مدرسة الوادي للغات

 

مدرسة الوادي للغات

Wadi Language School 

 

العنوان: نزلة البطران المجزر الألى مريوطيه بعد حفر الباطن علطول

التليفون: 3841792

المصاريف:

        كجي 2915 +150 شيتات وبوكليت،2250 برى 4

        الباص: 1100: 1600

        الزي: 300


أراء أولياء الأمور فى المدرسه :

  

Rodinaomar   05-2008

مدرسة كويسة مساحتها معقولة وأنشطتها كويسة مصاريفها فى حدود 3000 جنية من غير الباص

 

مريم552   2009

انا كنت في الوادي امبارح وسألت هناك وكمان صحاب الواحة هما صحاب الوادي ومصاريفها رخيصة الكجي 2900 والشيتات 150 والباص1200

بيمتحنو الاطفال المحولين

امتحانوها ساينس بس طبعا احنا فاهمناهم انها في علوي مكنتش بتاخد ساينس وبياخدو حاجات في كي جي قوية بس هما لما يلاقو الطفل كويس بيدولوا بوكليت يذاكره في الصيف علشان يبقي اخد المنهج بتاعهم اة المصاريف 2900 والبوكليت والشيتات ب150 يعني ب3050 والبرايمري 3250

 

بيستخدمو منهج way a head سألتهم انتو مش بتستخدمو ماكميلان لية قالو ان واي اهيد اقوي في الجرامر وهما عاملين شيتات بتعالج الموضوع دة وبعدين جينا للانترفيو بتاع الولاد البنت امتحنوها حوالي ساعة ونص وحاجات انا متوقعتش انهم يمتحنوها فيها ساينس وماث وعربي وكل حاجة دة امتحان كي جي 2 وبعدين لما خلصت ادوها بوكليت تذاكرة علشان متبقاش اقل من زمايلها في الكلاس السنة الي جاية

اولا هي كانت في علوي وهي مدرسة قوية جدا بس هي هتنقلها علشان الظروف المادية والمدرسة كبيره وحلوة والحمامات نظيفة والفصول كبيرة وحلوة واناشوفت الشيتات مصدقتش انا اطفال في كجي بياخدوا

الحاجات دي.

 

المنهج واي أهيد وبوكليت المدرسة حلو علي فكرة هو منهج حلو بس تركيزة علي الجرامر اكتر عكس ماكميلان تركيزة علي المحادثة اكتر الفصول نظيفة وحلوة  والحمامات نظيفة الملعب كبييييييييييييير والكجي لية ملعب جاردن يعني لوحدهم وفية كانتين اسعارة زي برة بالظبط وسألت اولياء الامور هناك كتير قال انها مدرسة شغالة كويس في التعليم

 

Muslium   2009

المدرسه كبيره

و و المصاريف: برايميرى 4 تقريبا 2500 و الباص للرمايه 1600

الكثافة: 18:20

سن القبول: 3.5

منهج اللغة: عرفت ان منهجهم واى هيد

و مبيفصلوش بين الأولاد و البنات لحد ثانوى

 

و الله انا اللى خلانى استبعدها ان منهجهم واى اهيد و كمان مفيش فصل بنات عن اولاد و انا بنتى كبيره و ديه نقطه تفرق معايا

 

الأميرة طماطم   2009

روحت اشوف مدرسة الوادى وهى قريبة من المصرية بس لقيت الامتحان خلص وكل الادارة الى فى المدرسة بيمشوا المهم لقيت وليه امر توسمت فيها الخير كانت جاية تاخد بنتها فى اولى اعدادى فسألتها شكرت فى المدرسة جدا وقالت ان بنتها فيها من 3 ابتدائى بس عربى مش لغات وقالت لى ان بنتها من الاوائل ودة بمجهود المدرسين فى المدرسة وانها مش بتديها دروس وبتساعدها قليل ولما سلألتها عن الفصل بين الاولاد والبنات قالت للاسف مافيش لان عدد الفصول قليل يعنى كل مرحلة فصل او اثنين لكن فى كنترول عالى من المدرسة على البنات والاولاد وان كمان عدد الفصول القليل ده بيخلى فى اهتمام وتركيز لكن لما العدد يكتر ممكن يكون فيه فصل

 

 رأى و لى أمر  4-2010

 انا مقدرش اعيب في حاجه من ناحيه الدراسه بالنسبه للوادي لأنها من الناحيه دي ممتازه في كل المواد و المدرسين بيبذلو مجهود لتوصيل المعلومه و بيجي ابنك فاهم الدرس و بتعملي معاه الهوم ورك وبس لكن هو كتير شويه و بالنسبه للمنهج بياخدو واي اهد وبياخدو شيتات لكل المواد اسبوعيه و شهريه بجانب البوكليت و كويز كل اسبوع و امتحان شهري منظمه و نظيفه و كثافه الفصل اقل من 30

لكن فيها عيوب بالنسبه لي عملالي مشكله لان بنتى عندها مشكله و هي انها حساسه جدددا و عندها تلعثم بيتـاثر بحالتها النفسيه ،و العيوب دي انها شديده علي الاطفال يعني لو محدش عمل الواجب او نسي كتاب بيتذنب طيب وهو ذنبه ايه طيب ما احنا اللي بنحضر الجدول و احنا اللي بنعمل معاهم الواجب روحت كتيييير وفهمتهم ظروف بنتى هما بيسمعوكي كويس و يقابلوكي كويس و يمتصوا غضبك لكن اللي في دماغهم بينفذوه ده غير تذمتهم في لون توك الشعر لازم تكون بيضاء و الشعر ملموم كحكه او ضفيره ولو لقوا غير كده بياخدو التوك و بنتك تيجي شعرها كمبوش و و دايما بينصروا المدرس علي ولي الامر حتي لو غلطان يعني في مدرسه عماله تنقل بنتى كل شويه من مكانها طبعا البنت منزعجه روحت اتكلمت كل مره يقولوا لي دي اسلوب المدرسه ان الطفل يتعود انه ممكن يتغير مكانه في اي وقت و اخراها امبارح بدلتها مع بنت تانيه علشان البنت دي بتتكلم كتير مع زميلتها قو لتلهم رجعوها علشان هي مضيقه و بتعيط قالولي لا احنا شايفين ان ده الاصلح قولتلهم طيب البنت التانيه هي اللي بترغي ذنب بنتي ايه انها ترجع ورا و تجيبوا اللي بترغي ادام انتو كده بتعقبو ا بنتي انها ملتزمه هي كطفله هتفهم كده فشوفو حد غيرها يبدل مع اللي بترغي قالوا لي احنا مش هنرجعها ماكانها لكن هنوضح لها الموقف طبعا نفسيه بنتي ساءت جدددا و مارحتش النهارده وهروح بكره بقي اتخانق مادام الذوق مانفعش ،فعلشان كده انا محتاجه مدرسه تكون تعليم كويس و معامله كويسه و تكون مرنه مع الاولاد انا عارفه ان في هيقول عليا مجنونه و ان مادام التعليم كويس استحمل لكن هيفيدني بأيه التعليم لو بنتي فضل معاها التأتأه بسبب المدرسه و بعدين احنا بنعمل ده كله ليه الا علشان نريحهم صح ولا لا

عايزه أضيف حاجه مهمه جدا و هى:

مديره مرحله بري مدام دعاء ما أقدرش اقول عليها ميس دي ملاك بتجمع ما بين الحزم و الحنيه و متعاونه جددددا و بتسمع و بتحل المشكله يا بأقناعك ان ان ده الصح يا بتوصل لحل للمشكله لو في حدود ادارتها لكن في حاجات بتبقي خارج عن إدارتها و بتكون تخص اداره المدرسه


 سهر   2010

 المدرسة كويسة أنا أولادى فيها بريمرى وان وبريمرى 2 المستوى التعليمى معقول وفى شغل كويس وفيه امتحانات وشيتات بتتوزع اسبوعيا فى الماث والانجلش والعربى وفى كمان بوكلت لكل مادة والادارة بتسمع وبتتجاوب مع اولياء الأمور والمشاكل اللى ساعات بتحصل. بس أكيد لازم تلاقى عيب ف كل مدرسة يعنى ساعات يصادف ان مدرس الماث مش أوى ومش بيشتغل كفاية يعنى انت وحظك وكفاءة المدرس اللى شغال مع الولاد ف الكلاس بس متهيألى الحكاية ده ممكن تلاقيها ف كل مدرسة. هيه كمان مدرسة واسعة ونظيفة كثافة الولاد تتراوح من 22-28 متزيدش عن كده اقدر اقيمها لك بأنها مدرسة معقولة جدا بالنسبة لكتير من المدارس جنبها.


 



إدخل تعليقك ورأيك فى المدرسه