Home‎ > ‎

Tamil Poem on Com Saketh Rajan

The below content will not display correctly if Unicode Encoding is not enabled in your browser. The content is written in tamil. To make it readable, pls install unicode tamil font latha.

மோனம் கிழித்து.


ஒரு அதிகாலைப் பொழுதின் கருக்கலில்
விநாடிப் பொழுதின் இடைவெளியில்
இருளார்ந்த கானகத்தின் நடுவே
சாகேத்ராஜனின் மரணம் சம்பவித்தது.
புரட்சியின் கனவுகளில் இயங்கிய
அவரது இரத்த நாளங்களைத்
தெறிக்கப் பாய்ந்தது தோட்டா.
அன்றிலிருந்து
துவங்குகிறது மோனப் பாசாங்கு.
திரும்பும் திசையெங்கும்
முணுமுணுப்பு கூட சாத்தியமாகவில்லை.
கொடூர அமைதி...
கொலை முடித்த அமைதி...

சட்லெட்ஜ் நதிக்கரையில்
பகத்சிங்கின் உடல்
எவருக்கும் தெரியாமல்
எரித்துச் சாம்பலாக்கப்பட்டது போலவே...
பிரேம் என்ற சாகேத்ராஜனும்
சாம்பலாக்கப்பட்டார்.
செய்த குற்றம் என்ன?
சுட்டுத் தள்ளுமளவிற்கு என்ன நேர்ந்தது?
கேட்க முடியாது.
கேட்கக் கூடாது.
'நக்சலைட்'....!
அவ்வளவுதான்,
நியாயம் பிறந்து விட்டது.
பொதுக் கருத்தின் வரம்புகளில் நின்று
கேள்வியெழுப்ப முடியாத நியாயம்...

மணிப்பூரில் மனோரமா தேவியை
சீருடையணிந்த வெறி நாய்கள்
புணர்ந்து கொலை செய்யவும்,
கஜூரேலை இரண்டாண்டுகளுக்கும் மேலாய்
தொடர்ந்து வதைக்கவும்,
ஊத்தங்கரையில் சிறைப்பட்ட நாள் முதலாய்
வெஞ்சிறையில் வாடவும்,
சுவரொட்டி ஒட்டுவதற்கும்,
கூட்டம் கூட்டுவதற்கும் கூட சிறையில் தள்ளப்படவும்,
வழி சமைக்கும் நியாயம்...

எழுதப்பட்ட தீர்ப்புகளோடு
தொடர்கிறது வழக்கு.
நக்சலியம்
சமூகப் பிரச்சினையா,
சட்ட ஒழுங்குப் பிரச்சினையா?
அறிவுஜீவிகளின்
வடிகட்டிய சொற்களில்
தொடர்கிறது விவாதம்.
மற்றொரு புறத்தில்
துப்பாக்கிகளின் பேரிரைச்சலில்
தொடர்கிறது வதம்.

பகத்சிங்கின் காலம் தொட்டு
பகரப்படும் சட்டம் இதுதான்,
அரசு மாறலாம்,
ஆட்சி மாறலாம்.
ஆள்வோர் மாறலாம்,
ஆள்வோரின் நிறம் மாறலாம்.
அடிப்படையை மாற்ற முயன்றால்...
துப்பாக்கிகளுக்கு பசியெடுக்கும்.
ஊடகங்கள் உறங்கிப் புரளும்.
கொடூர அமைதி நிலைநாட்டப்படும்.

சாகேத் ராஜன் எழுதிய
வரலாற்று நூல்கள்
கர்நாடகப் பல்கலைக் கழகங்களில்
பாடமாக்கப்பட்டிருப்பதை
எண்ணிப் பதறுகிறது அரசு.
நாளை அது நீக்கப்படலாம்.
ஆனால்,
காற்றினில் எழுதிச் சென்ற
அவரது வாழ்க்கை கவிதையை
எங்கும் ஒளித்து வைக்க முடியாது.
கவனமாய் வடிவமைக்கப்பட்ட
இந்தக் கருத்துச் சிறையை
ஊடுருவி
அக் கவிதை
விரிசல்களை எழுப்பிக் கொண்டே இருக்கும்.

கோட்டையில் கொடி மாறும் வரை
பகத்சிங்கும் பயங்கரவாதியாகத்தான் அறியப்பட்டார்.
கொடியோடு
கோட்டையையும் கைமாற்றும் வரை
சாகேத்ராஜனும் தீவிரவாதியாகத்தான் அறியப்படுவார்.
இரத்தப் பலிகளால்
இறுதி நாளை
வெகுநாட்களுக்கு தவிர்த்து விட முடியாது.
நிறுவப்பட்ட கொடூர அமைதி
உடைந்து நொறுங்கும்.
எழும்பும் உரத்த குரல்களோடு
பகத்சிங்கினதும், சாகேத்ராஜனதுமான உயிர்கள்
புதிய உருவம் பெறும்.

...

பிப்ரவரி 6-ஆம் தேதி 2005 அன்று மாவோயிஸ்ட் கட்சித் தோழரான பிரேம் என்ற சாகேத்ராஜன் போலீஸால் சுட்டுக் கொல்லப்பட்டார். மாவோயிஸ்ட் கட்சியின் நடைமுறைகளில், இந்தியப் புரட்சிக்கான அவர்களது அரசியல், இராணுவப் பாதைகளில் கருத்து வேறுபாடுகள், விமர்சனங்கள் இருப்பினும், சாகேத்ராஜனுடைய, சாகேத்ராஜனைப் போன்ற எண்ணற்ற அக்கட்சித் தோழர்களின் தியாகம் அளவிறந்த மதிப்பிற்குரியது. இக்கவிதை மார்ச் - 23, 2005 அன்று எழுதப்பட்டது. சாகேத்ராஜன் குறித்த எனது பழைய வலைப்பதிவையும், அவரது அமைப்பின் ஆதரவாளர்கள் அவர் குறித்து உருவாக்கியிருக்கும் வலைத் தளத்தையும் படித்துப் பாருங்கள்.

Comments