May mga kuwentong nagsisimula sa maliliit na pangarap. May mga kuwentong umusbong mula sa sipag, tiyaga, at pananampalataya. At may mga kuwentong naging daan upang mas maraming Pilipino ang magkaroon ng pagkakataong umunlad. 

Ito ang mga kuwentong ipinagdiriwang ng Gawad TANYAG. 

Bawat finalist ay may sariling landas na tinahak—mga magsasakang nagpayabong ng lupa, mga mangingisdang humango ng pag-asa mula sa dagat, mga kooperatibang nagbuklod ng mga komunidad, mga negosyong nagsimula sa simpleng pangarap, at mga institusyong lumilikha ng mas malawak na oportunidad para sa iba. 

Magkakaiba man ang kanilang pinagmulan at larangan, iisa ang kanilang pinatutunayan: ang tunay na tagumpay ay hindi lamang nasusukat sa paglago ng isang organisasyon o negosyo, kundi sa dami ng buhay na nababago at komunidad na napauunlad. 

Ang Gawad TANYAG (Tanging Yaman at Galing) ang pangunahing programa ng pagkilala ng LANDBANK para sa mga natatanging kliyente at katuwang na nagpakita ng kahusayan, inobasyon, katatagan, at malasakit sa pagsusulong ng pag-unlad ng kanilang komunidad at ng bansa. 

Itinatampok din ng Gawad TANYAG ang mga kuwentong nagbibigay-inspirasyon at nagpapatunay na ang tagumpay ay nagiging higit na makabuluhan kapag ito ay nagbubukas ng mga pagkakataon para sa iba.