Прыпынак 4. Шчодрая талентамі зямля Дзятлаўская

Славу краіне і народу заўсёды робяць таленавітыя людзі. Яны, дзеці зямлі беларускай,- наш гонар і сумленне. Наша дзятлаўская зямля багата на таленавітых, разумных і працавітых людзей, якія праславілі свой край. Ва ўсіх сферах жыцця вызначаліся і вызначаюцца выдатныя вучоныя і паэты, інжынеры і музыкі, кіраўнікі вытворчасці і спартсмены, настаўнікі і ўрачы, рабочыя і афіцэры, мастакі і дзяржаўныя дзеячы. Гэта тыя, кім мы ганарымся.

Здаўна Дзятлаўшчына валодала багатай мастацкай спадчынай, якая садзейнічала развіццю культуры і таленту насельніцтва нашага краю.

Упершыню фальклорныя ўзоры раёна былі прадстаўлены ў зборніку “Матэрыялы для геаграфіі і статыстыкі Расіі”, сабраныя афіцэрамі Генеральнага штаба. Мастацкую спадчыну Дзятлаўшчыны добра ведалі Адам Міцкевіч і Вячаслаў Адамчык. Дзятлаўскія песенныя сюжэты ёсць амаль ва ўсіх выданнях “Вясковых песень з-пад Нёмана” Яна Чачота. Фальклор раёна прадстаўлены і на многіх старонках 8-томнай працы Міхаіла Федароўскага. Сустракаюцца дзятлаўскія запісы і ў 4-томным выданні “Беларускіх народных песень” Рыгора Шырмы., “Песнях беларускага народа” Генадзя Цітовіча, “Песнях Гродзеншчыны” Э.Ледаховіча. Шмат зрабілі ў справе збірання фальклору Дзятлаўшчыны супрацоўнікі Інстытута мастацтвазнаўства, этнагарафіі і фальклору Акадэміі навек Беларусі, студэнты Гродзенскага і Беларускага дзяржаўных універсітэтаў.

Вялікім дасягненнем беларускай фалькларыстыкі стала выданне фундаментальнага зводу “Беларуская народная творчасць”, у які ўключаны запісы з Дзятлаўшчыны. Гэта казкі, паданні, легенды, прыказкі і прымаўкі, замовы. Значнае месца займаюць творы каляндарна-абрадавай паэзіі. У рэпертуар таленавітых беларускіх выканаўцаў уключаны песні-вяснянкі, валачобныя, юр’еўскія, жніўныя, вясельныя песні.

Шырока бытуюць на Дзятлаўшчыне сацыяльна-бытавыя казкі, анекдоты, гумарэскі. Аб багатым і разнастайным культурным жыцці раёна сведчаць фальклорныя калектывы ў вёсках Ахонава, Погіры, Студзераўшчына. Кожны з гэтых калектываў мае свае адметныя рысы. З вуснаў народных выканаўцаў льецца прыгожая, багатая, мілагучная беларуская мова.

На Дзятлаўшчыне функцыянуе ансамбль народных інструментаў “Дзятлаўскі калейдаскоп”, узорны ансамбль скрыпачоў “Зорачкі”. Гэтыя калектывы з’яўляюцца пастаяннымі ўдзельнікамі святочных мерапрыемстваў горада і раёна.

Усё гэта сведчыць аб высокай духоўнай і мастацкай культуры насельнікаў гэтага цудоўнага куточка нашай Беларусі, аб тым, што нам, дзятлаўчанам, ёсць чым ганарыцца.

Яшчэ больш інфармацыіі знойдзеце тут і тут і тут, а таксама на сайце дзяржаўнай установы культуры "Дзятлаўская раенная бібліятэка" ў раздзеле краязнаўства.