Home‎ > ‎

Saláikka Cíyal


Saláikka Cíyal or Kissá

by Mohammed Alif


Boóut agor zobanat mazé, uggwá baccár fua ye gúñra loi sofór ot zar. Zaite zaite bicí duré foóñisse. Éen thaim ot uggwá talgas deikké. Óran lager bouli, talgas íbar sábat zai boiccé. Gúñra wa ré talgas loi bañdí raikké. Bicí duróttu aiccé de ótolla, bicí óran ói, talgas ór sábat gúm fori giyói.

É dec ór baccár fua ye aái, gúñra wa loi zar gói. Éen thaim ot íte tán faiyé. Duñri duñri zaiyóre dóijje gói. Íte hoórde, “Tui añár gúñra wa ká loi zoór gói.” É dec ór baccár fua ye hoórde, “Talgas ibá añár. Gúñra ibá añár talgas é biyaiyé de. Ótolla añár gúñra aññí loi zair gói de.” Íte hoórde, “Noó ibá añár gúñra. Aññí talgas ót bañdí éri gúm giyíde.” Lékin dec ór baccár fua ye no mani yóre gúñra loi giyói. Íte báfi báfi áñçi áñçí zargói.

Éen thaim ot cíyal uggwá yé loot faiyé. Cíyailla ye hoórde, “Ite báfi bafí hontú aiyér.” Íte hoórde, “Ki hoiyóum duk kór kaáni. Añár gúñra wa talgas ót bañdí éri gúm gilám. E dec ór baccár fua ye aái yóre añár gúñra wa loi giyói. Aró hoórde ítar talgas é biyaiyé de gúñra bole.” Baade cíyailla ye hoórde, “Eén óile ekkán ham gor. E dec ór baccár fuallá hailla bisar kurá. Bisar ot mazé aññí zaiyoum ar tor gúñra toré loi diyoum.”







Baade íte ki goijjé hoilé, é dec ór baccár fuallá bisar kuraiyé. Tarfordín bisar ot mazé, é dec ór baccá yó aiccé, ar baccár fua yó aiccé, ar uzir, nazir, kutual ókkol beggún aiccé ar íte yó giyé. Mogor Cíyailla noó foóñse. Beggún é Cíyailla re soiñ gorí boói táikke. Boóut hotún baade Cíyailla góille gái. Cíyailla re baccá yé hoórde, “Tui etúkkun deri kiyólla goijjós.”  Cíyailla ye hoórde, “Ki hoitám baccá sáb? Raitta doijjat mazé ooin dóijje. Doijjar ooin nifáite nifáite gúm uddwa zai noó fari.  Ótolla ekkená deri óiyede.” Baade baccá yé hoórde, “Doijjat mazé uggwá ooin zole nekí ? Bekuf or hotá kiyálla hoór, tui.”


Cíyailla ye hoórde, “Bicí sóiyi hotá hoiyó baccá sáb. Doijjat mazé zodi ooin zoli nofarí le, talgas é kengóri gúñra biyai faribóu.” Aró hoórde, “Talgas é biyaiyé bóuli hoói, tuáñr fua ye ze gúñra wa loi ainné, tuáñr fua ré hoó, é gúñra íba re difélai bélla.”

Yíar baade bisar ot mazé giyéde uzir, nazir, kutual arde baccá yé báfi saár dé, Cíyailla ye bicí sóiyi bisar goijjé dé yían, buzí faijjé. Baade ítar gúñra ítare diféláiye. Tói zar zar gór ot te te giyói. Kissá ibá eddúr ót hótom.

Kissá ibá lekóya: Citizen of Arakan

Editted by Eng. Mohammed Siddique (UK), Founder of Rohingya Language


Comments