創作發表研究

我上佮意的禮物                           吳讚原老師

各位評審老師、各位參賽的同學逐家好！我是第□號，我欲講的題目是「我上佮意的禮物」。

    若講著我佮意的禮物，自細漢到即馬已經是歹算矣！隨著我越來越大漢，佮意的物件嘛一直咧變。m閣，佇我心肝內有一項上佮意的禮物是永遠攏袂變个。自我做囝仔有印象以來，我的迌伴就是一个音樂布尪仔，這个布尪仔是一隻熊的造型，有兩粒大大蕊的烏仁，青靈靈活跳跳，未輸真的目睭仝款，干那使一個目尾著會當甲人勾去，總講一句，我足佮意這个布尪仔，我共伊號一个外國名，叫做熊寶(直接念英文名)。

　　阿爸甲我講，這个布尪仔當初時是阿母買予我的，因為我是一個無足月生的囝仔，出世的時陣，生命強強欲休去，經過醫生的搶救，才甲一條命撿倒轉來，閣佇保溫箱住2個月，才順利出院。阿母講因為佇加護病房愛照病院規定的時間才會凍來看我，因袂凍時時刻刻照顧我， 閣m甘放我一個人無伴，所以經過護士的同意，特別甲這个布尪仔，囥佇我的身軀邊，伴我住佇保溫箱的日子，著干那有伊的陪伴，乎我度過規落拜的危險期。

護士甲阿爸、阿母講，每一拜只要伊輕輕啊拉這个布尪仔，音樂聲一響(陳)我就會安靜落來，惦惦啊睏去，干那知影有人佇身軀邊，有足濟人咧關心甲疼痛，所以著拼勢一定愛勇敢活落來，就因為安呢，我對這个布尪仔有一種真特殊的感情。

阿母閣講細漢的時，我一工到暗攏甲熊寶攬稠稠，抱伊做伙看電視，去飯廳食飯，暗時閣甲伊莫咧做伙睏，會使講是和我無離開半腳步。

讀幼稚園的時，和別个囡仔鬥陣，不管是歡喜、受氣抑是傷心的代誌，一轉去到厝，我就衝去房間仔內，甲心肝仔熊寶攬起來，共佇幼稚園雜雜滴滴的代誌，那看伊的目睭，那講予伊聽，熊寶的眼神親像攏聽有仝款，我著感覺足安慰耶，甚至講我真希望熊寶親像人仝款，會使和我講話。

這馬我已經讀五年矣，身軀邊嘛有足濟迌的囝仔伴，m閣熊寶佇我心目中的地位，是永遠袂改變的。經過遐濟年，熊寶看起來嘛已經舊啊，m閣對我來講，伊永遠是我的寶貝，因為對我來講，伊是代表阿爸、阿母對我的愛，是值得紀念而且是上珍貴的物件，也就是我上佮意的禮物啦!

  我的演講到此結束，感謝逐家！