alarm don blow

ALARM DON BLOW

Eferi plan don scatter

Katakata jam yamayama

Moto dey boil like

Firewood soup

Moue people dey baff for sweat:

Alarm don blow

For Lagos go slow.
 

I-go-drive-mysef kiss

De yansh of Eko taxi

Grammar jus fly comot

From eferi corner:

“Gaddem! Nonsense!

I drive in London

Ten years no problem.”
 
Dem park for road

Dey block eferibodi:

My people, alarm don blow

For Lagos go slow.

Gofment oga wan go airport

Na so alarm come blow

Becos all road don close.

I sweat reach bucket for molue

Still oga nefer pass

But sha, after two hour

Siren come blow

And oga fain im way.

Alreadi, alarm don blow

For Lagos go slow.
 

Hit-and-run driver jam

Person for Eko bridge

Eferibodi dey hala

Some dey do kiss of life

Oders bicom emergency dokita:

Ojuelegba na casualty ward

Eko bridge don bicom moto park.

Alarm don blow

Inside Lagos go slow.

 
Morning go slow

For Carter bridge

Night go slow

For Mile two

Ikorodu road

Na all weather.

You comot from work:

Go slow

You dey go work:

Go slow

You dey fain job:

Go slow

You dey fain business:

Go slow.

Go slow, go slow

You don go nuclear

Your alarm wan

Blow my ear comot.

Go slow, go slow

Your wahala tire me.

 
 
 
 
Comments