ديوان لطميات الاربعين

ديوان نواعي السبايا صلوات الله وسلامه عليهنَّ

مجموعة قصائد ولطميات مكتوبة لمناسبة أربعين الإمام سيد الشهداء ومحيي الإسلام بعد موته الحسين ابن علي ابن ابي طالب عليهم صلوات الله وسلامه ومنها ما يمكن قرائتهُ في غير الأربعين في المجالس الحسينية العامة
ثوابها لكم وإلى أمواتكم وأموات شيعة أمير المؤمنين صلوات الله وسلامه عليه من لا ذاكر لهم يذكـــــرهم وأسالكم الدعاء



ديــْـوان لطميَّــات الأربعيـْـن

أول أربعين


أبياتها تحمل بعض مضامين لقاء جابر ابن عبد الله الانصاري رضوان الله تعالى عليه
بالإمام السجاد زين العابدين وسيد الساجدين ( صلوات الله وسلامه عليه )

وقد ورد في الروايات ما مضمونه : بينا جابر وعطا ومن معهما كانوا يزورون سيد الشهداء الحسين
( صلوات الله وسلامه عليه ) في كربلاء و إذا بسواد قد طلع عليهم من ناحية الشام
فقال جابر لعبده : انطلق إلى هذا السواد وآتِنا بخبره
فإن كانوا من أصحاب عُمر بن سعد فارجع إلينا لعلَّنا نلجأ إلى ملجأ
وإن كان زين العابدين ( صلوات الله وسلامه عليه )
فأنت حُرٌّ لوجه الله تعالى . فمضى العبد ، فما أسرع أن رجع وهو يقول :
يا جابر ، قم واستقبل حرم رسول الله ( صلى الله عليه وآله وسلم )
هذا زين العابدين قد جاء بعمَّاته وأخواته .
فقام جابر يمشي حافي القدمين ، مكشوف الرأس ، إلى أن دنا من الإمام زين العابدين
فقال ( صلوات الله وسلامه عليه ) له : ( أنْتَ جابر ) ؟ قال : نعم يا ابن رسول الله ( صلى الله عليه وآله وسلم ) فقال الإمام ( صلوات الله وسلامه عليه ) :
( يا جابر هاهُنا واللهِ قُتلت رجالُنا ، وذُبحِت أطفالُنا ، وسُبيَت نساؤنا ، وحُرقَت خِيامُنا)


گوم صُب دمعك يجابـر .. هـــــــذا زيـن العابدين
رجَع من الشـام للطـف .. جايب اضعون الحسين
آه يَجابــر .. آه يَجابــر
گوم والطم عالصدر هـليوم أول أربعين
1
كربله ابيوم اربعيـن احسيــن ميعــاد اللقــاء
چان جابر وي عطـا يم گبـُـــر سَيْدِ الشُهـداء
وابـ إديه ايزيح عــن اترابــــــــه آثار الدماء
يبچي من دم والگلب مجمور من عُظم البلاء
لن سواده وغـُبره مـن ابعيــد لاحت بالفضاء
صاح شاهِــد يا عطا منهو الي گاصِـد كربلاء
راح وبسرعــــــــة رجع ... يلطم على راسه ويصيح
هذا ضعن الحـــره زينب ... گاصِد الگبـــــــــر الذبيح
ويّه الحراير ... ويّه الحراير
گوم والطم عالصدر هـليوم أول أربعين
2
هذا موكب بنـي هاشـم راجع الطـف كربله
عاد ودموع الشـَجَن ويَّاه تِـــحــدي القافله
هذا زين العابديــن ومَـن بگه امـن العايله
رد ضعنهم آيجابــــــر گوم گوم استقبلـــه
واسي زينب بالنياحه وبالدمــــوع الهامله
هذي بت الزهره فاطم والوصي عقد الوله
گوم واسيهــا يَجابر ... هذي بت حيدر علــي
گوم بلكي الحزن والهم ... عـن گلبهـا ينجلي
هذي زينب ... هذي زينب
گوم والطم عالصدر هـليوم أول أربعين
3
آه يا دمع الهطول اشگـال سُـلطـان الرشاد
من دخل طف كربله ابكل هالألم زين العباد
هنا يجابر صاح وعيونـه بچن حتى السواد
هنا يجابر حاوطـونـه ابجيش وابعُدّه وعِتاد
هنا يجابر ذبحـو الأنــــــــــذال فلذات الفؤاد
هنا يجابر طاح ابويـه من على ظهر الجواد
هنا شفت بعيوني شي ... ما شافه واحد بالبشر
شفت عبد الله الرضيع ... ابسهم مگطوع النحر
هدلي حيلي ... هدلي حيلي
گوم والطم عالصدر هـليوم أول أربعين
4
هنا يجابر شِفِت جاسم إبن عمّــي المجتبه
شلون دهر الغدر والشر بالنوايـــب صوَّبه
شلون دمَّه ابعِز شبابه هنا يجابــر خضبه
شفت رمله اعليه تبچي بالدمــوع اللاهبـه
هذا واحدها يجابر ضاع كـــل تعــب الربه
أم وحيده تصيح عگبك راح أبگـه امعذبه
تدري يا جابر مُصابه ... بچَّــه أمــلاك السمــه
بدال حِنته والصواني ... راسه مخضوب ابدمه
بالمدامع ... بالمدامع
گوم والطم عالصدر هـليوم أول أربعين
5
هنا يجابر شِفت اخوي الأكبـــــر امگطـَّع وصَل
أشبه الناس ابرسول البـاري وابجــــــــده البطل
شفته عالتربان جسمه مثل غيــــــــــم ودم هطل
وليلى مغمي اعليها يمه وبيها لو تدري شحصل
تدعي يارب ردلي إبنـي هِـــــــرش دلالي انفصل
ما أعيشن لحظه دونه شلـون يـــــا رب لو رحَـل
ليله مذهوله وتنادي ... علـــي الأكبر يالحبيب
رد عليّه ابجاه دمعي ... صيـر لجـروحي طبيب
راح الاكبر ... راح الأكبر
گوم والطم عالصدر هـليوم أول أربعين
6
أه يا عمي يجابــر تـــــــدري يم المشرعه
شفت عمي گمر هاشــم والجفوف امگطعه
وعينه مطفيه ابسهم ويـــلاه من هالفاجعه
وراسه مفضوخ ابعمَد هذا الجرم ما افضعه
هنا يجابر ظهر ابوي احسيـن محني طالِعه
هنا يجابر طاح ابو فاضــل تشاهد مصرعه
هالصور لا ما تِفارگ ... منــي يا عمي الخيال
شلون انسه كربلــــه ... يا جابر انساها محال
علهواشم ... علهواشم
گوم والطم عالصدر هـليوم أول أربعين
زكي الياسري النجفي
25/11/213
21/محرم الحرام


قصيدة : منظر المشايه



أبيات أهديكم ثوابها وإلى أموات شيعة أمير المؤمنين صلوات الله وسلامه عليه المنسيين وخصوصاً خدام سيد الشهداء صلوات الله وسلامه عليه والشهداء الكرام .. وأسألكم الدعاء



شاهد ابعينك يسامع منظـر المشـَّــايه
راح تعرف عالنهر لسَّا بقـــت يا رايه
راية الله وبيها دم .. من منحر الشهيــد
1
يا مُنصف ارجوك تمعـّـــن بالـــذي تسمَع
واخذ الدرس وارتوي من صافي هالمنبع
معلوم مَگصود كلامـــي ابـــــأول المطلع
يا مصرع احيه السُنن خبِّرني يا مصـرع

ليش ما تسأل ضميرك يالضميــرك واعي؟
ليش بالطف كل سنه يرتفع صوت الناعي

يا سبب خله الحُسين ابكل زمــن جديـد؟
راية الله وبيهه دم .. من منحر الشهيــد
2
خلينه نطرح طـــرح وانـَّـــاقــش ابعاده
وانشوف مطلب حُسين و نفهــم امراده
وابـ إذِن ناقِد نِحاول نسمـــــــع اشنـاده
واشلون قدّم إخوتـه وصحبــــه واولاده

ناتج التحليل واضح هاك اخــذ تبيانـــي
ناده هيهات آنه اذلن للدعي السفيــــاني

مثلي مَيبايع أبــــد طاغـــــي مثـل يزيــد
راية الله وبيهه دم .. من منحر الشهيــد
3
ميزان خلي العقــــل واتـــرك مواريثك
واستنجــد ابخالِـقـــَك واتيقـَّـن ايغيثـك
من غير دين النبي كــــل دين ميفيـدك
بيدك طريق السَقـر والجنــــه هم بيدك

شوف يا منهج يروح الـ ألله والـ رضوانه
وأدري بيك احسين تدري للنبـــي ريحانه!

أظن واضح مقصــدي للعاقل الــــــرشيد
راية الله وبيهه دم .. من منحر الشهيــد
4
أكثر أوضِّـح إلك يــا سامـــــــعي إفهـم
من كربله اخذ العِبر وادرسهه واتعلـَّـم
دين الله بيها انبنه من بعــــد ماْ اتهدم
للتضحيه وللفــــداء وللمجــــــــد منجم

من بعد ما لوَّثه ايزيـــــد ابفجـوره وهانه
عاد من ثار الحُسيـــــن الإصلـه والقـرآنه

حين ناده لا أقـــر إلكـــــــــــم كما العبيد
راية الله وبيهه دم .. من منحر الشهيــد
5
هذي الخـُلاصه الخلود اتجسَّـــد ابواقع
إسمه الحُسين وأبد مـــا يمنعــــه مانع
هذا الذي بس إلـــه جفـــن الزمن دامع
بس لليعرفه ويتـِبعــــه ويندِبـــه شافع

هذا وارث أنبيـــــــــاء الله وعِــدِل قرآنه
هذا ثار الله وشهيده وقدرتــــه وسلطانه

حسين أكبر مُعجزه وهذا أمــــــــــر أكيد
راية الله وبيهه دم .. من منحر الشهيــد
زكي الياسري النجفي
24/11/2013
20 محرم

قصيدة شام الآلآم


يا خويه ردّينه ... من شام الآلآم

عشنه مُصايبها .. شفنه عَجايبها

من شام الآلآم

1

يا خويه جينــــــه والدمـع حادينه

تاخذنه شوغه وفاجعـــــه اتودينه

يوم اربعينـــــــك يا شبـــــل والينه

زينب أنه وجبـــــت الحرم وسكينه

إنهض يبـــــو السجـــاد عاين لينه

جينه ابمئاسينه ....... وي زين العباد

يم گبرك الليلــه ...... احچيله وشكيله

من شام الآلآم

2

يا خويه رَد ضعن الألم هـــــذا اليوم

طيف الحزن بالمســـره ويانه ايحوم

شوف الحـرم يـــم الگبـــر يا مظلوم

كلمن تِعاتِب هالدهـــــــر دهر الشوم

رمله تِنادي گوم يــــــــــا جاسم گوم

وليله اعله لكبر تنتحــــــب يا جيدوم

وم الطفل صاحت ..... عبد الله چا وين

وسفه الگبر ضمّك ..... جيتك يبعد امك

من شام الآلآم

3

يا خويه درب الشــام راوانه الويل

طوله المدامع تجري جريان السيل

خوف ومحن وآهـات وهمـوم وليل

والشمر حـادي وهالأمــر هد الحيل

مسبيه إختك بيــن فرســــان وخيـل

وفوگ الرمح راسك .... ينظر عالأيتــــام

أسمع يشِد أزري .... صبري على اليجري

من شام الآلآم

4

يا خويه أدريبـــــك شفت يبن الحيد

من دخـِّلونه المَجلس الطاغي ايزيد

وحبال درب اليســــر حفرت كل أيد

بالخيزرانه ايگيس راســــك رعديد

واشويه لن گاع القصــــر بيه اتميد

ياخويه ذليتــــه ....... گدّام الأعـــــوان 

من افضحت عاره ... واكشفت أسراره

من شام الآلآم

5

جيت ارد اعاتب بالدمــــع يا عباس

وادري يخويه ابعمد مفطـور الراس

ويديك مگطوعه وخميـــــده الأنفاس

يا خويه عگبك ما رعونه الأرجـاس

عالهزل ودونه وتِشــــــاهدنه النـاس

يا گـُمر حاچيني .......... يا صاحب الجود

يا كافل اضعوني .......... متورِّمه امتوني

من شام الآلآم

زكي الياسري النجفي / الاحد 11 صفر / 15/12/2013
طال الغياب


گوم يا مولاي شاهـــد كربله

حسين مذبوح وسبيه العايله

والگمر يم الشريعه ... يمه چفينـــه گطيعه

گوم يا مولاي شاهِـــد كربله

1

سيدي يا صاحب العصر انتفض طال الغياب

شيعتك ما زالت اتعاني المظالـــــــم والعذاب

طفح كيل الإنتظار وفاضت ادمـــــوع العتاب

عليك ننشد سيدي لا صوت يرجــع لا جواب

گوم يا مــــولاي للجُــــرم الفضيع

واخذ ثار احسين وي ثار الرضيع

ثار جاسم ويـــه الاكبر ... والضعن من هـام بالبر

گوم يا مولاي شاهِـــد كربله

2

سيدي يالمنتظر ندريــك دمعـــــك من دمه

ندري ليل انهار تنظر ذكريــــــات الملحمه

تدري دم شيعتك يجري بسبب ظلم الظالمه

من عهد يوم السقيفه وعصرة امك فاطمه

اتأسست أول ظلامات الرسول

والشرح مولاي لصوابه يطول

وانته بيهـــن أدره انتـــه ... والحزن بانواعــه عِشته

گوم يا مولاي شاهِـــد كربله

3

گوم يا مولاي شاهد حـــال شيعتكم صعب

تروح مشايه الحُسين ابرغم تهديد ورعب

يذبحونه ويفجرونه لو مشينـــه ابهالدرب

گوم يا مولاي جاوز حدّه طغيان النصـــب

ناصبيه مبغضه وبـــلا عقول

ما يطيقون اليحب آل الرسول

والهدف ما تبقه شيعه ... وتنهدم كــــل الشريعه

گوم يا مولاي شاهِـــد كربله

4

گوم يا مولاي يا شمس اختفت خلف الغيوم

شيعتك لهفانه تنطر من معاليـــــــــك القدوم

والنواصب حاوطونه وجوه تارسهه الوجوم

گوم طالب ثار جدك واعلــن اعليها الهجوم

إمتداد امن السقيفــــــه الكربله

والحرب كلها البغض عقد الوله

حان ميعـــــــادك تِعجّـل ... محله صوتك لوَّن جلجل

گوم يا مولاي شاهِـــد كربله

5

أدري يا مولاي انته الثوره منـَّــــــه تنتظِر

ودري تحتاج انته شيعه تقتحم درب الخطِر

تريد أنصار اوفياء اعله الوعد مـــــا تعتذر

بيهم اتعيد ابفقارك صولتــــــه الفارس بدر

تريد انصار بفعلهم صادقين

مايهابون المنيـــه ومؤمنين

مثل حمزة ومثل جعفر ... لو مثــــل مالك الأشتر

گوم يا مولاي شاهِـــد كربله

زكي الياسري النجفي 24/11/2013 / 22 / محرم

مو إنته غايب !




قصيدة أهدي ثوابها لسيدي صاحب الزمان صلوات الله وسلامه عليه
راجياً دعوته لي بالتوفيق للفوز بخدمته ورضاه عني وعن والدي وجميع من يقرأ هذه الأبيات



مو إنته غايب سيدي .. مو انته غايب
واقعنه يثبت بالفعــل .. مو انته غايب

غيـِّاب احنه
ونعيش فتنه
مو إنته غايب سيدي .. موانته غايب


1
 
سيدي بالعاطفـه الآمــال تعجيــــل الفرَج
بالدقايق والثواني نصيـح هل نوره انبلج
لكن الواقع مئآسي بيهـن إبليــــس ابتهج
جهل ينخر بالعقول وهَرَجْ مَقرون ابمَرَج


وأهل السياسة سيدي .. تعبد كراسي
باعوا الدين وما تِهمهم .. هل مئآسي

كل يوم طعنه
ونعيـش فتنه
مو إنته غايب سيدي .. موانته غايب


2

سيدي هالناس تصرخ وينه صاحِب الزمان
عاطفه ابلايه ثوابـــــــت بالضمير وبالكيان
ناس ما تدري الحياة ابكل صورهه إمتحان
بي نجاح وبي رسوب وبيــه نيـران وجنان


والدين ضايع سيـــدي .. والدين ضايع
بين السياسه والجهل .. واهل المطامع

دينك ابمحنه
ونعيـش فتنه
مو إنته غايب سيدي .. موانته غايب


3
أَمْ حَسِبْتُمْ أَنْ تَدْخُلُوا الْجَنَّةَ وَلَمَّا يَعْلَمِ اللَّهُ الَّذِينَ جَاهَدُوا مِنْكُمْ وَيَعْلَمَ الصَّابِرِينَ

أَمْ حَسِبْتُمْ جنة الله ابـلا فتـــــــن لا إختبار؟
آيه واضح مُحتواهـا للكبـــــــــار وللصغار
عليها يا ناس الأساس انشاد وندار المَدار
ماكو جنه ابلا جهاد ولاكو ليــــل ابلا نهار


وأكبر جهاد اويه النفس .. والباقي هيّن
والفتنه تعنــي مختبـــــر .. كلشي يـِبَيِّن

نار اويه جنّه
ونعيـش فتنه
مو إنته غايب سيدي .. موانته غايب


4

سيدي عم الفساد ابيـن أغلـــــــــب هالبشر
رشوه،محسوبيه،بوگ،وشاهد الزور انتشر
والأمين ايخاف گام ودومه عايش بالخطـر
والفقير ابلا سگف يحميه من مـــاي المطر


والقائمه ابطول الأسه .. طويله عريضه
واهل العقول الراجحه .. صـارت بغيضه

مولاي ضِعنه
ونعيـش فتنه
مو إنته غايب سيدي .. موانته غايب


5

سيدي ابهذا الزمان انگلب ميزان العقول
صار اليقيم الشعائر يُعتبر عدهم جهــول
صار كاسر ضلع فاطم من أحباء الرسول
والي يطعن بالسقيفه فتنوي مهمـا يگول


هذا عذابك سيـــــدي .. هـــذا عذابك
وبسبب قلة ناصــرك .. ندري غِيابك

بدمـوع صحنه
ونعيـش فتنــه
مو إنته غايب سيدي .. موانته غايب

زكي الياسري النجفي 26/11/2013 / 22 محرم الحرام





لطمية فصيحة للاربعين بعنوان
طريق الكبرياء




هاكَ دمعي والولاء ... يا شهيدَ كربلاءْ
إنها ثورةُ حُـــــــبٍ صادقه
إنها خـُطواتُ شوق ٍ واثقه
في طريق الكبرياء ... يا شهيدَ كربلاء
1
يا شهيداً أسرجَ النـورَ بآفاقِ الظـَــلام
يا أبيَّ الضَيم ِ مَن والاكَ هيهاتَ يُضام
مبدأ ٌ انتَ لِكلِ المَجد في بدءِ الكـَــــلام
و لهُ أنتَ أبا الاحرار قانـــــونُ الختام
يا عظيماً حقّ و اللهِ لهُ قــَـــودُ الزمام
دمُكَ الطاهِر أقوى من شبا حدِ الحُسام
انتَ قرآن اليقين ... قدوةٌ للثائرين
صرتَ للثوراتِ قاموسُ فِدا
و إلى الثـُوار اُفقٌ وَ مَــــدى
أنتَ يا ثأرَ السماء ... يا شهيدَ كربلاء

2
أيها المُخلص حقـاً لإلـــــــهِ الكـون قد
بدماء النحر ضَحـَّــــــى وبصَحبٍ وَولد
هَجَرَ الدُنيا ومــــــا فيهــا فدائاً للصَمَد
سيدي من لم يجد فيكَ المَعالي ما رَشد
فــَـلدين اللهِ قد أصبحتَ مـولايَ العَمَــد
يومَ لبّيتَ سريعاً حينمـا نـــــــادى مدد
حينما عزّ النصير .. صرت للدين المُجير
و لهُ أهديتَ مِن نحركَ دم
فاضاءَ الكون ناراً في عَلم
صِرتَ مقياس الفداء ... يا شهيدَ كربلاء
3
لك يا مظلوم مِنـّـــــــــا كل عيـنٍ دامعه
إنما النفس بما قد جالَ فيـــهــا صادعه
و قليلُ الدمع لا يوفي السيوف القاطعه
لكَ حقّ المـوتِ مــــا بين حنايا الواقعه
والملايينُ إلى قبــــــــــركَ تسعى طائعه
ترتجي أمك في حشر البرايــــــا شافعه
كلهم اضحى يقول .. فلنـُعزي للبتول
إنها بنت الحبيب المصطفى
علـّنا بالدمع نهديها شِفــــا
وهيَ أهلٌ للوفاء ... يا شهيدَ كربلاء
4
خذ أبا الاحرار في دربــــك حـــب السائرين
لك جاءوا من بقاع الارض في ركبِ الحنين
و على طول المدى الآهات تحكـــــي للأنين
ماجرى في كربلاءَ الحزن في ماضي السنين

ونداء الشوق يا مظلوم في لحـــــن ٍ حزيـن
أبداً و اللهِ يا زهراء لن ننســـــــــى الحُسين
كلهم شد الرحـــــال .. كي يرى نور الجلال
رغم إر
هاب بني حـــــرب اللئام
فيكَ لا نخشى من الموت الزؤام
و عبارات النداء ... يا شهيدَ كربلاء

5
سيدي أنتَ مُنى المُشتـــاق قد طال النوى
حنّ قلبي يا إمامي لنواحـــــــــــي نينـوى
و الكرى فارَقَ جفني و نما غصن الجَوى
و فؤادي قد حوى من فرط شوقي ماحوى
و لهُ لقياكَ يا مظلــــــــــــــــومُ و اللهِ الدوا
ماْارتوى دونكَ مــن أيِّ نميــــر ٍ ماْارتوى
يا
ملاذ الوافدين .. و مجير القاصدين
وطنٌ أنتَ لمن اضحى غريب
ولمن يشكومـــن الآهِ طبيب
أنت بحرٌ من عطاء ... يا شهيدَ كربلاء


زكي الياسري النجفي
25/12/2012


قصيدة : صُبّي الدمِع يا عين


صُبّي الدمِع يا عين
.. للغاضريه

رد
الضعن يحسيــن .. للغاضريه
رجعت حرم وايتــام ... من بعد ضيـــــم الشام
للغاضريه ... للغاضري
ه
1
رجعت عزيزة روحك اويه الآلآم
تحديها دمعات الحزن و الحسره
شافت عذاب و ضيم مِنِّ الظـُـلام
زينب حبيبة حيـدرة و الزهـــــره
شافت فجايع بالدرب درب الشام
و أعظمها راسك علرمح و تنظره

شلون اقبَـلِت يا حيـــــــد .. زينب سبيه
راحت العِنـــــــــــــدِ ايزيد .. زينب سبيه
و الجفن لا ما نـــام ... من بعد ضيم الشام
للغاضريه ... للغاضريه
2
زينب إجتلك يا شهيد وعبــــرات
خنگتها و هموم اليُســـــر ملتمه
شاهد يخوها و استمـع للآهــــات

عن گبرك اتدوِّر تِـريــــــد اتشمه
وصلت العنـده و الدمع بالوجنات
و تصيح فدوه للفدانـــــــه ابدمه

و ابهجير الأوجــــــــاع .. عفـــرت خدها
شالت اتراب الگـــــــاع ..
عفـــرت خدها
وتشتكيــــــلك آلآم ... من بعد ضيم الشام
للغاضريه ... للغاضريه
3
ناحت و لطمت خدها وَيّه النِسوان
كل وحده منهن عدها ذِكره و ذكره
رمله اعله جاسم تنتحــب يا شبان
ذكرت زفافه وحنِته ابدم نحــــــره
وليلى اعله لكبر دوهِنتها الاشجان
چم طبره جسمك شحتِمَل چم طبره

وين ابو فاضِـــــل ويـــــــن .. زينب اتنادي
مني خـــــــــذاك البيـــــــــن .. زينب اتنادي
يا كفيلي الضرغــام ... من بعــد ضيم الشام
للغاضريه ... للغاضريه
4
ما بين دمعات الحَـرم لـــــن آهـات
حتى الصخر ينفـــت لوَن يسمعهن
و التفتن وشافن حليـــف الحسرات
شافن علي السجّـــاد گــــرّب يمهن
يبچي او يگل الجابر اعله الطعنات
يا عم يجابر شرد اسولـف عنهـــن

لو چنت حاضــــر چـــــان .. شفت العجايب
عالجره اعله العطشــــــان .. شفت العجايب
من دعاة الإســـــلام ... من بعد ضيــم الشام
للغاضريه ... للغاضريه
5
يا عم يجابر شرد اگولن عالصار
وآنه العليل الشاهِدت موت احمر
تدري العساكر حاوطونه الاشرار
من كل كتر وبعيني شفت المنظر
شفت اخوتي يا جابر ازغار اكبار
مابين مذبوح وسليب امــــــــوذر

والذي ما انســــــــــــاه ... سبيِ الحراير
للأبـــــــــــــــــد لا والله ... سبيِ الحراير
خلتِكِتـْبه الأقــــلام ... من بعد ضيم الشام
للغاضري
ه ... للغاضريه

زكي الياسري النجفي
25/12/2012



قصيدة يابو فاضل


تشرح بعض حال قبر العقيلة عليها السلام في هذه الايام و هو في مرمى صواريخ ابناء بني أمية لعنهم الله
ثوابها لكم و الى امواتكم و اموات شيعة امير المؤمنين المنسيين من لا ذاكر لهم يذكرهم و اسألكم الدعاء


هاي زينب گوم يا راعي الفخــر
نادِتك من حاط مرقدها الخطــــر
يابو فاضل .. يابو فاضل
1
زينب اتناديك بلســــــــان الدمع
گوم عاين يابو فاضــــل للوضع
گبـُــر فارغ لا بُخــور و لا شمـع
وبين حين وحين صـاروخ انفجر
يابو فاضل .. يابو فاضل
2
هاي زينب بيهـا مِتربْصه اللئـام
نسل ابو سفيــــان أولاد الحــرام
دزّت الگبرك يبـــو فاضـل سـلام
و ارتجت منك تِشد ليهـا السفـــر
يابو فاضل .. يابو فاضل
3
هاي زينـب يابـــــو فاضل نادتك
تدري بيهـا الهلـشِـــــدايد رادِتك
أدري تدري وهيه تعــرف حالتك
لچن بيها اردود هلــــــدار الدهـر
يابو فاضل .. يابو فاضل
4
يبو فاضل گـوم شاهِـد محنتـــي
گوم شوف اشلــون دارت دنيتي
منعت الأنذال حتــــــــى ازيارتي
شيعتي ابهلعام ما واحــــد حضر
يابو فاضل .. يابو فاضل
5
يبو فاضل گوم جرّد صـــــارمك
عجب حالي الهلوكت مـــــا ألمك
گوم واركب خوية ظهـرامطهمـك
وفني جيش ايزيد يا فـارس مضر
يابو فاضل .. يابو فاضل
6
گوم يا عبّـاس يا نبـــــــــع اليقين
حاط بيه اليوم جيــــــش المارقين
خويه ادركنـــــــي عليـك ام البنين
السيف و الچفــّين يم شاطي النهـر
يابو فاضل .. يابو فاضل
زكي الياسري النجفي
23/12/2012

قصيدة قمر العشيرة


يا قمر العشيره ... عباس يابو الغيره
إنته الجبتها ابشيمتك للغاضــــــــريه
شلون اقبلت يابالفضل ترجع سبيــه ؟
1
زينب يابوفاضل ...... ياخوهه المناضل
بحمايتك طلعـت عزيــــــزة امن المدينه
يا مصدر فخرهه ...... ياحارس خدرهه
يالبسمك اتسجّـل فخــــر حامي الضعينه
چا وينك يـباسل ...... متشوف المحامل
حاديها من عگبك صبح جيش الضغينه
تقبل يا أخوهــه ......... لمّن چتـِّــِفوهه
بيد الشمر صـارت عُگـُــب عينك رهينه

معذور ياكفيلي .. فگدك هدلي حيلي
صاحت عزيزة روحـك ابونـَّه خفيــه
شلون اقبلت يابالفضـل ترجع سبيـه
2
بيهه انــت داري؟ ..... مدمعهـــه جاري
و الصبر يلفـــظ بالألـــم آخــــر الانفاس
زينب يالجبتهـه .. ياريتـــــك شفتهـــــه
مچتوفه بحبال الهضـــم يـارفعـــة الراس
من بعدك ولوهه .... حرمـه استوحدوهه
وينك يراعي المرجلة وصـاحب النوماس
صِد رد عليهه .............. رد يــا وليهه
شو ما صحت لبيچ مـن صــاحت يعبـاس

معذور ما شفتهه .. يالعينك طفتهه
نبلة غدر علمشرعة يابو الحميــــة
شلون اقبلت يابالفضل ترجَـع سبية
3
هاك اسمع صداهه.. صرختهه او نداهه
يا خوية شيداوي الجرح جــرح الامامـه
يا دمعة عتابـي ....... يا لوعة مصابــي
من عگب عينك سلوتــــي الليل وظلامه
وبيوم العطش شد ...... و اسهامه سدد
كل ظني ترجع ياشهــــــــم لينه ابسلامه
زينب ياكفيلـي ......... والهدّمـلي حيلي
حبل اليسر بعدك تـــــــــرك بيدي علامه

معذور يا سندنه .. ما تگدر تردنه
وچفوفك ابجنب النهر ويلــي رمية
شلون اقبلت يابالفضل ترجع سبية
4
ياخوية ابدمعتـي ..... لـو أشـرح مِحنتي
ودموعي لو نزلـن عتـب يا محلـه العتاب
و المِِنِّ الحبايـب ....... عـذره لـو يــِعاتب
و المَعتَب ايخفف أثـــــر لوعات المصاب
يالعند الشريعة ............ چفينـك گطيعة
يا گمرهاشم ياوسـف عاف السمه وغاب
يا بدر الهواشم ........ يمكسر الصـوارم
من بعد عينك يا فحَـــــل بيديــن الاغراب

زينب من ولوني .. ومن يمك خذوني
حسراتي چن جمر الجمر بين آل امية
شلون اقبلت يابالفضـل ترجع سبيـــة
زكي الياسري النجفي / 25 / محرم / 1434


قصيدة احنه شيعة الحسين


احنه شيعة الحُسين ..... جينه نحيي الاربعين
كربله و أحزانــها .... والفخر عنوانـــها

احنه شيعة الحُسين
1
جينه نحمل علجتاف هموم والآم السنين
جينه و نريد الفرج منك يلاه العالمين
نقسم اعليك بضلع فاطمه بت طه الامين
عجِّل اظهور الامام الياخذ بثار الحسين
عجِّل اظهور الامــام .... حته ننعـــم بالسلام
جينه و الحادي الدمع .... نقسم بحق الضلع
احنه شيعة الحسين

2
بالصفات الضاهريه الناس مختلفه الصور
كل شخص يحمل صفات اتميزه عن باقي البشر
و احنه من دون الخلايق شلنه عنوان الفخر
حيث يجمعنه الحسين شما يفرقـنه الدهر
وي ابو اليمه الشهيد .... هذا منهجنه السديد
شما قسه اويانه الزمن .... يبقه لحسين الوطن
احنه شيعة الحُسين

3
احنه قاموس الكرامه من عطانه رفعته
احنه مشعل كل فضيله من هُدانه جذوته
احنه كل ثائر اتعلـــــــم من دمانه ثورته
و كل فدائي و كل مناضل احنه سيف بيمنته
احنه عبَّدنه الطريق ..... احنه حبل الله الوثيق
احنه اهل الغانمه .... و السيوف الصارمه

احنه شيعة الحُسين
4
احنه صرخة رفض تدوي ابسمِـع كل ضالم رعد
احنه سدّ الكــل يزيد ابحال امتنه استبد
احنه مصداق الخلود الچان من زينب وعد
قسم نقسم مانموت و عِدنه من حيدر مدد
احنه اولادك علي ..... بينه كل هم ينجلي
احنه ميهمنه اليكَول ... بدعه حب ال الرسول

احنه شيعة الحُسين
5
ويّه كل گطره ابدمانه يسري حب آل النبي
احنه غير احسين ابداً ما نريــــد و ما نبي
احنه ما قــَرّينه ابـــــــــــداً بالولا للأجنبي
احنه ما بعنه العقيده ( في سبيلِ المطلبِ )
اسأل اعلينه الطغاة .... منهو باقي بالحياة
بيمن اتجله الخلود ... منهو مصداق الصمود

احنه شيعة الحُسين
6
احنه بركان القيَمْ خالد على مر الدهور
سر بقاء الدين دمنه و البجي ولطم الصدور
حب ابو السجاد بينه جوهري .. بالـ لا شعور
يعني وي طينتنه جان بمبتدأ فطرتنه نور
احنه فرسان الولاء ..... و بدمانه كربلاء
نِحسهه وي دكَـ النبض .... كل دقيقه تنتفض

احنه شيعة الحُسين
زكي الياسري النجفي


قصيدة رافضية للابد


رافضية للأبد رافضية .. رافضية للأبد .. رافضية

بدعة گالو لو طبــرنــا الهامة
ما دروا بالشيعي دمّه اوسامه
رافضية للأبد ... رافضية
1
احنه من انصار ابو اليمـــــــه تعلمنـه الفداء
احنه صرنه ابكل زمان انجوم تضوي كبرياء
احنه ابطال الصمود و ما يزلزنــــــــه العداء
لو علن ضد الشعاير حرب ما ليها إنتهـــــاء
كربلائي هالنهـج ... كربـلائي
و الفدائي ما يهز عزمه مُرائي
رافضية للأبد ... رافضية
2
نار بينه ايشع جمرها ابگلب كل عاشگ ألم
و اليضد نار الغرام ابطعم هلحُــــــب ما عِلم
احنه بدروب الفداء الما تـِــــــــــزل إلنه قـدم
و الشموخ البينة يمنع أن يزعزعنــــــه قزم
حب جنوني يا خلگ ... حب جنوني
و الصيحه تبقه للأبد يا نفسُ هوني
رافضية للابد ... رافضية
3
احنه من عابس عرفنه اشلون نعشگ للحسيـن
و احنه من جون و حبيب اعرفنـه كُنهْ العارفين
و احنه من سورة زُهير اقرينـــــــه قرآن اليقين
و احنه من حملة برير اورثنه دم الثائــــــــرين
كالرياحي لو هجم .. كالرياحـي
ما يزلزلنه الجبــــان الانبطاحي
رافضية للابد ... رافضية
4
إحنه ميزان الكرم و الـــــــــدم أعـــز ما للجــواد
يرخص الأجل الحسين و يجري وي دمع الحـداد
احنه منهجنة أصيل و هوّه للديــــــــــــن امتـداد
فهموا يا عالم و اعقلوا دم نزف حتـــــى الجماد
ما نعوفـــه هلنهـج ... مــا نعوفه
و الينكره من هوى او ما نشوفه
رافضية للأبد ... رافضية
5
يالتخاف اتشوف دمنه و منه تستنكـــف وسف
وشتگول ابحين راس احسين بحجـاره انخسف
و اشتگول ابحين عباس ابعَمد بـــــدره انكسف
و اشتگول ابنحر عبد الله الطفل لمّــــــن نزف
أنبيائي هالفعــــــل ... أنبيائي
وآنه ليه ابكــــل فخــر إنتمائي
رافضية للأبد ... رافضية
6
يالتضد منهجنه إعلِن گول ذيـــــــع اشما تِريد
شما تزيد الگول زدنه شما تعيد احنـــــــه نعيد
إحنه دزينه الرساله و الدمــع ساعــــــي البريد
احنه قائدنه حسين و انتهَ خيفيـــــــــــدك يزيد
لو طبرنه لا تضد ... لو طبرنه
لا تِگرّب بالجَهل يم حد صبرنه
رافضية للأبد ... رافضية

بقلم زكي الياسري النجفي    14/11/2012

قصيدة للموت وياك



للموت ويّاك يبن حامي الحمـــه
للموت ويّاك يبن حامي الحمـــه
1
يحسين يحسين اجينـــــه علعهد
شيعة و موالين ترانــــــه للابـد
من دمّك انريد لــَثورتنــــه مدد .. من دمّك انريد لثــورتنــــه مدد
لجلك يمظلوم نِضَحـــي بالدمـه
للموت وياك يبن حامي الحمـــه
2
لجلك يمظلوم هديـــة هلعُمــــــر
يحسين للموت نـــذر عدنــه نذر
نلطم على الراس ونلطم علصدر .. نلطم على الراس ونلطم علصدر
نترجه مولاي شفاعة فاطمـــــه
للموت وياك يبن حامي الحمـــه
3
يحسين جيناك يبن حيـدر علـي
و الصوت لبيـك تِسِمعــه يعتلي
يا نور العيون مدامعنــــه اْتهَلي .. يا نور العيون مدامعنــــه اْتهَلي
يلتنحب اعليك ملايكة السمــــه
للموت وياك يبن حامي الحمــه
4
يا سبط الاسباط ينور ابكربله
جيناك لعيــون مدامع هامـــله
نتذكر اليوم رجــــــوع العايله .. نتذكر اليوم رجـــــــوع العايله
عادت بالالآم لراضي الملحمه
للموت وياك يبن حامي الحمـه
5
جيناك يحسين ينامـــوس الفخر
و يحيط بينه يبو اليمــــه الخطر
تفجير وارهاب على درب السفر .. تفجير وارهاب على درب السفر
تمنعنه هيهات فِعال الظالمــــــه
للموت وياك يبن حامي الحمـــه
6
فاز اليواليك يمـن حبــــك غنه
و العاشك ايصيح وصالك جننه
شوف الملايين تِزيد ابكـل سنـه .. شوف الملايين تِزيد ابكــل سنه
يالحبك اشراع سفينـــة غانمـــه للموت وياك يبن حامي الحمــه

زكي الياسري النجفي
06/01/2011

هدية الى كل احباب الامام الحسين صلوات الله وسلامه عليه .. اسميتـُها  الزلزال الزينبي
ثوابها الى قرائها الاكارم  و الى اموات شيعة امير المؤمنين المنسيين و اسألكم الدعاء



بينـي وبينك يبـن اْلزهره .. تتشابـه خويه الادوار
إنته اْبسيفك وآنه اْبَعبره .. زلزلنه اعروش الكفار


1
يحسين ابقانون الدنيه ... تفكير اليدرس محدود
محدود بدائِرْةِ اْدراكه ... ويشوف ابعينه المشهود
شافوك انحز مِنك نحرك ... ضنوك ابمسلك مسدود
ما دركوا (كيفية) خـُلدك ... وشلون ابكل (غد) موجود
جهلوا قيمـَة ... ثورة سيفك
من حّــدّوهه بنص انهار!!
انته ابسيفك وآنه ابعَبره
زلزلنه اعروش الكفار

2
يا خويه الدنيه ابأيامك ... وصلت حد الما مألوف
صار الحكَـ باطل و الباطل ... حكَـ عين العميان تشوف
خويه وانته بثورة سيفك ... حطيت انقاط اعله احروف
صار الصار او أصبح كَبرك ... كعبه وبيه الناس اتطوف
طفــَك اصبح ... فردوسِ النه
من تحته ادماك الأنـهار!!
انته ابسيفك وانه ابعبره
زلزلنه اعروش الكفار

3
جابر واحد جان يزورك ... يوم الرد ضعنك يحسين
هسا خل نحسب زوارك ... و نشاهدهم شوف العين
عـَّدوا حـد العَـــد عشاكَك ... مو مليون و مليونين!
هذا اليثبت سر قدسيتك ... صادر من رب الكونين
بـحــْـر احبابك موجه الهادر
ينجيـــهُـم باجر من نار
انته بسيفك ... وآنه ابعبرة
زلزلنه اعروش الكفار

4
اختك يحسين اوعلــّيته ... راسك يا تاج اهل البيت
جاهل مو فاهم مكَصدنه ... من ضن يا شامخ ذليت
جسمك صح مكَطوع المنحر ... وآنه ابأيتام احتاريت
لكن مقصد كل نهضتنه ... تـفـــتهمه الوادم يا ريت
ياهل وادم اصل الفكره
ما تقبـــــــل ذل الاحرار
انته بسيفك ... وآنه ابعبرة
زلزلنه اعروش الكفار

5
آدم لا اب لا ام عنده ... و عيسى ابلا والد انسان
اعجاز و تم بمر الباري ... من كَاللهم كـون و كان
وانته الكن مرتين الذاتك ... وحده ابثالث من شعبان
وْتخليدك يا سبط المُرسل ... حل من يوم العاشر حان
انته الخالد يابن حيدر
يا سالك نهـــج الكرار
انته بسيفك ... وآنه ابعبرة
زلزلنه اعروش الكفار

6
يازهرة كل هاي الدنيه .... يا شعلة نور الايمان
يحسين ابثورة صمصامك ... احييت افكار الانسان
دمك من سال الشرع الله ... صار الكل سائل برهان
كَبرك ياخويه ابتضحيتك .... صار الكل كَاصد عنوان
(لائـَـ ــكْ) رَجَّت كل العالم
و هيهاتك صارت اعصار
انته بسيفك ... وآنه ابعبرة
زلزلنه اعروش الكفار

زكي الياسري النجفي
11/1/2011


دموع الأياب

قصيده اربعينيه ثوابها لكم و الى اموات شيعة امير المؤمنين عليه السلام .. من لا ذاكر لهم يذكرهم و اسألكم الدعاء
في هذه القصيدة تم اعتماد الطور اكثر من الوزن لذلك نسترعي الانتباه للقرائة الصحيحة


بدموع الفجيعه ... و الحاله الفضيعه
جينه يخويه الكربله بيوم اربعينك ... جينه يخويه الكربله بيوم اربعينك
1
يحسين اجينه ... يبن الحنينه ... يا خويه عشرين ابصفر يوم التلاقي
يحسين اجينه ... تسمع بجينه ؟؟؟ ... بدال الدمع يجري دمه من المآقي
يحسين اجينه ... كَبرك لكَينه ... كل وحده نادت هاك اخذ صوت اشتياقي
يحسين اجينه ... جسمك رهينه ... بالغاضريه بالترب يا خويه باقي
زينب اختك آني ... بدمعي وكل كياني
خويه اسمعت من منحرك نبرة ونينك
جينه يخويه الكربله بيوم اربعينك
2
يبن الاطايب ... ذني الغرايب ... يم تربتك يبن النبي نصبن عزيه
بالتربه طافن ... بلجن يوافن ... ياخويه بدموع الالم حزن الزجيه
صاحن يغالي ... انهض يوالي ... وامسح دموع العايله بالغاضريه
تنهض يريتك ... تقبل حميتك؟؟ ... يسبونه للشام ابظلم ازلام اميه؟
يحسين انسبينه .... عكَبك يا ولينه
شفنه العجايب من بعد كَطعة وتينك
جينه يخويه الكربله بيوم اربعينك
3
رمله ويه جاسم ... رسمت علايم ... يم كَبره كَامت تنتحب ذكرت زفافه
اسمع تنادي ... آيا ودادي ... يوليدي حنـَّاك الدمه ابسيف الجـَلافه
ليلى اويه لـَـكبَر ... جسمه تعفر ... شبه النبي ابخـَلق وخـُلُق غايب حسافه
صاحت ييمه ... يليضوي رسمه ... شلون انسه يا بعد الاهل ذيج اللطافه
مذبوحه الشبيبه .... بسيوف المصيبه
و اتوذرت فوكَـ الترب خيرة بنينك
يحسين اجينه الكربله بيوم اربعينك
4
اصل المصيبه ... يبن الحبيبه ... بمهجة علي من نبتوا اغدر مخالب
اهل السقيفه ... خلـَّو خليفه ... تاليهه صارت مملكه بيــد النواصب
شفنه العجايب ... من هلكتايب ... ياخويه هاك اخذ الخبر شفنه العجايب
حركَو خيمنه .. سلبو حرمنه ...خويه كَمر هاشم وسف عن ذوله غايب
اصحاب السقيفه ... زمره مو نضيفه
من سكَطوا محسن اصل ذبحت جنينك
جينه يخويه الكربله بيوم اربعينك
5
جينه ابأسانه ... و بعنفوانه ... طيف الاسى يشرح الك صورة سبينه
صح سلبونه ... صح يسرونه ... لكن ابد ما صح لهم خويه لوينه
شام الخيانه ... تزلزل كيانه ... بيدي يخويه زلزلت عرش الضغينه
صورة خلودك ... ثورة صمودك ... شما تقسه موجات الدهر انته السفينه
يحسين القياده ... ودموع السياده
من اشرقت شمس الكرامه ابحد يقينك
يحسين اجينه الكربله ابيوم اربعينك


قصيدة لقاء الدموع


كأني بها تنتظر زينب على قارعة الطريق
محنية الظهر تمسح دماء الضحايا
من فوق الرمضاء
تحملُ معها كفي ابي الفضل العباس .. أمانة الى يوم القيامة
لتقابل الوفاء بالوفاء
كأني بالزهراء مع النساء تنادي

وين كَبرك يا حبيبي يا حُسين
وين كَبرك يا حبيبي يا حُسين
1

وين كَبرك آنه زينب بت علي ... جيت خويه و صوت نوحي يعتلي
جيتك و جبت الحرم يبن الولي ... نريد يم كَبرك نذب تعب السنين
وين كبرك يا حبيبي يا حُسين
2
وين كبرك آنه ليلى يا غريب ... نيتي أرويه بدمع عيني نحيب
وين كبرك يمَن لجروحي طبيب ... جيت ادور اعليه يحديني الونين
وين كبرك يا حبيبي يا حُسين
3
وين كبرك آنه رمله الفاجده .... ابني جاسم راح لعيونك فِده
واجـِده يحسين جيتــك و النِده .... ريت نحري الجان مكَطوع الوتين
وين كبرك يا حبيبي يا حُسين
4
وين كبرك انه يحسين الرباب .... جيتك و يا محله ويـــاك العتاب
بينك وبيني فصل سيف المصاب .... و اخذ سهم البين من حضني الجنين
وين كبرك يا حبيبي يا حُسين
5
وين كبرك يبني انه فاطمه .... جيت ويه الحرم من عين السمه
جيت امسح بيدي اثار الدمه .... جيت ادَوِّر وين مكَطوع الادين
وين كبرك يا حبيبي يا حُسين
6
جيت ادور وين جفين الوفه .... وياي اريد آخذهن بهاي الصفه
حتى يوم الحشر لجروحي شفه .... الله ياخذ ثاري من الظالمين
وين كبرك يا حبيبي ياحُسين
7
فاطمه و ي زينب اتصب الدمع ... ثنينهن كَعدن بجنب المنصرع
زينب اتنادي وفاطم تستمع ... يا غريب و يا سليب و يا طعين
وين كبرك يا حبيبي يا حُسين

زكي الياسري النجفي

قصيدة ... خويه ردينه



خويه ردينه ... الكَبر وين
خويه دلينه ... يا ضوه العين
1
خويه جينه الكربله بلوعة هضمنه
نشرح بصوت الدمع صورة المنه
خويه وكَيود اليسُر كسرت ضهرنه
خويه يحسين انتهى و خلَّص صبرنه
كل كَلب آآهه .... آآهه و ونين
والحرم تصرخ .... يا ضوه العين
2
يحله يحسين العتب بين الحبايب
اختك آنه و ادري تسمع من اعاتب
خويه عكَبك باليسر شفت العجايب
حادي الضعون الشمر عكَب الاطايب
خويه ترضاهه ... غدرة البين
شمر يحديني ... يا ضوه العين
3
خويه من وين التفت جدامي الراس
خويه واطفال وحرم تصرخ يعباس
خويه و بلوعة الم اسواط الارجاس
فرجه صرنه باليسر لِنواظر الناس
خويه ذلونه .... زمرة الشين
خويه ضربونه .... يا ضوه العين
4
شوف متني يالوفي و شوف الرزيه
خويه شفنه اشكَد عذاب و هم وذيه
عكَب ما غابت شــُموس الهــــاشميه
هجمت اعلينه المــــسوخ الناصبيه
حركَوا اخيامك ... الشياطــين
سلبوا ايتامك .... يا ضوه العين
5
خويه يبن المرتضى و شبل النجيبه
اختك اصبح اسمي يحسين الغريبه
زينب آنه ام الخدر ترضى سليبه
ابد ما مرَّت عله اْحـَّــد هالمصيبه
زينب الجانت .... درة الدين
باليسر صارت .... يا ضوه العين
6
يا حسين الفاجعه فجعت دليلي
شفت راسك بالطشت ويلي يويلي
شفت طاغي ال اميه الهدلي حيلي
بيك يشمت .. و صرخت يا دمعه سيلي
خويه وعتابي .... يمك الحين
خويه داويني ..... يا ضوه العين


قصيدة اللقاء الزينبي


يا خويه يا خويه .... آنه السبيه
يا خويه يا خويه ... بالغاضريه
رد ضعني هذا اليوم ..... يا خويه يا مظلوم
يوم اربعينك .. يوم اربعينك
1
يخويه حسين حاجيني ... أنه زينب يبو اليمه
أنه المجروحه داويني ... يمن غطه الارض دمه
كَبرك وينه دليني .... اريد احتضنه واشتمه
اريد اشبع نضر منك .... يبعد الخاله و العمه
بدموعي بدموعي ... جيت ارد اعاتب
بدموعي بدموعي .... دلا ّلي ذايب
من فركَتك لليوم ... ماشفت خويه النوم
يوم اربعينك ... يوم اربعينك
2
يخويه حسين بونيني ... اجيتك و الدمع حادي
يخويه اويايه ايتامك .... رجعت دمعه للوادي
وادي كربله خويه ... ترك اثاره بفادي
جم صيحة الم تِسمع .... صداهه ابكَبرك ينادي .. شينادي؟؟
يا بويه يا بويه .... ايتامك احنه
يا بويه يا بويه .... هلمِحنه مِحنه
سحكتنه بويه الخيل ... نار و عذاب وليل
يوم اربعينك ... يوم اربعينك
3
اجيتك خويه خجلانه .... اخافن قصرت وياك
يخويه احسين ايتامك .... ردت يالوفي لحماك
اخذ مني الحِمل خويه ... هلــساعه انه اترجاك
يخويه بجاه ضلع امي .... ضمني بالكَبر وياك
يبن امي يبني امي .... جيت اشتكيلك
يبني امي يبن امي .... يشفي غليلك
لو سالت الدمعات ..... لو هاجت الونات
يوم اربعينك ... يوم اربعينك
4
ينور العين ايامي .... بعد عيناك ليل اظلم
يخويه بغيبة اهلالك .... دهرنه اعلينهـِ اتحزّم
يبو اليمه بعد عينك .... رعد غدر الدهر دمدم
من طف كربله يحسين ... بده منبع مسيل الدم
بالكوفه بالكوفه .... لا ما رعونه
بالكوفه بالكوفه .... ديوان ابونه
يا خويه بهلألآم ..... ردينه من الشام
يوم اربعينك .... يوم اربعينك
5
ينور اعيوني ياخويه .... ضعنك يالولي حاضر
اجينه الكَبرك و ننعاك ... لكَينه اعله الكَبر جابر
علي السجاد من رحنه .... على ادموع الحزن صابر
من شافه نزف دمعه .... دمعه التجبر الخاطر
وينادي وينادي .... عمي يجابر
وينادي وينادي .... بدمع المحاجر
ذبحو زلمنه هناه .... يا جابر واويلاه
يوم اربعينك .... يوم اربعينك
6
يخويه احسين وعيونك .... يمك آنه اتمنه
اضل يا خويه يم كَبرك .... واجر ونه ابأثر ونه
وشيل اترابك بكل حين .... واشم بي ريحة الجنه
يمن راسك رماح الشوم .... لرض الشام ودَّنه
سمّوني سموني ....... صبر العجايب
سمّوني سموني ........ ام المصايب
يا خويه و بهالحال ... ريت العمر لا طال
يوم اربعينك ......... يوم اربعينك


قصيدة كربلائيه تصرخ من اعماق الضمير
لبيك يا حسين ... في آخرها مستهل ثاني لها في حال قرائتها في غير كربلاء
اهدي ثوابها الى قرائها الكرام و الى امواتهم و اموات شيعة امير المؤمنين علي عليه السلام
من لا ذاكر لهم يذكرهم لا سيما خدمة الشهيد عليه السلام
و اسألكم الدعاء


جينه في يوم اربعينك يا حُسين الكربله
شيعه و نطوف ابضريحك يا شبل عقد الوله
وَ نِدانا وا حسيناه ................... و احسيناه وا حسينا
1

يا حراره ابكَلب كلمن حَب ابوك المصطفه
يا حسين ابلا شعاعك من على الدنيه العفه
ما يصح للعاشِكَينــك يبو اليمه كل شفه
الا بزيارة ضريحك يمن نورك ما طفه
و هُدانا مذ وعينا .... و احسيناه وا حسينا
2
يا بحر عزه و كرامه مايه ما يملـَح ابد
حيث حـــلاه الصُميده (والدٌ و ما ولد)
انته سد يحمي العقيده ياسندنه انته سد
مو عجيبه الكون كله الإجل عيناك انوجد
قـَـَد عَشِقنا مذ حَيينا .... وا حسيناه وا حسينا
3
يا سفينة نوح ناجي بيهه من ينوي السفر
انته مفتاح السعاده و انته سلطان الدهر
انته فرقان العقيده انته بركان الفخر
انته نور الما يشوفك اعمه بس مو بالبصر
سَـَـَ ــينادي .. من يلينا ... وا حسيناه و احسينا
4
كربله صومعة دين الباري تبكَه علزمن
ما تزحزحهه العواصف ما تغيرهه المحن
النه صارت يبو اليمه بكل معاليهه وطن
وطن عزه او طن ثوره اوطن آهات و شجن
وَ َ شعاعٌ عاشَ فينا ..... وا حسيناه ... و احسينا
5
ما نبيع احنه القضيه لو الف مره نموت
منــَّك اعرفنه على الشر ابد ما ينفع سكوت
علمتنه اعله الجهاد و على كل كلفه نفوت
انته يحسين بصلاة المــوت جفين القنوت
فالمنايا تــَـَـقـتـــفينا .... وا حسيناه .. وا حسينا
6
طيَّــَحِت كل الشوامخ من طِحت يَــعظم شهيد
زلـــزلِت كل العروش بصرخِتك لا يا يزيد
اسقطِت كل الطغات بسيف هيهات .. الفريد
و اْرعبت سبعين الف يابن علي وانته وحيد
وا حسيناه واحسينا .... وا حسيناه وا حسيناه

وهذا المستهل يمكنكم استخدامه لهذه القصيده اذا كنتم تريدون قرائتها في غير الاربعين
او في غير مدينة كربلاء اسألكم الدعاء

يا حسين الشيعه صاحت ما نعوفك للابد
يا حسين وهذي بيعه إلك و البيعه عهد
وا حسيناه .. وا حسينا .... وا حسيناه وا حسينا




عاهدنه ابدربك مشايه
1
يابن حيدر عهد الشيعه ... حبك لو بالدم منبيعه
امرك عاهدناك انطيعه .... انتَ المبدأ و انت الغايه
عاهدنه بدربك مشايه
2
يحسين ابدربك منعوفه ... شيمتنه ابحبك معروفه
غيرتنه ابزودك موصوفه .... بيدك يبن الزهره الرايه
عاهدنه بدربك مشايه
3
مشايه وما نترك ثارك ... يا بن حيدر احنه انصارك
يلكل عزنه بزود انوارك .... خيمتنه انته وانته الثايه
عاهدنه بدربك مشايه
4
يبن المختار اتمنينه .... وياك الجنه اتودينه
يوم المحشر لتخلينه .... يبن الانوار الوفايه
عاهدنه بدربك مشايه
5
يحسين و هيهات انعوفك .... لابد من انموت انشوفك
يبن الزهره و من انطوفك .... جن جنه انطوف و عنايه
عاهدنه بدربك مشايه
6
يحسين اشننسه شما ننسه .... نسسه القدم اهله ونفسه؟
يحسين الحبك نتنفسه .... ومن نعطش يروينه ابمايه
عاهدنه ابدربك مشايه


شعايرنة شعايرنة بــِدَع كَالوا شعارينة
خـلّـيهـم يـلومـونـه ما نتــــــرك شعايرنه
1

ما نترك شعايرنه ... حته لو يذبحونه
نلطم نضرب الزنجيل ... لا لا ما يمنعنونه
كل شيعي نذر عمره ... للي سار بضعونه
كل شيعي على المظلوم ... تنزل دمعة اعيونه
بضمايرنه بضمايرنه
يحسين بضمايرنه
خليهم يفجرونه .. ما نترك شعايرنه
2
يبو اليمه الك بالروح ... حب ثابت ميتزحزح
يا من للشرع والدين ... غيره و باصره تنضح
دمك يا عظيم الشان ... قدمته ابفضا المذبح
و جسمك للخيول اهناك ... اصبح يا وفي مسرح
مشاعرنه مشاعرنه
الك تلهب مشاعرنه
نصيح و خل يسمعونه ... ما نترك شعايرنه
3
سفينة نوح انته وبيك ... ناجح من ركب يحسين
ابد و الله ما ننساك ... بيك الشيعه متمسكين
ينور العين يا مظلوم ... ما نكَدر ينور العين
ما نكدر على افراكك ... سر انته البقاء الدين
يفهمونه يفهمونه
صعب ذوله يفهمونه
حبنه و هذا مضمونه ... ما نترك شعايرنه
4
يبن حيدر قسم و الله ... للموت احنه وياكم
يشهد منبر الالام ... لا و الله مننساكم
ننساكم جذب يحسين ... يلجوهر سجاياكم
جود و مرحمه و ايثار ... شيمه و نخوه مغناكم
سحرتونه سحرتونه
ابمحبتكم سحرتونه
والرادو يمنعـــونه ... ما نترك شعايرنه
5
عجيب اليسمع اخبارك... يحسيـن و ميتــــــألم
عجيب الينضر ايتامك ... و ما يبجي المصابك الدم
يحسين الجروح الدين ... دم نحرك صبح بلسم
عجيب اليقره تضحيتك ... و ينساهه و ميتكلّم
عمه عيونه عمه عيونه
حسد حاقد عمه عيونه
فاسد و الله مضمونه .... ما نترك شعايرنه
6
للتنكر علينه النوح ... خلتـــــطرح مسأئلهه
علتاريخ و تشاهد ... حجــــتنه و دلايلهه
رسول الله على الحمزه ... امر تندب ثواكلهه
و زينب بت علي لمن ... ضربت ويلي محملهه
على الغالي على الغالي
بجت لطمت على الغالي
زينب يلتسمعونه .... ما نترك شعايرنه

تمت بحمد الله



لا لا للــشر ... لا للــــــــذله ...... ماشين بدربك يحسين
1
منهج واضح و الميشوفه ... اعمه و باجر مثوا نار
دربك درب العـــــز والقوه ... ما تمشيه إلا الاحرار
يا رافع راية رِفعتــــنه ... صرنه بمدرستــــــك ثوار
والهيبه البينه اكسبناهه ... من صرنه الخطك انصار
مطلب عدنه ... يا مرشدنه ... سجلنه ابدربك ماشــين
لا لا للــشر ... لا للــــــــذله...... ماشين بدربك يحسين
2
اللهِ ابمُحـــكــم آآآيـــاته ... ضَمَّن معنه الحب للناس
صح حرفين بكلمه نجمعن ... بس مو بالكمِّ المقياس
إلحب مضمونه بافعالك ... إلحــــــب بالنـــاتج ينقاس
ايثار و دمِ و تضــــــــــــحـيِّه ... و كلهن جسدهن عباس
ابن الانزع ... سيفه تصدع .......عاد بحد سيفه صِــــفين
لا لا للــشر ... لا للــــــــذله ...... ماشين بدربك يحسين
3
مشايه احنه بدرب الغيره ... نكَصد ضنوة داحي الباب
شكَـ كَبرك يحسين و شــــاهد ... شوف ابعينك هالاحباب
كلهه اتصيح بصوت المنحر ... ميهمنه ارصاص الارهاب
لو ذبحونه لو فجـــــــــــرونه ... نبقه التاج و هُــــــمَّ اذناب
شيعة حيدر ....... ما نتأثّر ...... نبقـــــــه بحبك مجنونين
لا لا للــشر ... لا للــــــــذله ...... ماشين بدربك يحسين
4
تاريخ الحريه بسيـــــفك .... يحسين انخط من اجديد
من دمك سال الشرع الله .... ثبتت ساسات التـــوحيد
نهجك ميخص بس الشيعه .... ياخذ منه ياهو يريد
فيصل بين الحق و الباطل ... واهم مَن حده بتحديد
سيف وقدره ..... و عبــِـره و عَبره ..... حافظ اركان التكوين
لا لا للــشر ... لا للــــــــذله ...... ماشين بدربك يحسين
5
كل منصف يدرس للمنطق ... لازم يوصـــل استنتاج
لابد من يوصل يم اسمك ...ويشاهد نوره الوهّاج
لابد يجزم راس الدنيه ... من قدسيتك لابس تاج
من حيث الفاهم يفهمهه .... دمَّك اسراء ومعراج !
يبقه الحاصل ... انته الفاصل ... اْلحَبك ناجي بالدارين
لا لا للــشر ... لا للــــــــذله ...... ماشين بدربك يحسين
6
بتاريخ الدنيه و دورتهه ... ما صح دم ينحــــــــر بتار !!
و ما صح منحورِ ابدم سابح ... من عنده اتخاف الاشرار
و ماصح والِـــــد قَدَّم وِلـــده ... كبارِ المذبَــــحهُم و زغار
و لهاي الاسباب انحبـــــــــك ... ونتعنــــــــــالك مهما صار
يابو الاكبر ... هذا المنبر .... شاهدِ بيكم متمســـــــــكين


كلٌ تبكي على حبيبْ


بالنائبات جئنا اليكم ... و الدمع يجري حزنا عليكم
هذا الانين .. في الاربعين
يبن الكرار .... يبن الكرار
+ +1 + +
يا شموس الغاضريه ... الغابت بأفق البساله
يلكفلتوا الدنيه كلهه ... و صنتوا ابعاد الرساله
دمكم الصان الشريعه ... و حقق آمآل العداله
كل فدائي بيكم اثبت ... نخوته ابساحة نضاله
جئنا اليكم و الشوق حادي
كل ينادي اين عمادي
اين الحسين ... في الاربعين
يبن الكرار ... يبن الكرار
+ +2 + +
انه زينب جيت انادي ... وينه كافل ضعني وينه
ارد اعاتب راعي خدري .. شلون غيرك يحدي بينه
كوم ردني يا عضيدي ... خويه ردني للمدينه
بسد حسامك منهه جينه ... يا بو فاضل يا ولينه
قم يا كفيلي قم يا كفيلي
قد حلَّ ياعبّــاسُ رحيلي
قم يا مكين ... في الاربعين
يبن الكرار ... يبن الكرار
+ +3 + +
انه ليله وجيت ادور ... وين جسم ابني تمدد
عن علي الاكبر حبيبي ... اشبه الناس ابمحمد
رد يبعد امك عليه ... ما بكالي غيرك احد
يا غصن شجرة حياتي ... لنكطع و ستوه ورد
همي و حزني قد احرقاني
كيف احتمالي بلوى زماني
قم يا طعين ..... في الاربعين
يبن الكرار ....... يبن الكرار
+ +4 + +
آنه رمله و جيت يمك ... يبني جاسم و الصواني
بيهن الحنه و شموعك ... بيهن انعقدت اماني
دهري بغيابك يجاسم ... جم سهم غادر رماني
و انتهى حلمي البنيته ... وي وكعتك يا ضماني
قم يا حبيبي قم ياطبيبي
اطفئ بوصل منك لهيبي
قم يا دفين ........ في الاربعين
يبن الكرار ....... يبن الكرار
+ +5 + +
يبني يا عبد الله آنه ... امك و جيت ابدموعي
والله مشتاكه احضنك ... يمه و بدافي ضلوعي
وين كبرك يا حبيبي ... حتى بيه اعلك شموعي
حرمله الصابك ييمه ... سهمه سبب كل صدوعي
يا رب ماذا جنى رضيعي
و من لديها مثل صريعي
طفلٌ طعين? ........ في الاربعين
يبن الكرار ....... يبن الكرار
+ +6 + +
شتنتضر يا حجة الله ... شلون صابر علفجيعه
كوم اخذ ثارات طفك ... ثار الحسين و رضيعه
شنهو اليهيج حسامك ... غير هلعَمله الفضيعه
خيل عدوانك حسينك ... سيدي طحنت ضلوعه *
قم يبن طاها فالثأر نادى
واقتص ممن لله عادى
ثأر الجنين ...... في الاربعين

تمت بحمد الله في يوم


للمزيد من القصائد اذهب الى أرشيف قصائد الأربعين