Prayer Request

Live Channel

Our Pastor

            Rev. Nang Gin Mung

TOPA SUNGAH LUNGDAMNA                                                                                            

Filippi 4:4  Topa sungah lungdam tawntung un.

Thumasa:

Leitungah a lungdam tawntung ding mi om kha thei sam dinga, a hi zongin hih pen thu-um mite ading a kisam mah thu khat le a haksa mahmah thu khat a hi hi. Lai Siangtho sungah "un" cih sawlna kammal khempeuh pen a haksa vive hipah hi. Lungdam ding pen nasep haksa khat a hihmanin hong kisawl den hi zaw hi. A haksat zenzen hangin hithei-in kihih zo ding a hihmanin hong kisawlsawl na hi gige hi. I haksatna, i lungsim tapzaanna le i thuaknate nungah i neihlai thuphate, i ngah ding hamphatnate ngaihsun to suak leng bek kilungdam thei panin lungdam kiko zo pan hi.

 

1. I Mimal ading Lungdam Ko Ni                                                                                                 

   Pianna:  Mauvom khua panin 1979 kumin ka suak a, unau 6 ka pha vua kei pen innsungah kumpi’ za a nei nautum ka hi hi.

   Sangkahna: Tanlang pan tanli Mauvom, tannga pan tankua Cikha, 1998 kumin Tonzang pan Pasian nalamdang sepna le kumpite thusiamna tawh kawlgam tansawm (A list) in ka aung demdaam sam hi.

2003 kumin EBS, Yangon (Dr. Chong Luai) Lai Siangtho sang pan B.Th ka ngah kha bilbel a, 2004 kumin HFMC, Mandalay (Rev. Zam Lian Kham) music sang panin Diploma laidal khat siate thusiamna le panpihna tawh ka la ngei sam hi. Efesa 3:20 “I nget i agaihsutna sangin a hih theizaw Pasian” mahin lam hong honsak toto a,  ka lamet ngei kholloh thupha khat August 29, 2009 in  USA gam Southern Baptist te thusiamna tawh Ordination ka ngah kha hi. Tulaitakin ZLCF Pawlpi ah hunbit Pasian nasem(fulltime) khatin Senior Pastor dinmunah Pasian gam le lei ading mapangin ka hanciam laitak a hi hi.

             Ka nu le ka pa pen singtang lokho mi ahihmanun nuntak zia pen haksa ka sak hun uh tamzaw den hi. Meh ding kilung himawh manlo-in a buh/an ding mahmah zongin ka nu le ka pa khuadangah zin mun mahmah uh hi. Ka neulai/tannga ka kah kumin ka pa'n hong nusia ahihmanin tua hun a kipan tuni dong mah haksatna tampi  ka phukha toto lai hi. A hih hangin ka neih Zeisu nung ka zuih taktak a kipan ka tuahsa, tuahlai, nawktoh ding haksatnate tungtawnin Topa hoihna ka muhna, Ama hihtheihna ka tel semsemna, ka teci panna le ka lungdam kohna hong hi toto hi. Late 27:10 sungah “Ka nu le ka pa in hong nusiat hangin Topa in kei hong keem ding hi.” Ka mimal nuntakna ah Topa hoih lua a hihmanin ka kammal le Topa hong piaksa late sung pan lungdamna kammalte ka hel tawntung kei leh ka mihing nuntakna a mawkna taktak hi dingin ka kingaihsun den hi.

            

Jonah 2:9  Ahih hangin ke'n ahih leh lungdamna aw tawh biakna kong pia ding a, ka ciamsa thu ka tangtungsak ding hi. Topa' kiang pan hotkhiatna hong pai hi,” Korin Nihna 12:9 Ka hehpihna thupha in nang adingin kicing hi. Ka vangliatna in na thanemna adingin kicing thei hi.                                                                       

Jonah bangin haksatna ngasa gilpi sungah na om laitak hi kha ding hi. Tua sung pan mahin Topa tungah lungdam ko khia lecin na haksatna ngasa gilpi sung pan a pua lamah hong tunkhia thei Zeisu bek a hi hi.                      

Isaiah 54:17  Nangmah dona dingin a kibawl hiam peuhmah mavang lo ding a, thukhenna sungah na langah a pang mi khempeuh na nialgawpzo ding hi. Hih thu pen Topa' nasemte' gamhluah leh keima kiang panin amaute' dikna a kilahna ahi hi, Topa in ci hi,” a ci hi.

 

2. I Innkuan ading Lungdam Ko Ni 

Ka ute pasal 3 le numei 2 hi-in kei tawh 6 ka pha uh hi. Zomite a tam zaw i ngeina pen uzawpa pen innluah hi dena, ko tawh kilehbulh pian hi. Zi nei masate inntuan masa hi pahpah mai. Zomite i lom omkhopnana ah pawlpi i kikhen pahpah pen kei adingin lamdang lualo hi. Ko innkuan sung pan ka na tuah ngei uh thu khat hi lel hi (Pasian hehpihna tawh tulaitakin ka ute tawh ka omna uh a kibatloh hangin ka lungsim uh le ka biakna, upna uh innsung khata omkhawm mah ka bang kik ta uh hi).                                                                                                                                            Ka neulai a ka inn nihna masa (inn masa ah ka vek un, inn nihna ah ka nu, ka u Cin le kei) pen uh ka innkhuamte uh gua, a kawm/baangte gua, a tungkhuhte gua, siktukilhte gua mah hi-in, tuukhun ciangin guatuai meh zel ka hihmanun, mipawlkhatte'n ciamnuihna-a a neih uh, "Gua aw! na sungah kei ka oma, kei sungah zong nang na om hi," a cih uh pen ko nutateng tuahkhak takpi thu a hi hi. "Kei hong pahtawite ka pahtawi ding hi" (1 Sam. 2:30), a ci Pasian pen ka mimal le innkuan un lungsim takpi tawh ka pahtawi uh teh, gua inn pan bii inn, bii inn panin USA building sungah Topa'n hong laamtoto hi. Ka innkuan adingun Topa tungah lungdam kohloh theihloh a hi hi.                                  

    Joshua 21:45  Topa in Israel mite tungah a ciamsa thuhoih khempeuh khat zong a mawkna omlo a, a vekpi-in tangtung kim hi.                                                                                                                                                                         Joshua 24:13-15  Note in na seploh uh leitang, na satloh uh khuapite, note tungah kong pia a, tuate sungah na teng uh hi. Na suan'loh uh leenggui lo pan a gah leh oliv huan pan a gah na ne uh hi,’ ci hi. 14“Tua ahih ciangin tu-in Topa zahtak un la, lungsim tak leh thumanna tawh ama na sem un. Na pu na pate un Gun gal leh Egypt gamsungah a biak uh pasian-te koihkhia un la, Topa' na sem un. 15 Topa' na na sepnop kei uh leh, Gun galkhata a na na sepsak uh na pu na pate uh pasian ahi a, note' ten'na gam Amor mite' pasian ahi zongin, a na na sepsak ding peuhpeuh uh tuni-in teel un. Ahih hangin kei leh ka innkuanpihte in ahih leh Topa' na ka sem ding uh hi,” a ci hi.

Tulaitak: Ka pianna Tuunnu Niangkaang, ka angkawi zi Lun ka tate pasal 2 Tatung &Sianbawi le numei 1 Cicing tawh Pasian ompihna sungah Pasian thuphate USA gam panin ka semis uh hi.

 

3. I Pawlpi ading Lungdam Ko Ni                                                                                                                                         

2007 kum July kha in Atlanta khuapi ka innkuanun ka tung uha, tualaitakin a omsa inn 4 tawh homecell kipan to in Zomite khat le nih hong tung toto in amauteng mah tawh Zomi Laizom Christian Felloship pawlpi na kipankhiain, Pasian ompihna tawh tuni ciang Pawlpi member inn 90 val bang kipha ta hi. A mimalin 300 kival ta a, nipi sim biakinnah Pasian maipha hong zong 130 kiim kipha den hi. I pawlpi adingin Topa tungah lungdam kohtak a salo  om dingin ka lamen kei hi. A hang pen i pawlpi makaiteng en leng leitung pilna sangkahzah/taanzah gawmgawm le hang kawlgam tansawm laivuanna-ah (B) list tawh ki-ONG/passed zo pan kha ding hi. A hih hangin Topa ompihna, panpihna le lam'na Pawlpi pen maizum ngeilo hi. KA pawlpi KA lam ding hi (Mate 16:18).       

 

Rom 8:31-37 Hihteng bang ahih khit ciangin bang gen ding om nawn ahi hiam? Pasian in eite hong koppih peuh leh kua in eite hong zo zo ding ahi hiam? 32 Ama Tapa nangawn sitloin eite khempeuh-a' dingin hong piakhia ahih manin, na dang khempeuh zong hong piazaw kan ding hilo ahi hiam? 33Pasian in mawhlo hi, ci-in a gen khitsa ahih manin, Pasian' teelsa mite tungah kua in mawhna guan'thei nawnding ahi hiam? 34Tua ahih manin kua in amaute tungah thu khenthei nawnding ahi hiam? Eite-a' dingin a hong thumsakpa pen Pasian' taklamah a tu, a sih khit ciangin sihna panin a kihing kiksak Khrih Jesuh hilo ahi hiam? 35Tua ahih manin bang in Khrih' itna tawh hong kikhensakzo ding ahi hiam? Haksatna, lungkhamna, bawlsiatna, gilkialna, zawn'na, lauhuaina, sihnate khat peuhpeuh in hong khenzo ding ahi hiam? 36Lai Siangtho sungah zong, “Note hangin sunthapai-in siatna ding lauhuaina ka thuak uh a, gawhding tuu bangin a hong kibawl hi,”. 37Eite a hong itpa' hangin hih thu khempeuhah a gualzo pente ihi hi.                                                                                                                                                                                   Korin Nihna 10:4  Kote' zat galdona hiam pen leitung galhiam lelte hilo a, galte' pan'mun phualpi a susiazo ding Pasian' galhiam khauhte ahi hi.                                                                                                                                         Paunak 21:31  Galdona dingin sakolte a baihsa-in kikoih a, ahi zongin galzawhna pen Topa' hang hizaw hi.

 

Thukhupna:  

Mikhat a sai uh laksakte'n luhsakin sai neipa'n Pawlpi siapa le upate kaikhawm a, "Zanni-in ka sai uh kiluhin van pawlkhat mang ahihmanin lungdam hong kohpih un," ci hi. Makaite'n "banghangin lungdam hong kohpih un ci na hi hiam? Hehnepna hun hi zaw lo ding a hiam?," ci uh hi. Innteekpa dingto kika, "A hang pen hi dan hi;                                                                                                                                                                                                           

1. Ka van uh a kiguk hang tampi mah nei lai ka hihmanun lungdam hong kohpih un.                                                           2. Ko bangmah hong kicihlo ahihmanin lungdam hong kohpih un.                                                                                           3. Mi deih ding van nei ka hihmanun lungdam hong kohpih un.                                                                                                4. Ko gutate hilo ka hihmanun lungdam hong kohpih un," ci hi.

 

Topa kammal i nuntakna lungtang sungah hong nungta semsem ta hen.

TL Mungbawi

480 Hammett Dr

Decatur, GA 30032

404-296-4820 (Home), 678-644-3962 (Cell), 

 email: ngmungbawi@gmail.com,                                                                                                                                                                                       



Thuphate 
Phuak/sa - TL Mungbawi
Zeisu Omlo Hi Leh ( Live )
Phuak/sa - TL Mungbawi 

Zeisu Omlo Hileh..


Vanglian Sisan
Phuak - TL Mungbawi
Sa      - TL Mungbawi, David Kham, Suan Lian, Kapno

Vanglian Sisan


Hong Zeek In
Phuak/sa - TL Mungbawi

Hong Zeek In


Youth Pastor Mike