1112: XƏBƏRSİZ
XƏBƏRSİZ
Nə müddətdir, ay qız, eşqin qəlbimdə,
Sizi yaşadıram, sizdən xəbərsiz.
Sevda göylərini süzüb gözümlə,
Gözünə baxıram, gözdən xəbərsiz,
Üzünə baxıram, üzdən xəbərsiz.
Məhəbbət bənzəməz nə vara-mülkə,
Baş endirməz nə mənsəbə, nə silkə.
Öz-özümdən sual etdim mən, bəlkə,
Hürküb yenə ceyran düzdən xəbərsiz?
Qaçır ovçusundan tezdən xəbərsiz.
Sərraf Qasım deyər: gövhər sözlü mən,
Eşq oduna yanar sinəm, közlü mən.
Xeyli gəzdim arxasınca gizli mən,
Nə biləydi, gözəl bizdən xəbərsiz?
İzinə düşüblər, izdən xəbərsiz.