檔案下載

「炕塗窯（kòng-tō-iŏr）」

作者：簡惠珠（gan-hui-zu）。

細漢的時代無手機仔，無電腦，連欲看電視都愛去厝邊的客廳才有通看。阮無科技的𨑨迌物仔（cit-tōr-mīh-à玩具），上捷耍的（siong ziap-sng4 eo最常玩的）就是和囡仔伴走相逐、覕相揣，閣來就是佇厝頭前的田裡變猴弄（bìn gāu-lāng）。

後頭厝的徛家頭前是一片闊莽莽的（kùa-bhong-bhòng ē廣闊的樣子）田地，田裡若有種稻仔的時，田岸仔路就是我下課了後會去耍的好所在。一枝竹仔縛一條（bak zit diāu）釣線就是一枝魚釣仔，欲釣的毋是魚仔是田蛤仔，手攑釣竿仔（diòr-gūan-à）擢懸擢低（diòr-gŭan-diòr-gē輕輕拉動）唌田蛤仔（siān cān-gap-à誘青蛙）來食餌（lī），有時閣釣甲有通仔予阿母加菜。一碗清清的蒜頭四跤仔湯就是阮的山珍海味，而且閣加上家己的成就感，湯頭啉起來（lim kio laio喝起來）感覺（gam-gak）特別甘甜。毋過若是影著釣起來是一尾長長的水蛇，我就釣竿擲咧（diòr-guan dan leo丟掉）趕緊落跑（làu-pău）。

稻仔收成了後是我上快樂的時陣，我和囡仔伴會佇田裡享受大自然，掠草猴、弄草蜢仔（lang cau-me-à嬉弄蚱蜢），猶有就是我上愛的炕塗窯。

佇咧稻仔割了，猶未佈（iau/ia bhue bò還未播）後一擺的稻仔進前，作穡的（zòr-sīt）阿伯攏用犁共田裡的塗僥僥反反咧（hiāu-hiau-bing-bìng leo反覆翻土），僥過了後，田裡的塗丸仔就是我炕塗窯上讚的材料，因為起塗窯我上內行，所以賰的囡仔伴攏干焦負責抾（kiòr撿拾）塗丸仔。我攏先用三塊紅磚仔排一个『ㄇ』字型成做欲囊柴的（lōng că ē穿進去）窯門（iōr-mňg），紲落來用較大粒的塗丸仔圍踮磚仔邊先箍一个圓，閣來就是一層一層，愈圍愈懸，上重要的鋩角（mē-gāk原則範圍、輕重關鍵）就是圓箍仔愛愈圍愈細个，一直到共塗窯的厝頂崁起來（kam-kio-laio覆蓋起來）。

起好了後阮就開始燃柴（hiān-că燒柴），等塗窯的塗墼（tō-gāt/gāk土塊、土磚）燒甲紅記記的時，這陣就是欲囥番薯的好時機矣！閣來就是對塗窯懸頂的塗墼用火鋏（hue-ngēh火炭夾）共挓一寡（tà zit gua鏟一些）落去，予頂懸成做一个空，利用這個空共番薯囥落去塗窯內底，才閣用棍仔撼予倒（ham hō dòr用重物猛擊或砸），閣共塗砂粉仔崁踮（kàm diàm蓋在）頂懸，才袂予燒的空氣走出來，按呢番薯才會熟、才會好食，紲來就是等待的時間矣。

等待的時阮會擉玻璃珠仔、擗樹奶（piak ciu-ling打彈弓），聽候時間若到，全部的囡仔伴圍佇塗窯邊，用柴枝勻勻仔（ūn-ūn-a緩慢地）共塗丸仔挖開，共一條一條芳kòng-kòng（pāng-gòng-gong）的番薯，勻勻仔挓出來分予在場的每一个人，逐家就歡頭喜面，佇黃昏的日頭跤享受這簡單的幸福。 

「愛綴路的」

作者：王秀容

（ōng-siù-iŏng）。

「啥人欲綴喔（bheh due ŏ跟隨）？」阿公準備欲出門囉。伊刁工（tiāu-gāng故意）喝欲予我聽的，因為兄姊攏大漢無欲綴矣，毋過我閣足愛綴呢！定定佇門口耍甲一半，影著（ian diorh眼光非刻意看到）阿公欲出去，就隨喝講：「我欲佮阮阿公來去矣，後擺才耍。」囡仔伴攏嘛隨應講：「愛綴路的。」

有通食、有通耍，我毋才會想欲綴。佇「生食都無夠，哪有通曝乾（pak guan曬成乾物）」的囡仔時代，若會當啖著（dām diorh吃著解饞、淺嚐）四秀仔（零食），袂輸猴山仔食著弓蕉咧，樂暢（lok-tiong歡喜舒暢）的感覺，到今（gàu dan到如今）想著猶閣會偷笑。

是食啥物好料的咧？上豐沛的就是去食一碗五箍銀的摵仔麵（cīk-a-mī擔仔麵）。彼塊囥佇中央的肉杮仔（bhà-pue-à肉片），攏留甲規碗囫了（hut liàu狼吞虎嚥），才用湯匙仔共撈入去（hō lip kì撈進）喙裡含咧（găm leo含著），毋甘（m gām捨不得）隨哺哺吞吞（bo-bō-tūn-tun嚼一嚼吞下去）落去。阿公撏錢（līm/rīm zĭn掏錢）咧納數（lap siau付帳）的時，我綴佇伊尻川後，全心全意咧欶（sù吸）彼塊肉的汁，足甜的呢！莫怪到這馬，去到佗都愛食摵仔麵，連去飯店食包肥的『buffet』，嘛會先來一碗。人攏笑我無彩錢，黜我講（tù ghua gong揭我瘡疤）「哪閣有法度通食別項咧？」毋捌啦（īn m bhāt lao他們不懂）！摵仔麵食落去，心情好，脾土開（bī-tò kui胃口大開），顛倒食較濟！

我嘛誠愛綴阿公去漢藥店。定定有人來厝裡揣阿公討藥單，隔轉工（gè dng gang隔日）伊就會去敆藥仔（gap iōrh-à配藥）。遐會當看著足特別的物件，像龜啦、鱉啦（bīh-lao）、海馬啦，閣藥頭仔逐款攏有名，我坐佇邊仔一下仔看動物，一下仔看植物（sit-bhut），一下仔認藥格仔頂的字，袂輸咧踅（seh逛來逛去）博物館咧，足趣味的。頭家驚我等久會囉（lōr囉嗦不完），逐擺阮尻川才頓好（dng4 hòr坐好），伊隨捎（sā粗魯的拿）兩包宋陳（sòng dĭn柚子皮、橘皮製成的乾果）予我窒喙空（tat cùi kang塞嘴巴）。酸微仔酸微，我會共含佇喙裡閣用舌共輾來輾去，袂輸擉煙腸（diak/diak iān-ciăng彈珠子贏香腸）的珠仔台，足好耍呢！若講傷久，頭家閣會補我兩包，我攏儉轉去（kiam dng kì存儲回去）分兄姊食。

我上愛綴阿公坐市區的去辦代誌，因為車牌仔遐拄好有一間𥴊仔店（gam-a diam），阿公會買一包牛奶糖仔予我。我共當做寶貝仝款袋佇橐袋仔（lak-dē-à口袋），閣定定去摸看有落去無。一包十二粒，坐去閣坐轉來，我攏算好好，食甲賰六粒，轉去拄好兄姊一人食兩粒。

逐擺，我提出來分食，免品，嘛足奢颺（ciā-iān擺排場派頭過於奢華）。食甲足歡喜，毋過會笑笑窮分講（kīng hūn gong分毫計較），古早綴有著，煞無通食，講我這个愛綴路的有影較好命！

「愛會記得𤆬我轉來喔」

作者：鍾育紋（zīng-iok-bhŭn）。

有一个下晝（e-dau下午），阮大伯來招我去看兜（īn dau他們家）的豬仔囝，我講豬牢（dī-diău養豬處所）臭臭，無愛去。伊煞一直共我唌（siăn誘使），講豬牢今仔（dăn-a剛剛）清過，袂臭啦！拄出世的豬仔囝偌（lŭa~多麼地）古錐拄（du又、剛好）偌古錐咧，閣講我會使佇邊仔看欶奶（sù ling/ni吸奶），提hòo-sù管（橡皮水管）共灇（zāng淋浴）身軀，嘛會當予我抱起來摸的毛，猶閣會使看豬仔囝軁過（nńg gùe穿過）豬牢邊仔的細个空，走去後埕彼搭（hit dāh那個所在）𨑨迌……。聽伊講甲喙角全波，我彼當陣干焦（gān nā僅只）讀國校仔一二年仔，一漢仔疕（zit-han-a-pì一個小不點）哪會堪得（e kām dit怎麼受得了）予人按呢唌？不而過，補習班的車連鞭（liām-mī立刻馬上）就欲來載我去上課矣！雖然毋情願嘛是愛另工才去。āīūēō àìùèò ăĭŭĕŏ ňń

隔兩工，有一个房頭仔內（同阿公生的兄弟）的阿伯來阮兜食茶，講伊小等咧欲去阮大伯遐（hia那裏），彼工的宿題（siok-dĕ家庭作業）拄好寫好矣，阿爸佮阿母答應予我綴伊去。我就佮彼个阿伯講好勢，叫伊著愛會記得共我載轉來才會使喔！我歡喜甲喙笑目笑，啊！豬仔囝，我來矣！ 

叔伯（zik bè同阿公的堂..）阿兄看我去到兜，就隨共我牽咧，親像導遊仝款，𤆬我去踅（cua ghua kì seh帶我去逛）兜的豬牢。彼幾隻仔豬仔囝就若像大伯講的，古錐甲予我佇豬牢看規點鐘久都袂𤺪（bhue siān厭倦、厭煩）。尾仔轉去大伯廳裡的時，大人做咧開講，我佇邊仔煞一直咧哈唏（hà-hi打哈欠）。大人講：「囡仔人下晝無睏擋袂牢啦（dòng bhue diău受不了）！小睏一下無要緊。」我真正傷過（siūn gùe太過於..）愛睏，嘛想講阿伯若欲轉去，就會共我叫精神，無一睏仔（zit-kun-à一下子），我就睏甲毋知人矣。啥人知影我一下醒，阿伯煞先轉去矣。我氣甲那吼那罵：「講話無準算（bhōr zun sng不算話）！凊彩（cìn cai隨隨便便）騙囡仔！」

大姆共我安慰講：「無啦！阿伯有先敲電話予恁老爸啦！叫伊送貨的時陣才斡過來（uat gùe lāi彎轉來）載你轉去。」毋過我起毛（ki-mo源自日語：気持ち「きもち」心情）猶是真䆀（bhài不好、壞），共伊當做是白賊七仔，就按呢，決定以後無愛閣佮伊講話矣！

無幾日仔，阿伯又閣來阮兜食茶，聽逐个講彼工我哭甲真忝（tiàm疲累），就好禮仔共我會失禮。只不過彼陣我猶細漢，腹腸（bak-dňg肚量）無遐爾闊（hia ni kūah那麼寬闊），毋管阮序大人按怎苦勸，自彼站開始，我就無愛閣佮伊相借問矣！一直到我讀國中蹛學寮（dùa hak-liău住學生宿舍）的時，規禮拜才有法度轉去厝裡一擺，閬足久（làng ziok gù日子離久）才閣看著伊，我毋才開始閣再叫伊一聲「阿伯」！