「2gether講嘅係一見鍾情，咁Bright呢？你第一次見到Win時係咪love at first sight？」主持知道眼前呢一對同其他BL情侶唔同，從來唔肯主動放閃，唯有不斷助攻，希望chok到一句半句可以令fans尖叫嘅答案。
「我第一次見到佢？」Bright望一望身邊人，忍唔住笑：「我諗係hate at first sight。Nong你話畀大家知發生咩事。」
「嗰日係GMM活動，我遠遠見到P’Bright，咪走埋去同佢打招呼兼自我介紹囉，點知佢睄咗我一眼就走咗去。」Win講緊嘅時候，Bright仲好配合咁模擬當日嘅情境。
「哈哈哈哈因為我當時未知會同佢拍2gether，佢無端端走嚟自我介紹，我根本意識唔到係咩事。加上有朋友等緊我食飯，所以趕住要走。」
於是，呢個一啲都唔浪漫嘅故事，成為佢哋「首次相遇」嘅官方版本。估唔到fans非常受落，後來仲搬上Global Fan Meeting嘅舞台案件重演。
—— 只有Bright知道，呢次其實唔係佢第一次遇到Win。
「一杯凍Americano走甜……啊唔好意思，都係要熱嘅唔該。」十二月嘅曼谷，天氣總算涼咗少少，加上到處都係聖誕裝飾，令Bright突然渴望一啲暖笠笠嘅嘢。
每次返到GMM，佢都會喺樓下嘅連鎖咖啡店買一杯凍Americano走甜，日子耐咗，而家佢一行入舖頭，店員就會自動喺凍飲杯寫低佢個名同order。所以聽到佢要熱飲，店員詫異到定格咗兩秒。
畀完錢之後，佢先留意到有個男仔排佢後面：高大，五官精緻，輕微baby fat，著住名牌恤衫，唔似一般嚟追星嘅fans，應該係嚟試鏡嘅新人？
唔知點解，見到佢皺住眉好緊張咁望住手上寫滿字嘅筆記，Bright有少少鬱悶。
「佢笑起嚟應該好好睇。」等緊咖啡嘅時候，佢繼續偷偷觀察個男仔，同時說服自己，咁在意呢個陌生人，只係因為職業病，想睇吓對方有無潛質加入娛樂圈。
又或者，都只係因為天氣涼咗。
「P’Bright嘅Americano，仲有P’Win嘅Cappuccino。」Bright嘅思緒終於回到現實，接過店員遞過嚟嘅咖啡，就急急腳走去搭𨋢。畢竟係公眾人物，被人發現佢成個怪叔叔咁𥄫住自己，始終唔係幾好。
喺電梯入面，佢心不在焉咁飲咗啖咖啡 —— 咦？Cappuccino？望一望杯上面個名，先發現店員將兩杯搞錯咗。如無意外，佢嘅Americano而家去咗嗰個人手上。
嗰個人，佢個名叫做Win。
「P’Bright，你啲fans送咗咖啡嚟啊。」拍攝Still 2gether期間，幾乎日日都有fans嘅打氣食物，但Bright唔鍾意食嘢，有時間佢寧願用嚟瞓覺或者打機，每次都要由Win將食物送到佢面前。
「嗯。」隔咗陣佢終於擘大眼，但依然郁都無郁過。
「P’Bright ~」其實喺鏡頭以外，佢哋通常會直接叫對方個名，只係喺撒嬌嘅時候先會以Phi / Nong相稱。
Bright望住佢手上嘅咖啡，突然諗起兩年前嗰個十二月，嗰兩杯被調亂咗嘅咖啡，仲有當時嗰個陌生人。
「多謝你。」
「多謝你啲fans就真，佢哋成日……咦咪住！你拎錯我嗰杯啊！呢杯走甜先係你嘅。」為咗加強說服力，Win仲將個杯隊到Bright面前：「你睇吓，『Bright, always love you』。」
Bright無理佢，開始飲手上加咗糖嘅Americano，但紅哂嘅耳仔已經出賣咗自己。為咗轉移視線，佢隨口講咗句：「有咩所謂啫，又唔係第一次拎錯。」
「吓？」Win慢慢抬高頭望住佢，眼神中有困惑，有驚訝，亦都有一絲絲嘅期待，令Bright一時間唔知應該點回應。
「無嘢啦，乖乖哋快啲飲。」
兩個人無再出聲，但係空氣中嘅曖昧愈嚟愈刺耳。Bright自覺好了解佢最錫嘅弟弟，但Win頭先嘅眼神……佢睇唔透。
「你記得？」呢啲情況，首先開口嘅永遠都係Win。
「記得啲咩？」
「我哋第一次見面……喺星巴巴嗰次……」
Bang!!!!!!!!!!
由GMM活動上嘅重遇，到往後無數嘅相處時間，Bright三番四次想提起兩年前嘅事，但正如Sarawat第一次見返Tine，內向嘅人怕羞起嚟，唯一會做嘅就係逃離現場。何況佢都唔覺得當日嘅擦身而過，Win會留意到拎錯咖啡嘅人就係佢。
「Hmmm……嗯。」為咗避免尷尬，Bright決定反客為主：「既然你都記得，做咩一開始唔同我講？」
「你估我唔想講？明明係你未聽完我介紹自己就走咗去。」Win反反白眼，然後「嘻」一聲笑咗出嚟。
「你個煩膠仔。」見到佢笑，Bright都忍唔住笑，心入面再次肯定：呢個人，佢笑起嚟真係好好睇。
Notes：
最近迷上意大利型仔歌手Anthony Lazaro嘅Coffee Cup，所以喺等睇Still 2gether嘅時候，嘗試將歌詞延伸，FF一個關於BrightWin、關於SarawatTine、關於緣分嘅微甜小故事。