1085: O, SƏNLƏ MƏNƏM
O, SƏNLƏ MƏNƏM
İnsan, gəl dünyaya vəfasız, fani,
Etibarsız demə, o, sənlə, mənəm.
Dünya deyil, onda yaradan, quran,
Aləmə zinətçi, o, sənlə mənəm.
Nə lazım, o var ki, səni eşidə,
Gələ isindirə, gedə üşüdə.
Dünya deyil, sahib taxtı-Cəmşidə,
Sahib olan cəmə, o, sənlə mənəm.
Alilərdən ali bir alimim var,
Onun əlindədir külli-ixtiyar.
Dünya deyil, insan olur hökmdar,
Zülm edən hər kimə, o, sənlə mənəm.
Dəryadırmı dəryalardan bac alan?
Yox, insandır tacidardan, tac alan.
Dünya deyil, gah alçalan, ucalan,
Enən zildən-bəmə, o, sənlə mənəm.
Sərraf Qasım, yüksəlsə də səs-sədan,
Fəxr eyləmə, bil ki, ey sevinc dadan,
Dünya deyil, qəfil qəhri-qəzadan,
Düşən dərdə, qəmə, o, sənlə mənəm.