ဖော်ဝေး

နှလုံးအိမ်ထဲရေငတ်ခြင်း

ငါ့လျှာမှထွန်ကြောင်းအရစ်ရစ်
တစစ်စစ်နာကျင်ဖူးယောင်
အိပ်မက်တွင်ပင် သောင်ထွန်းလာသည့်အဆုံး
မြစ်ရေလုံးလုံးခန်းပြီ။

နှုတ်ခမ်းမွေးထောင်ထောင်
နှာယောင်ကောက်မျက်လုံးပြူးပြူး
ဆူးတောင်နှင့် အသံမှုံဝါးဝါး
ပရစ်များတွားတက်လာတယ်။

သံယောဇဉ်ကြိုးတစ်စ
အမှိုက်တစ်ပုံ
သပွတ်အူတို့ တွေ့ဆုံပေါင်းစည်းသောည
ပါးစပ်လှလှလေး ဖွင့်ဟသောအခါ
ငါ့အတ္တဟာရူးသွပ်ပြေးထွက်လာရဲ့။

လူခြေတိတ်လျှင်
အိပ်ခြင်းကိုအောင်နိုင်သူ
ပြိုကွဲပူလောင်ရာသွေးစများကိုနင်း၍
ကိုယ့်ကျင်းကိုယ်တိုင်တူး
တွင်းနဖူးမှာညစဉ်ရပ်ခဲ့ပေါ့။

မပင့်ဖိတ်သော
အရိပ်ပေါင်းစုံတို့၏ အစည်းအဝေး
ဆွေးနွေးသံများခြိမ်းခြောက်
မျက်လုံးဟောက်ပက် လောက်တဖွားဖွား
အပူတိုင်းကိရိယာများ ကျွမ်းသွားပြီ။

မွတ်သိပ်ခြင်း၏ ဒုတိယအမည်
အက်ကွဲရယ်သံဖြင့်သာ အသက်ရှင်သူ
ငါ့ပုံတူတစ်ခု၏ ဦးခေါင်းကိုဖွင့်
ပင့်သက်များအငွေ့ပျံ
ခါတစ်ရံ မိုးရွာစေသတည်း။ ။

ဖော်ဝေး
၁၀-၅-၇၅
မိုးဝေ၊ ၁၉၇၈၊ သြဂုတ်။
ဖော်ဝေးငှက်များ ပျံသန်းချိန်။
ပကြိမ်၊ ၂၀၀၄၊ အောက်တိုဘာ။ နှစ်ကာလများ။




မီးလောင်ပြင်၊အရိပ်များ၊နှလုံးသားမျက်နှာ၊၃ကြိမ်မြောက်လက်ခမောင်းခတ်ခြင်း၊
အမည်မဲ့နေ့ရက်များ၊မိမိကိုယ်ကိုရှာဖွေတွေ့ရှိခြင်း။


မီးလောင်ပြင်
အလောင်းအမှတ်…သုံည
တယောက်ပြာကျသွားပြန်ပီ။

တနင်္ဂနွေများမှစနေများ
ကိန်းဂဏန်းများရူးသွပ်မှု
မကုသချင်ကြပါနဲ့။

ကျောက်တုံးအက်မှ
ရေအေးအေးတစက်သည်
အသက်ဆီများဝေ့နေရဲ့။

လိုက်ခဲ့ကြ…လိုက်ခဲ့ကြ
ဟို ..ချောက်ကမ္ဘားအောက်မှာ
အံ့ဖွယ်ပ နတ်တိုင်းပြည်
ဆီဥထောပတ်ပဒေသာတဲ့
ပါးကွက်သားရဲ့ပျက်လုံး
ပြုံးဖြစ်အောင်ပြုံးပါ။

သင်ဖြူးဖျာတချပ်
ယပ်တောင်တခုနဲ့
ခုခံကြသူတွေ
နယ်မြေမရှိ။

လွင်ထီးခေါင်မှာ
လက်သီးလက်မောင်းတန်း
ဒေါသနဲ့ကန်းနေသူ
ဘယ်သူဘယ်ဝါမခွဲတတ်
ဖတ်မနေတော့ပါ။

အို…သူလား
ပြုတ်ကျသွားသောသူ့ဘယ်လက်
ညာလက်နှင့်ကိုင်ကာ
မြိန်ရေရှက်ရေကိုက်စား
ရူးသွပ်သွားပြီဘဲ
မျက်နှာလွှဲလိုက်တော့။

ရေ…ရေ..
သူမသေသေး
ငါ့သွေးကိုသောက်ပါ့။

ညှော်နံ့
ပြာဖြူ
အောင့်မထားနဲ့
ရဲရဲရှူကြ။

ကမ္ဘာမြေကြီးသည်လဲ
နီရဲနေပေပြီ။

အိပ်မက်လမ်းခွဲမှာ
ငါ့ကဗျာများကြဲဖြန့်
ပံ့သကူအကြွေစ
ကလေးများပျော်ကြပါစေ။

ယမ်းနံ့
မျက်ရည်
သွေး
ဇွန်လမွေးကလေးတယောက်
ငါ့ကျောပေါ်ကလျှောက်သွားပါ။

ဘယ်သူလဲ
ဘယ်သူတွေလဲဟင်
အသက်ရှင်နေသေးသူများ
သွားစို့။ ။
ဖော်ဝေး


အရိပ်များ

ကီလီဈေးတန်း
ဆန်လမ်းမမှာ
ကဗျာတပုဒ်
ကြွက်တအုပ်ဝင်ဆွဲ
ပြန့်ကျဲတိတ်ဆိတ်
မျက်နှာရိပ်ဘာသာစကား
တွားသွားနေရဲ့။

ရန်ကုန်မန္တလေးရထား
ခရီးသွားတွေ
တော်လှန်ရေးနေ့ညကိုဖြတ်ခိုက်
ဂျပန်ပါးရိုက်သတဲ့
လွတ်လပ်တဲ့ဗမာပြည်အကြောင်း
စကားကောင်းသွားကြတယ်။

လူငယ်ရေးရာညကျောင်း
ခေါင်းလောင်းထိုးသံသာ
အလုပ်သမားရှာဖွေရေးရုံး
တ၀ုံးဝုံးလှုပ်ရမ်း
ပန်းဆိုးတန်းထိပ်
မအိပ်တဲ့နာရီစင်ထဲ
စီးဝင်ပျောက်သွား
၁၂-နာရီထိုးသံကြားလိုက်ရတယ်။

အဲဒါ“နေ”
အဲဒါ“နေ”တဲ့
ရှေ့နေကြီးတယောက်
ခြိမ်းခြောက်လိုက်တာ
ည….လသာသာထဲ
ရေဆွဲနေကျ
ဥက္ကလာကမိန်းမများ
တဟားဟားရယ်။ ။
ဖော်ဝေး


နှလုံးသားမျက်နှာ

စိမ်းညို့တောရိပ်
တိတ်ဆိတ်ခြင်းရဲ့ညီးတွားသံ
နက်မှောင်ရှည်လျား
အေးစက်ခြေလှမ်းများရှပ်ရှပ်
ရွာ၏ပန်းချီကားတချပ်ပြပွဲမှာ။

ရေနံမြေသပိတ်
အတိတ်ကိုလွမ်းစရာ
မဟာရန်ကုန်လမ်းမများ
ခြေသံကြားမလားနားစွင့်တယ်။

ချွေးစီးမွန်းနစ်
အိပ်မဖြစ်တဲ့ည
ဖျက်ဆီးပစ်ဖို့
လူဖြစ်ခဲ့ရတယ်ဆိုတဲ့“ဂေါ်ကီ”
ငါ့ဆီဖိတ်ခဲ့မိတာကို။

သမတရုံလှေကား
မှန်ချပ်များခြောက်လှန့်ပြ
ငါ့ကိုငါရှောင်ခဲ့ရဘူးတယ်။

နက်ဖြန်မနက်မှ
စပါယ်ဖြူတကုံးသီ
ချစ်သူဆီအရောက်သွား
ခွင့်လွှတ်ဖို့စကားဆိုမယ်။ ။
ဖော်ဝေး



၃ကြိမ်မြောက်လက်ခမောင်းခတ်ခြင်း


(၁)
အနက်ရောင်တစ
မြက်ခင်းပေါ်ကျလာတယ်။

ဆည်းဆာဟာ
ညရဲ့အကျဉ်းသား
ဝပ်တွားသွားရှာပေါ့။

အမဲရောင်
အနက်ရောင်
အမှိုင်းရောင်
ကောင်မလေးများ
ငါ့နှလုံးသားအသုဘ
ရယ်သံနဲ့ပို့လိုက်ကြရဲ့။

လှံစွပ်ဖျားမှာ
နားလှာတဲ့ပုဇင်း
ကိုယ်ချင်းစာမိရဲ့
ပြေးမလွတ်ခဲ့ပါ။

ဇာတ်စင်ပေါ်မှာ
“တောင်စွယ်နေကွယ်ရင်
သုဿန်ထုတ်
ဒါးခုတ်သတ်စေ”တဲ့
ပရိယာယ်ချို့ငဲ့လိုက်တာ။

တချက်ရိုက်
ခေါင်းငိုက်စိုက်ချ
နှစ်ချက်ရိုက်
ခေါင်းပြန်မတ်ထူ
အို…လူတွေမနဲပါလား
မြေကျသွားတဲ့ငါ့သွေးမှာ
မျက်ရည်ဘာကြောင့်ရောသလဲ
ဝမ်းမနဲချင်ဘူး။

“ဗျို့မိတ်ဆွေ
ဘယ်လိုလဲ” တဲ့
တမေးထဲမေးနေကြ
“ခနငယ်”တခုမဆုံးခင်
လူလုံးမပြချင်သေးပါ။

မျက်စိကိုမှိတ်
နားကိုပိတ်ထား
နှလုံးသားမီးတောက်ထဲမှာ
“ငါ”အစစ်လမ်းလျှောက်
တက်ခေါက်သံကြားပါစ။

လူရွှန်းရဲ့စိတ္တဇဒိုင်ယာရီဟာ
ဘာ့ကြောင့်ရင်မှာငြိပါ ပါလိမ့်။

လူမမာရဲ့အိပ်ကပ်ထဲက
ထမင်းတနပ်စာတောင်
“မှောင်”လို့။

အနူးညံ့ဆုံး
အချစ်ဦးရဲ့ပါးပြင်ဟာလဲ
“မဲ” လို့။

“ဟဲ့…အကန်း
လမ်းကဒီမှာ ” တဲ့
[ ]
ကျောစပ်သွားပါသည်။

“ဆီကိုရေချိုး
ဆေးရိုးမီးလှုံ
စပါးတောင်လိုပုံ”
ဆေးလိပ်ခုံကမိန်းကလေး
ငိုချင်းတေးလဲချိုပါရဲ့။

အနှစ် ၆၀၀၀ကျော်
ပခုံးပေါ်ထမ်းပိုးလာတဲ့
ရာဇ၀င်အဖိုးအိုက
ဟဟလေးရယ်နေတယ်။

(၂)
လ္ဘက်ရည်တခွက်ရဲ့
ပြား ၅၀က
အချိန်ကာလ စပွဲပေါ်မှာ
ထယ်ဝါနေပါပေါ့လား။

အေးစက်တဲ့
လ္ဘက်ရည်ခွက်ထဲမှာ
ည…..လာမင်းမူပြန်ပေါ့။

ခရမ်းရောင်
ကောင်မလေးရဲ့အလှ
လ္ဘက်ရည်ကျကျတခွက်ထဲ
ပျော်ဝင်သွားတယ်။

မလာနဲ့ကွယ်
တခစ်ခစ်နဲ့
ချစ်စရာ့ရယ်မောသံမှာ
ငါဖျားခဲ့ဘူးတယ်။

မျက်နက်ဝန်းမှ
စွဲမက်ဖွယ်အရုဏ်ဦး
ငါကြည်နူးခဲ့ဘူးတယ်။

“ချောင်းအစပ်မှာ
ပွင့်ဖတ်များစွာ
မျောပါလာကြ“
အိပ်မက်လှလှလေး
ညရဲ့တေးကိုသီကြူးနေ။

ဆေးလိပ်တတိုရဲ့
နုပျိုခဲ့အတိတ်မှာ
လွမ်းစရာအိပ်မက်အဖြစ်
ချစ်သူ့နှုတ်ခမ်းကိုနမ်းခဲ့ကြောင်း
ပြောပြနိုင်ကောင်းပါတယ်။

ရဲရင်တဲ့အချစ်
ဆုံးရှုံးနစ်နာခြင်းများနေရာ
ရင်မှာကိန်းဝပ်
အို…ကျွတ်လွတ်သောနှင်းဆီ
အရုဏ်မလာမီပွင့်စမ်းပ။

(၃)

အချိန်နတ်ဘုရား
အသွားမြန်လှ
နွေဆယ်ညနှင့်အိပ်ရာထမျက်နှာ
မကြည်သာလှပေဘူး။

အံကြိတ်လိုက်တဲ့
ငါတယောက်ထဲရဲ့
မိုးချုန်းသံမှာ
ကဗျာမှထွက်မလာရင်
အသက်ရှင်ခြင်းတရားကို
ငါသတ်မိလိမ့်မယ်။

ပြည်သူကြားမှ
ခံစားမှုများ
ပြားပြားဝပ်မှောက်
စာအုပ်စင်အောက်ရောက်ခဲ့ရဲ့
ရှက်တယ်။

ငါ့နှုတ်ဖျားမှာ
တရားထူထောင်
ကဗျာကလှောင်လိမ့်မယ်။

၂၀ရာစုမျက်ဝန်းနဲ့
“အနန္တသူရိယ”ကိုမုန်းသူတွေ
ငါပြုံးကြည့်နေမိတယ်။

စကားထဲထိုင်
သတ္တိပြိုင်ရင်း
ကွင်းမှားဆင်းကြ
“အလင်း”လာမှသိတော့မယ်။

ခရေကို
မကြွေခင်
မပန်ဆင်ကြပါဘူး။

(၄)
အနာဂတ်ရဲ့
ရာဇ၀င်သုတေသန
ဗိမ္မာန်မှာ
သက်သေခံအဖြစ်
နှစ်တွေလတွေနေရစ်ပါစေ။ ။
ဖော်ဝေး


အမည်မဲ့နေ့ရက်များ


နေအရုဏ်ကား
သံပတ်မကုန်နိုင်သေးချေ။

သမရိုးကျဝါကျ
ပွဲနေပွဲထိုင်မိန့်ခွန်း
ရာသီဖွဲ့ကဗျာ
တနေ့တာလုံးညီးတွားနေတယ်။

ဆေးလိပ်တိုကို
သုံးလေးဖွာရှိုက်
နှပ်ထားလိုက်ဦးမယ်။

ရေညှိတက်သစ်ကိုင်းပေါ်မှာ
စာဝါလေးအဖော်ပျောက်
ဒေါင်းတောက်နေသလားကွယ်။

ကလေးငါးယောက်မေ
ရေခပ်နေတဲ့မိန်းမ
အလှသားနော်။

လ္ဘက်ရည်ကြွေးတွေကြောင့်
ကဗျာစာအုပ်ကလေးပေါင်ချင်တယ်။

“ရှောလိုက်ပလား”
“တကျပ်လောက်”
ဟိုဘက်ခုံမှာ
သင်္ဘောမှောက်ကုန်ပါပြီ။

ကပ်ရက်စာအုပ်ဆိုင်မှာ
တခါမှမဖတ်ဘူးသေးတဲ့
(ဖတ်လဲမဖတ်နိုင်တဲ့)
မာ့က်စ်ရဲ့အရင်းကျမ်းစာအုပ်
ခေါင်းကုတ်ငုံ့နေရရှာတယ်။

ထိုင်ခုံကြားကဂျပိုးတသိုက်
ကိုက်လိုက်တာလဲလွန်ရောလေ။

ဟိုခတ်လှမ်းလှမ်းက
မီးရထားဥသြ
အမောသံစွက်နေရဲ့။

နေရပ်ပြန်သူတို့
လမ်းခုလပ်ကျန်သူတို့
နေမင်းရဲ့သက်ပြင်းကိုသောက်
မောနေလောက်ပြီ။

ရွှေယုံနဲ့ရွှေကျား
သက်ကယ်ရိတ်သွားသတဲ့
ရေဒီယိုစကားသံ
နားထဲပြန်ဝင်လာတယ်။

ရွာကိုပြန်ခဲ့ပါလား
အလကားဒုက္ခခံချင်တယ်
ဂရုဏာရှင်သူငယ်ချင်းမ
မေ့လိုက်ရပြန်ဦးမယ်။

လမ်းမပေါ်မှာ
ဖွာရရာကြဲပြန့်သွား
အစိမ်းစက်များလှုပ်လာတယ်။

ခြေသံရှပ်ရှပ်
ညနေခင်းဖြတ်သွားပြန်
နီကျန်ကျန်ဆည်းဆာရိပ်
လောကတိတ်တဆိတ်လောင်ကျွမ်းနေပေါ့။ ။
ဖော်ဝေး


မိမိကိုယ်ကိုရှာဖွေတွေ့ရှိခြင်း

(၁)
ပုလင်းအလွတ်နှစ်လုံး
စပွဲဘေးမှာတုံးလုံးလဲနေတယ်။

လာလာလေသူငယ်ချင်းတို့
ဟင်းလင်းစကြာဝဠာကြီးထဲမှာ
တွယ်တာစရာဘာမှမရှိ
ဘယ်သူသိသလဲမနက်ဖြန်။

အမှောင်ဆိုတာမရှိ
အလင်းဆိုတာမရှိ။

အစမရှိ
အဆုံးမရှိ
မသိ
မသိ
မသိ။

(၂)
တောင်ကုန်းဂမူ
ထုံးဖြူဖြူသာသုတ်လိုက်ပါ့
ငါရှိခိုးလိုက်ပရစေ။

နွားရိုင်းသွင်းချိန်
အိမ်ပြန်ရမဲ့ခြေလှမ်း
တောလမ်းထောင်ချောက်တခု၌
လမိုက်သွားချိန်ရောက်ခဲ့တယ်။

စလေအညာက
ပုလွေဆရာရဲ့ဖျားယောင်းသံ
ကျောက်နံရံဂူဝထက်
ငါ့ခြေရာဖျက်မရပါ။

ကျောက်ခေတ်မှအနုမြူ
လူ့သမိုင်းကြောင်းအထပ်ထပ်
ငါကန့်လန့်ဖြတ်ကူးခဲ့ပေါ့။

ငါ
(သို့မဟုတ်)နောက်တယောက်ငါ
ဖျားနာရင်း
အိုမင်းလာခဲ့ပြီ။

(၃)

နေပူကြဲတဲမှာ
ငါတယောက်ထဲရပ်နေတယ်။

လောကအား
လက်ဝါးပေါ်တင်
ဖြစ်ညှစ်လိုက်ချင်တယ်။

ဝါးရုံတောမှ
ဥသြသံမွဲခြောက်ခြောက်
ငါ့နားကိုဖောက်ပစ်လိုက်ချင်ရဲ့။

ဗိုလ်ချုပ်ဈေးရှေ့
ကောင်မလေးရဲ့ဘရာဇီယာမှာ
ငါ့ဆဲသံပါသွားတယ်။

လမ်းဘေးစင်ပေါ်က
လျှပ်စစ်ဂီတာထဲ
ငါဆဲထဲ့လိုက်တယ်။

နဝေတိန်တောင်
မျက်မှောင်ကုတ်ကုတ်
ကျွန်ုပ်ကိုသင်…
မြင်ရင် မှတ်မိနိုင်စွမ်းမရှိပါ။

(၄)
ကြေးမောင်းတချက်အခေါက်မှာ
ရွာရိုးတလျှောက်ခွေးအူသံ
ဆူညံဖုံးလွှမ်းသွားပါတယ်။

ရေနံဆီမီးခွက်မှိတ်တုတ်
စာအုပ်ပုံအထပ်ထပ်ကြား
ငါ့ဝိညဉ်ဖြတ်သွားချိန်
လမင်းမှိန်ဖျော့ပေးရတယ်။

မှတ်စုစာအုပ်ထဲမှာ
ကမ္ဘာကြီးခွဲစိတ်
အိပ်မက်ထဲကတော်လှန်ရေးသမား
မျက်ဝါးထင်ထင်ရှု
သင်သတိပြုမိခဲ့သလော။

အရိုက်ခံရသောအခါ
သည်းထန်စွာငိုကြွေး
အကြွေးဆပ်ရမယ်
သွေးတစက်အတွက်သွေးတစက်
အသက်အတွက်အသက်
တက်ခေါက်သံထွက်လာတယ်
ကြာပြီ။
ကြာပါပြီ။

(၅)
ဆွေးမြေ့အိမ်အို
ရေမယိုစေရ
လှပတဲ့ဟာသပေကပဲ။

သွေးခြေဥ
နုနုဖွေးဖွေး
ခြေဖျားလေးရဲ့အောက်မှာ
ငါဒူးထောက်ခစားလိုက်တယ်။

အိမ်များလမ်းများ
မြို့ရွာများ၊တိုင်းပြည်များ
ငါ့နှလုံးးသားပေါက်ကွဲသံ။

ထိမှန်ခံစားကြစေလော့။

ခန္ဓာကိုယ်ကိုအပိုင်းပိုင်းချိုး
ရှေ့တိုးပေးအပ်လိုက်ပါရဲ့။

ဘ၀ကိုယူမလား
အနာဂတ်ကိုယူမလား
ငန်းတော်ကြားမလေးရှေ့တွင်
“ယုံကြည်ချက်”ပင်ကြောက်ဒူးဆတ်
ငါအားလုံးကိုသတ်ခဲ့တယ်။

ရွှေနန်းတော်ဆီမှ
ရီမောသံများအံကျလာ
ပါတော်မူရှေ့ပိုင်းရာဇ၀င်
အသင်မှတ်မိသေးပါစ။

လမ်းနှစ်ခွဆုံ၌
ခေါင်းငိုက်စိုက်ငြိမ်သက်
မျက်ရည်စက်လက်နှင့်ငါ
လာလေကြည့်လှည့်
ငါမဟုတ်ဘူးငြင်းချင်ပြီ။

(၆)
အစာဝကာမှ
ဌာနပြန်ချင်ပြီကွဲ့
တောသံကိုပေးသတဲ့လေ။

နှစ်အတန်ကြာ
ငါမေ့လျော့နေခဲ့သည့်
မိမိ၏၀ိညဉ်သဏ္ဍန်များ
မိုးနံရံကားယားခွ
ခြောက်လှန့်ပြနေကြပြီ။

ဆေးစက်ကျရာ
ငါများစွာမွေးဖွား
ကျားခံတွင်းထဲကသမင်
ဘယ်သူမှအသက်မရှင်ပါ။

သည်နယ်မြေကား
စီးတားထားကြသည်။

နေ၀င်ချိန်
တိမ်အဆင်အရင့်အနုနှင့်
ငါခေတ်ကိုထုဆစ်မည်။

မမြင်စမ်းတန်း
လမ်းကျဉ်း၌ကား
ခလုပ်တိုက်သံကြားပေမယ်။

မိတ်ဆွေတို့
မဟာဂေါ်ကီရဲ့
ဒန်ကာနှလုံးသားဟာ
ရှုတ်ချသံကြားမှာဖွားမြင်တယ်။

အုတ်ဂူဖြူဖြူမှ
သောကနှင့် ရင်မ နေသော
အို….အမေ
ကျနော့်ရင်ထဲမှာ
ကောင်းကင်ပြာ
ကမ္ဘာကြီး
အနုပညာပစ္စည်းတွေနဲ့
ပြီးပြည့်စုံခဲ့ပါပြီ။ ။
ဖော်ဝေး

 

Comments