Félagið

Skógræktarfélag Mosfellsbæjar

Skógræktarfélag Mosfellssveitar síðar Mosfellsbæjar var stofnað 20. maí 1955. Tildrög þess voru að á 45 ára afmæli Kvenfélags Lágafellssóknar gaf Dr. Helgi Tómasson félaginu 450 plöntur úr gróðrarstöð sinni til gróðursetningar. Til stofnfundar var boðað af undirbúningsnefnd Kvenfélags Lágafellssóknar og Ungmennafélags Aftureldingar. Stofnendur voru 88 og þrjú félagasamtök gerðust meðlimir. Ungmennafélagið Afturelding, Kvenfélag Lágafellssóknar og Skógræktarfélag kvenskáta við Hafravatn.
Fyrsti formaður félagsins var Guðjón Hjartarson á Álafossi. Með honum í stjórn voru kosin Jóel Jóelsson Reykjahlíð, Helga Magnúsdóttir Litlalandi, Freyja Norðdahl Reykjum og Valgerður Guðmundsdóttir Seljabrekku.
Guðjón Hjartason var formaður félagsins í fimm ár eða til ársins 1960 en þá tók Ingigerður Sigurðardóttir Reykjalundi við formennsku í tuttugu ár. Jón Zimsen var formaður á árunum 1980 til 1985 en þá tók Guðrún Hafsteinsdóttir við og gengdi formennsku til ársins 2003 en þá tók Elísabet Kristjánsdóttir við og gegnir því núna.
Mikið starf hefur verið unnið í gegnum tíðina. Fyrsta plöntun félagsins var kringum Hlégarð vorið 1956. Fljótlega fékk félagið sinn reit í Hamrahlíðinni. Á þessum árum þótti mikil bjartsýni að planta trjám. Margir töldu það óðs manns æði. En annað kom upp á daginn og er víða risinn hinn myndarlegasti skógur að tilstuðlan Skógræktarfélagsins.
Árið 1990 tók félagið þátt í Landgræðsluátakinu og fékkst þá mikið af plöntum sem ekki þurfti að leggja út fyrir. Eftir það varð mikil aukning á gróðursetningu hjá félaginu,

Vinnuskóli Mosfellsbæjar fékk þá vinnu við gróðursetningu og hefur svo verið til þessa dags.
Árið 1986 keypti félagið sumarbústað við austanvert Hafravatn. Hann er í landi Þormóðsdals sem félagið er með á leigu. Bústaðurinn hefur verið notaður af skátum úr Mosfellsbæ á veturna.

Stjórn Skógræktarfélags Mosfellsbæjar 2016 skipa:

Formaður: Kristín Davíðsdóttir 
Gjaldkeri: Louisa Sigurðardóttir
Varaformaður: Ágúst Hálfdánarson 
Ritari: Björn Traustason  
Meðstjórnandi og vararitari: Hólmfríður Karlsdóttir 

Varastjórn
Sigurgeir Steingrímsson
Ívar Örn Þrastarson
Elísabet Kristjánsdóttir
Jóhanna Ólafsdóttir
Comments