News and Events‎ > ‎

“Seminaryo diay ka dong?” by Sem. Mac Jason N. Bacalla

posted Aug 6, 2015, 8:40 PM by MOIC SMSC

“Seminaryo diay ka dong?” Sigurado ko nga tanan nga seminarista nakasugat na aning mga pulonga ilabi na kung ang seminarista naa sa parokya o sa ilang pastoral assignments. Ambot og ngano nga daghan man sa mga tawo ang mangangha o sa Iningles pa ma “amazed” inig kahibalo nila nga seminarista diay ang ilang ka estorya. Tungod niini, ma-aan nalang intawon kami og building nga hinimo sa semento ug kabilya. Aron lang sa pagpa tin-aw, ang seminaryo mao ang among balay kun diin kami namuyo sa among pag-eskwela sa pagkapari. Kami nga namuyo sa seminaryo mao ang mga seminarista; mga batan-ong lalaki nga nangandoy nga mamahimong mga pari pohon.

Kadaghanan usab sa mga pangutana nga among masugatan ilabi na sa mga kabatan-onan mao nga unsa man ang among gipangbuhat sulod sa seminario; sige lang ba ming nag-ampo o nagmisa, etc.? Niining atong basahon, atong hinay-hinayan og tan-aw ang kinabuhi sulod sa mga paril sa seminaryo. Atong sud-ongon o lilion ang mga panghitabo; dili lang ang mga panghitabo hasta napud ang klase sa kinabuhi nga among gipuy-an sulod sa among ikaduhang panimalay.

Unsa, report diay ni? Basin siguro, apan para nako ang mas lawom nga hinungdan niini mao ang kamatuoran nga kaming mga seminarista dili mga espesyal nga mga batan-on nga tuyong gipalayo sa kalibutan. Sa pagkatinuod, gi-umol mi sa sulod aron sa pag-andam kanamo sa pagpangalagad sa mga katawhan ilabi na gayud ang mga kabus, dinaog-daog ug mga sinalikway sa katilingban. Nganung sila man gayud? Tungod kay nisunod raman mi sa among teacher. Kinsa man ang among teacher? Matod pa sa among motto sa seminario “Christus Magister Noster” o sa Cebuano- Cristo Among Magtutudlo. Ang among kinabuhi naka sentro sa iyang pagkatawo ug sa iyang mga pagtulun-an. Tungod sa among gugma kaniya, among saulogon ang iyang kapyestahan sa seminario.  Ug sa iyang ka pyestahan pohon, announcement nalang usab, sa kadtong mga naka tungha sa Seminario Mayor de San Carlos, graduate o dili, aduna kitay 2nd Homecoming karong Agosto 18, 2015, Feast of Christus Magister Noster. Ang venue sa Seminario Mayor ug mag sugod ang registration sa ala una sa hapon (1pm) ug adunay 500 nga registration fee. Magkita-kita kita didto mga seminario, ay sorry seminarista diay. Atong himamaton pag-usab ang atong Magtutudlo. Viva Christus Magister Noster!



An article published in Ang Bag-ong Lungsoranon

on August 2, 2015

under the heading "Sa Ibabaw ning Paril"

by  Sem. Mac Jason N. Bacalla


Comments