1060: OLANDA
OLANDA
Yaranış belədir: bu kainatda,
Dağlar da qəm çəkər qarsız olanda.
Əfsus ki, insan var yüz yaşasa da,
Dərd çəkməz, qocalmaz arsız olanda.
Sevincini yarı böldür çoxdursa,
O kəs insan deyil, dərdi yoxdursa.
Gün gəlib çatıbsa əgər vaxtdırsa,
Bağban ağlar, bağı barsız olanda.
Bünövrəni xaliq özü düz qoya,
Qismət ola, könül verə tay-taya.
Ayaqlar axurun gözləməz maya;
Gözdən düşüb nərlər karsız olanda.
Bülbül solan gülü bəxşiş almazdı,
Gül bitməzdi, açılmazdı, solmazdı.
Çəmənlər çiçəkli oylaq olmazdı,
Ətir də saçmazdı sarsız olanda.
Sərraf Qasım deyər bir fikir verin;
Zəkası, ağılı, kamalı dərin,
Qeyrətli, hünərli, mərd kişilərin
Qaməti əyilər varsız olanda.