Ds. Laurie Naudé en sy eggenoot Elmaré word gedurende die naweek van 20/21 Oktober verwelkom in ons gemeente. Die egpaar gaan tuis by Johan en Hillet Myburgh.

Ds. Naudé is tans voltydse leraar in die gemeente Meyerhof – Bothaville.

Ds. Naudé is een van drie kortlys kandidate wat deur die Pre-Advies Komitee uitgenooi is vir 'n onderhoud wat in die Kobus Hattinghsaal sal plaasvind om 14:00 op Saterdag 20 Oktober. Hy sal ook die erediens in die kerk waarneem op Sondag 21 Oktober.

Ons wens Ds. Naudé en sy eggenoot 'n aangename en geseënde tyd by ons in die gemeente toe asook 'n veilige terugreis.

Ons bid verder, in nederige afhanklikheid van God ons Vader, dat Hy die gepaste leraar na ons gemeente sal stuur.

Vroeër die jaar het Diepkloof kleuterskool 'n kos-belofte projek geloods waardeur gemeentelede hulle maandeliks met 'n item (bv, bottel Oros, blikkie baked beans, pak suiker ens.) kon borg.
Hulle sê die stroompie het bietjie opgedroog en wil die gemeentelede net herinner dat hulle baie staatmaak op hierdie kos.

BADISA se koskaste is leeg en daar word dringend gevra vir donasies van voedsel, sodat hul aan gesinne kan gee wat dit dringend nodig het.
Ons gaan elke maand ander items aanvra en dit kan by die kantore van BADISA in Victoriastraat 60, George, afgegee word.
Kontak BADISA by 044 874 5013 of Mariet by 082 364 111.

Ds. Mauritz (MHO) Heyneman en sy eggenoot Sonja word gedurende die naweek van 13/14 Oktober verwelkom in ons gemeente. Die egpaar gaan tuis by Johann en Annette Richter.

Ds. Heyneman is tans voltydse leraar in die gemeente Heuwelkruin – Bloemfontein.

Ds. Heyneman is een van drie kortlys kandidate wat deur die Pre-Advies Komitee uitgenooi is vir 'n onderhoud wat in die Kobus Hattinghaal sal plaasvind om 14:00 op Saterdag 13 Oktober. Hy sal ook die erediens in die kerk waarneem op Sondag 14 Oktober.

Ons wens Ds. Heyneman en sy eggenoot 'n aangename en geseënde tyd by ons in die gemeente toe asook 'n veilige terugreis.

Ons bid verder, in nederige afhanklikheid van God ons Vader, dat Hy die gepaste leraar na ons gemeente sal stuur.

Ons as gemeente was so besig die afgelope tyd met reëlings aangaande ds. Japie se aftrede asook die keuringsproses van aansoekers wat om die vakante leraarspos aansoek gedoen het, dat ons dalk die fokus op ons dankbaarheidsoffer agterweë gelaat het.

Die dienswerkers het dalk alreeds kommunikasie in dié verband by gemeentelede afgelewer of hulle is nog in die proses om 'n besoek aan elke huisgesin wat lidmate is, te bring. Elke huisgesin kry 'n Dankbaarheidsoffer-koevert. Die bedrag wat begroot is bedrae R115 000 en aangesien hierdie bedrag 8% uitmaak van die gemeente se totale inkomstebegroting word dit belangrik genoeg geag om alle lede op 'n vroeë stadium te herinner aan hierdie spesiale insamelingsveldtog/poging.

Die kommunikasie wat by wonings van gemeentelede afgelewer is of nog sal word, verduidelik presies die rede vir hierdie spesiale dankbaarheidsmaand en die prosedures wat gevolg gaan word in verband met die insameling.

Baie dankie dat u verstaan waarom hierdie tydige kommunikasie as herinnering geskied en maak asseblief 'n aantekening van Sondag 28 Oktober 2018 wanneer hierdie insameling ook gepaard sal gaan met die gebruiklike nagmaal en nagmaalsete daarna in die Kobus Hattinghsaal.

Finansiële Kommissie