯，轉個頭就喺twitter見到啲相，搞到公司要出嚟澄清話係朋友先平息到件事，想好似一般情侶咁放下閃都唔得。
「成日都唔見得光，你覺得我哋似唔似偷緊情？」Tine試過問Sarawat。
Sarawat諗咗陣，之後㩒咗Tine喺梳化，快手除咗Tine同自己件T恤。
「做咩呀你！！」
「快啲啦，我同我老婆講9點返去。」低頭就將Tine嘅牢騷吞哂落肚。
自此以後Tine冇再問過呢啲問題。
係有少少唔開心，但係同呢個大明星拍拖又未至於「不了」嘅。
Sarawat周不時會錄低自彈自唱嘅片放上IG，有一次佢cover Scrubb嘅Khon Nee，唱到中間有一句「也許就是這個人」，仲未停機嗰陣……
「彈畀你聽㗎，你就係嗰個人。」佢突然望住坐喺鏡頭對面睇緊法律文件嘅Tine講，再額外加多個可以殺死人嘅微笑。
嗰下真係好冧，但Tine冷靜返落嚟就喺度諗，好彩唔係live緊，如果唔係上蘋果娛樂版頭條嘅就係呢個不分時地flirt人嘅男人，標題都諗好埋，《泰星金屋藏嬌 直播甜喊老婆》。
Tine千叮萬囑Sarawat要cut咗最尾嗰part先好upload上IG，up咗上去十秒都未夠已經成千個留言，好彩個個都忙住聽Sarawat唱歌，無人留意到點解最尾停得咁怪。至於條原片就save咗落Tine部手機度，佢一得閒就不停repeat最後嗰part，聽幾多次笑幾多次，仲笑到成個痴漢咁。
「Sorry呀，唔好嬲啦。」Sarawat攬住Tine手臂扮可憐搏下同情。
拍拖7週年紀念日撞正Ctrl S開concert，慶祝都係凍過水㗎喇。自從Sarawat做咗明星之後，好多日子都冇得一齊過，Tine都慣咗。
「我都冇嬲你，唔使講對唔住喎。」唔通仲發Sarawat爛渣咩，工作嘅嘢又唔係佢控制到，唯有做個明白事理嘅男友啦。
鼓起泡腮，個嘴嘟到咁高，明明就嬲緊，仲話自己冇嬲。Sarawat冇拆穿Tine，只係哄埋去，喺Tine嘟起嘅嘴上面錫咗一下。
慶祝唔到都冇辦法，鬼叫自己個男朋友咁紅咩，能夠身處喺同一空間都算贏啦。Concert嗰日Tine坐喺第一排嘅家屬位，一岳高頭就見到Sarawat好專注咁彈結他同唱歌。
認真嘅男人真係特別有魅力。呢個企喺台上面型到爆嘅人，係自己男朋友，喺屋企會好似貓咁嗲自己，同自己耍冧，得自己先可以見到Sarawat嘅呢一面，Tine莫名其妙有種優越感。
「最後呢首歌我交畀Sarawat唱。」主唱同Sarawat調咗位。
Concert嘅最後一首歌係Sarawat自己作嘅新歌，曲同詞照舊係佢一手包辦。首歌講兩個人相遇相識相處，講對婚姻被認可嘅喜悅。
「呢首歌係送畀一個對我好重要嘅人。有時感情真係一樣好得意嘅嘢，我冇諗過你踩我一腳，我望你一眼，就造就咗呢段7年嘅感情。而今日係一個好特別嘅日子，我想大家一齊見證。Tine，嫁畀我做我老婆吖？」
兩盞白燈照住佢哋，嗰刻世界好似靜止咗咁，得返佢兩個你眼望我眼。
Tine霎時間畀唔到反應，目光只係隨住Sarawat移動，見住佢放低個結他，施施然落台走到自己面前，之後攞咗個方形盒出嚟，打開入面見到隻款式簡單嘅男戒，然後單膝跪咗喺地下。
唔再係以前攞住枝Oishi Apple Honey互相表白，亦都唔係膠下膠下咁拎住塊pick叫Tine嫁畀自己，更加唔係用條手繩箍煲，而係真真正正拎住隻戒指同Tine求婚，喺成萬人面前。
周圍嘅人開始意識到發生咩事，啲尖叫聲大到地都開始震。Tine仲好似聽到班妹豬嘅心碎聲，嗚…死喇聽日娛樂版頭條實係佢哋，已經諗唔到會改咩標題。
「好唔好呀，Tine？」
唉是但啦，理得佢咩標題吖，所有嘢都唔到Tine去緊張，聽日嘅事聽日先算啦。而家Tine要做嘅事就只係得一樣。
「好。」
#318 scrubb4ever
同明星拍拖好大壓力㗎喎，又唔見得光，都係不了
不過如果係同Sarawat就例外 :)
記之廢話：
第一次用全粵語寫文，寫得唔好請包容下~
今日唔知聽日事，所以過好當下呢一刻先啦。希望可以為有緣睇到呢篇膠文嘅你帶嚟一點正能量啦:)