1022: ŞƏFA DİLƏYİ
ŞƏFA DİLƏYİ
Ellərin Aşıq oğlu Ədalət Dəlidağlıya xitabən (xəstə olarkən) ona itfaf olunmuş şeir.
Sən xəstəsən sanki xalqın xəstədi,
Sağal-sağal Dəlidağlı Ədalət.
Hanı İstisuyun, hanı silsilə?
Dağların dağlara tağlı Ədalət.
Sən xəstəsən sanki xalqın xəstədi,
Sağal-sağal Dəlidağlı Ədalət.
Aşıq oxu, qoy cahillər ayılsın,
Aşıq oxu, qoy yaxşılar sayılsın,
Aşıq oxu, şirin səsin yayılsın,
Sazın ötsün yağlı-yağlı Ədalət.
Sən xəstəsən sanki xalqın xəstədi,
Sağal-sağal Dəlidağlı Ədalət.
Qoşqar yurdlarına düşmənlər köçür,
Ceyranlar bulağından düşmənlər içir,
Didərginsən, yurdsuz-yuvasız keçir,
Günlərin qaralı, ağlı Ədalət.
Sən xəstəsən sanki xalqın xəstədi,
Sağal-sağal Dəlidağlı Ədalət.
Təbi ildırımlı, təbi tufanlı,
Saza nəfəs verib edirsən canlı,
Dədə ələsgərli, dədə Qurbanlı,
Şəmşir barlı, Alı bağlı Ədalət.
Sən xəstəsən sanki xalqın xəstədi,
Sağal-sağal Dəlidağlı Ədalət.
Sərraf Qasım deyər, oylağın xaçın,
Qarqarın köksündə güllər duaçın,
İnşa-allah, aşıq, ellər duaçın,
Olacaqsan nicat çağlı Ədalət.
Sən xəstəsən sanki xalqın xəstədi,
Sağal-sağal Dəlidağlı Ədalət.
01.05.2004-cü il, Bakı şəhəri.