Казан шәһәренең Яңа Савин районында урнашкан "Татар телендә белем бирүче 13нче гимназия " үзенең ишекләрен 1991нче елда ача. Гимназиядә һәр яктан камил шәхес тәрбияләүгә зур игътибар бирелә. Укучыларның күпчелеге татар балалары, ә 30-40проценты рус, үзбәк, таҗик, грузин, әзербайҗан балалары тәшкил итә.

2012нче елда гимназиядә Татарстан Халыклары Дуслыгы музее ачылу тантанасы Татарстанда гына түгел, рәсәйкүләм зур вакыйга булды. Безнең гимназия "Рәсәйнең 100 иң яхшы мәктәбе" конкурсында "Иң яхшы милли мәктәп" һәм "Ел вакыйгасы" номинацияләләрендә лауреат булып танылды.

Рөстәм Миңнеханов 2021 елны Туган телләр һәм халыклар бердәмлеге елы дип игълан итте. «Без милли телләр һәм мәдәниятләр үсеше өчен шартлар тудырырга тиеш. Рус, чуваш, удмурт, мордва, марилар һәм башкалар. Бу мәсьәләгә зур игътибар биреп, киләсе елны Туган телләр һәм халыклар бердәмлеге елы дип игълан итәргә тәкъдим итәм», — диде Президент.

«Телебез — рухи яктан берләштерүче зур көч. Татар телен саклау һәм үстерү буенча комиссиягә дә зур өметләр баглыйбыз. Бу эштә барлык хакимият органнары һәм иҗтимагый оешмалар катнашырга тиеш. Туган тел — үз халкың белән нечкә элемтә. Без аны саклап калу өчен барысын эшләячәкбез. Бу алдагы буын алдында әхлакый бурыч», — диде Президент.

Ана теле һәрвакытта беренче урында торырга тиеш, аның аша дөньяга, аң-белемгә юл ачыла. Безнең төп бурычыбыз - үз халкыбызның мәдәниятен, гореф-гадәтләрен, иң күркәм йолаларын, халкыбызның тарихын хөрмәт итәргә өйрәнергә тиешбез.

Әйе, милләт буларак сакланып калу бүген безнең һәрберебездән тора. Беркемгә, бернәрсәгә карамыйча, үз ана телебездә сөйләшергә, үз динебезне тотарга, үзебезчә яшәргә безгә беркем комачау итәргә тиеш түгел. Халыкның рухи байлыгы бервакытта да саекмасын, кимемәсен, милләт үткәнен хөрмәт итсен, кеше үзенең туган җирен, туган телен, гореф-гадәтләрен, йолаларын онытмасын дигән сүз. Бу эшне тормышка ашыруда безнең гимназиядә урнашкан музейның роле гаять зур роль уйный.

Туган телебезне онытмыйча, саф татар телендә сөйләшүне балаларыбызга да җиткерик. Бер-беребезне хөрмәт итеп бердәм булып яшик!!!

Хәзергесе көндә безнең музейда күп кенә кунаклар булды. Музей Казан шәһәрендә урнашкан Халыклар дуслыгы йорты белән тыгыз элемтәдә тора. Килгән кунакларга укучылар музей буенча эксурсия күрсәтәләр, төрле мастер-класслар, музей дәресләре була. Шулай ук, төрле конкурс бәйгеләрдә катнашып, призлы урыннар алалар.