1003: AZƏRBAYCAN (Ən müqəddəs)
AZƏRBAYCAN (Ən müqəddəs)
Bu dünyanın ən müqəddəs
Gözəlisən Azərbaycan.
Övladınam, sən anamdan
Əzəlisən Azərbaycan.
Söz mülkündür qoşma, qəzəl,
Var kamanın, tarın gözəl,
Musiqindir qədim, əzəl,
Saz elisən Azərbaycan.
Hər yerini etdim seyir,
Gördüm əlik, ceyran, cüyür,
Zəngin təbiətin deyir
Bəzəlisən Azərbaycan.
Mən qartal, sən uca dağ ol,
Vüqarımsan ana, sağ ol,
Neçə-neçə igid oğul,
Qız elisən Azərbaycan.
Gətirmisən soraq, bütün,
Özün, uzaq keçmişdən çün,
Yadigarsan, həm də bu gün,
Təzəlisən Azərbaycan.
Səndə vardır, aşiq meyli,
Məşuqların olur Leyli,
Təbəssümlü, dodaq neyli,
Məzəlisən Azərbaycan.
Sənsiz mənə kim yanası,
Sənsən eşqimin binası,
Sərraf Qasımın anası,
Öz elisən Azərbaycan.