مدرسة أمجاد لغات

 

مدرسة أمجاد لغات

 

العنوان: شارع النصر-اللاسلكي-بجوار بنزينة Caltex – المعادي

التليفون: 29820826 - 25165973

المصاريف:

        لسنة 2009: 9000 شاملة الكتب والرحلات والحفلات والكرسات والاقلام وكل ما يحتاجه الطالب ماعادا اليونيفورم

        الباص:

        الزي:

أراء أولياء الأمور فى المدرسه :

  

رأى و ليه امر اولادها فى المدرسه من سنين

الناس بتشكر جدااا فى مدرسة امجاد لسة واحدة قريبتنا قافلة معاية التليفون صحبتها بناتها هناك فى ثانوى وبتشكر فى علمهم وتربيتهم الدينية

 

أم فريده

الكلاس في 3 مدرسات مش اتنين زي باقي المدارس ودة انا تأكد منه بنفسي واحدة اساسية واتنين مساعدين والمساعدة دي مش ناني دي مدرسة بس اجدد من الاساسية وبعد سنة بتترقى وتبقى اساسية ودة غير ان في اتنين قاعدين على الباب بيدخلو وقت الاكل فقط مشرفات ياكلو الولاد دة غير الدادا بتاعت التويلت يعني دة مش موجود في معظم المدارس هما بيبقوا واحدة اساسية وواحدة مساعدة والمدرسة هي اللي بتاكل وتشرب بس اكيد ملهاش دعوة بالتويلت

احسبها على خير  مدرسة ممتازة مدرسين القران فيها من مشهير القراء فى المعادى كالشيخ أحمد رجب

انا بنوتي لسه حتدخل السنة دي بس انا اعرف ناس كتير اولادهم فيه  عنصر الامان الكجيز ليهم جاردن لوحدهم ارضها فووم ومظلله وكل الالعاب بلاستك وفي مدرسة واقفة جنب كل لعبة علشان مافيش اطفال تتشقى كمان في انضباط في المدرسة يعني مافيش هرجلة التعليم قوي اوائل الاي جي طلعين من هناك انا مقدمة ناشونال بس ممكن احول انترناشونال في نفس المدرسة في اى وقت انا مدرسة البنات كل اللي فيها ستات يعني مفيش ولا راجل ومدرسة الولاد كل اللي فيها رجال بس مافيش ولا ست كمان المصاريف شاملة كل حاجة من انشطة رحلات حفلات كتب حتى الاقلام والكرسات انتي مابتجبيش حاجة غير اليونيفورم والشنطة والحذاء طبعا وانا شوفت الحاجات اللي بيجيبوها للاطفال الاقلام والكرسات وكدة حاجات لو احنا نزلنا مع ولادنا يمكن نستخسر نجبهلهم يعني اللي بتدفعيه فعلا بتاخدي بيه

 

بالنسبة لمدرسة بنتي اللي هي انشاء الله امجاد الانترفيو طويييييييييل ساعة تقريبا انا مدخلتش معها هما مش بيدخلو اولياء الامور الا لو الطفل خايف او بيعيط وانا علشان فريدة رد حضانات (على وزن رد سجون) قعدت الساعة ومخفتش ولا عيطت بس بعد ماخرجت وقلولي نجحت قلتلهم عاوزة اشوف الامتحان وورهولي هو عبارة عن ماشاء الله ورق كده كتير مش عارفة قد ايه هي بتعدي على 3 مدرسين عربي وانجلش ومدرسة اختبار ذكاء العربي بتسالها عن الاشكال والالوان والحروف ده ايه وده ايه يعني الف ارنب د ديك كده والانجلش برضوا وبعدين اختبار الذكاء توصل بينالصور المتشابهة تمشي على خط معرج وخط مستقيم تطلع الفروق بين صورتين متشابهتين وتلون صورة كاملة وكمان بيلعبوها بلعب كدة مغنطيس تمشي بيه فتلزق في حاجة تمشي بين طرق كده وبيسالوها اخواتك اسمهم ايه بابا اسمه ايه وبيشتغل ايه بتروحي حضانة لو له اسمها ايه بس على فكرة امجاد دي اختبارها معقد حبتين يعني مش كل المدارس كدة

 

ماس 20001

أمجاد عبارة عن مدرستين

الأولى للبنات والبنين حتى الصف الثانى الأبتدائى ثن بينقلوا البنين الى مدرسة البنين فى الصف الثالث مدرسة البنات ممتازة ومستقرة وخالية من الرجال تماما والبنات بطبيعتهم ملتزمين أحيانا يوجد مدرسات ضعاف ولكنة الحال فى كل المدارس

أما عن مدرسة البنين فحدث ولاحرج المدرسين كلهم بيهرجوا مع الأولاد وبيعطوهم درجات أعلى بكثير من مستواهم ونحن فى البيت منخدعين وفاكرين الأولاد شاطريين بيطبطبوا على الولاد وبيحايلوهم لكى يبقوا فى المدرسة ولايحولوا منه معظم المدرسين ضعاف كل مؤهلهم اللحية التى يربونها حتى وقت الصلاه تلاقى واحد بيضحك والمدرس يديلوا على قفاة فالكل يشارك فى الضحك وهما بيصلوا لم يزرعوا فى الأولاد أى نازع دينى لدرجة أن ابنى لايصلى فى المنزل لأن القدوة الدينية عندة فى المدرسة مهزوزة ويكفى أن أقول لكم أن نتيجة الدين الأسلامى للصف الأول الأعدادى بنين لم تعلق

لأن النتيجة لم ينجح أحد ومحدش لاحظ

ليست المدارس هى التى تهدى الطفل لكن الله يهدى من يشأ



أم البنات   5 - 2010

بناتى دخلو المدرسة منذ 3 سنوات كانت ممتازة وخصوصا KG بس كل سنة تتغير للاسوء الزى مغالى فيه جدا

الملازم التى كانت تقدم ضمن المصاريف اصبحت رديئة فى المضمون و التغليف و مواعيد التسليم

أى نقاش مع الادارة العليا لا تصل بعده لاى نتيجة وعود بالليل فاذا طلع عليها النهار تسيح (مثل الوعد بعمل النادى الصيفى هذا العام مجانا مع توافر الباص مجانا ايضا نظرا لعدم قيام المدرسة باى انشطة فى التيرم الاول وبمجرد دفع القسط الثانى للمصاريف سحب العرض بحجة انه لا يستطيع الاطفال مواصلة العام وبعدها بعدة ايام تم ارسال مواعيد النادى الصيفى اللى مصاريفه 700 جنيه ده غيرحاجات تعد تافهه ولكن ممكن تفيد مثل الكانتين الذى يبيع الاشياء بضعف الثمن واحيانا اكثر ده الجزء السلبى

اما الايجابى فهو ان الاخلاق فى المدرسة جيدة جدا و النظام فى مدرسة البنات حازم

اتمنى ان اكون قد افدتكم وكل ما كتب هو راى شخصى ناتج عن احتكاكى بالمدرسة




ام فريدة   سبتمبر 2010

حبيت بس اقولكم انى اكتشفت محل في المعادى بيبيع يونيفورم المدرسة بنصف التمن القطعة ب 50 جنيه عليها اللوجو وتقريبا نفس الخامة بالظبط هو في شارع الجزائر امام توكيل بيجو اسمه خلود تكس



أم شوشو   أكتوبر 2010

كنت بدور على مدرسة إسلامية قالوا لي أمجاد ولكن للأسف من الواضح من تصرفات المدرسين مع أولادي إن شعارها الذقن وحصة القرآن بتاعت الصبح إزاي مطلوب من أبني يحافظ على الصلاة والشيخ يقوله (لو مصلتي هديك بالجزمة ) ولا الأولاد الأجانب في المدرسة بيتعملوا كأنهم عبيد بالظبط على قول ابني 

الأدهى من كدة لما اتكلم مع مدير المرحلة الابتدائية ( أ. محسن) فعلا نجم في التثبيت وأ.رامي على علم بكدة والأمرّ إن الحاجة كامليا عارفة دة كله وتيجي تكلمها تقول ( البويز لوحديهم بإدارتهم والجيرليز لوحديهم ، وأنا مليش كلام على البويز ) من الواضح إنها عايزة تعمل برستيج للمدير (ابنها رامي - شاب 31 سنة تقريبًا) 

الكارثة عن كدة الباص انا ساكنة في البحر الأعظم يعني تقريبا 5كم من المدرسة والمدرسة ببتعاملني في مصاريف الباص ذي بتوع المهندسين والدقي

وكله كوم والسمر سكول كوم تاني اللي بيتحط له برنامج رائع جدا يوهمك إن ابنك دة هيعيش أحلى صيف ( لكن من الواضح إنهم الفترة الجاية هيرشحوا نفسهم في الانتخابات لأنهم بيتصرفوا ذي بتوع مجلس الشعب ( نقول لحد ما نجمعهم وبعد كدة أصل مش عرف أية .... معلش علشان أية )

بصراحة أنا بحاول أدور للولد على مدرسة تانية وبشارك في المنتديات وعايزة حد يدلني على الخروج من الورطة دية



Om toti  يناير 2011

اية اخبار مدرسة امجاد القسم البريطانى ؟ هل هى ممتازة وما نقاط القوة والضعف فيها عشان عايزة بنتى الانترناشونال فيها جراد 3 ارجو ان يفيدنى احد

 

um toti  أبريل 2011

أنترناشيونال
I want to apply to Amgad British School. If you have idea about the school and its academic level that would help me make
decision please write to me

إدخل تعليقك ورأيك فى المدرسه