... ديوان لطميات مسلم ابن عقيل عليه السلام سفير الحسين صلوات الله وسلامه عليه

صفحة البداية
ديوان لطميات مسلم ابن عقيل
صلوات الله وسلامه عليه
تجدون فيه كذلك اللطميات المكتوبة بحق حميدة بنت مسلم عليها السلام
واللطميات المكتوبة بحق أولاد مسلم عليهم السلام محمد وابراهيم الشهداء بعد وقعة كربلاء




تلميذ الكرار


 

حين طب للكوفه مسلم

صاحت الكوفه علي

حين طب ليها المُجاهد بيـــده شايل صارمه

ماجت وهاجت وظنت لاحـَـــت الگاع السمه

كلها تبچي اهناك صارت فقط غُرته الباسمه

صاح بالگاع الغضنفر ياللـه گاع اتزلزلي

حين طب للكوفه مسلم

صاحت الكوفه علي

2

صاح صيحه وبيها زلزل كل عروش الظالمين

گال مسلم آنه مسلم آنه مبعوث الحُسين

آنه تلميذ ابو الحمله حيدره يا سامِعين

آنه تربات الصميده حيدره نِعمَ الولي

حين طب للكوفه مسلم

صاحت الكوفه علي

3

آنه تربات الصميده حامل الواء الرسول

آنه خادم للذي جده النبي وأمه البتول

آنه مسلم بن عقيل اليوم بيكم راح اصول

راح اراويكم كفاحي من أصيحن ياعلي

حين طب للكوفه مسلم

صاحت الكوفه علي

4

صاح مسلم بالجموع الضاع مشردها ضياع

واحد آنه وسيفي واحد وين جيبولي السِباع

ما صمد بيهم مقاتـــــــل لا ثبت بيهم شجاع

هذا مسلم هذا مسلم يا ملاحم هلهلي

حين طب للكوفه مسلم

صاحت الكوفه علي

5

غاص بجموع الحرايب والزلم تردم زلم

ما گدر يوگف ابوجها منها واحد والنِعم

ما لگو غير الخديعة وبالغـدِر عقد العزم

بيه غدرت يا حسافه بنار باچر تصطلي

حين طب للكوفه مسلم

صاحت الكوفه علي

6

بالخديعة وبالحفيــره يسِّروا اعظم سفير

راحوا القصر الإماره گصدَوا الأنجس امير

صعِّدوه اهناك ويلي امگيد ابحبله أسير

ويلي من فوگ القصر شمروه يا حيدر علي

حين طب للكوفه مسلم

صاحت الكوفه علي


صولة مسلم


 

بالكوفه مُسلم من صال

حيّر أفكـــــــــار الأبطال

صوتٌ يعتلي .. هل هذا علي ؟

حيّر أفكار الأبطال

1

طالِع التاريخ يا مــــــــــن تگصد ارموز الكرامه

راح تلگه اشموس تسطع بالعـزيمه بنص ظلامه

شموس هاشم والهواشم  زينـــــة الكون ونظامه

منهم الصنديد مُسلم للـــــمَجـِــــــــد أصبح علامه

لمّن طب ليها الضرغام

ذكرها ابصـــولات الشام

صَولات الولي ... هل هذا علي ؟

حيّر أفكار الأبطال

2

مُظلِم التاريخ لكن ضوِّتـه اشمـــــــــــوس الهـواشم

هُمَّه مقياس الشجاعه وهُمَّــــــــــه نبراس المكـارم

إلهُم الساحات تشهد هُمّـه فرســـــــــــــــان الملاحم

وهم قــوّاد الفيالــــــــــــــــــــق والكتايب والضياغم

مسلم من ذوله الأحرار

تلميــذ الحيـــــــد الكرار

والقول الجلي ... هل هذا علي

حيّر افكار الأبطال

3

مسلم اختاره الحُسين وصار مُختار السفاره

منصب ايبيِّن مقامه الناله بالتقوى ابجَــداره

واحد ابألفين فارس بيـــــده شب أول شراره

واحد ابلا خوف زلزل بالعــزم قصر الأماره

بالكوفه وهز عرش الشام

ضل منهـــــل يروي الأيام

فيضٌ أزلي ... هل هذا علي ؟

حيَّر أفكار الأبطال

4

مسلم الأنسان مثلـــــــــك يلــي تسمع هالقصيده

نال عصمه امن الجليل ابزوده من صان العقيده

صير مثله يالغيور وحـاول المجــــــــــــده تِعيده

صير شيعي ما يجامل ناصبـــــــي الأجل اليريده

ما ساوَم أعــــــــداء الله

ما غرّه المنصب والجاه

هل من قائلي ... هل هذا علي ؟

حيَّر أفكار الأبطال

5

يلــّي تسألني أجيبـَـك عــــن سبب خلده وبقاءه

صار حُر و ما تِزلــــــــزل بالفِتن والحگ لواءه

مسلم اختار السلامـــه الدينه مـن عادى الدناءه

شيعي مُعلِن للولايـه ومـــا تــــرِك نهج البراءه

أصبح للعالـــم نبراس

ولكل حُر ثائر مقيـاس

خـُـذ يا سائلي ... هل هذا علي ؟

حيَّر أفكار الأبطال

6

منهج الِّي اختاره مسلم مو صَعُب علــِّي يگصده

منهج الثورة العظيمه البيهـــــــا خط بدماه مجده

منهج الحبل المتين البيـــــــــده ويد احسين شدّه

عالزمن باقي شراره ودمعــــة اصرار اعله خـده

جمره اتشع نور الإيمان

وي دمعه الصارت بركان

لا نهجٌ جاهلي ... هل هذا علي ؟

حيّر أفكار الإنسان

 


قصيدة بعنوان السفير الصامد



حاولت فيها ان اصور بعض مشاهد الثبات وصور الصمود وتضاريس الألم

أهديكم ثوابها وإلى أمواتكم وأموات شيعة أمير المؤمنين صلوات الله وسلامه عليه المنسيين وخصوصاً خدام سيد الشهداء صلوات الله وسلامه عليه والشهداء الكرام
 وأسألكم الدعاء

صير شيعي مثل مُسلم .. رافضي الحـــد النخـاع
مبدئي لا مـا يجــامـــل .. لاولا لابــــــس قنــــاع
بطل ما أعلن خـُضوعه .... ماكو ناصر غير طوعه
رافضي الحد النـُخاع
1
عبقريـة مسلـم اتعــــدَّت حِسابــــــات الخيال
للخلود أول شـرارة انقدحَـــت ابأقدس مجال
هاشمي وصيت الهواشـم بالمكــارم والجلال
كبرياء وإنتمــاء اتجسَّــد ابســــــــوح القتال
وحده ظل بالكوفة صامـد مُسلم ونِعْم الرجال
وحده ضد جيش الخيانه ينسحب ويذل محال


جبل ثابــت ما تِزحـزح .. رغــم آلآف الجمـــوع
تربيـــة حامـي الحميه .. ما عرف معنه الخنوع
عهــد بس للــه رُكوعـه .... ماكو ناصر غير طوعه
رافضي الحد النـُخاع
2
يافخـــر أول فدائـــي احسيـــــن خلاه السفيـر
هذا من بيهِ المَكـــــــارم والمَعـــــالي تستجير
منهو غير الطالبــي يا عالـــــــم ابهذي جدير
هذا تلميذ الصُميـدة الچـان للهــــــــادي وزير
وحده ضل بالكوفـه صامـد عاد صولات الأمير
عاد قصـــة ذو الفقــار وعملته ابليــــل الهرير


جندل ابنـــــــــــاء البغايا .. وطارت اچفوف ورؤوس
چنه عزرائيل نــــــــــازل .. يختطـــف منهــه النفوس
زلزل ازياد وجُموعـــه .... ماكو ناصر غير طوعه
رافضي الحد النـُخاع
3
الناس ياسامع خليط ابيــن فهمــان وجهول
وبين عابد للغريـزه يستجيــب اشمـا تِگول
وبين ساعي للمطامع بلكي من عدهه ينول
وبين خامل إتكالي ابلا ثمـن همـه الوصول
والقره التاريخ شاف الكـوفـه وشبيهه فلول
وقدرة الدينــار والدرهــم على مسخ العقول


تجسدت بالكوفه لمَّن .. خانت ابأقـدس سفير
من عگب ما بايعـوه .. انطوه للطاغــي أسير
علغريب اتصب دُموعه .... ماكو ناصر غير طوعه
رافضي الحد النـُخاع
4
كل بشر مِـن كربلــــه اتعلـَّــــم مقاييس الفداء
لچن مسلم وهـب دمــــــه قبــِــل وقعة كربلاء
يعني مسلم فتـح بـــاب التضحية وباب العطاء
أرخص الأجل العقيـدة ورفعــــــة الدين الدماء
وگع صح عالگاع لكــــــــن بلـغ غايات العلاء
نجم أصبح للبطوله ايشِـــع كـــــرامه وكبرياء


نجم لامع نور ساطع .. ما تغطيـــــــه الغيوم
نجم هادي للبــــرايه .. مو مثل باقي النجوم
دائم اشراقه وطلوعــه .... ماكو ناصر غير طوعه
رافضي الحد النـُخاع
5
بين كل هذي المشاهِــد نلتقــط مشهد حزين
مشهد ايفت الصخـور ويـِشِـب نيران الونين
مشهد الطفله حميـدة البلـدرب ويــه الحسين
من گصد ليها وحضنها وگلهـا لازم تصبرين
صرتي هسه اول يتيمه مــن يتامــى الطيبين
عظـَّم الله اجرچ ببوچ استشهد ابدرب اليقين


مسح راس الطفله بيده .. ودمعه فوگ الخـد نزل
لمسلم الضحه ابوريـده .. والجنـــــان اللـه ارتحل
تبقه ما تطفه شُمــوعه .... ماكو ناصر غير طوعه
رافضي الحد النـُخاع


قصيدة بعنوان خلود مسلم


سفير حسين بالكوفه .. مَثـَـل للناس
بطل اوصافه معروفه .. شديد الباس
كَصد يصلحهه بفكـاره
لجن ما تــَـوفي غدّاره
سفير حسين بالكوفه .. مَثــَـل للناس

1
هاشم زبدة الدنيه ....... بيهم تنضرب أمثال
بجفوف الكرم آيه ... و بسوح الحرب أبطال
منهم مُسلم الأصبح .... نور ابجبهة الاجيال
شما دار الزمن باقي ... فكرة بكل زمن تنكَال

بقائه اشلون يالسامع .. على الأيــام ؟
خلوده منين و الواقع .. مِحن و آلآم ؟

اريد ابّاصِرة اتنظــــره
تشوف الملحمة الكبره
سفير حسين بالكوفه .. مثل للناس
2
حسين ابواقع المبدأ .... ما يختار ياهو الجان
و الكوفه بزمنهم ذاك ..... جانت فوّهة بركان
يعني اليكَصد الكوفه ........ لازم يمتلك ايمان
ميهزة الذهب و المال ... يعرف نزعة الانسان
لذلك سَلــّم المسلم ... رسالة نـــــور
و ابو الكلفات متعلـّم .. طلع مسرور
ينفذ امر ابو اليمـــــه
وفي و هلدنيه متهمه
سفير حسين بالكوفه .. مَثـَـل للناس
3
بالكوفة الوضع اصبح .. بين الباري و الشيطان
ناس اتصيح يا دينار ...... ناس اتصيح يا ديان
و بالفتنه الشعب اصبح .... بين المنذهل حيران
و بين الباع كل دينه ..... و شايع زمرة الطغيان
الوف البايعت غرهه ... سنه الدينـــار
و عُبَيد الله سِجَن شيعة ... علي الكرار
و ابو طاهر يويلي اْصبح
وحيد ابساحة المذبــــح
سفير حسين بالكوفه .. مَثـَـل للناس
4
و مابين الألم و الاه ... عِبره و عَبره للـوادم
دمعة تشد عزم ثائر .. وعِبره التنفع العالِـــم
مسلم من كَصد واحد .. كَابَــل فيلق الظالــــم
يدري ينكَطع راسه ... بس صيته يضل قائــم
دِشاهد كَـُبته يالسامع ... ذهَــب لمّــــــاع
مثل نور الشمس ساطع ... عليها اشعاع
رسالة ثورة قدسيه
جهادية و سياسيه
سفير احسين بالكوفه .. مَثــَــل للناس
5
يالتسمع صدى الكوفه ... و عقلك بالحصل حاير
هاك اخذ الخبر مني ... لا تنخِــــــــــدع بالضاهر
الناس اتكَول غداره .. الكوفه وهلوصــــف جائر
الكوفه اتحب علي الكرار ... لكن من حُكــَـم غادر
الك اضرب مثل واقع .. زمن صــــــــــدام
حكمهه و ضوَّك الكوفه .. غصص و آلآم
لجن راح و بقت هيه
عليهه الرايه ثوريـه
سفير احسين بالكوفه .. مَثــَــل للناس
تمت بحمد الله
بقلم خادمكم
زكي الياسري النجفي
20.10.2011


الى كل الاحرار المنصفين .. اهدي هذه الابيات من صميم كربلاء الفداء .. التي كانت و مازالت و ستبقى ..منهل الثوار ضد الظلم و الجبروت
اسأل الله ان يتقبلها منا بقبولٍ حسن 
بحق باب الحوائج مُسلم ابن عقيل عليه السلام


سؤال للكوفه



خلنسألهه .. خلنسألهه ... عن السبب

الغدرت مسلم خلنسألهه ... عن السبب

مسلم تلميذ الكـــــــــــّرار

وارث علمه و ذو الفقــّار
 خلنسألهه.

****1****

بتكوين الانسان الفطري ... حب للخــير واهل الخير

فطره امن الباري جل شانه ... ما تحتاج الأي تفسير

لاجن هم ممكن تتـــــــــأثر ... هاي الفطره بجم تأثير

وتتغير بالواقع لو ضل ... وتبدي ابدرب الشر اتسير

اصل الفطره .. اصل الفطره ... خير العمل

ومن نتوانه بسقي ِ البذره ... ينشأ  خلل

وبالتاريخ هواي امثال

خنــطالع و نشوف اشكَال؟؟.
. خلنسألهه.

****2****

لبــطون التاكل بالصـالح ... ما ترضه بجـــور و عدوان

و الي انترست من الطالح ... احسن من عدهه الحيوان

وكَوم الينجمعت بالكوفه ... اكثرهـــــــــم فاكَـــــــد ايمان

منهم يتبع مـــــال ودنيه ... وقله المنهـجـــهه الـــــقرآن

من غروهه .. من غروهه ... اهل الوثن

حالاً جنتهم باعوهه ... برخص ثمن

تبعــوا خطوات الشيطان

وابتعدوا عن الرحمن

خلنسألهه ...
 ***3***

بالكوفه الوادم معروفه ... شيعه تحب حماي الجار

والواقع يشرح حالتهه ... انصار ونـِــــــعم الانصار

لاجن بالحيله وبالباطل ... و بسلـــــطة شام الاشرار

للجهلت قيمة واليهه ... صادوهـــــــــه بزود الدينار

لعبوا بيهه .. لعبوا بيهه ... اهل الغدر

بالارهاب استوله اعليهه ... فكر الشمر

وصارت ضد مسلم ثوار

وباعوا جـــــــنتهم بالنار

خلنسألهه ..

****4****

طوعه وهاني المنِّ الكوفه ... شمــسين بافق الاسلام

رفعة راس الهاي الدنيه ... يضل عالي ابدور الايــــام

وابن ِ زياد وشمر وعمرو ... وحجّار ابن ابجر ظـّـُلام

قارنهم وانضر للنـــــــــاتج ... واقع ذوله وذوله اوهام

طوعه وهاني .. طوعه وهاني ... شمس وكَمر

ويزيد و جيشه الســُــــــــــــــفياني ... الهم سقر

من الله هذا المـــيزان

لابد نهج الشــر ينهان

خلنسألهه ... 

****5**** 

مسلم يوم الطب للكوفه ... آلاف اتــصــــــــافح يمناه

تتعاهد بالثوره تنصره ... وللموت اتــــــــحارب وياه

شلون اندارت بيهه الدنيه ... و تغير مخهه و فحواه

نفس البعثت برســــايلهه ... نفــــــس الي جانت تتناه

تالي الغدر .. تالي الغدر ... بيهه اتضح

من بعد ما بان الامر ... ســـرهه انفضح

ننشدهم شنهو الي صار

عد مسلم الهم يا ثار؟

خالنسألهه .. 

****6**** 

صوره امن الصار انترجمهه ... بحروف الحكَـ والوجدان

من دارت كلهه اعله الفارس ... مسلم و بـــــذاك الميدان

وحده و آلاف البي حاطت ... من سيفه بكل صِـــل نيشان

ذكرهه ابحيدر وبســـــــيفه ... خلاهه اتلــــــوج الشجعان

لا متهمه .. لا متهــمه ... مسلم بطــــل

كل واحد يكَرب من يمه .. راسه انفصل

و تاليهه حفرت بالكَاع

و التمت اعليهِ اضباع

خالنسألهه .. خلنسألهه ... عن السببْ ؟؟

لولاد مسلم هالدمع


هالصوت لازم ينسمِع .. لولاد مسلم هــالدمــع

1

لا ديانه ..... ولاأمــانه ..... خانت نبيهـا أمته

بالصوارم .... والقواصم .... حاربوها العترته

ناس كفـّار .. رضت بالعار .. للنبي من عادته

بالفجايــع ... والفضايـــع ... عالرساله جازته

گلب الديانـــه منصدع

لولاد مسلم هـــالدمــع

2

ويلي أطفال .... آ بــِلـِحبـال .... چتـِّفوهم يا بشر

منظر الآه .. ويلي ويلاه .. شمِـس حضنت للگمر

بيد أشرار .. والگلب نـــار .. منهم ابجمره استعر

هالعزا اليوم .. إلى المظلوم .. بن علي فارس مضر

و الگلب أصبح منفجع

لولاد مسلــم هــالدمــع

3

نار الخيام ..... گوم ظلاّم ..... منها فـرَّو بالقفار

يسِّروهم ..... واسجنوهم .... صِدر بيهم هالقرار

چبد ضامي .... بلا محامي ..... طال ليل الإنتظار

من ولوهم .. ما رعوهم .. شبول صاحب ذو الفقار

يا رب تشاهد هالوضع

لولاد مسلــم هــالدمــع

4

زغار والخوف .. بيهم ايطوف .. واليتم فوگ الأسه

صوَر عاشور .... بيهم اتدور .... كل نهار وكل مسه

بين أغراب .... عنهم اجنــــاب .... للمثالب مدرسه

فاجعه وهم .... سجن آظلم .... جلف طاغي حارسه

صوت الطفل ما ينسمع .. لولاد مسلم هــالدمــع

5

ليش ياناس .... وين لحساس .... عيال مسلم تنذبح

ما كفاكم .... كل أذاكــــم .... جرح أكبر من جرح

بكربله حسين .. بين نارين .. عالترب ضل منطرح

هالعذابات .. والظلامات .. حگـّه لو طال الشرح

بيا دين هاي ويا شرع .. لولاد مسلم هــالدمــع

6

دمع الايام .... علـى الايتام ... صبّه يا شيعي ابشجن

الطم اصدور .. عيش مجمور .. على الما عدهم وطن

صيح يا ثار ... واشعل النــار ... واذكر اعيون البچن

اذكر اطفال .... مسلم الگــال .... رخيص للدين الثمن

بالكرم معروف الطبـع .. لولاد مسلم هــالدمــع

زكي الياسري 21 صفر 25/12/2013



أولاد مسلم

اولاد مسلم للأبد دمعـه سِريّه

أيتام ذبحوهم ذَبـِح أزلام اميّه

وا ويلاه ... وا ويلاه

اولاد مسلم للأبد دمعـه سِريّه

1

كل بشر يفگد عزيز اعليه يسچب دمعته

يوم يومين او ثلاثه وبعد تسكــن لوعته

لچن دمعات الموالي عالسفيــر وغربته

مسلم وبنته حميدة او ولده فلـذة چبدِته

للأبد منبع حزن للجعفـــــريه

أيتام ذبحوهم ذبح أزلام اميه

وا ويلاه ... وا ويلاه

أولاد مسلم للأبد دمعـه سِريّه

2

محمد الي ما تِجاوز عمره خمسه امن السنين

والاخو ابراهيم ويلي اعليه مـــا بطل الونين

فرّوا امن الغاضريه من جيـوش الظالمين

لكـن أزلام آل اميه يسّروهـــم بعد حين

ما رعوا سِنهم زغير الناصبيه

أيتام ذبحوهم ذبــح أزلام اميه

وا ويلاه ... وا ويلاه

أولاد مسلم للأبد دمعـه سِريّه

3

فرّوا امن الغاضريه عگب شب نار الخيام

زغار ما عِدهُم مُعيــن ابهيمة البر والظلام

واليتيم اويه الحــزن والخوف مايگدر ينام

والكفلهم عالتـــرب مذبـــوح ياويلي الأمام

فاجـِعتهم آذت الزهره الزچيه

أيتام ذبحوهم ذبح أزلام اميه

وا ويلاه ... وا ويلاه

أولاد مسلم للأبد دمعـه سِريّه

4

بليل أظلم صادفوا حرمه عجوزه امن العباد

حاوروها وحاورتهم وين اهلكـــــــم والبلاد

گالوا احنه اولاد مسلـم من ولد بيت الرشاد

بس سواد الليلـه هـــــذي يمچ انبات المُراد

احنه أيتام النبي وحيدر وصيه

أيتام ذبحوهم ذبــح أزلام اميه

وا ويلاه ... وا ويلاه

أولاد مسلم للأبد دمعـه سِريّه

5

ويلي أعظم فاجعه ابيته لگـــاهم هالبعيـد

جائزه مِن الأمير إگبــــال مقتلهــــم يريد

ربـّط ايديهم يويلي ابحبــل وبگيد الحديد

والصبح يم الفرات المــنوه ينحرهم يريد

بلا ذنب وابلا جرم يا رافضيه

أيتام ذبحوهم ذبح أزلام اميه

وا ويلاه ... وا ويلاه

اولاد مسلم للأبد دمعـه سِريّه

زكي الياسري النجفي

02/12/2013





قصيدة نداء السفير

 

يبن عمي .. انسفك دمي .. غريب و لا سند يمي

**1**

يبن عمي علي الكرار .. مسلم  آنه واشكي الحال

الوف البايعت راحــت .. باعتــــــنه ابحرام المال

كَوم الكوفه بالــــغدره .. صارت مضرب الامثال

تعال وشوف ابن عمك .. بالكوفه انســـحل بحبال

سبب نوحي .. جـِـرح روحي .. ما اعرف شنو جرمي

يبن عمي .. انسفك دمي .. غريب و لا سند يمي


**2**

غريب الكوفه سموني .. وآنه الجـنت اقر الضيف

من حيدر ورثت الجود .. وفنون الحرب والسيف

آنه البلكرم معــروف .. تلهب ناري شتوه وصيف

تاليهه الزمــــن يندار .. وبغفله انغـــــــدر ياحيف

طفوا ناري .. و حِزَن جاري .. ونابت بلكَلب سهمي

يبن عمي .. انسفك دمي .. غريب ولاسند يمي


**3**

يبن حيدر علي الكرار .. رد ضعنك يبو سكينه

رد لرض المدينه الكوم .. جــتــــلك والله ناوينه

ابليس ابلمعة الدينــــــار .. حشـَّــم كل شياطينه

شره امن الكوفه ذمتهه .. جمع لجلك ملاعينه

نصب جهده .. جمع جنده .. عليك ابمُستند رسمي

يبن عمي  .. انسفك دمي .. غريب و لاسند يمي

 

**4**

يبن عمي الدهر غدار .. واعلينه الحرب شنهه

ويانه اله يا ثــــــــــار .. حتــه اجيوشه ترسنهه

عترة احمد المــختار .. ما سامـــــع خبر عنهه

املاك الــــــسمه جانت .. دوم ابداره مسكنهه

دهر اعمه .. هجم هجمه .. هدفهه دنيوي وهمي

يبن عمي .. انسفك دمي .. غريب و لا سند يمي

 

**5**

جمع جيشه اميرالشام .. جمعة غدره خوانه

من كل فاجد الغيره ..من شمـره او مروانه

ناشز يتـــــِّبـــع ناشز .. واقع غره شيطانه

وابن سعد ابهوه الدنيه.. خالف معنه قرآنه

بغض حيدر .. اهو المصدر .. هذا المعتقد فهمي

يبن عمي .. انسفك دمي .. غريب و لا سند يمي


**6**

يبن بنت النبي الهادي .. وصيتي بطفلتي يحسين

حميده لا تخــــــليهه .. تحس منهه خذاني البين

بحنانك يا ابو الايتام .. نشفلهه دمـــــوع العين

طفله وتنحرم مني .. ما ادري اجتــــهه امنين

يواليهه .. ابتواليهه .. خصيمك بالحشر خصمي

يبن عمي .. انسفك دمي .. غريب ولاسند يمي